אידיש
1
זָאל זִיךְ אַייעֶר הַארְץ נִישְׁט מְצַעֶר זַיין; גְלוֹיבְּט אִין גָאט, אוּן גְלוֹיבְּט אוֹיךְ אִין מִיר.
2
אוּן מַיין פָאטֶערְס הוֹיז זֶענֶען פַארַאן אַ סַך וְואוֹינוּנְגֶען; אוֹיבּ סֶע וָואלְט אַזוֹי נִישְׁט גֶעוֶוען, וָואלְט אִיךְ עֶס אַייךְ גֶעוֶוען גֶעזָאגְט; וָוארִים אִיךְ גֵיי אָנְגְרֵייטְן פַאר אַייךְ אַן אָרְט.
3
אוּן בְּעֵת אִיךְ וֶועל גֵיין אוּן אָנְגְרֵייטְן אַן אָרְט פַאר אַייךְ, וֶועל אִיךְ וִוידֶער קוּמֶען, אוּן אַייךְ נֶעמֶען צוּ מִיר, כְּדֵי וואוּ אִיךְ בִּין, זָאלְט אִיר אוֹיךְ זַיין.
4
אוּן וואוּהִין אִיךְ גֵיי, וֵוייסְט אִיר, אוּן אִיר קֶענְט דֶעם וֶועג.
5
זָאגְט צוּ אִים תּוֹמָא: הַאר, מִיר וֵוייסְן נִישְׁט וואוּהִין דוּ גֵייסְט; וִוי אַזוֹי זָאלְן מִיר וִויסְן דֶעם וֶועג?
6
זָאגְט צוּ אִים יֵשׁוּעַ: אִיךְ בִּין דֶער וֶועג, אוּן דֶער אֶמֶת, אוּן דָאס לֶעבְּן; קֵיינֶער קוּמְט נִישְׁט צוּ דֶעם פָאטֶער, סַיידְן דוּרְךְ מִיר.
7
אוֹיבּ אִיר וָואלְט מִיךְ גֶעקֶענְט, וָואלְט אִיר אוֹיךְ גֶעקֶענְט מַיין פָאטֶער; פוּן אִיצְט אָן קֶענְט אִיר אִים, אוּן הָאט אִים גֶעזֶען.
8
זָאגְט צוּ אִים פִילִיפּוּס: הַאר, וַוייז אוּנְדְז דֶעם פָאטֶער, אוּן עֶס וֶועט זַיין פַאר אוּנְדְז גֶענוּג.
9
זָאגְט צוּ אִים יֵשׁוּעַ: אַזַא לַאנְגֶע צַייט בִּין אִיךְ גֶעוֶוען מִיט אַייךְ, אוּן דוּ, פִילִיפּוּס, קֶענְסְט מִיךְ נִישְׁט? דֶער, וָואס הָאט מִיךְ גֶעזֶען, הָאט גֶעזֶען דֶעם פָאטֶער; וִוי אַזוֹי קֶענְסְטוּ זָאגְן: וַוייז אוּנְדְז דֶעם פָאטֶער?
10
צִי גְלוֹיבְּסְטוּ נִישְׁט, אַז אִיךְ בִּין אִין דֶעם פָאטֶער, אוּן דֶער פָאטֶער אִיז אִין מִיר? דִי רֵייד, וָואס אִיךְ זָאג אַייךְ, רֶעד אִיךְ נִישְׁט פוּן מִיר אַלֵיין; נַייעֶרְט דֶער פָאטֶער, וָואס וואוֹינְט אִין מִיר, טוּט זַיינֶע מַעֲשִׂים.
11
גְלוֹיבְּט מִיר, אַז אִיךְ בִּין אִין דֶעם פָאטֶער, אוּן דֶער פָאטֶער אִיז אִין מִיר; אוֹיבּ נִישְׁט דֶען גְלוֹיבְּט מִיר צוּלִיבּ דִי מַעֲשִׂים אַלֵיין.
12
בֶּאֱמֶת, בֶּאֱמֶת, אִיךְ זָאג אַייךְ, דֶער, וָואס גְלוֹיבְּט אִין מִיר, וֶועט אוֹיךְ טָאן דִי מַעֲשִׂים, וָואס אִיךְ טוּ. אוּן גְרֶעסֶערֶע מַעֲשִׂים וִוי דִי דָאזִיקֶע וֶועט עֶר טָאן, מַחְמַת אִיךְ גֵיי צוּ דֶעם פָאטֶער.
13
אוּן וָואס אִיר וֶועט בֶּעטְן אִין מַיין נָאמֶען, דָאס וֶועל אִיךְ טָאן, כְּדֵי דֶער פָאטֶער זָאל פַארְעֶרְלִיכְט וֶוערְן אִין דֶעם זוּן.
14
אוֹיבּ אִיר וֶועט מִיךְ עֶפֶּעס בֶּעטְן אִין מַיין נָאמֶען, וֶועל אִיךְ עֶס טָאן.
15
אוֹיבּ אִיר הָאט מִיךְ לִיבּ וֶועט אִיר אָפְּהִיטְן מַיינֶע מִצְוֹות.
16
אוּן אִיךְ וֶועל בֶּעטְן דֶעם פָאטֶער, אוּן עֶר וֶועט אַייךְ גֶעבְּן אַן אַנְדֶערְן טְרֵייסְטֶער, כְּדֵי עֶר זָאל זַיין מִיט אַייךְ אוֹיף אֵייבִּיק,
17
טַאקֶע דֶעם גֵייסְט פוּן אֶמֶת, וֶועמֶען דִי וֶועלְט קֶען נִישְׁט מַשִׂיג זַיין, וָוארִים זִי זֶעט אִים נִישְׁט, אוּן קֶען אִים אוֹיךְ נִישְׁט. אִיר קֶענְט אִים; וָוארִים עֶר רוּט בַּיי אַייךְ, אוּן וֶועט זַיין אִין אַייךְ.
18
אִיךְ וֶועל אַייךְ נִישְׁט לָאזְן יְתוֹמִים; אִיךְ וֶועל קוּמֶען צוּ אַייךְ.
19
נָאךְ אַ קְלֵיינֶע וַויילֶע, אוּן דִי וֶועלְט וֶועט מִיךְ מֶער נִישְׁט זֶען, אִיר אָבֶּער וֶועט מִיךְ זֶען; מַחְמַת אִיךְ לֶעבּ, וֶועט אִיר אוֹיךְ לֶעבְּן.
20
אִין יֶענֶעם טָאג וֶועט אִיר וִויסְן, אַז אִיךְ בִּין אִין מַיין פָאטֶער, אוּן אִיר זֶענְט אִין מִיר, אוּן אִיךְ בִּין אִין אַייךְ.
21
דֶער, וָואס הָאט מַיינֶע גֶעבָּאטְן, אוּן הַאלְט זֵיי, דֶער אִיז עֶס, וָואס הָאט מִיךְ לִיבּ; אוּן דֶער, וָואס הָאט מִיךְ לִיבּ, וֶועט זַיין גֶעלִיבְּט פוּן מַיין פָאטֶער, אוּן אִיךְ וֶועל אִים לִיבּ הָאבְּן אוּן וֶועל מִיךְ צוּ אִים אַנְטְפְּלֶעקְן.
22
זָאגְט צוּ אִים יְהוּדָה (נִישְׁט אִישׁ־קְרִיוֹת): הַאר, וִוי קוּמְט עֶס, וָואס דוּ וֶועסְט דִיךְ אַנְטְפְּלֶעקְן צוּ אוּנְדְז, אוּן נִישְׁט צוּ דֶער וֶועלְט?
23
הָאט יֵשׁוּעַ גֶעעֶנְטְפֶערְט, אוּן צוּ אִים גֶעזָאגְט: אוֹיבּ עֶמִיצֶער הָאט מִיךְ לִיבּ, וֶועט עֶר הַאלְטְן מַיין וָוארְט, אוּן מַיין פָאטֶער וֶועט אִים לִיבּ הָאבְּן, אוּן מִיר וֶועלְן קוּמֶען צוּ אִים, אוּן מַאכְן בַּיי אִים אוּנְדְזֶער וְואוֹינוּנְג.
24
דֶער, וָואס הָאט מִיךְ נִישְׁט לִיבּ, הַאלְט נִישְׁט מַיינֶע וֶוערְטֶער; אוּן דָאס וָוארְט, וָואס אִיר הֶערְט, אִיז נִישְׁט מַיינְס, נַייעֶרְט דֶעם פָאטֶערְס, וָואס הָאט מִיךְ גֶעשִׁיקְט.
25
דָאס הָאבּ אִיךְ אַייךְ גֶעזָאגְט, כָּל־זְמַן אִיךְ בִּין נָאךְ מִיט אַייךְ.
26
אָבֶּער דֶער טְרֵייסְטֶער, דֶער רוּחַ־הַקוֹדֶשׁ, וֶועמֶען דֶער פָאטֶער וֶועט שִׁיקְן אִין מַיין נָאמֶען, עֶר וֶועט אַייךְ לֶערְנֶען אַלְצְדִינְג, אוּן אַייךְ דֶערְמָאנֶען אִין אַלְץ, וָואס אִיךְ הָאבּ אַייךְ גֶעזָאגְט.
27
שָׁלוֹם לָאז אִיךְ אִיבֶּער מִיט אַייךְ; מַיין שָׁלוֹם גִיבּ אִיךְ אַייךְ; נִישְׁט וִוי סֶע גִיט דִי וֶועלְט, גִיבּ אִיךְ אַייךְ. זָאל זִיךְ אַייעֶר הַארְץ נִישְׁט מְצַעֶר זַיין, אוּן זָאל עֶס אוֹיךְ נִישְׁט מוֹרֶא הָאבְּן
28
אִיר הָאט גֶעהֶערְט, וִוי אַזוֹי אִיךְ הָאבּ צוּ אַייךְ גֶעזָאגְט: אִיךְ גֵיי אַוֶועק, אוּן אִיךְ וֶועל קוּמֶען צוּ אַייךְ. אוֹיבּ אִיר וָואלְט מִיךְ לִיבּ גֶעהַאט, וָואלְט אִיר אַייךְ גֶעפְרֵייט, מַחְמַת אִיךְ גֵיי צוּ דֶעם פָאטֶער; וָוארִים דֶער פָאטֶער אִיז גְרֶעסֶער פוּן מִיר.
29
אוּן אִיצְט הָאבּ אִיךְ עֶס אַייךְ גֶעזָאגְט, אֵיידֶער סֶע גֶעשֶׁעט, כְּדֵי, וֶוען סֶע וֶועט גֶעשֶׁען, זָאלְט אִיר גְלוֹיבְּן.
30
אִיךְ וֶועל מֶער נִישְׁט רֶעדְן מִיט אַייךְ קֵיין סַך: וָוארִים דֶער שַׂר פוּן דֶער וֶועלְט קוּמְט אָן. אוּן עֶר הָאט גָארְנִישְׁט אִין מִיר;
31
נָאר כְּדֵי דִי וֶועלְט זָאל וִויסְן, אַז אִיךְ הָאבּ לִיבּ דֶעם פָאטֶער, אוּן וִוי דֶער פָאטֶער הָאט מִיר גֶעבָּאטְן, אַזוֹי טוּ אִיךְ. שְׁטֵייט אוֹיף, אוּן לָאמִיר גֵיין פוּנְדַאנֶען.