אידיש
1
אוּן עֶר הָאט צוּזַאמֶענְגֶערוּפְן דִי צְוֶועלְף, אוּן הָאט זֵיי גֶעגֶעבְּן מַאכְט אוּן שְׁלִיטָה אִיבֶּער אַלֶע בֵּייזֶע גֵייסְטֶער, אוּן צוּ הֵיילְן קְרַאנְקְהַייטְן.
2
אוּן עֶר הָאט זֵיי אַרוֹיסְגֶעשִׁיקְט אָנְצוּזָאגְן דָאס מַלְכוּת פוּן גָאט, אוּן צוּ הֵיילְן.
3
אוּן עֶר הָאט צוּ זֵיי גֶעזָאגְט: נֶעמְט גָארְנִישְׁט מִיט אוֹיפְן וֶועג, נִישְׁט קֵיין שְׁטֶעקְן, נִישְׁט קֵיין רַייזֶעטַאשׁ, נִישְׁט קֵיין בְּרוֹיט, נִישְׁט קֵיין גֶעלְט; אוּן הָאט אוֹיךְ נִישְׁט קֵיין צְוֵויי רֶעק.
4
אוּן אִין וָואסֶער הוֹיז אִיר וֶועט אַרַיינְקוּמֶען, דָארְטְן פַארְבְּלַייבְּט, אוּן פוּן דָארְטְן גֵייט וַוייטֶער.
5
אוּן וואוּ מֶען וֶועט אַייךְ נִישְׁט אוֹיפְנֶעמֶען, זָאלְט אִיר פַארְלָאזְן יֶענֶע שְׁטָאט, אוּן אָפְּטְרֶעסְלֶען דֶעם שְׁטוֹיבּ פוּן אַייעֶרֶע פִיס פַאר אַן עֵדוּת קֶעגְן זֵיי.
6
אוּן זֵיי הָאבְּן אָפְּגֶעקֶערְט, אוּן זֶענֶען גֶעגַאנְגֶען אִיבֶּער דִי דֶערְפֶער, אוּן הָאבְּן מְבַשֵׂר גֶעוֶוען דִי בְּשׂוּרָה אוּן אוּמֶעטוּם גֶעהֵיילְט.
58
הָאט יֵשׁוּעַ צוּ אִים גֶעזָאגְט: דִי פוּקְסְן הָאבְּן הֵיילְן, אוּן דִי פֵייגְל פוּן הִימְל הָאבְּן נֶעסְטְן, אָבֶּער דֶער בֶּן־אָדָם הָאט נִישְׁט וואוּ זַיין קָאפּ אַנִידֶערְצוּלֵייגְן;
7
אוּן הוֹרְדוֹס, דֶער טֶעטְרַארְךְ, הָאט גֶעהֶערְט פוּן אַלְץ, וָואס עֶס אִיז גֶעטָאן גֶעוָוארְן, אוּן עֶר אִיז שְׁטַארְק בַּאזָארְגְט גֶעוֶוען, וָוארִים טֵייל הָאבְּן גֶעזָאגְט, אַז יוֹחָנָן אִיז אוֹיפְגֶעשְׁטַאנֶען תְּחִיַת־הַמֵתִים,
8
אוּן אַנְדֶערֶע, אַז אֵלִיָהוּ הָאט זִיךְ בַּאוִויזְן; אוּן וִוידֶער אַנְדֶערֶע, אַז אֵיינֶער פוּן דִי אַלְטֶע נְבִיאִים אִיז אוֹיפְגֶעשְׁטַאנֶען.
9
אוּן הוֹרְדוֹס הָאט גֶעזָאגְט: יוֹחָנָן הָאבּ אִיךְ גֶעלָאזְט אָפְּהַאקְן דֶעם קָאפּ; אָבֶּער וֶוער אִיז דֶער דָאזִיקֶער, פוּן וֶועמֶען אִיךְ הֶער אַזוֹינֶע זַאכְן? אוּן עֶר הָאט אִים בַּאגֶערְט צוּ זֶען.
10
אוּן דִי שְׁלִיחִים הָאבְּן זִיךְ אוּמְגֶעקֶערְט, אוּן הָאבְּן אִים דֶערְצֵיילְט, וָואס זֵיי הָאבְּן גֶעטָאן. אוּן עֶר הָאט זֵיי גֶענוּמֶען מִיט זִיךְ אוּן הָאט אַלֵיין אָפְּגֶעקֶערְט צוּ אַ שְׁטָאט, וָואס הָאט גֶעהֵייסְן בֵּית־צַידָה.
11
אוּן אַז דָאס פָאלְק הָאט דָאס בַּאמֶערְקְט, זֶענֶען זֵיי אִים נָאכְגֶעגַאנְגֶען; אוּן עֶר הָאט זֵיי אוֹיפְגֶענוּמֶען, אוּן הָאט צוּ זֵיי גֶערֶעדְט פוּן דֶעם מַלְכוּת פוּן גָאט, אוּן דִי, וָואס הָאבְּן זִיךְ גֶענֵייטִיקְט אִין אַ רְפוּאָה, הָאט עֶר גֶעהֵיילְט.
12
אוּן דֶער טָאג הָאט זִיךְ אָנְגֶעהוֹיבְּן צוּ נֵייגְן; אוּן דִי צְוֶועלְף הָאבְּן גֶענֶעעֶנְט, אוּן צוּ אִים גֶעזָאגְט: לָאז אָפּ דָאס פָאלְק, כְּדֵי זֵיי זָאלְן קֶענֶען גֵיין אִין דִי אַרוּמִיקֶע דֶערְפֶער אוּן פֶעלְדֶער אִיבֶּערְצוּנֶעכְטִיקְן אוּן צוּ קְרִיגְן שְׁפַּייז; וָוארִים מִיר זֶענֶען דָא אִין אַ וִויסְטְן אָרְט.
13
אָבֶּער עֶר הָאט צוּ זֵיי גֶעזָאגְט: גִיט אִיר זֵיי צוּ עֶסְן. הָאבְּן זֵיי גֶעזָאגְט: מִיר הָאבְּן נִישְׁט מֶער וִוי פִינְף לַאבְּנְס אוּן צְוֵויי פִישׁ - סַיידְן מִיר זָאלְן גֵיין אוּן קוֹיפְן שְׁפַּייז פַאר דֶעם דָאזִיקְן גַאנְצְן פָאלְק.
14
(וָוארִים זֵיי זֶענֶען גֶעוֶוען אַרוּם פִינְף טוֹיזְנְט מַאן). אוּן עֶר הָאט גֶעזָאגְט צוּ זַיינֶע תַּלְמִידִים: זֶעצְט זֵיי אוֹיס אִין גְרוּפֶּעס, אַרוּם פוּפְצִיק אִין יֶעדֶער.
15
אוּן זֵיי הָאבְּן אַזוֹי גֶעטָאן, אוּן הָאבְּן אַלֶעמֶען אוֹיסְגֶעזֶעצְט.
16
אוּן עֶר הָאט גֶענוּמֶען דִי פִינְף לַאבְּנְס אוּן דִי צְוֵויי פִישׁ, אוּן הָאט אוֹיפְגֶעהוֹיבְּן זַיינֶע אוֹיגְן צוּם הִימְל, אוּן הָאט אַ בְּרָכָה גֶעמַאכְט אוּן פוּן זֵיי אָפְּגֶעבְּרָאכְן, אוּן זֵיי גֶעגֶעבְּן דִי תַּלְמִידִים, צוּ גְרֵייטְן פַאר דֶעם פָאלְק.
17
אוּן זֵיי הָאבְּן אַלֶע גֶעגֶעסְן צוּ דֶער זַאט; אוּן זֵיי הָאבְּן צוּנוֹיפְגֶענוּמֶען פוּן דִי אִיבֶּערְגֶעבְּלִיבֶּענֶע בְּרֶעקְלֶעךְ, צְוֶועלְף קֶערְבּ.
18
אוּן עֶס אִיז גֶעוֶוען, בְּעֵת עֶר הָאט אַלֵיין מִתְפַּלֵל גֶעוֶוען, זֶענֶען דִי תַּלְמִידִים גֶעוֶוען מִיט אִים; אוּן עֶר הָאט זֵיי גֶעפְרֶעגְט: וֶוער, זָאגְט דָאס פָאלְק, בִּין אִיךְ?
19
אוּן זֵיי הָאבְּן גֶעעֶנְטְפֶערְט, אוּן גֶעזָאגְט: יוֹחָנָן הַמַטְבִּיל. אָבֶּער אַנְדֶערֶע זָאגְן: אֵלִיָהוּ; אוּן אַנְדֶערֶע, אַז אֵיינֶער פוּן דִי אַלְטֶע נְבִיאִים אִיז אוֹיפְגֶעשְׁטַאנֶען.
20
הָאט עֶר צוּ זֵיי גֶעזָאגְט: אִיר אָבֶּער, וֶוער זָאגְט אִיר, בִּין אִיךְ? אוּן פֶּעטְרוֹס הָאט גֶעעֶנְטְפֶערְט: דֶער מָשִׁיחַ פוּן גָאט.
21
אוּן עֶר הָאט זֵיי בַּאפוֹילְן אוּן גֶעבָּאטְן, אַז זֵיי זָאלְן עֶס קֵיינֶעם נִישְׁט דֶערְצֵיילְן,
22
אוּן גֶעזָאגְט: דֶער בֶּן־אָדָם מוּז לַיידְן אַ סַך, אוּן פַארְוָוארְפְן וֶוערְן פוּן דִי זְקֵנִים אוּן רָאשֵׁי־כֹּהַנִים אוּן סוֹפְרִים, אוּן גֶעטֵייט וֶוערְן, אוּן אוֹיף דֶעם דְרִיטְן טָאג וִוידֶער אוֹיפְשְׁטֵיין.
23
אוּן עֶר הָאט גֶעזָאגְט צוּ אַלֶעמֶען: וִויל מִיר וֶוער נָאכְגֵיין, זָאל עֶר זִיךְ אַלֵיין פַארְלֵייקֶענֶען, אוּן נֶעמֶען אוֹיף זִיךְ פוּן טָאג צוּ טָאג זַיין קְרַייץ, אוּן מִיר נָאכְגֵיין.
24
וָוארִים וֶוער סֶע וִויל מַצִיל זַיין זַיין לֶעבְּן, וֶועט עֶס פַארְלִירְן; אוּן וֶוער סֶע וֶועט פַארְלִירְן זַיין לֶעבְּן פוּן מַיינֶעטְוֶועגְן, וֶועט עֶס מַצִיל זַיין.
25
וָוארִים וָואס נוּצְט עֶס דֶעם מֶענְטְשְׁן, וֶוען עֶר זָאל גֶעוִוינֶען דִי גַאנְצֶע וֶועלְט, אוּן פַארְלִירְן אָדֶער פַארְדַארְבְּן זִיךְ אַלֵיין?
26
וָוארִים וֶוער סֶע וֶועט זִיךְ שֶׁעמֶען מִיט מִיר אוּן מִיט מַיינֶע רֵייד, וֶועט דֶער בֶּן־אָדָם זִיךְ שֶׁעמֶען מִיט אִים, בְּעֵת עֶר וֶועט קוּמֶען אִין זַיין כָּבוֹד, אוּן אִין דֶעם כָּבוֹד פוּן זַיין פָאטֶער אוּן דִי הֵיילִיקֶע מַלְאָכִים.
27
בֶּאֱמֶת, אִיךְ זָאג אַייךְ, פַארַאן עֶטְלֶעכֶע פוּן דִי, וָואס שְׁטֵייעֶן דָא, וָואס וֶועלְן נִישְׁט פַארְזוּכְן דֶעם טַעם פוּן טוֹיט, בִּיז זֵיי וֶועלְן זֶען דָאס מַלְכוּת פוּן גָאט.
28
אוּן עֶס אִיז גֶעוֶוען אַרוּם אַכְט טֶעג נָאךְ דִי דָאזִיקֶע רֵייד, אַז עֶר הָאט גֶענוּמֶען מִיט זִיךְ פֶּעטְרוּס, אוּן יוֹחָנָן, אוּן יַעֲקֹב, אוּן אִיז אַרוֹיפְגֶעגַאנְגֶען אוֹיף דֶעם בַּארְג מִתְפַּלֵל צוּ זַיין.
29
אוּן בְּעֵת עֶר הָאט מִתְפַּלֵל גֶעוֶוען, הָאט זִיךְ דָאס אוֹיסְזֶען פוּן זַיין פָּנִים פַארְעֶנְדֶערְט, אוּן זַיינֶע מַלְבּוּשִׁים זֶענֶען גֶעוָוארְן שְׁטַראלְנְדִיק וַוייס.
30
אוּן אָט הָאבְּן צְוֵויי מֶענְטְשְׁן גֶערֶעדְט מִיט אִים, מֹשֶׁה אוּן אֵלִיָהוּ,
31
וָואס הָאבְּן זִיךְ אַנְטְפְּלֶעקְט אִין הֶערְלְעכְקַייט, אוּן הָאבְּן גֶערֶעדְט פוּן זַיין פְּטִירָה, וָואס עֶר הָאט גֶעדַארְפְט מְמַלֵא זַיין אִין יְרוּשָׁלַיִם.
32
אוּן פֶּעטְרוֹס אוּן דִי, וָואס זֶענֶען גֶעוֶוען מִיט אִים, זֶענֶען בַּאפַאלְן גֶעוָוארְן פוּן אַ שְׁוֶוערְן שְׁלָאף; אוּן בְּעֵת זֵיי הָאבְּן זִיךְ אוֹיפְגֶעכַאפְּט, הָאבְּן זֵיי גֶעזֶען זַיין הֶערְלְעכְקַייט אוּן דִי צְוֵויי מֶענְטְשְׁן, וָואס זֶענֶען גֶעשְׁטַאנֶען לֶעבְּן אִים.
33
אוּן עֶס אִיז גֶעוֶוען, בְּעֵת זֵיי הָאבְּן זִיךְ גֶענוּמֶען פוּן אִים שֵׁיידְן, הָאט פֶּעטְרוֹס גֶעזָאגְט צוּ יֵשׁוּעַ: הַאר, עֶס אִיז גוּט פַאר אוּנְדְז דָא צוּ זַיין; לָאמִיר מַאכְן דְרַיי בֵּיידְלֶעךְ, אֵיינְס פַאר דִיר, אֵיינְס פַאר מֹשֶׁה, אוּן אֵיינְס פַאר אֵלִיָהוּ; אָבֶּער עֶר הָאט נִישְׁט גֶעוואוּסְט, וָואס עֶר רֶעדְט.
34
אוּן בְּשַׁעַת עֶר הָאט דָאס גֶעזָאגְט, אִיז גֶעקוּמֶען אַ וָואלְקְן אוּן הָאט זֵיי פַארְשָׁאטְנְט; אוּן זֵיי הָאבְּן זִיךְ גֶעפָארְכְטְן, בְּעֵת זֵיי זֶענֶען אַרַיינְגֶעקוּמֶען אִין דֶעם וָואלְקְן.
35
אוּן אַ קוֹל אִיז אַרוֹיס פוּן דֶעם וָואלְקְן, אַזוֹי צוּ זָאגְן: דָאס אִיז מַיין זוּן, מַיין אוֹיסְדֶערְוֵויילְטֶער, אִים זָאלְט אִיר הֶערְן.
36
אוּן בְּעֵת דָאס קוֹל הָאט זִיךְ גֶעהֶערְט, הָאט זִיךְ יֵשׁוּעַ גֶעפוּנֶען אַלֵיין. אוּן זֵיי הָאבְּן גֶעשְׁוִויגְן, אוּן הָאבְּן קֵיינֶעם נִישְׁט אִין יֶענֶע טֶעג דֶערְצֵיילְט דָאס, וָואס זֵיי הָאבְּן גֶעזֶען.
37
אוּן עֶס אִיז גֶעוֶוען אוֹיפְן אַנְדֶערְן טָאג, בְּעֵת זֵיי הָאבְּן אַרָאפְּגֶענִידֶערְט פוּן דֶעם בַּארְג, הָאט אִים בַּאגֶעגְנְט אַ גְרוֹיסֶער עוֹלָם.
38
אוּן אָט הָאט אֵיינֶער פוּן פָאלְק גֶעשְׁרִיגְן, אוּן גֶעזָאגְט: רֶבִּי, אִיךְ בֶּעט דִיךְ אַ קוּק צוּ טָאן אוֹיף מַיין זוּן, וָוארִים עֶר אִיז מַיין אֵיינְצִיק קִינְד;
39
אוּן זֶע, אַ רוּחַ כַאפְּט אִים אָן, אוּן עֶר שְׁרַייט פְּלוּצִים אוֹיס; אוּן עֶר רַייסְט אִים, בִּיז עֶר שׁוֹימְט, אוּן עֶר וַוייכְט פוּן אִים שְׁוֶוער, אוּן טוּט אִים שְׁטַארְק צֶעשְׁלָאגְן.
40
אוּן אִיךְ הָאבּ גֶעבֶּעטְן דַיינֶע תַּלְמִידִים, אַז זֵיי זָאלְן אִים אַרוֹיסְטְרַייבְּן, אוּן זֵיי הָאבְּן נִישְׁט גֶעקֶענְט;
41
אוּן יֵשׁוּעַ הָאט גֶעעֶנְטְפֶערְט, אוּן גֶעזָאגְט: אָ, אוּמְגְלוֹיבִּיקֶער אוּן פַארְקְרוּמְטֶער דוֹר, וִוי לַאנְג נָאךְ זָאל אִיךְ זַיין מִיט אַייךְ, אוּן אַייךְ פַארְטְרָאגְן? בְּרֶענְג אַהֶער דַיין זוּן.
42
אוּן וִוי נָאר עֶר הָאט גֶעטָאן גֶענֶעעֶנֶען, הָאט אִים דֶער בֵּייזֶער גֵייסְט אַנִידֶערְגֶעוָוארְפְן, אוּן אִים מוֹרֶאדִיק גֶערִיסְן. אָבֶּער יֵשׁוּעַ הָאט אָנְגֶעשְׁרִיגְן אוֹיף דֶעם אוּמְרֵיינֶעם גֵייסְט, אוּן גֶעהֵיילְט דָאס יִינְגְל, אוּן אִים צוּרִיקְגֶעגֶעבְּן זַיין פָאטֶער.
43
אוּן זֵיי זֶענֶען אַלֶע נִשְׁתּוֹמְם גֶעוָוארְן פוּן דֶער גְרוֹיסְקַייט פוּן גָאט. אוּן בְּשַׁעַת אַלֶע הָאבְּן זִיךְ גֶעוְואוּנְדֶערט אוֹיף אַלְץ, וָואס עֶר הָאט גֶעטָאן, הָאט עֶר גֶעזָאגְט צוּ זַיינֶע תַּלְמִידִים:
44
טוּט דִי דָאזִיקֶע רֵייד אַרַיין אִין אַייעֶרֶע אוֹיעֶרן: וָוארִים דֶער בֶּן־אָדָם וֶועט אִיבֶּערְגֶעעֶנְטְפֶערְט וֶוערְן אִין דִי הֶענְט פוּן מֶענְטְשְׁן.
45
אָבֶּער זֵיי הָאבְּן נִישְׁט פַארְשְׁטַאנֶען דָאס דָאזִיקֶע וָוארְט, אוּן עֶס אִיז גֶעוֶוען פַארְהוֹילְן פוּן זֵיי, כְּדֵי זֵיי זָאלְן עֶס נִישְׁט בַּאנֶעמֶען; אוּן זֵיי הָאבְּן מוֹרֶא גֶעהַאט אִים צוּ פְרֶעגְן וֶועגְן דֶעם דָאזִיקְן וָוארְט.
46
אוּן עֶס אִיז אוֹיפְגֶעגַאנְגֶען אַ מַחְשָׁבָה צְוִוישְׁן זֵיי, וֶוער פוּן זֵיי עֶס אִיז דֶער גְרֶעסְטֶער.
47
אוּן בְּעֵת יֵשׁוּעַ הָאט דֶערְקֶענְט דִי מַחְשָׁבָה פוּן זֵייעֶר הַארְץ, הָאט עֶר גֶענוּמֶען אַ קִינְד, אוּן עֶס אַוֶועקְגֶעשְׁטֶעלְט לֶעבְּן זִיךְ,
48
אוּן הָאט צוּ זֵיי גֶעזָאגְט: וֶוער סֶע וֶועט אוֹיפְנֶעמֶען דָאס דָאזִיקֶע קִינְד אִין מַיין נָאמֶען, נֶעמְט מִיךְ אוֹיף; אוּן וֶוער סֶע וֶועט מִיךְ אוֹיפְנֶעמֶען, נֶעמְט אוֹיף דֶעם, וָואס הָאט מִיךְ גֶעשִׁיקְט; וָוארִים דֶער, וָואס אִיז דֶער קְלֶענְסְטֶער צְוִוישְׁן אַייךְ אַלֶע, דֶער דָאזִיקֶער אִיז גְרוֹיס.
49
אוּן יוֹחָנָן הָאט גֶעעֶנְטְפֶערְט: הַאר, מִיר הָאבְּן גֶעזֶען אֵיינֶעם אַרוֹיס־טְרַייבְּן שֵׁדִים אִין דַיין נָאמֶען, אוּן מִיר הָאבְּן אִים פַארְוֶוערְט, מַחְמַת עֶר גֵייט אוּנְדְז נִישְׁט נָאךְ.
50
אָבֶּער יֵשׁוּעַ הָאט צוּ אִים גֶעזָאגְט: פַארְוֶוערְט אִים נִישְׁט; וָוארִים דֶער, וָואס אִיז נִישְׁט קֶעגְן אַייךְ, אִיז פַאר אַייךְ.
51
אוּן עֶס אִיז גֶעוֶוען, בְּעֵת דִי טֶעג הָאבְּן זִיךְ שׁוֹין דֶערְנֶענְטֶערְט, אַז עֶר זָאל אַרוֹיפְגֶענוּמֶען וֶוערְן, הָאט עֶר אַנְטְשְׁלָאסְן גֶעוֶוענְדְט זַיין פָּנִים צוּ גֵיין קֵיין יְרוּשָׁלַיִם,
52
אוּן עֶר הָאט גֶעשִׁיקְט שְׁלִיחִים פָארוֹיס פַאר אִים, וָואס זֶענֶען גֶעגַאנְגֶען אוּן זֶענֶען אַרַיינְגֶעקוּמֶען אִין אַ דָארְף פוּן דִי שׁוֹמְרוֹנִים, כְּדֵי פַאר אִים אָנְצוּגְרֵייטְן.
53
אוּן זֵיי הָאבְּן אִים נִישְׁט אוֹיפְגֶענוּמֶען, מַחְמַת זַיין פָּנִים אִיז גֶעוֶוען גֶעוֶוענְדְט צוּ גֵיין קֵיין יְרוּשָׁלַיִם.
54
אוּן בְּעֵת זַיינֶע תַּלְמִידִים יַעֲקֹב אוּן יוֹחָנָן הָאבְּן דָאס גֶעזֶען, הָאבְּן זֵיי גֶעזָאגְט: הַאר, וִוילְסְטוּ, מִיר זָאלְן בַּאפֶעלְן אַ פַייעֶר זָאל אַרָאפְּנִידֶערְן פוּן הִימְל, אוּן זֵיי פַארְצֶערְן?
55
אָבֶּער עֶר הָאט זִיךְ אוֹיסְגֶעדְרֵייט, אוּן הָאט זֵיי פִירְגֶעהַאלְטְן.
56
אוּן זֵיי זֶענֶען גֶעגַאנְגֶען אִין אַן אַנְדֶער דָארְף אַרַיין.
57
אוּן בְּעֵת זֵיי זֶענֶען גֶעגַאנְגֶען אוֹיפְן וֶועג, הָאט אֵיינֶער צוּ אִים גֶעזָאגְט: אִיךְ וִויל דִיר נָאכְגֵיין וואוּהִין נָאר דוּ וֶועסְט גֵיין.
59
אוּן צוּ אַן אַנְדֶערְן הָאט עֶר גֶעזָאגְט: גֵיי מִיר נָאךְ. אָבֶּער יֶענֶער הָאט גֶעזָאגְט: הַאר, דֶערְלוֹיבּ מִיר קוֹדֶם צוּ גֵיין אוּן מְקַבְר זַיין מַיין פָאטֶער.
60
אָבֶּער עֶר הָאט צוּ אִים גֶעזָאגְט: לָאז דִי מֵתִים מְקַבְר זַיין זֵייעֶרֶע אֵייגֶענֶע מֵתִים; אוּן דוּ גֵיי אוּן זָאג אוּמֶעטוּם אָן דָאס מַלְכוּת פוּן גָאט.
61
אוּן אַן אַנְדֶערֶער הָאט גֶעזָאגְט: אִיךְ וֶועל דִיר נָאכְגֵיין, הַאר; נָאר דֶערְלוֹיבּ מִיר קוֹדֶם זִיךְ צוּ גֶעזֶעגֶענֶען מִיט מַיינֶע בְּנֵי־בַּיִת.
62
אָבֶּער יֵשׁוּעַ הָאט צוּ אִים גֶעזָאגְט: דֶער, וָואס לֵייגְט צוּ אַ הַאנְט צוּם אַקֶער, אוּן קוּקְט אוֹיף צוּרִיק, טוֹיג נִישְׁט פַאר דֶעם מַלְכוּת פוּן גָאט.