אידיש
1
נָאכְדֶעם וִוי עֶר הָאט גֶעעֶנְדִיקְט אַלֶע זַיינֶע רֵייד אִין דִי אוֹיעֶרְן פוּן דֶעם פָאלְק, אִיז עֶר אַרַיינְגֶעגַאנְגֶען קֵיין כְּפַר־נַחוּם.
2
אוּן אֵיינֶער אַ הוֹיפְּטְמַאן הָאט גֶעהַאט אַ קְנֶעכְט, וָואס אִיז אִים גֶעוֶוען טַייעֶר, אוּן וָואס אִיז גֶעוֶוען קְרַאנְק אוּן הָאט גֶעהַאלְטְן בַּיים שְׁטַארְבְּן.
3
אוּן אַז עֶר הָאט גֶעהֶערְט וֶועגְן יֵשׁוּעַ, הָאט עֶר צוּ אִים גֶעשִׁיקְט זְקֵנִים פוּן דִי יִידְן, אוּן הָאט אִים גֶעבֶּעטְן, אַז עֶר זָאל קוּמֶען אוּן הֵיילְן זַיין קְנֶעכְט.
4
אוּן אַז זֵיי זֶענֶען גֶעקוּמֶען צוּ יֵשׁוּעַ, הָאבְּן זֵיי אִים זֵייעֶר גֶעבֶּעטְן, אוּן גֶעזָאגְט: עֶר אִיז וֶוערְד, אַז דוּ זָאלְסְט דָאס טָאן פַאר אִים.
5
וָוארִים עֶר הָאט לִיבּ אוּנְדְזֶער פָאלְק, אוּן הָאט אֲפִילוּ אַלֵיין אוּנְדְז אוֹיפְגֶעבּוֹיט אוּנְדְזֶער שׁוּל.
6
אוּן יֵשׁוּעַ אִיז מִיט זֵיי גֶעגַאנְגֶען. אוּן בְּעֵת עֶר אִיז גֶעוֶוען שׁוֹין נִישְׁט וַוייט פוּן דֶעם הוֹיז, הָאט דֶער הוֹיפְּטְמַאן גֶעשִׁיקְט צוּ אִים פְרַיינְט, אִים אַזוֹי צוּ זָאגְן: הַאר, זֵיי דִיךְ נִישְׁט מַטְרִיחַ; וָוארִים אִיךְ בִּין נִישְׁט וֶוערְט, אַז דוּ זָאלְסְט קוּמֶען אוּנְטֶער מַיין דַאךְ.
7
דֶערִיבֶּער הָאבּ אִיךְ מִיךְ אַלֵיין אוֹיךְ נִישְׁט גֶעהַאלְטְן פַאר רָאוּי צוּ דִיר צוּ קוּמֶען. נַייעֶרְט זָאג נָאר דָאס וָוארְט, אוּן מַיין קְנֶעכְט וֶועט גֶעהֵיילְט וֶוערְן.
8
וָוארִים אוֹיךְ אִיךְ בִּין אַ מֶענְטְשׁ, גֶעשְׁטֶעלְט אוּנְטֶער בַּאפֶעל־מַאכְט, אוּן הָאבּ אוּנְטֶער מִיר חַיִל; אוּן אִיךְ זָאג צוּ דֶעם: גֵיי! אוּן עֶר גֵייט, אוּן צוּ אַן אַנְדֶערְן: קוּם! אוּן עֶר קוּמְט. אוּן צוּ מַיין קְנֶעכְט: טוּ דָאס! אוּן עֶר טוּט עֶס.
9
אוּן אַז יֵשׁוּעַ הָאט דָאס גֶעהֶערְט, הָאט עֶר זִיךְ גֶעוְואוּנְדֶערט אִיבֶּער אִים, אוּן הָאט זִיךְ אוֹיסְגֶעדְרֵייט אוּן גֶעזָאגְט צוּם פָאלְק, וָואס אִיז אִים נָאכְגֶעגַאנְגֶען: אִיךְ זָאג אַייךְ, אֲפִילוּ אִין יִשְׂרָאֵל הָאבּ אִיךְ נִישְׁט גֶעפוּנֶען אַזַא אֶמוּנָה.
10
אוּן וֶוען דִי שְׁלוּחִים הָאבְּן זִיךְ אוּמְגֶעקֶערְט אַהֵיים, הָאבְּן זֵיי גֶעפוּנֶען דֶעם קְנֶעכְט גֶעזוּנְט.
11
אוּן עֶס אִיז גֶעוֶוען גְלַייךְ נָאכְדֶעם, אַז עֶר אִיז גֶעגַאנְגֶען אִין אַ שְׁטָאט אַרַיין מִיטְן נָאמֶען נָעִין, אוּן זַיינֶע תַּלְמִידִים זֶענֶען גֶעגַאנְגֶען מִיט אִים, אוּן אַ סַך פָאלְק.
12
אוּן וִוי עֶר הָאט זִיךְ דֶערְנֶענְטֶערְט צוּם טוֹיעֶר פוּן דֶער שְׁטָאט, עֶרְשְׁט מֶען הָאט אַרוֹיסְגֶעטְרָאגְן אַ טוֹיטְן, אַ בֶּן־יָחִיד בַּיי זַיין מוּטֶער, אוּן זִי אִיז גֶעוֶוען אַן אַלְמָנָה; אוּן אַ סַך מֶענְטְשְׁן פוּן דֶער שְׁטָאט זֶענֶען גֶעוֶוען מִיט אִיר.
13
אוּן אַז דֶער הַאר הָאט זִי גֶעזֶען, הָאט עֶר אוֹיף אִיר רַחֲמָנוּת גֶעהַאט, אוּן צוּ אִיר גֶעזָאגְט: וֵויין נִישְׁט.
14
אוּן עֶר אִיז צוּגֶעגַאנְגֶען אוּן הָאט אָנְגֶערִירְט דִי מִיטָה; אוּן דִי טְרֶעגֶערְס זֶענֶען גֶעבְּלִיבְּן שְׁטֵיין. אוּן עֶר הָאט גֶעזָאגְט: יוּנְגֶערְמַאן, אִיךְ זָאג דִיר, שְׁטֵיי אוֹיף.
15
אוּן דֶער טוֹיטֶער הָאט זִיךְ אוֹיפְגֶעזֶעצְט, אוּן הָאט אָנְגֶעהוֹיבְּן צוּ רֶעדְן. אוּן עֶר הָאט אִים גֶעגֶעבְּן צוּ זַיין מוּטֶער.
16
אוּן אַ פַּחַד הָאט זֵיי אַלֶע אָנְגֶענוּמֶען; אוּן זֵיי הָאבְּן גֶעלוֹיבְּט גָאט, אוּן גֶעזָאגְט: אַ גְרוֹיסֶער נָבִיא אִיז אוֹיפְגֶעשְׁטַאנֶען צְוִוישְׁן אוּנְדְז! אוּן, גָאט הָאט גֶעדֶענְקְט אָן זַיין פָאלְק!
17
אוּן דִי דָאזִיקֶע יְדִיעָה וֶועגְן אִים אִיז אַרוֹיסְגֶעגַאנְגֶען אִין גַאנְץ יְהוּדָה, אוּן אִין דֶער גַאנְצֶער גֶעגְנְט.
18
אוּן דִי תַּלְמִידִים הָאבְּן דֶערְצֵיילְט יוֹחָנָן פוּן דִי דָאזִיקֶע אַלֶע זַאכְן.
19
אוּן יוֹחָנָן הָאט גֶערוּפְן צוּ זִיךְ צְוֵויי פוּן זַיינֶע תַּלְמִידִים, אוּן הָאט זֵיי גֶעשִׁיקְט צוּ דֶעם הַאר, אַזוֹי צוּ זָאגְן: בִּיסְטוּ דֶער, וָואס דַארְף קוּמֶען, אָדֶער זָאלְן מִיר וַוארְטְן אוֹיף אַן אַנְדֶערְן?
20
אוּן אַז דִי מֶענְטְשְׁן זֶענֶען גֶעקוּמֶען צוּ אִים, הָאבְּן זֵיי גֶעזָאגְט: יוֹחָנָן הַמַטְבִּיל הָאט אוּנְדְז גֶעשִׁיקְט צוּ דִיר, אַזוֹי צוּ זָאגְן: בִּיסְטוּ דֶער, וָואס דַארְף קוּמֶען, אָדֶער זָאלְן מִיר וַוארְטְן אוֹיף אַן אַנְדֶערְן?
21
אִין יֶענֶער שָׂעָה הָאט עֶר גֶעהֵיילְט אַ סַך פוּן חוֹלַאתְן אוּן פוּן פְּלָאגְן אוּן פוּן בֵּייזֶע גֵייסְטֶער, אוּן אַ סַך, וָואס זֶענֶען גֶעוֶוען בְּלִינְד, הָאט עֶר גֶעשָׁאנְקֶען דִי רְאִיָה.
22
אוּן עֶר הָאט זֵיי גֶעעֶנְטְפֶערְט: גֵייט אוּן דֶערְצֵיילְט יוֹחָנָן, וָואס אִיר הָאט גֶעזֶען אוּן גֶעהֶערְט: דִי בְּלִינְדֶע קְרִיגְן זֵייעֶר רְאִיָה, דִי לָאמֶע גֵייעֶן, דִי מְצוֹרָעִים וֶוערְן גֶערֵיינִיקְט, דִי טוֹיבֶּע הֶערְן, דִי טוֹיטֶע שְׁטֵייעֶן אוֹיף, אוּן פַאר דִי אָרֶעמֶע וֶוערְט גֶעדַרְשְׁנְט דִי בְּשׂוּרָה־טוֹבָה.
23
אוּן וָואוֹיל אִיז דֶעם, וָואס וֶועט זִיךְ נִישְׁט שְׁטְרוֹיכְלֶען אִין מִיר.
24
אוּן אַז דִי שְׁלִיחִים פוּן יוֹחָנָן זֶענֶען אַוֶועקְגֶעגַאנְגֶען, הָאט עֶר אָנְגֶעהוֹיבְּן צוּ רֶעדְן צוּם פָאלְק וֶועגְן יוֹחָנָן: וָואס זֶענְט אִיר אַרוֹיסְגֶעגַאנְגֶען זֶען אִין דֶער מִדְבָּר? אַ שְׁטֶעקְל שָׁאקְלֶען זִיךְ מִיטְן וִוינְט?
25
וָואס דֶען זֶענְט אִיר אַרוֹיסְגֶעגַאנְגֶען זֶען? אַ מֶענְטְשְׁן אָנְגֶעטָאן אִין פַיינֶע מַלְבּוּשִׁים? זֶעט, דִי וָואס זֶענֶען הֶערְלֶעך גֶעקְלֵיידְט, אוּן לֶעבְּן פַיין, זֶענֶען אִין פַּאלַאצְן פוּן מְלָכִים.
26
אָבֶּער וָואס דֶען זֶענְט אִיר אַרוֹיסְגֶעגַאנְגֶען זֶען? אַ נָבִיא? יָא, אִיךְ זָאג אַייךְ, אַ סַך מֶער וִוי אַ נָבִיא.
27
דָאס אִיז עֶר, פוּן וֶועמֶען סֶע שְׁטֵייט גֶעשְׁרִיבְּן: זֶע, אִיךְ שִׁיק מַיין שְׁלִיחַ פַאר דַיין פָּנִים, וָואס וֶועט אָנְגְרֵייטְן דַיין וֶועג פַאר דִיר.
28
אִיךְ זָאג אַייךְ, צְוִוישְׁן דִי, וָואס זֶענֶען גֶעבּוֹירְן גֶעוָוארְן פוּן וַוייבֶּער, אִיז נִישְׁטָא קֵיין גְרֶעסֶערֶער וִוי יוֹחָנָן, דָאךְ אִיז דֶער קְלֶענְסְטֶער אִין דֶעם מַלְכוּת פוּן גָאט גְרֶעסֶער פוּן אִים.
29
(אוּן דָאס גַאנְצֶע פָאלְק, בְּעֵת זֵיי הָאבְּן דָאס גֶעהֶערְט, אוּן דִי מוֹכְסִים, הָאבְּן גֶערֶעכְטְפַארְטִיקְט גָאט, וָוארִים זֵיי הָאבְּן זִיךְ גֶעלָאזְט טוֹבְלֶען מִיט דֶער טְבִילָה פוּן יוֹחָנָן;
30
אָבֶּער דִי פְּרוּשִׁים אוּן דִי חֲכָמִים הָאבְּן אָפְּגֶעוָוארְפְן דִי עֵצָה פוּן גָאט, וָוארִים זֵיי הָאבְּן זִיךְ פוּן אִים נִישְׁט גֶעלָאזְט טוֹבְלֶען.
31
צוּ וֶועמֶען אָבֶּער זָאל אִיךְ גְלַייכְן דִי מֶענְטְשְׁן פוּן דֶעם דָאזִיקְן דוֹר? צוּ וֶועמֶען זֶענֶען זֵיי עֶנְלֶעך?
32
זֵיי זֶענֶען גְלַייךְ וִוי קִינְדֶער, וָואס זִיצְן אוֹיף דֶעם מַארְקְפְּלַאץ, אוּן רוּפְן אֵיינֶער צוּם אַנְדֶערְן: מִיר הָאבְּן גֶעשְׁפִּילְט פַאר אַייךְ, אוּן אִיר הָאט נִישְׁט גֶעטַאנְצְט; מִיר הָאבְּן גֶעקְלָאגְט, אוּן אִיר הָאט נִישְׁט גֶעוֵויינְט.
33
וָוארִים יוֹחָנָן הַמַטְבִּיל אִיז גֶעקוּמֶען, אוּן הָאט נִישְׁט גֶעגֶעסְן קֵיין בְּרוֹיט, אוּן נִישְׁט גֶעטְרוּנְקֶען קֵיין וַויין, אוּן אִיר זָאגְט: עֶר הָאט אַ בֵּייזְן גֵייסְט.
34
דֶער בֶּן־אָדָם אִיז גֶעקוּמֶען, עֶר עֶסְט אוּן טְרִינְקְט, אוּן אִיר זָאגְט: זֶעט, אַ מֶענְטְשׁ אַ זוֹלֵל־וְסוֹבֵא, אַ פְרַיינְט פוּן מוֹכְסִים אוּן זִינְדִיקֶע!
35
אוּן דִי חָכְמָה אִיז גֶערֶעכְטְפַארְטִיקְט פוּן אַלֶע אִירֶע קִינְדֶער.
36
אוּן אֵיינֶער פוּן דִי פְּרוּשִׁים הָאט אִים גֶעבֶּעטְן, אַז עֶר זָאל עֶסְן מִיט אִים, אוּן עֶר אִיז אַרַיינְגֶעגַאנְגֶען אִין דֶעם פָּרוּשׁ׳ס הוֹיז, אוּן הָאט זִיךְ גֶעזֶעצְט צוּם טִישׁ.
37
אוּן זֶע, דָארְט אִיז גֶעוֶוען אַ זִינְדִיקֶע פְרוֹי אִין דֶער שְׁטָאט, אוּן אַז זִי אִיז גֶעוָואר גֶעוָוארְן, אַז עֶר זִיצְט בַּיים טִישׁ אִין דֶעם פָּרוּשׁ׳ס הוֹיז, הָאט זִי גֶעבְּרַאכְט אַן אַלְאַבַּאסְטֶער קְרִיגְל מִיט זַאלְבְּאֵייל,
38
אוּן הָאט זִיךְ גֶעשְׁטֶעלְט הִינְטְן בַּיי זַיינֶע פִיס אַ וֵויינֶענְדִיקֶע, אוּן הָאט אָנְגֶעהוֹיבְּן נַאס מַאכְן זַיינֶע פִיס מִיט אִירֶע טְרֶערְן, אוּן הָאט זֵיי אָפְּגֶעוִוישְׁט מִיט דִי הָאר פוּן אִיר קָאפּ, אוּן גֶעקוּשְׂט זַיינֶע פִיס, אוּן זֵיי גֶעזַאלְבְּט מִיט דֶעם זַאלְבְּאֵייל.
39
אוּן בְּעֵת דֶער פְּרוּשִׁי, וָואס הָאט אִים פַארְבֶּעטְן, הָאט דָאס גֶעזֶען, הָאט עֶר צוּ זִיךְ גֶעזָאגְט: וָואלְט עֶר גֶעוֶוען אַ נָבִיא, וָואלְט עֶר דֶערְקֶענְט וֶוער אוּן וָואס פַאר אַ מִין פְרוֹי דָאס אִיז, וָואס רִירְט אִים אָן, אַז זִי אִיז אַ זִינְדִיקֶע.
40
אוּן יֵשׁוּעַ הָאט גֶעעֶנְטְפֶערְט, אוּן צוּ אִים גֶעזָאגְט: שִׁמְעוֹן, אִיךְ הָאבּ דִיר עֶפֶּעס צוּ זָאגְן. אוּן עֶר הָאט גֶעעֶנְטְפֶערְט: וָואס, רֶבִּי.
41
אֵיינֶער אַ מַלְוֶוה הָאט גֶעהַאט צְוֵויי בַּעֲלֵי־חוֹבוֹת; אֵיינֶער אִיז אִים שׁוּלְדִיק גֶעוֶוען פִינְף הוּנְדֶערְט דִינָרִים, אוּן דֶער אַנְדֶערֶער פוּפְצִיק.
42
אוּן אַזוֹי וִוי זֵיי הָאבְּן נִישְׁט גֶעהַאט מִיט וָואס צוּ בַּאצָאלְן, הָאט עֶר זֵיי בֵּיידְן מוֹחְל גֶעוֶוען. וֶוער פוּן זֵיי וֶועט אִים דֶערִיבֶּער מֶער לִיבּ הָאבְּן?
43
הָאט שִׁמְעוֹן גֶעעֶנְטְפֶערְט: דֶער, דֶענְק אִיךְ, וֶועמֶען עֶר הָאט מוֹחְל גֶעוֶוען צוּם מֶערְסְטְן. אוּן עֶר הָאט צוּ אִים גֶעזָאגְט: דוּ הָאסְט רִיכְטִיק גֶעמִשְׁפָּט.
44
אוּן עֶר הָאט זִיךְ אוֹיסְגֶעדְרֵייט צוּ דֶער פְרוֹי, אוּן גֶעזָאגְט צוּ שִׁמְעוֹן: דוּ זֶעסְט דִי דָאזִיקֶע פְרוֹי? אִיךְ בִּין אַרַיינְגֶעקוּמֶען אִין דַיין הוֹיז, אוּן קֵיין וַואסֶער פַאר מַיינֶע פִיס הָאסְטוּ מִיר נִישְׁט גֶעגֶעבְּן, זִי אָבֶּער הָאט נַאס גֶעמַאכְט מַיינֶע פִיס מִיט אִירֶע טְרֶערְן, אוּן הָאט זֵיי אָפְּגֶעוִוישְׁט מִיט אִירֶע הָאר.
45
דוּ הָאסְט מִיר נִישְׁט גֶעגֶעבְּן קֵיין קוּשׁ; זִי אָבֶּער, זִינְט אִיךְ בִּין אַרַיינְגֶעקוּמֶען, הָאט נִישְׁט אוֹיפְגֶעהֶערְט צוּ קוּשְׁן מַיינֶע פִיס.
46
דוּ הָאסְט נִישְׁט גֶעזַאלְבְּט מַיין קָאפּ מִיט אֵייל; אָבֶּער זִי הָאט גֶעזַאלְבְּט מַיינֶע פִיס מִיט זַאלְבְּאֵייל.
47
דֶערִיבֶּער זָאג אִיךְ דִיר: אִירֶע זִינְד, וָואס זֶענֶען אַ סַך, זֶענֶען פַארְגֶעבְּן גֶעוָוארְן, וָוארִים זִי הָאט אַ סַך לִיבּ גֶעהַאט; אָבֶּער וֶועמֶען וֵויינִיק וֶוערְט פַארְגֶעבְּן, דֶער דָאזִיקֶער הָאט לִיבּ וֵויינִיק.
48
אוּן עֶר הָאט צוּ אִיר גֶעזָאגְט: דַיינֶע זִינְד זֶענֶען דִיר פַארְגֶעבְּן גֶעוָוארְן.
49
אוּן דִי, וָואס זֶענֶען גֶעזֶעסְן מִיט אִים בַּיים טִישׁ, הָאבְּן גֶענוּמֶען זָאגְן צְוִוישְׁן זִיךְ: וֶוער אִיז עֶר, וָואס עֶר פַארְגִיבְּט אֲפִילוּ זִינְד?
50
אוּן עֶר הָאט גֶעזָאגְט צוּ דֶער פְרוֹי: דַיין אֶמוּנָה הָאט דִיךְ מַצִיל גֶעוֶוען; גֵיי בְּשָׁלוֹם.