אידיש
1
אוּן זֶעקְס טֶעג פַאר פֵּסַח אִיז יֵשׁוּעַ גֶעקוּמֶען קֵיין בֵּית־הִינִי, וואוּ אֶלְעָזָר אִיז גֶעוֶוען, וֶועמֶען יֵשׁוּעַ הָאט מְחַיֶה־מֵתִים גֶעוֶוען.
2
אוּן זֵיי הָאבְּן פַאר אִים דָארְטְן גֶעמַאכְט אַ סְעוּדָה; אוּן מַרְתָּא הָאט בַּאדִינְט, אוּן אֶלְעָזָר אִיז גֶעוֶוען אֵיינֶער פוּן דִי, וָואס זֶענֶען גֶעזֶעסְן מִיט אִים בַּיים טִישׁ.
3
אוּן מִרְיָם הָאט גֶענוּמֶען אַ פוּנְט זֵייעֶר טַייעֶרְן זַאלְבְּאֵייל פוּן לוֹיטֶערְן נַארְד, אוּן הָאט גֶעזַאלְבְּט דִי פִיס פוּן יֵשׁוּעַ, אוּן אָפְּגֶעוִוישְׁט זַיינֶע פִיס מִיט אִירֶע הָאר; אוּן דָאס הוֹיז אִיז גֶעוָוארְן פוּל מִיט דֶעם רֵיחַ פוּן דֶעם זַאלְבְּאֵייל.
4
אָבֶּער יְהוּדָה אִישׁ־קְרִיוֹת, אֵיינֶער פוּן זַיינֶע תַּלְמִידִים, וָואס הָאט אִים גֶעזָאלְט אִיבֶּערְעֶנְטְפֶערְן, הָאט גֶעזָאגְט:
5
פַארְוָואס הָאט מֶען דֶעם דָאזִיקְן זַאלְבְּאֵייל נִישְׁט פַארְקוֹיפְט פַאר דְרַיי הוּנְדֶערְט דִינָרִים, אוּן דָאס גֶעגֶעבְּן צוּ דִי אָרִימֶעלַייט?
6
אוּן דָאס הָאט עֶר גֶעזָאגְט, נִישְׁט מַחְמַת עֶר הָאט גֶעדַאגֶה׳ט פַאר דִי אָרֶעמֶעלַייט, נַייעֶרְט וַוייל עֶר אִיז גֶעוֶוען אַ גַנָב, אוּן אַזוֹי וִוי עֶר הָאט גֶעהַאט דֶעם בַּייטְל, פְלֶעגְט עֶר אַרוֹיסְנֶעמֶען וָואס מֶען הָאט דְרִינֶען אַרַיינְגֶעלֵייגְט.
7
יֵשׁוּעַ הָאט דֶערִיבֶּער גֶעזָאגְט: לָאזְט זִי גֶעמַאך, זָאל זִי עֶס הַאלְטְן פַאר דֶעם טָאג פוּן מַיין קְבוּרָה.
8
וָוארִים דִי אָרֶעמֶעלַייט הָאט אִיר תָּמִיד מִיט זִיךְ, אָבֶּער מִיךְ הָאט אִיר נִישְׁט תָּמִיד.
9
אוּן אַ גְרוֹיסֶער עוֹלָם יִידְן הָאבְּן זִיךְ דֶערְוואוּסְט, אַז עֶר אִיז דָארְטְן; אוּן זֵיי זֶענֶען גֶעקוּמֶען, נִישְׁט נָאר פוּן יֵשׁוּעַ וֶועגְן, נַייעֶרְט אוֹיךְ כְּדֵי צוּ זֶען אֶלְעָזָר, וֶועמֶען עֶר הָאט מְחַיֶה־מֵתִים גֶעוֶוען.
10
אוּן דִי רָאשֵׁי־כֹּהַנִים הָאבְּן זִיךְ מְיַעֵץ גֶעוֶוען, אֲפִילוּ אֶלְעָזָר אוֹיךְ צוּ טֵייטְן,
11
מַחְמַת אַ סַך יִידְן זֶענֶען פוּן זַיינֶעטְוֶועגְן אַוֶועקְגֶעגַאנְגֶען, אוּן הָאבְּן גֶעגְלוֹיבְּט אִין יֵשׁוּעַ.
12
אוֹיף מָארְגְן, בְּעֵת אַ סַך פָאלְק, וָואס אִיז גֶעקוּמֶען אוֹיף יוֹם־טוֹב, הָאט גֶעהֶערְט, אַז יֵשׁוּעַ קוּמְט אָן קֵיין יְרוּשָׁלַיִם,
13
הָאבְּן זֵיי גֶענוּמֶען צְוַוייגְן פוּן פַּאלְמֶענְבֵּיימֶער, אוּן זֶענֶען אַרוֹיסְגֶעגַאנְגֶען אִים מְקַבְּל־פָּנִים זַיין, אוּן הָאבְּן אוֹיסְגֶעשְׁרִיגְן: הוֹשַׁע־נָא! בָּרוּךְ הַבָּא אִין דֶעם נָאמֶען פוּן גָאט, מֶלֶךְ יִשְׂרָאֵל!
14
אוּן יֵשׁוּעַ הָאט גֶעפוּנֶען אַ יוּנְג אֵייזְל, אוּן הָאט זִיךְ אוֹיף אִים אַרוֹיפְגֶעזֶעצְט, וִוי סֶע שְׁטֵייט גֶעשְׁרִיבְּן:
15
הָאבּ נִישְׁט קֵיין מוֹרֶא, טָאכְטֶער פוּן צִיוֹן! זֶע, דַיין מֶלֶךְ קוּמְט, רַייטְנְדִיק אוֹיף אַ יוּנְגְן אֵייזְל.
16
זַיינֶע תַּלְמִידִים הָאבְּן דָאס לְכַּתְּחִילָה נִישְׁט פַארְשְׁטַאנֶען; אָבֶּער נָאכְדֶעם וִוי יֵשׁוּעַ אִיז פַארְהֶערְלְעכְט גֶעוָוארְן, הָאבְּן זֵיי זִיךְ דֶערְמַאנְט, אַז אַזוֹי אִיז וֶועגְן אִים גֶעשְׁרִיבְּן גֶעוָוארְן, אוּן אַזוֹי הָאבְּן זֵיי אוֹיךְ צוּ אִים גֶעטָאן.
17
אוּן דָאס פָאלְק, וָואס אִיז גֶעוֶוען מִיט אִים, בְּעֵת עֶר הָאט אֶלְעָזָר אַרוֹיסְגֶערוּפְן פוּן דֶעם קֵבֶר, אוּן אִים מְחַיֶה־מֵתִים גֶעוֶוען, הָאט דֶערוֹיף עֵדוּת גֶעזָאגְט.
18
אוּן דֶערִיבֶּער אִיז אִים אוֹיךְ דָאס פָאלְק אַנְטְקֶעגְנְגֶעגַאנְגֶען, וַוייל זֵיי הָאבְּן גֶעהֶערְט, אַז עֶר הָאט גֶעטָאן דָאס דָאזִיקֶע צֵייכְן.
19
דִי פְּרוּשִׁים הָאבְּן דֶערִיבֶּער גֶעזָאגְט אֵיינֶער צוּם אַנְדֶערְן: אִיר זֶעט, אַז אִיר קָאנְט גָארְנִישְׁט דֶערְגְרֵייכְן, וָוארִים אָט גֵייט אִים דִי גַאנְצֶע וֶועלְט נָאךְ.
20
אוּן צְוִוישְׁן יֶענֶע, וָואס הָאבְּן עוֹלֵה־רֶגֶל גֶעוֶוען אוֹיף יוֹם־טוֹב תְּפִילָה צוּ טָאן, זֶענֶען אוֹיךְ גֶעוֶוען עֶטְלֶעכֶע גְרִיכְן.
21
אוּן דִי דָאזִיקֶע זֶענֶען דֶערִיבֶּער גֶעקוּמֶען צוּ פִילִיפּוּס, וָואס אִיז גֶעוֶוען פוּן בֵּית־צַידָה אִין גָלִיל, אוּן הָאבְּן אִים גֶעבֶּעטְן, אַזוֹי צוּ זָאגְן: הַאר, מִיר וָואלְטְן גֶעוָואלְט זֶען יֵשׁוּעַ.
22
אוּן פִילִיפּוּס אִיז גֶעגַאנְגֶען אוּן הָאט עֶס דֶערְצֵיילְט אַנְדְרֵי, אוּן אַנְדְרֵי אוּן פִילִיפּוּס זֶענֶען גֶעגַאנְגֶען, אוּן הָאבְּן עֶס דֶערְצֵיילְט יֵשׁוּעַ.
23
אוּן יֵשׁוּעַ הָאט זֵיי גֶעעֶנְטְפֶערְט: דִי שָׂעָה הָאט גֶענֶעעֶנְט, אַז דֶער בֶּן־אָדָם זָאל פַארְהֶערְלְעכְט וֶוערְן.
24
בֶּאֱמֶת, בֶּאֱמֶת, אִיךְ זָאג אַייךְ, סַיידְן דֶער קֶערְן וֵוייץ פַאלְט אִין דֶער עֶרְד אַרַיין אוּן שְׁטַארְבְּט, פַארְבְּלַייבְּט עֶר פַאר זִיךְ אַלֵיין: נָאר אוֹיבּ עֶר שְׁטַארְבְּט, טְרָאגְט עֶר אַ סַך פֵּירוֹת.
25
דֶער, וָואס הָאט לִיבּ זַיין לֶעבְּן, פַארְלִירְט עֶס; אוּן דֶער, וָואס הָאט פַיינְט זַיין לֶעבְּן אִין דֶער דָאזִיקֶער וֶועלְט, וֶועט עֶס בַּאוָוארֶענֶען צוּם אֵייבִּיקְן לֶעבְּן.
26
אוֹיבּ עֶמִיצֶער דִינְט מִיר, לָאז עֶר מִיר נָאכְגֵיין; אוּן וואוּ אִיךְ בִּין, דָארְט וֶועט אוֹיךְ זַיין מַיין בַּאדִינֶער. אוֹיבּ עֶמִיצֶער דִינְט מִיר, וֶועט אִים דֶער פָאטֶער אָנְטָאן כָּבוֹד.
27
אִיצְט אִיז מַיין זֶעלֶע זִיךְ מְצַעֶר; אוּן וָואס זָאל אִיךְ זָאגְן? פָאטֶער, זַיי מִיךְ מַצִיל פוּן דֶער דָאזִיקֶער שָׂעָה? נֵיין, צוּלִיבּ דֶער דָאזִיקֶער סִיבָּה בִּין אִיךְ גֶעקוּמֶען צוּ אָט־דֶער שָׂעָה.
28
פָאטֶער, פַארְעֶרְלֶעךְ דַיין נָאמֶען. אוּן עֶס אִיז גֶעקוּמֶען אַ קוֹל פוּן הִימְל אַרוֹיס: אִיךְ הָאבּ אִים פַארְעֶרְלֶעכְט אוּן וֶועל אִים וִוידֶער אַמָאל פַארְעֶרְלֶעכְן.
29
אוּן דָאס פָאלְק, וָואס אִיז דֶערְבַּיי גֶעשְׁטַאנֶען אוּן הָאט עֶס גֶעהֶערְט, הָאט גֶעזָאגְט, אַז עֶס הָאט גֶעדוּנֶערְט; אַנְדֶערֶע הָאבְּן גֶעזָאגְט: אַ מַלְאַךְ הָאט גֶערֶעדְט צוּ אִים.
30
אוּן יֵשׁוּעַ הָאט גֶעעֶנְטְפֶערְט, אוּן גֶעזָאגְט: דָאס דָאזִיקֶע קוֹל אִיז נִישְׁט גֶעקוּמֶען פוּן מַיינֶעטְוֶועגְן, נַייעֶרְט פוּן אַייעֶרְטְוֶועגְן.
31
אִיצְט אִיז דֶער מִשְׁפָּט אִיבֶּער דֶער דָאזִיקֶער וֶועלְט; אִיצְט וֶועט דֶער שַׂר פוּן דֶער דָאזִיקֶער וֶועלְט אַרוֹיסְגֶעוָוארְפְן וֶוערְן.
32
אוּן אִיךְ, בְּעֵת אִיךְ וֶועל אוֹיפְגֶעהוֹיבְּן וֶוערְן פוּן דֶער עֶרְד, וֶועל אִיךְ צוּצִיעֶן צוּ מִיר אַלֶע מֶענְטְשְׁן.
33
דָאס הָאט עֶר גֶעזָאגְט, כְּדֵי מְרַמֵז צוּ זַיין, מִיט וָואסֶער מִין טוֹיט עֶר וֶועט שְׁטַארְבְּן.
34
דָאס פָאלְק הָאט אִים דֶערִיבֶּער גֶעעֶנְטְפֶערְט: מִיר הָאבְּן גֶעהֶערְט פוּן דֶער תּוֹרָה, אַז דֶער מָשִׁיחַ בַּאשְׁטֵייט אוֹיף אֵייבִּיק; אוּן וִוי אַזוֹי זָאגְסְטוּ: דֶער בֶּן־אָדָם מוּז אוֹיפְגֶעהוֹיבְּן וֶוערְן? וֶוער אִיז דָאס דֶער דָאזִיקֶער בֶּן־אָדָם?
35
הָאט יֵשׁוּעַ צוּ זֵיי גֶעזָאגְט: נָאךְ אַ קְלֵיינֶע וַויילֶע אִיז דָאס לִיכְט צְוִוישְׁן אַייךְ. גֵייט, כָּל־זְמַן אִיר הָאט דָאס לִיכְט, כְּדֵי דִי פִינְצְטֶערְנִישׁ זָאל אַייךְ נִישְׁט בַּאפַאלְן; אוּן דֶער, וָואס גֵייט אִין דֶער פִינְצְטֶערְנִישׁ, וֵוייסְט נִישְׁט וואוּהִין עֶר גֵייט.
36
כָּל־זְמַן אִיר הָאט דָאס לִיכְט, גְלוֹיבְּט אִין דֶעם לִיכְט, כְּדֵי אִיר זָאלְט וֶוערְן קִינְדֶער פוּן לִיכְט. בְּעֵת יֵשׁוּעַ הָאט דָאס גֶעזָאגְט, אִיז עֶר אַוֶועקְגֶעגַאנְגֶען, אוּן הָאט זִיךְ פַארְבָּארְגְן פוּן זֵיי.
37
אָבֶּער כָאטְשׁ עֶר הָאט גֶעטָאן אַזוֹיפִיל צֵייכְנְס פַאר זֵייעֶרֶע אוֹיגְן, הָאבְּן זֵיי דָאךְ נִישְׁט גֶעגְלוֹיבְּט אִין אִים,
38
כְּדֵי דָאס וָוארְט פוּן יְשַׁעְיָהוּ הַנָבִיא זָאל מְקוּיָם וֶוערְן, וָואס עֶר הָאט גֶעזָאגְט: הַאר, וֶוער הָאט גֶעגְלוֹיבְּט אוּנְדְזֶער הֶערוּנְג? אוּן פַאר וֶועמֶען אִיז דֶער אָרֶעם פוּן גָאט אַנְטְפְּלֶעקְט גֶעוָוארְן?
39
צוּלִיבּ דֶעם הָאבְּן זֵיי נִישְׁט גֶעקָאנְט גְלוֹיבְּן, וָוארִים יְשַׁעְיָהוּ הָאט וִוידֶער גֶעזָאגְט:
40
עֶר הָאט גֶעמַאכְט בְּלִינְד זֵייעֶרֶע אוֹיגְן, אוּן פַארְהַארְטֶעוֶועט זֵייעֶר הַארְץ, טָאמֶער וֶועלְן זֵיי זֶען מִיט זֵייעֶרֶע אוֹיגְן, אוּן בַּאנֶעמֶען מִיט זֵייעֶר הַארְץ, אוּן תְּשׁוּבָה טָאן, אוּן אִיךְ זָאל זֵיי הֵיילְן.
41
אָט־דָאס הָאט יְשַׁעְיָהוּ גֶעזָאגְט, מַחְמַת עֶר הָאט גֶעזֶען זַיין כָּבוֹד, אוּן עֶר הָאט גֶערֶעדְט וֶועגְן אִים.
42
פוּנְדֶעסְטְוֶועגְן הָאבְּן אַ סַך פוּן דִי שָׂרִים גֶעגְלוֹיבְּט אִין אִים, אָבֶּער צוּלִיבּ דִי פְּרוּשִׁים הָאבְּן זֵיי דָאס נִישְׁט מוֹדֶה גֶעוֶוען, כְּדֵי זֵיי זָאלְן נִישְׁט אַרַיינְגֶעלֵייגְט וֶוערְן אִין חֵרֶם;
43
וָוארִים זֵיי הָאבְּן לִיבּ גֶעהַאט דֶעם כָּבוֹד פוּן מֶענְטְשְׁן מֶערֶער, וִוי דֶעם כָּבוֹד פוּן גָאט.
44
אוּן יֵשׁוּעַ הָאט אוֹיסְגֶערוּפְן, אוּן גֶעזָאגְט: דֶער, וָואס גְלוֹיבְּט אִין מִיר, גְלוֹיבְּט נִישְׁט אִין מִיר, נַייעֶרְט אִין דֶעם, וָואס הָאט מִיךְ גֶעשִׁיקְט.
45
אוּן דֶער, וָואס זֶעט מִיךְ, זֶעט דֶעם, וָואס הָאט מִיךְ גֶעשִׁיקְט.
46
אִיךְ בִּין גֶעקוּמֶען פַאר אַ לִיכְט אִין דֶער וֶועלְט אַרַיין, כְּדֵי דֶער, וָואס גְלוֹיבְּט אִין מִיר, זָאל נִישְׁט בְּלַייבְּן אִין דֶער פִינְצְטֶערְנִישׁ.
47
אוּן אוֹיבּ עֶמִיצֶער הֶערְט מַיינֶע רֵייד, אוּן הִיט זֵיי נִישְׁט, מִשְׁפָּט אִיךְ אִים נִישְׁט; וָוארִים אִיךְ בִּין גֶעקוּמֶען נִישְׁט צוּ מִשְׁפָּטְן דִי וֶועלְט, נַייעֶרְט מַצִיל צוּ זַיין דִי וֶועלְט.
48
דֶער, וָואס פַארְוַוארְפְט מִיךְ אוּן אִיז נִישְׁט מְקַבְּל מַיינֶע רֵייד, הָאט אֵיינֶעם, וָואס טוּט אִים מִשְׁפָּטְן; דָאס וָוארְט, וָואס אִיךְ הָאבּ גֶערֶעדְט, דָאס דָאזִיקֶע וֶועט אִים מִשְׁפָּטְן אִין דֶעם לֶעצְטְן טָאג.
49
וָוארִים אִיךְ הָאבּ גֶערֶעדְט נִישְׁט פוּן מִיר אַלֵיין, נַייעֶרְט דֶער פָאטֶער, וָואס הָאט מִיךְ גֶעשִׁיקְט, הָאט מִיר גֶעגֶעבְּן אַ גֶעבָּאט, וָואס אִיךְ זָאל זָאגְן, אוּן וָואס אִיךְ זָאל רֶעדְן.
50
אוּן אִיךְ וֵוייס, אַז זַיין גֶעבָּאט אִיז אֵייבִּיק לֶעבְּן. דֶערִיבֶּער, דִי רֵייד, וָואס אִיךְ רֶעד, רֶעד אִיךְ אַזוֹי וִוי דֶער פָאטֶער הָאט מִיר גֶעבָּאטְן.