אידיש
1
אוּן עֶס אִיז גֶעוֶוען, בְּעֵת דָאס פָאלְק הָאט זִיךְ אַרוּם אִים, כְּדֵי צוּ הֶערְן דָאס וָוארְט פוּן גָאט, אִיז עֶר גֶעשְׁטַאנֶען בַּיים יַם גִנֵיסָר.
2
אוּן עֶר הָאט גֶעזֶען צְוֵויי שִׁיפְלֶעך שְׁטֵיין בַּיים יַם, אוּן דִי פִישֶׁערְס זֶענֶען פוּן זֵיי אַרוֹיסְגֶעגַאנְגֶען, אוּן הָאבְּן גֶעוַואשְׁן זֵייעֶרֶע נֶעצְן.
3
אוּן עֶר אִיז אַרַיינְגֶעגַאנְגֶען אִין אֵיינֶע פוּן דִי שִׁיף, וָואס הָאט גֶעהֶערְט צוּ שִׁמְעוֹן, אוּן הָאט אִים גֶעבֶּעטְן, אָפְּצוּרוּקְן זִיךְ אַבִּיסְל פוּן דֶער יַבָּשָׁה. אוּן עֶר הָאט זִיךְ אַנִידֶערְגֶעזֶעצְט, אוּן הָאט גֶעלֶערְנְט דָאס פָאלְק פוּן דֶעם שִׁיף.
4
אוּן אַז עֶר הָאט אוֹיפְגֶעהֶערְט רֶעדְן, הָאט עֶר גֶעזָאגְט צוּ שִׁמְעוֹן: פָאר אָפּ, וואוּ עֶס אִיז טִיף, אוּן לָאזְט אַרָאפּ אַייעֶרֶע נֶעצְן צוּם פַאנְגֶען.
5
אוּן שִׁמְעוֹן הָאט גֶעעֶנְטְפֶערְט: הַאר, מִיר הָאבְּן זִיךְ גֶעמִיט אַ גַאנְצֶע נַאכְט, אוּן הָאבְּן גָארְנִישְׁט גֶעכַאפְּט; אָבֶּער אוֹיף דַיין וָוארְט וֶועל אִיךְ אַרָאפְּלָאזְן דִי נֶעצְן.
6
אוּן אַז זֵיי הָאבְּן דָאס גֶעטָאן, הָאבְּן זֵיי גֶעכַאפְּט זֵייעֶר אַ סַך פִישׁ; אוּן זֵייעֶרֶע נֶעצְן הָאבְּן זִיךְ גֶענוּמֶען רַייסְן;
7
אוּן זֵיי הָאבְּן גֶעוואוּנְקֶען צוּ זֵייעֶרֶע חַבֵרִים אִין דֶעם אַנְדֶערְן שִׁיפְל, אַז זֵיי זָאלְן קוּמֶען אוּן זֵיי הֶעלְפְן. אוּן זֵיי זֶענֶען גֶעקוּמֶען אוּן הָאבְּן אָנְגֶעפִילְט דִי בֵּיידֶע שִׁיפְלֶעך, אַזוֹי, אַז זֵיי הָאבְּן אָנְגֶעהוֹיבְּן צוּ זִינְקֶען.
8
אוּן אַז שִׁמְעוֹן פֶּעטְרוֹס הָאט דָאס גֶעזֶען, אִיז עֶר גֶעפַאלְן יֵשׁוּעַ צוּ דִי פִיס, אוּן גֶעזָאגְט: הַאר, גֵיי אַוֶועק פוּן מִיר, וָוארִים אִיךְ בִּין אַ זִינְדִיקֶער מֶענְטְשׁ.
9
וָוארִים אַ שְׁרֶעק אִיז אִים בַּאפַאלְן, אוּן אַלֶע, וָואס זֶענֶען גֶעוֶוען מִיט אִים בַּיים פִישׁ-פַאנְג, וָואס זֵיי הָאבְּן גֶעפַאנְגֶען;
10
אוּן אַזוֹי זֶענֶען אוֹיךְ גֶעוֶוען יַעֲקֹב אוּן יוֹחָנָן, זַבְדִיס זִין, וָואס זֶענֶען גֶעוֶוען שִׁמְעוֹן׳ס חַבֵרִים. אוּן יֵשׁוּעַ הָאט גֶעזָאגְט צוּ שִׁמְעוֹן: הָאבּ נִישְׁט קֵיין מוֹרֶא; פוּן אִיצְט אָן וֶועסְטוּ פַאנְגֶען מֶענְטְשְׁן.
11
אוּן אַז זֵיי הָאבְּן גֶעבְּרַאכְט זֵייעֶרֶע שִׁיפְלֶעך צוּ דֶער יַבָּשָׁה, הָאבְּן זֵיי אַלְץ אִיבֶּערְגֶעלָאזְט, אוּן זֶענֶען אִים נָאכְגֶעגַאנְגֶען.
12
אוּן בְּעֵת עֶר אִיז גֶעוֶוען אִין אֵיינֶע פוּן דִי שְׁטֶעט, אִיז דָארְטְן גֶעוֶוען אַ מֶענְטְשׁ לוֹיטֶער צָרַעַת; אוּן אַז עֶר הָאט דֶערְזֶען יֵשׁוּעַ, אִיז עֶר גֶעפַאלְן אוֹיף זַיין פָּנִים, אוּן הָאט אִים גֶעבֶּעטְן: הַאר, אוֹיבּ דוּ וִוילְסְט, קָאנְסְטוּ מִיךְ מַאכְן רֵיין.
13
אוּן עֶר הָאט אוֹיסְגֶעשְׁטְרֶעקְט זַיין הַאנְט, אוּן הָאט אִים אָנְגֶערִירְט, אוּן גֶעזָאגְט: אִיךְ וִויל; זֵיי רֵיין. אוּן תֵּיכֵּף הָאט זִיךְ דָאס צָרַעַת אָפְּגֶעטָאן פוּן אִים.
14
אוּן עֶר הָאט אִים בַּאפוֹילְן, עֶר זָאל עֶס קֵיינֶעם נִישְׁט דֶערְצֵיילְן; נַייעֶרְט גֵיי אוּן וַוייז דִיךְ פַארְן כֹּהֵן; אוּן זֵיי מַקְרִיב פַאר דַיין רֵיינִיקוּנְג, אַזוֹי וִוי מֹשֶׁה הָאט גֶעבָּאטְן, פַאר אַן עֵדוּת צוּ זֵיי.
15
אוּן דִי יְדִיעָה וֶועגְן אִים הָאט זִיךְ נָאךְ מֶער פַארְשְׁפְּרֵייט, אוּן אַ גְרוֹיסֶער עוֹלָם אִיז זִיךְ צוּנוֹיפְגֶעקוּמֶען, אִים צוּ הֶערְן, אוּן גֶעהֵיילְט צוּ וֶוערְן פוּן זֵייעֶרֶע קְרַאנְקְהַייטְן.
16
עֶר אָבֶּער הָאט זִיךְ צוּרִיקְגֶעצוֹיגְן אִין דִי מִדְבָּרִיוֹת, אוּן הָאט מִתְפַּלֵל גֶעוֶוען.
17
אוּן עֶס אִיז גֶעוֶוען אִין אֵיינֶעם פוּן יֶענֶע טֶעג, בְּעֵת עֶר הָאט גֶעלֶערְנְט, אַז עֶס זֶענֶען דָארְטְן גֶעזֶעסְן פְּרוּשִׁים אוּן לוֹמְדֵי־תּוֹרָה, וָואס זֶענֶען גֶעקוּמֶען פוּן אַלֶע שְׁטֶעט פוּן גָלִיל, אוּן יְהוּדָה, אוּן יְרוּשָׁלַיִם, אוּן דִי מַאכְט פוּן גָאט אִיז גֶעוֶוען מִיט אִים, צוּ קֶענֶען הֵיילְן.
18
אוּן אָט הָאבְּן מֶענְטְשְׁן גֶעבְּרַאכְט אוֹיף אַ גֶעלֶעגֶער אַ מַאן, וָואס אִיז גֶעוֶוען גֶעלֵיימְט; אוּן זֵיי הָאבְּן גֶעזוּכְט אִים אַרַיינְצוּבְּרֶענְגֶען אוּן אִים אַוֶועקְצוּלֵייגְן פַאר אִים.
19
אוּן אַזוֹי וִוי זֵיי הָאבְּן נִישְׁט גֶעקֶענְט גֶעפִינֶען קֵיין וֶועג וִוי אִים אַרַיינְצוּבְּרֶענְגֶען, צוּלִיבּ דֶעם עוֹלָם, זֶענֶען זֵיי אַרוֹיפְגֶעגַאנְגֶען אוֹיפְן דַאךְ, אוּן הָאבְּן אִים אַרָאפְּגֶעלָאזְט מִיט זַיין גֶעלֶעגֶער דוּרְךְ דִי דַאכְצִיגְל אִין דֶער מִיט פַאר יֵשׁוּעַ.
20
אוּן אַז עֶר הָאט גֶעזֶען זֵייעֶר אֶמוּנָה, הָאט עֶר גֶעזָאגְט: מֶענְטְשׁ, דַיינֶע זִינְד זֶענֶען דִיר פַארְגֶעבְּן גֶעוָוארְן.
21
אוּן דִי סוֹפְרִים אוּן דִי פְּרוּשִׁים הָאבְּן אָנְגֶעהוֹיבְּן נָאכְטְצוּרַאכְטְן, אוּן הָאבְּן גֶעזָאגְט: וֶוער אִיז דֶער דָאזִיקֶער, וָואס רֶעדְט לֶעסְטֶערוּנְגֶען? וֶוער קָאן מוֹחְל זַיין זִינְד, אַחוּץ גָאט אַלֵיין?
22
אָבֶּער יֵשׁוּעַ הָאט פַארְשְׁטַאנֶען זֵייעֶרֶע מַחְשָׁבוֹת, אוּן הָאט צוּ זֵיי גֶעזָאגְט: וָואס טְרַאכְט אִיר אִין אַייעֶרֶע הֶערְצֶער?
23
וָואס אִיז גְרִינְגֶער, צוּ זָאגְן: דַיינֶע זִינְד זֶענֶען דִיר פַארְגֶעבְּן גֶעוָוארְן, אָדֶער צוּ זָאגְן: שְׁטֵיי אוֹיף אוּן גֵיי?
24
נָאר כְּדֵי אִיר זָאלְט וִויסְן, אַז דֶער בֶּן־אָדָם הָאט רְשׁוּת אוֹיף דֶער עֶרְד מוֹחְל צוּ זַיין זִינְד (הָאט עֶר גֶעזָאגְט צוּם גֶעלֵיימְטְן): אִיךְ זָאג דִיר, שְׁטֵיי אוֹיף, אוּן נֶעם דַיין גֶעלֶעגֶער, אוּן גֵיי אַהֵיים.
25
אוּן עֶר אִיז תֵּיכֵּף פַאר זֵיי אוֹיפְגֶעשְׁטַאנֶען, אוּן הָאט גֶענוּמֶען דָאס גֶעלֶעגֶער, אוֹיף וֶועלְכְן עֶר אִיז גֶעלֶעגְן, אוּן אִיז אַוֶועק אַהֵיים, לוֹיבְּנְדִיק גָאט.
26
אוּן זֵיי זֶענֶען אַלֶע נִבְהָל אוּן נִשְׁתּוֹמְם גֶעוָוארְן, אוּן הָאבְּן גֶעלוֹיבְּט גָאט, אוּן זִיךְ זֵייעֶר גֶעפָארְכְטְן, אוּן גֶעזָאגְט: וְואוּנְדֶערְלֶעכֶע זַאכְן הָאבְּן מִיר הַיינְט גֶעזֶען.
27
אוּן נָאכְדֶעם אִיז עֶר אַרוֹיסְגֶעגַאנְגֶען, אוּן הָאט גֶעזֶען אַ מוֹכֵס, וָואס הָאט גֶעהֵייסְן לֵוִי, זִיצְן אוֹיפְן צָאל־אַמְט, אוּן עֶר הָאט צוּ אִים גֶעזָאגְט: גֵיי מִיר נָאךְ.
28
אוּן עֶר הָאט אַלְץ אִיבֶּערְגֶעלָאזְט, אוּן אִיז אוֹיפְגֶעשְׁטַאנֶען אוּן אִיז אִים נָאכְגֶעגַאנְגֶען.
29
אוּן לֵוִי הָאט אִים גֶעמַאכְט אַ גְרוֹיסֶע סְעוּדָה אִין זַיין הוֹיז; אוּן אַ גְרוֹיסֶער עוֹלָם פוּן מוֹכְסִים אוּן אוֹיךְ אַנְדֶערֶע זֶענֶען מִיט זֵיי גֶעזֶעסְן בַּיים טִישׁ.
30
אוּן דִי פְּרוּשִׁים אוּן זֵייעֶרֶע סוֹפְרִים הָאבְּן גֶעמוּרְמְלְט קֶעגְן זַיינֶע תַּלְמִידִים, אוּן הָאבְּן גֶעזָאגְט: פַארְוָואס עֶסְט אִיר אוּן טְרִינְקְט מִיט מוֹכְסִים אוּן זִינְדִיקֶע?
31
אוּן יֵשׁוּעַ הָאט גֶעעֶנְטְפֶערְט, אוּן צוּ זֵיי גֶעזָאגְט: דִי, וָואס זֶענֶען גֶעזוּנְט, נֵייטִיקְן זִיךְ נִישְׁט אִין קֵיין רוֹפֵא, נַייעֶרְט דִי, וָואס זֶענֶען קְרַאנְק.
32
אִיךְ בִּין נִישְׁט גֶעקוּמֶען רוּפְן דִי צַדִיקִים, נַייעֶרְט דִי זִינְדִיקֶע צוּ תְּשׁוּבָה.
33
אוּן זֵיי הָאבְּן צוּ אִים גֶעזָאגְט: דִי תַּלְמִידִים פוּן יוֹחָנָן פַאסְטְן אָפְט אוּן טְוּעֶן תְּפִילָה, אוּן אַזוֹי טְוּעֶן אוֹיךְ דִי תַּלְמִידִים פוּן דִי פְּרוּשִׁים, אָבֶּער דַיינֶע עֶסְן אוּן טְרִינְקֶען.
34
אוּן יֵשׁוּעַ הָאט צוּ זֵיי גֶעזָאגְט: קָאנְט אִיר לָאזְן דִי מְחוּתָּנִים פַאסְטְן, בְּשַׁעַת דֶער חָתָן אִיז מִיט זֵיי?
35
סֶע וֶועלְן אָבֶּער קוּמֶען טֶעג, וֶוען דֶער חָתָן וֶועט אַוֶועקְגֶענוּמֶען וֶוערְן פוּן זֵיי, אוּן דֶעמָאלְט וֶועלְן זֵיי פַאסְטְן אִין יֶענֶע טֶעג.
36
אוּן עֶר הָאט זֵיי אוֹיךְ דֶערְצֵיילְט אַ מָשָׁל: קֵיינֶער רַייסְט נִישְׁט אָפּ אַ שְׁטִיק פוּן אַ נַייעֶם מַלְבּוּשׁ, אוּן טוּט עֶס אַרוֹיף אוֹיף אַן אַלְטְן מַלְבּוּשׁ; אוֹיבּ יָא, וֶועט עֶר צֶערַייסְן דָאס נַייעֶ, אוּן אוֹיךְ דָאס שְׁטִיק פוּן דֶעם נַייעֶם וֶועט זִיךְ נִישְׁט פַּאסְטְן צוּם אַלְטְן.
37
אוּן קֵיינֶער טוּט נִישְׁט אַרַיין קֵיין נַייעֶם וַויין אִין אַלְטֶע לָאגְלֶען; אַנְדֶערְשׁ וֶועט דֶער נַייעֶר וַויין צֶעפְּלַאצְן דִי לָאגְלֶען, אוּן וֶועט זִיךְ צֶעגִיסְן, אוּן דִי לָאגְלֶען וֶועלְן גֵיין פַארְלוֹירְן.
38
נַייעֶרְט נַייעֶם וַויין מוּז מֶען אַרְיינְגִיסְן אִין נַייעֶ לָאגְלֶען.
39
אוּן קֵיינֶער, וָואס הָאט גֶעטְרוּנְקֶען אַלְטְן וַויין, וִויל נַייעֶם; וָוארִים עֶר זָאגְט: דֶער אַלְטֶער אִיז גוּט.