אידיש
1
אוּן יֵשׁוּעַ, פוּל מִיט דֶעם רוּחַ־הַקוֹדֶשׁ, הָאט זִיךְ אוּמְגֶעקֶערְט פוּן דֶעם יַרְדֵן, אוּן אִיז גֶעפִירְט גֶעוָוארְן דוּרְךְ דֶעם גֵייסְט
2
פֶערְצִיק טֶעג אִין דֶער מִדְבָּר, גֶעפְּרוּאְוְוט פוּן דֶעם שָׂטָן. אוּן עֶר הָאט גָארְנִישְׁט גֶעגֶעסְן אִין יֶענֶע טֶעג; אוּן בְּעֵת זֵיי הָאבְּן זִיךְ גֶעעֶנְדִיקְט, אִיז עֶר גֶעוֶוען הוּנְגֶערִיק.
3
אוּן דֶער שָׂטָן הָאט צוּ אִים גֶעזָאגְט: אוֹיבּ דוּ בִּיסְט דֶער בֶּן־אֱלֹהִים, בַּאפֶעל דֶעם דָאזִיקְן שְׁטֵיין, אַז עֶר זָאל וֶוערְן בְּרוֹיט.
4
הָאט יֵשׁוּעַ אִים גֶעעֶנְטְפֶערְט: סֶע שְׁטֵייט גֶעשְׁרִיבְּן: נִישְׁט פוּן בְּרוֹיט אַלֵיין לֶעבְּט דֶער מֶענְטְשׁ.
5
אוּן דֶער שָׂטָן הָאט אִים אַרוֹיפְגֶעפִירְט, אוּן הָאט אִים גֶעוִויזְן אַלֶע מְלוּכוֹת פוּן דֶער וֶועלְט אִין אַן אוֹיגְן בְּלִיק,
6
אוּן הָאט צוּ אִים גֶעזָאגְט: דִיר וֶועל אִיךְ גֶעבְּן דִי דָאזִיקֶע גַאנְצֶע מֶמְשָׁלָה אוּן אִיר פְּרַאכְט, וָוארִים מִיר אִיז זִי אִיבֶּערְגֶעגֶעבְּן גֶעוָוארְן, אוּן אִיךְ גִיבּ זִי וֶועמֶען אִיךְ וִויל.
7
דֶערִיבֶּער, אוֹיבּ דוּ וֶועסְט דִיךְ בּוּקְן פַאר מִיר, וֶועט דָאס אִינְגַאנְצְן זַיין דַיינְס.
8
אוּן יֵשׁוּעַ הָאט אִים גֶעעֶנְטְפֶערְט: סֶע שְׁטֵייט גֶעשְׁרִיבְּן: זָאלְסְט דִיךְ בּוּקְן צוּ גָאט דַיין הַאר, אוּן אִים אַלֵיין זָאלְסְטוּ דִינֶען.
9
אוּן עֶר הָאט אִים גֶעפִירְט קֵיין יְרוּשָׁלַיִם, אוּן הָאט אִים אַוֶועקְגֶעשְׁטֶעלְט אוֹיף דֶעם טוּרֶעם פוּן דֶעם בֵּית־הַמִקְדָשׁ, אוּן הָאט צוּ אִים גֶעזָאגְט: אוֹיבּ דוּ בִּיסְט דֶער בֶּן־אֱלֹהִים, וַוארְף דִיךְ אַרָאפּ פוּן דַאנֶען;
10
וָוארִים סֶע שְׁטֵייט גֶעשְׁרִיבְּן: זַיינֶע מַלְאָכִים וֶועט עֶר בַּאפֶעלְן וֶועגְן דִיר, דִיךְ צוּ הִיטְן;
11
אוּן אוֹיף דִי הֶענְט וֶועלְן זֵיי דִיךְ טְרָאגְן, טָאמֶער וֶועסְטוּ דִיר אָנְשְׁלָאגְן אָן אַ שְׁטֵיין דַיין פוּס.
12
הָאט יֵשׁוּעַ אִים גֶעעֶנְטְפֶערְט, אוּן צוּ אִים גֶעזָאגְט: עֶס אִיז אוֹיךְ גֶעזָאגְט גֶעוָוארְן: דוּ זָאלְסְט נִישְׁט פְּרוּאוְון גָאט דַיין הַאר.
13
אוּן אַז דֶער שָׂטָן הָאט גֶעעֶנְדִיקְט דוּרְכְפִירְן אַלֶע נִסְיוֹנוֹת, הָאט עֶר אִים אָפְּגֶעלָאזְט אוֹיף אַ צַייט.
14
אוּן יֵשׁוּעַ הָאט זִיךְ אוּמְגֶעקֶערְט אִין דֶער מַאכְט פוּן דֶעם גֵייסְט קֵיין גָלִיל; אוּן דִי יְדִיעָה וֶועגְן אִים הָאט זִיךְ פַארְשְׁפְּרֵייט אִין דֶער גַאנְצֶער גֶעגְנְט.
15
אוּן עֶר הָאט גֶעלֶערְנְט אִין זֵייעֶרֶע שׁוּלְן, אוּן אַלֶע הָאבְּן אִים גֶעלוֹיבְּט.
16
אוּן עֶר אִיז גֶעקוּמֶען קֵיין נְצָרֶת, וואוּ עֶר אִיז אוֹיפְגֶעצוֹיגְן גֶעוָוארְן; אוּן וִוי זַיין מִנְהָג, אִיז עֶר שַׁבָּת אַרַיינְגֶעגַאנְגֶען אִין דֶער שׁוּל אַרַיין, אוּן עֶר אִיז אוֹיפְגֶעשְׁטַאנֶען צוּ לֵייעֶנֶען,
17
אוּן מֶען הָאט אִים דֶערְלַאנְגְט דָאס סֵפֶר פוּן יְשַׁעְיָהוּ הַנָבִיא. אוּן עֶר הָאט גֶעעֶפְנְט דָאס סֵפֶר, אוּן הָאט גֶעפוּנֶען דָאס אָרְט, וואוּ עֶס אִיז גֶעשְׁטַאנֶען גֶעשְׁרִיבְּן:
18
דֶער גֵייסְט פוּן גָאט אִיז אוֹיף מִיר, וָוארִים עֶר הָאט מִיךְ גֶעזַאלְבְּט מְבַשֵׂר צוּ זַיין גוּטֶע בְּשׂוּרוֹת פַאר דִי אָרֶעמֶע. עֶר הָאט מִיךְ גֶעשִׁיקְט אוֹיסְצוּרוּפְן פְרַייהַייט פַאר דִי גֶעפַאנְגֶענֶע, מַאכְן זֶעעֶנדִיק דִי בְּלִינְדֶע, אוּן צוּ בַּאפְרַייעֶן דִי, וָואס זֶענֶען צֶעשְׁטוֹיסְן,
19
אוּן אוֹיסְצוּרוּפְן דָאס בַּאוִוילִיקְטֶע יָאר פוּן גָאט.
20
אוּן עֶר הָאט צוּנוֹיפְגֶעוִויקְלְט דָאס סֵפֶר, אוּן הָאט עֶס צוּרִיקְגֶעגֶעבְּן דֶעם חַזָן, אוּן הָאט זִיךְ אַנִידֶערְגֶעזֶעצְט; אוּן דִי אוֹיגְן פוּן אַלֶעמֶען אִין דֶער שׁוּל זֶענֶען גֶעוֶוען בַּאהֶעפְט אָן אִים.
21
אוּן עֶר הָאט אָנְגֶעהוֹיבְּן צוּ זֵיי צוּ זָאגְן: הַיינְט אִיז דֶער דָאזִיקֶער פָּסוּק מְקוּיָם גֶעוָוארְן אִין אַייעֶרֶע אוֹיעֶרן.
22
אוּן אַלֶע זֶענֶען אִים גֶעוֶוען עֵדוּת, אוּן הָאבְּן בַּאוְואוּנְדֶערט דִי לַייטְזֶעלִיקֶע רֵייד, וָואס זֶענֶען אַרוֹיסְגֶעגַאנְגֶען פוּן זַיין מוֹיל; אוּן זֵיי הָאבְּן גֶעזָאגְט: אִיז דָאס נִישְׁט יוֹסֵפְס זוּן?
23
אוּן עֶר הָאט צוּ זֵיי גֶעזָאגְט: אַוַודַאי וֶועט אִיר מִיר זָאגְן דָאס דָאזִיקֶע מָשָׁל: רוֹפֵא, הֵייל דִיךְ אַלֵיין; וָואס מִיר הָאבְּן גֶעהֶערְט ס׳אִיז גֶעטָאן גֶעוָוארְן אִין כְּפַר־נַחוּם, טוּ אוֹיךְ אִין דַיין הֵיימְשְׁטָאט.
24
אוּן עֶר הָאט גֶעזָאגְט: בֶּאֱמֶת, אִיךְ זָאג אַייךְ, קֵיין נָבִיא אִיז נִישְׁט אָנְגֶענוּמֶען אִין זַיין אֵייגְן לַאנְד.
25
אוֹיף אַן אֶמֶת, זָאג אִיךְ אַייךְ, אַ סַך אַלְמָנוֹת זֶענֶען גֶעוֶוען אִין יִשְׂרָאֵל אִין דִי טֶעג פוּן אֵלִיָהוּ, בְּעֵת דֶער הִימְל אִיז גֶעוֶוען פַארְשְׁלָאסְן דְרַיי יָאר אוּן זֶעקְס חֳדָשִׁים, אוּן עֶס אִיז גֶעקוּמֶען אַ גְרוֹיסֶער הוּנְגֶער אִיבֶּערְן גַאנְצְן לַאנְד;
26
אוּן צוּ קֵיינֶער פוּן זֵיי אִיז אֵלִיָהוּ נִישְׁט גֶעשִׁיקְט גֶעוָוארְן, אַחוּץ קֵיין צָרְפַת, וָואס אִיז אִין צִידוֹן, צוּ אַ פְרוֹי אַן אַלְמָנָה.
27
אוּן אַ סַך מְצוֹרָעִים זֶענֶען גֶעוֶוען אִין יִשְׂרָאֵל אִין דֶער צַייט פוּן אֱלִישָׁע הַנָבִיא; אוּן קֵיינֶער פוּן זֵיי אִיז נִישְׁט גֶערֵיינִיקְט גֶעוָוארְן, אַחוּץ נַעֲמָן דֶער אֲרַמִי.
28
אוּן אַלֶע אִין דֶער שׁוּל זֶענֶען גֶעוָוארְן פוּל מִיט צָארְן, בְּעֵת זֵיי הָאבְּן דָאס גֶעהֶערְט.
29
אוּן זֵיי זֶענֶען אוֹיפְגֶעשְׁטַאנֶען, אוּן הָאבְּן אִים אַרוֹיסְגֶעוָוארְפְן פוּן דֶער שְׁטָאט, אוּן אִים גֶעפִירְט צוּם רַאנְד פוּן דֶעם בַּארְג, אוֹיף וָואס זֵייעֶר שְׁטָאט אִיז גֶעוֶוען גֶעבּוֹיט, כְּדֵי אִים אַרָאפְּצוּאוַוארְפְן.
30
אָבֶּער עֶר אִיז דוּרְכְגֶעגַאנְגֶען אִין דֶער מִיט צְוִוישְׁן זֵיי, אוּן אִיז אַוֶועקְגֶעגַאנְגֶען.
31
אוּן עֶר הָאט אַרָאפְּגֶענִידֶערְט קֵיין כְּפַר־נַחוּם, אַ שְׁטָאט אִין גָלִיל, אוּן עֶר הָאט מִיט זֵיי גֶעלֶערְנְט אוֹיף שַׁבָּתִים;
32
אוּן זֵיי זֶענֶען נִשְׁתּוֹמְם גֶעוָוארְן פוּן זַיין תּוֹרָה, וָוארִים זַיין וָוארְט הָאט גֶעהַאט מַאכְט.
33
אוּן אִין דֶער שׁוּל אִיז גֶעוֶוען אַ מֶענְטְשׁ, וָואס הָאט גֶעהַאט אַ גֵייסְט פוּן אַן אוּמְרֵיינֶעם רוּחַ, אוּן עֶר הָאט אוֹיסְגֶעשְׁרִיגְן אוֹיף אַ הוֹיךְ קוֹל:
34
וֵויי, וָואס הָאבְּן מִיר צוּ טָאן מִיט דִיר, יֵשׁוּעַ הַנוֹצְרִי? בִּיסְטוּ גֶעקוּמֶען אוּנְדְז צוּ פַארְטִילִיקְן? אִיךְ וֵוייס וֶוער דוּ בִּיסְט: דֶער הֵיילִיקֶער פוּן גָאט.
35
אָבֶּער יֵשׁוּעַ הָאט אוֹיף אִים אָנְגֶעשְׁרִיגְן, אוּן גֶעזָאגְט: שְׁוַוייג, אוּן גֵיי אַרוֹיס פוּן אִים! אוּן דֶער בֵּייזֶער גֵייסְט הָאט אִים אַנִידֶערְגֶעוָוארְפְן אִין זֵייעֶר מִיט, אוּן אִיז פוּן אִים אַרוֹיס, נִישְׁט טוּעֶנְדִיק אִים קֵיין שְׁלֶעכְטְס.
36
אוּן אַ מוֹרֶא אִיז גֶעפַאלְן אוֹיף אַלֶעמֶען, אוּן אֵיינֶער הָאט צוּם אַנְדֶערְן גֶעזָאגְט: וָואס אִיז דָאס פַאר אַ וָוארְט, וָואס עֶר בַּאפֶעלְט מִיט רְשׁוּת אוּן כּוֹחַ דִי אוּמְרֵיינֶע גֵייסְטֶער, אוּן זֵיי גֵייעֶן אַרוֹיס?
37
אוּן דִי יְדִיעָה וֶועגְן אִים הָאט זִיךְ פַארְשְׁפְּרֵייט אִין דֶער גַאנְצֶער אַרוּמִיקֶער גֶעגְנְט.
38
אוּן עֶר הָאט זִיךְ אוֹיפְגֶעהוֹיבְּן אוּן אִיז אַרוֹיס פוּן דֶער שׁוּל, אוּן אִיז אַרַיינְגֶעגַאנְגֶען אִין דֶעם הוֹיז פוּן שִׁמְעוֹן. אוּן שִׁמְעוֹן׳ס שְׂוִויגֶער הָאט גֶעלִיטְן פוּן אַ גְרוֹיס פִיבֶּער, אוּן זֵיי הָאבְּן אִים גֶעבֶּעטְן פַאר אִירֶעטְוֶועגְן.
39
אוּן עֶר אִיז צוּגֶעגַאנְגֶען, אוּן הָאט זִיךְ אַיינְגֶעבּוֹיגְן אִיבֶּער אִיר, אוּן הָאט אָנְגֶעשְׁרִיגְן דָאס פִיבֶּער, אוּן עֶס הָאט זִי אָפְּגֶעלָאזְט; אוּן זִי אִיז תֵּיכֵּף אוֹיפְגֶעשְׁטַאנֶען אוּן הָאט זֵיי בַּאדִינְט.
40
אוּן בְּעֵת דִי זוּן אִיז אוּנְטֶערְגֶעגַאנְגֶען, הָאבְּן אַלֶע, וָואס הָאבְּן גֶעהַאט קְרַאנְקֶע מִיט פַארְשִׁידֶענֶע קְרַאנְקְהֵייטְן, זֵיי גֶעבְּרַאכְט צוּ אִים; אוּן עֶר הָאט אַרוֹיפְגֶעלֵייגְט זַיינֶע הֶענְט אוֹיף יֶעדְן אֵיינֶעם פוּן זֵיי, אוּן הָאט זֵיי גֶעהֵיילְט.
41
אוּן אוֹיךְ בֵּייזֶע גֵייסְטֶער זֶענֶען אַרוֹיס פוּן אַ סַך, וָואס הָאבְּן אוֹיסְגֶעשְׁרִיגְן, אוּן גֶעזָאגְט: דוּ בִּיסְט דֶער בֶּן־אֱלֹהִים. אוּן עֶר הָאט אוֹיף זֵיי אָנְגֶעשְׁרִיגְן, אוּן זֵיי נִישְׁט גֶעלָאזְט רֶעדְן, וַוייל זֵיי הָאבְּן גֶעוואוּסְט, אַז עֶר אִיז דֶער מָשִׁיחַ.
42
אוּן אַז ס׳אִיז גֶעוָוארְן טָאג, אִיז עֶר אוֹיפְגֶעשְׁטַאנֶען אוּן אִיז אַוֶועק אִין אַ וִויסְט אָרְט. אוּן דָאס פָאלְק הָאט אִים גֶעזוּכְט, אוּן אִיז גֶעקוּמֶען צוּ אִים, אוּן אִים גֶעוָואלְט פַארְהַאלְטְן, אַז עֶר זָאל נִישְׁט אַוֶועקְגֵיין פוּן זֵיי;
43
אָבֶּער עֶר הָאט צוּ זֵיי גֶעזָאגְט: אִיךְ מוּז אָנְזָאגְן דִי גוּטֶע בְּשׂוּרָה פוּן גָאטְס מַלְכוּת אוֹיךְ אִין דִי אַנְדֶערֶע שְׁטֶעט, וָוארִים צוּלִיבּ דֶעם בִּין אִיךְ גֶעשִׁיקְט גֶעוָוארְן.
44
אוּן עֶר הָאט גֶעדַרְשְׁנְט אִין דִי שׁוּלְן פוּן יְהוּדָה.