אידיש
1
אוּן פַאר דֶעם יוֹם־טוֹב פֵּסַח הָאט יֵשׁוּעַ גֶעוואוּסְט, אַז זַיין שָׂעָה אִיז גֶעקוּמֶען, אַז עֶר זָאל אַוֶועקְגֵיין פוּן דֶעם דָאזִיגְן וֶועלְט צוּם פָאטֶער; אוּן עֶר, וָואס הָאט לִיבּ גֶעהַאט זַיינֶע אֵייגֶענֶע אִין דֶער וֶועלְט, הָאט זֵיי לִיבּ גֶעהַאט בִּיז צוּם סוֹף.
2
אוּן בְּשַׁעַת דֶער סְעוּדָה, וֶוען דֶער שָׂטָן הָאט שׁוֹין אַרַיינְגֶעגֶעבְּן אִין הַארְצְן אַרַיין פוּן יְהוּדָה בֶּן־שִׁמְעוֹן אִישׁ־קְרִיוֹת, אִים אִיבֶּערְצוּעֶנְטְפֶערְן,
3
הַגַם יֵשׁוּעַ הָאט גֶעוואוּסְט, אַז דֶער פָאטֶער הָאט אִים אִיבֶּערְגֶעגֶעבְּן אַלְצְדִינְג אִין זַיינֶע הֶענְט אַרַיין, אוּן אַז עֶר אִיז גֶעקוּמֶען פוּן גָאט, אוּן גֵייט צוּ גָאט,
4
אִיז עֶר אוֹיפְגֶעשְׁטַאנֶען פוּן טִישׁ, אוּן הָאט אוֹיסְגֶעטָאן זַיינֶע מַלְבּוּשִׁים, אוּן הָאט גֶענוּמֶען אַ הַאנְטוּך אוּן הָאט זִיךְ אַרוּמְגֶעגַארְטְלְט.
5
דֶערְנָאךְ הָאט עֶר אַרַיינְגֶעגָאסְן וַואסֶער אִין דֶעם בֶּעקְן, אוּן הָאט אָנְגֶעהוֹיבְּן צוּ וַואשְׁן דִי פִיס פוּן דִי תַּלְמִידִים, אוּן זֵיי אָפְּצוּאוִוישְׁן מִיט דֶעם הַאנְטוּך, מִיט וֶועלכְן עֶר אִיז גֶעוֶוען אַרוּמְגֶעגַארְטְלְט.
6
אוּן עֶר אִיז גֶעקוּמֶען צוּ שִׁמְעוֹן פֶּעטְרוּס; זָאגְט עֶר צוּ אִים: הַאר, דוּ טוּסְט וַואשְׁן מַיינֶע פִיס?
7
אוּן יֵשׁוּעַ הָאט גֶעעֶנְטְפֶערְט: וָואס אִיךְ טוּ, פַארְשְׁטֵייסְטוּ נִישְׁט אַצִינְדֶערְט, אָבֶּער שְׁפֶּעטֶער וֶועסְטוּ פַארְשְׁטֵיין.
8
אוּן פֶּעטְרוֹס הָאט צוּ אִים גֶעזָאגְט: דוּ זָאלְסְט מִיר קֵיינְמָאל נִישְׁט וַואשְׁן מַיינֶע פִיס. הָאט יֵשׁוּעַ אִים גֶעעֶנְטְפֶערְט: אוֹיבּ אִיךְ וַואשׁ דִיךְ נִישְׁט, הָאסְטוּ נִישְׁט מִיט מִיר קֵיין חֵלֶק.
9
זָאגְט צוּ אִים שִׁמְעוֹן פֶּעטְרוֹס: הַאר, נִישְׁט נָאר מַיינֶע פִיס, נַייעֶרְט אוֹיךְ מַיינֶע הֶענְט אוּן מַיין קָאפּ!
10
אוּן יֵשׁוּעַ הָאט צוּ אִים גֶעזָאגְט: דֶער, וָואס הָאט זִיךְ גֶעבָּאדְן, נֵייטִיקְט זִיךְ נִישְׁט צוּ וַואשְׁן, אַחוּץ זַיינֶע פִיס, מַחְמַת עֶר אִיז אִינְגַאנְצְן רֵיין. אוּן אִיר זֶענְט רֵיין, אָבֶּער נִישְׁט אַלֶע.
11
וָוארִים עֶר הָאט גֶעוואוּסְט, וֶוער סֶע הָאט אִים גֶעזָאלְט אִיבֶּערְעֶנְטְפֶערְן; דֶערִיבֶּער הָאט עֶר גֶעזָאגְט: אִיר זֶענְט נִישְׁט אַלֶע רֵיין.
12
אוּן נָאכְדֶעם וִוי עֶר הָאט גֶעוַואשְׁן זֵייעֶרֶע פִיס, אוּן אָנְגֶעטָאן זַיינֶע מַלְבּוּשִׁים, הָאט עֶר זִיךְ וִוידֶער אַנִידֶערְגֶעזֶעצְט, אוּן צוּ זֵיי גֶעזָאגְט: פַארְשְׁטֵייט אִיר, וָואס אִיךְ הָאבּ צוּ אַייךְ גֶעטָאן?
13
אִיר רוּפְט מִיךְ רֶבְּי אוּן הַאר; אוּן זֶענְט גֶערֶעכְט, וָוארִים אִיךְ בִּין דָאס.
14
בְּכֵן, אוֹיבּ אִיךְ, אַייעֶר הַאר אוּן רֶבְּי, הָאבּ גֶעוַואשְׁן אַייעֶרֶע פִיס, זֶענְט אִיר אוֹיךְ מְחוּיָב צוּ וַואשְׁן אֵיינֶער דֶעם אַנְדֶערְנְס פִיס.
15
וָוארִים אִיךְ הָאבּ אַייךְ גֶעגֶעבְּן אַ בַּיישְׁפִּיל, כְּדֵי אִיר זָאלְט טָאן, וִוי אִיךְ הָאבּ צוּ אַייךְ גֶעטָאן.
16
בֶּאֱמֶת, בֶּאֱמֶת, אִיךְ זָאג אַייךְ, אַ קְנֶעכְט אִיז נִישְׁט גְרֶעסֶער פוּן זַיין הַאר; אוֹיךְ אִיז אַ שְׁלִיחַ נִישְׁט גְרֶעסֶער פוּן דֶעם, וָואס הָאט אִים גֶעשִׁיקְט.
17
אוֹיבּ אִיר וֵוייסְט דִי דָאזִיקֶע זַאכְן, אִיז וָואוֹיל אַייךְ, אוֹיבּ אִיר טוּט זֵיי.
18
אִיךְ רֶעד נִישְׁט פוּן אַייךְ אַלֶע; אִיךְ וֵוייס וֶועמֶען אִיךְ הָאבּ אוֹיסְדֶערְוֵויילְט; נָאר כְּדֵי דֶער פָּסוּק זָאל מְקוּיָם וֶוערְן: דֶער, וָואס עֶסְט מַיין בְּרוֹיט, הָאט אוֹיפְגֶעהוֹיבְּן קֶעגְן מִיר זַיין טְרִיט.
19
אִיךְ זָאג עֶס אַייךְ אִיצְט, אֵיידֶער סֶע גֶעשֶׁעט, כְּדֵי וֶוען סֶע וֶועט גֶעשֶׁען, זָאלְט אִיר גְלוֹיבְּן, אַז אִיךְ בִּין עֶס.
20
בֶּאֱמֶת, בֶּאֱמֶת, אִיךְ זָאג אַייךְ, דֶער, וָואס אִיז מְקַבְּל וֶועמֶען אִיךְ שִׁיק, אִיז מִיךְ מְקַבְּל: אוּן דֶער, וָואס אִיז מִיךְ מְקַבְּל, אִיז מְקַבְּל דֶעם, וָואס הָאט מִיךְ גֶעשִׁיקְט.
21
בְּעֵת יֵשׁוּעַ הָאט דָאס גֶעזָאגְט: הָאט עֶר זִיךְ מְצַעֶר גֶעוֶוען אִין דֶעם גֵייסְט, אוּן הָאט עֵדוּת גֶעזָאגְט: בֶּאֱמֶת, בֶּאֱמֶת, אִיךְ זָאג אַייךְ, אַז אֵיינֶער פוּן אַייךְ וֶועט מִיךְ פַארְרָאטְן.
22
דִי תַּלְמִידִים הָאבְּן גֶעקוּקְט אֵיינֶער אוֹיף דֶעם אַנְדֶערְן, אוּן זֶענֶען גֶעוֶוען נִישְׁט זִיכֶער פוּן וֶועמֶען עֶר הָאט גֶערֶעדְט.
23
אוּן בַּיים טִישׁ הָאט זִיךְ אֵיינֶער פוּן זַיינֶע תַּלְמִידִים, וֶועמֶען יֵשׁוּעַ הָאט לִיבּ גֶעהַאט, אָנְגֶעלֶענְט אוֹיף יֵשׁוּעַ׳ס בְּרוּסְט.
24
אוּן שִׁמְעוֹן פֶּעטְרוֹס הָאט צוּ אִים אַ וואוּנְק גֶעטָאן, אוּן גֶעזָאגְט: זָאג אוּנְדְז, וֶוער אִיז עֶס, פוּן וֶועמֶען עֶר רֶעדְט דָאס.
25
אוּן בְּעֵת עֶר אִיז אַזוֹי גֶעלִיגְן אָנְגֶעלֶענְט אוֹיף יֵשׁוּעַ׳ס בְּרוּסְט, הָאט עֶר צוּ אִים גֶעזָאגְט: הַאר, וֶוער אִיז עֶס?
26
הָאט יֵשׁוּעַ גֶעעֶנְטְפֶערְט: דָאס אִיז דֶער, פַאר וֶועמֶען אִיךְ וֶועל אַיינְטוּנְקֶען דֶעם בִּיסְן, אוּן דָאס אִים גֶעבְּן. אוּן אַז עֶר הָאט אַיינְגֶעטוּנְקֶען דֶעם בִּיסְן, הָאט עֶר אִים גֶענוּמֶען אוּן גֶעגֶעבְּן צוּ יְהוּדָה בֶּן־שִׁמְעוֹן אִישׁ־קְרִיוֹת.
27
אוּן נָאךְ דֶעם בִּיסְן, אִיז דֶער שָׂטָן אִין אִים אַרַיין, אוּן יֵשׁוּעַ הָאט צוּ אִים גֶעזָאגְט: וָואס דוּ טוּסְט, טוּ גֶעשְׁוִוינְד.
28
אוּן קֵיינֶער בַּיים טִישׁ הָאט נִישְׁט פַארְשְׁטַאנֶען, פַארְוָואס עֶר הָאט דָאס צוּ אִים גֶעזָאגְט.
29
וָוארִים עֶטְלֶעכֶע הָאבְּן גֶעמֵיינְט, אַז אַזוֹי וִוי יְהוּדָה הָאט גֶעהַאט דֶעם בַּייטְל, הָאט יֵשׁוּעַ צוּ אִים גֶעזָאגְט: קוֹיף אַיין וָואס מִיר הָאבְּן נֵייטִיק אוֹיף יוֹם־טוֹב; אָדֶער, אַז עֶר זָאל עֶפֶּעס גֶעבְּן דִי אָרֶעמֶעלַייט.
30
אוּן נָאכְדֶעם וִוי עֶר הָאט גֶענוּמֶען דֶעם בִּיסְן, אִיז עֶר תֵּיכֵּף אַרוֹיסְגֶעגַאנְגֶען; אוּן עֶס אִיז גֶעוֶוען נַאכְט.
31
אוּן בְּעֵת עֶר אִיז אַרוֹיסְגֶעגַאנְגֶען, הָאט יֵשׁוּעַ גֶעזָאגְט: אִיצְט אִיז דֶער בֶּן־אָדָם פַארְעֶרְלִיכְט, אוּן גָאט אִיז פַארְעֶרְלִיכְט אִין אִים.
32
אוּן אוֹיבּ גָאט אִיז פַארְעֶרְלֶעכְט אִין אִים, וֶועט אִים אוֹיךְ גָאט פַארְעֶרְלֶעכְן אִין זִיךְ, אוּן טַאקֶע תֵּיכֵּף וֶועט עֶר אִים פַארְעֶרְלֶעכְן.
33
קִינְדֶער מַיינֶע, נָאךְ אַבִּיסְל בִּין אִיךְ מִיט אַייךְ. אִיר וֶועט מִיךְ זוּכְן; אוּן וִוי אִיךְ הָאבּ גֶעזָאגְט צוּ דִי יִידְן, אַזוֹי זָאג אִיךְ אַייךְ אִיצְט: וואוּהִין אִיךְ גֵיי, קֶענְט אִיר נִישְׁט קוּמֶען.
34
אַ נַייעֶ גֶעבָּאט גִיבּ אִיךְ אַייךְ, אַז אִיר זָאלְט לִיבּ הָאבְּן אֵיינֶער דֶעם אַנְדֶערְן; אַזוֹי וִוי אִיךְ הָאבּ אַייךְ לִיבּ גֶעהַאט, אַזוֹי זָאלְט אִיר אוֹיךְ לִיבּ הָאבְּן אֵיינֶער דֶעם אַנְדֶערְן.
35
דוּרְךְ דֶעם וֶועלְן אַלֶע דֶערְקֶענֶען, אַז אִיר זֶענְט מַיינֶע תַּלְמִידִים, אוֹיבּ אִיר וֶועט הָאבְּן לִיבֶּע אֵיינֶער צוּ דֶעם אַנְדֶערְן.
36
זָאגְט צוּ אִים שִׁמְעוֹן פֶּעטְרוֹס: הַאר, וואוּהִין גֵייסְטוּ? אוּן יֵשׁוּעַ הָאט גֶעעֶנְטְפֶערְט: וואוּהִין אִיךְ גֵיי, קֶענְסְטוּ מִיר נִישְׁט נָאכְגֵיין אַצִינְד; אָבֶּער שְׁפֶּעטֶער־צוּ וֶועסְטוּ נָאכְגֵיין.
37
זָאגְט צוּ אִים פֶּעטְרוֹס: הַאר, פַארְוָואס קָאן אִיךְ דִיר אִיצְט נִישְׁט נָאכְגֵיין? אִיךְ וֶועל מַיין לֶעבְּן פַאר דִיר אַוֶועקְלֵייגְן.
38
הָאט יֵשׁוּעַ גֶעעֶנְטְפֶערְט: דַיין לֶעבְּן וִוילְסְטוּ פַאר מִיר אַוֶועקְלֵייגְן? בֶּאֱמֶת, בֶּאֱמֶת, אִיךְ זָאג דִיר: נָאךְ אֵיידֶער דֶער הָאן וֶועט קְרֵייעֶן, וֶועסְטוּ מִיךְ דְרַיי מָאל פַארְלֵייקֶענֶען.