אידיש
1
אוּן פְרִי אין דעֶם מָארְגְן פוּן דֶעם עֶרְשְׁטְן טָאג פוּן דֶער וָואך, זֶענֶען זֵיי גֶעקוּמֶען צוּם קֵבֶר, אוּן הָאבְּן גֶעבְּרַאכְט דִי בְּשָׂמִים, וָואס זֵיי הָאבְּן אָנְגֶעגְרֵייט.
2
אוּן זֵיי הָאבְּן גֶעפוּנֶען דֶעם שְׁטֵיין אַוֶועקְגֶעקַייקְלְט פוּן דֶעם קֵבֶר,
3
אוּן וֶוען זֵיי זֶענֶען אַרַיינְגֶעגַאנְגֶען, הָאבְּן זֵיי נִישְׁט גֶעפוּנֶען דֶעם גוּף פוּן דֶעם הַאר יֵשׁוּעַ.
4
אוּן עֶס אִיז גֶעוֶוען, בְּשַׁעַת זֵיי זֶענֶען אַזוֹי גֶעוֶוען צֶעטוּמְלְט פוּנְוֶועגְן דֶעם, עֶרְשְׁט צְוֵויי מֶענֶער זֶענֶען גֶעשְׁטַאנֶען נֶעבְּן זֵיי אִין שְׁטְרַאלְנְדִיקֶע קְלֵיידֶער;
5
אוּן אַ שְׁרֶעק אִיז זֵיי בַּאפַאלְן, אוּן זֵיי הָאבְּן אַרָאפְּגֶענֵייגְט זֵייעֶרֶע פֶּנִימֶער צוּ דֶער עֶרְד, אוּן דִי מֶענֶער הָאבְּן צוּ זֵיי גֶעזָאגְט: פַארְוָואס זוּכְט אִיר דֶעם לֶעבֶּעדִיקְן צְוִוישְׁן דִי טוֹיטֶע?
6
עֶר אִיז דָא נִישְׁטָא, נַייעֶרְט אִיז אוֹיפְגֶעשְׁטַאנֶען. דֶערְמָאנְט זִיךְ וִוי עֶר הָאט גֶערֶעדְט צוּ אַייךְ, בְּעֵת עֶר אִיז נָאךְ גֶעוֶוען אִין גָלִיל,
7
אוּן הָאט גֶעזָאגְט, אַז דֶער בֶּן־אָדָם מוּז אִיבֶּערְגֶעעֶנְטְפֶערְט וֶוערְן אִין דִי הֶענְט פוּן זִינְדִיקֶע מֶענְטְשְׁן, אוּן גֶעקְרֵייצִיקְט וֶוערְן, אוּן דֶעם דְרִיטְן טָאג וִוידֶער אוֹיפְשְׁטֵיין.
8
אוּן זֵיי הָאבְּן זִיךְ דֶערְמָאנְט זַיינֶע רֵייד,
9
אוּן הָאבְּן זִיךְ אוּמְגֶעקֶערְט פוּן דֶעם קֵבֶר, אוּן הָאבְּן דָאס אַלְץ דֶערְצֵיילְט צוּ דִי עֶלְף, אוּן צוּ אַלֶע אִיבֶּערִיקֶע.
10
אוּן דָאס זֶענֶען עֶס דִי, וָואס הָאבְּן דֶערְצֵיילְט דִי שְׁלִיחִים דִי דָאזִיקֶע זַאכְן: מִרְיָם פוּן מַגְדָלָה, אוּן יוֹחָנָה, אוּן מִרְיָם, דִי מוּטֶער פוּן יַעֲקֹב, אוּן דִי אַנְדֶערֶע פְרוֹיעֶן מִיט זֵיי.
11
אוּן דִי דָאזִיקֶע רֵייד הָאבְּן אוֹיסְגֶעזֶען אִין זֵייעֶרֶע אוֹיגְן וִוי פּוּסְטֶע רֵייד, אוּן זֵיי הָאבְּן זֵיי נִישְׁט גֶעגְלוֹיבְּט.
12
אוּן פֶּעטְרוֹס אִיז אוֹיפְגֶעשְׁטַאנֶען, אוּן אִיז גֶעלָאפְן צוּם קֵבֶר; אוּן אַז עֶר הָאט זִיךְ אַיינְגֶעבּוֹיגְן אוּן אַרַיינְגֶעקוּקְט, הָאט עֶר גֶעזֶען דִי תַּכְרִיכִים אַלֵיין; אוּן עֶר הָאט זִיךְ אוּמְגֶעקֶערְט אַהֵיים, אוּן הָאט זִיךְ גֶעחִידוּשְׁט אִיבֶּער דֶעם, וָואס עֶס אִיז גֶעשֶׁען.
13
אוּן זֶע, צְוֵויי פוּן זֵיי זֶענֶען גְרָאד יֶענֶעם טָאג גֶעגַאנְגֶען צוּ אַ דָארְף וָואס הָאט גֶעהֵייסְן עַמָאוּס, וָואס אִיז גֶעוֶוען זֶעכְצִיק סְטַאדְיֶעס פוּן יְרוּשָׁלַיִם.
14
אוּן זֵיי הָאבְּן גֶעשְׁמוּסְט אֵיינֶער מִיט דֶעם אַנְדֶערְן וֶועגְן דֶעם, וָואס הָאט זִיךְ גֶעטְרָאפְן.
15
אוּן עֶס אִיז גֶעוֶוען, בְּשַׁעַת זֵיי הָאבְּן גֶעשְׁמוּסְט אוּן זִיךְ אִינְאֵיינֶעם מְפַלְפֵּל גֶעוֶוען, אִיז יֵשׁוּעַ אַלֵיין הָאט גֶענֶעעֶנְט, אוּן אִיז מִיט זֵיי גֶעגַאנְגֶען.
16
אָבֶּער זֵייעֶרֶע אוֹיגְן זֶענֶען גֶעוֶוען פַארְשְׁטֶעלְט, כְּדֵי זֵיי זָאלְן אִים נִישְׁט דֶערְקֶענֶען.
17
אוּן עֶר הָאט צוּ זֵיי גֶעזָאגְט: וָואסֶערֶע גֶערֶעדֶערַייעֶן זֶענֶען דָאס, וָואס אִיר פִירְט אֵיינֶער מִיט דֶעם אַנְדֶערְן בְּעֵת אִיר גֵייט? אוּן זֵיי זֶענֶען שְׁטֵיין גֶעבְּלִיבְּן, אוּן הָאבְּן אוֹיסְגֶעזֶען אוּמֶעטִיק.
18
אוּן אֵיינֶער פוּן זֵיי, מִיטְן נָאמֶען קְלֶעאָפַאס, הָאט אִים גֶעעֶנְטְפֶערְט: בִּיסְטוּ דֶער אֵיינְצִיקֶער, וָואס טוּט זִיךְ אוֹיפְהַאלְטְן אִין יְרוּשָׁלַיִם, אוּן וֵוייסְט נִישְׁט דִי גֶעשֶׁעעֶנִישְׁן, וָואס זֶענֶען דָארְטְן גֶעשֶׁען אִין דִי דָאזִיקֶע טֶעג?
19
אוּן עֶר הָאט צוּ זֵיי גֶעזָאגְט: וָואסֶערֶע גֶעשֶׁעעֶנִישְׁן? הָאבְּן זֵיי צוּ אִים גֶעזָאגְט: פוּנְוֶועגְן יֵשׁוּעַ הַנוֹצְרִי, וָואס אִיז גֶעוֶוען אַ נָבִיא, מֶעכְטִיק אִין מַעֲשִׂים אוּן אִין וָוארְט, פַאר גָאט אוּן דֶעם גַאנְצְן פָאלְק,
20
אוּן וִוי אַזוֹי אוּנְדְזֶערֶע רָאשֵׁי־כֹּהַנִים אוּן שָׂרִים הָאבְּן אִים אִיבֶּערְגֶעעֶנְטְפֶערְט פַארְמִשְׁפָּט צוּ וֶוערְן צוּם טוֹיט, אוּן אִים גֶעקְרֵייצִיקְט.
21
אָבֶּער מִיר הָאבְּן גֶעהָאפְט, אַז עֶר אִיז דֶער, וָואס הָאט גֶעזָאלְט אוֹיסְלֵייזְן יִשְׂרָאֵל. אוּן חוּצְדֶעם אַלֶעמֶען, אִיז הַיינְט שׁוֹין דֶער דְרִיטֶער טָאג, פוּן זִינְט דָאס אִיז גֶעשֶׁען.
22
דֶערְצוּ נָאךְ הָאבְּן עֶטְלֶעכֶע פוּן אוּנְדְזֶערֶע פְרוֹיעֶן אוּנְדְז אִיבֶּערְרַאשְׁט; זֵיי זֶענֶען אִין דֶער פְרִי גֶעוֶוען בַּיים קֵבֶר,
23
אוּן וֶוען זֵיי הָאבְּן נִישְׁט גֶעפוּנֶען זַיין גוּף, זֶענֶען זֵיי גֶעקוּמֶען אוּן הָאבְּן גֶעזָאגְט, אַז זֵיי הָאבְּן אוֹיךְ גֶעזֶען אַ זֶעאוּנְג פוּן מַלְאָכִים, וָואס הָאבְּן גֶעזָאגְט, אַז עֶר לֶעבְּט.
24
אוּן עֶטְלֶעכֶע פוּן אוּנְדְז זֶענֶען גֶעגַאנְגֶען צוּם קֵבֶר, אוּן הָאבְּן אִים גֶעפוּנֶען פּוּנְקְט אַזוֹי וִוי דִי פְרוֹיעֶן הָאבְּן גֶעזָאגְט; אָבֶּער אִים הָאבְּן זֵיי נִישְׁט גֶעזֶען.
25
אוּן עֶר הָאט צוּ זֵיי גֶעזָאגְט: אָ נַארִישֶׁע מֶענְטְשְׁן, אוּן שְׁוֶוערְהַארְצִיקֶע צוּ גְלוֹיבְּן אִין אַלְץ, וָואס דִי נְבִיאִים הָאבְּן גֶערֶעדְט!
26
צִי הָאט נִישְׁט דֶער מָשִׁיחַ גֶעדַארְפְט לַיידְן דִי דָאזִיקֶע זַאכְן, אוּן אַרַיינְקוּמֶען אִין זַיין הֶערְלְעכְקַייט?
27
אוּן עֶר הָאט אָנְגֶעהוֹיבְּן פוּן מֹשֶׁה אוּן אַלֶע נְבִיאִים, אוּן הָאט זֵיי פַארְטַייטְשְׁט אִין אַלֶע שְׁרִיפְטְן, דִי זַאכְן וָואס הָאבְּן וֶועגְן אִים גֶערֶעדְט.
28
אוּן זֵיי הָאבְּן זִיךְ דֶערְנֶענְטֶערְט צוּ דֶעם דָארְף, וואוּהִין זֵיי זֶענֶען גֶעגַאנְגֶען; אוּן עֶר הָאט זִיךְ גֶעמַאכְט, וִוי עֶר וָואלְט וֶועלְן גֵיין וַוייטֶער.
29
אוּן זֵיי הָאבְּן אִים גֶעבֶּעטְן, אַזוֹי צוּ זָאגְן: פַארְבְּלַייבּ מִיט אוּנְדְז, וָוארִים עֶס אִיז קֶעגְן אָוְונְט, אוּן דֶער טָאג הָאט זִיךְ שׁוֹין גֶענֵייגְט. אוּן עֶר אִיז אַרַיינְגֶעגַאנְגֶען צוּ פַארְבְּלַייבְּן מִיט זֵיי.
30
אוּן עֶס אִיז גֶעוֶוען, בְּעֵת עֶר אִיז מִיט זֵיי גֶעזֶעסְן בַּיים טִישׁ, הָאט עֶר גֶענוּמֶען מַצָה אוּן אַ בְּרָכָה גֶעמַאכְט, אוּן עֶר הָאט זִי צֶעבְּרָאכְן אוּן זֵיי גֶעגֶעבְּן.
31
אוּן זֵייעֶרֶע אוֹיגְן זֶענֶען גֶעעֶפְנְט גֶעוָוארְן, אוּן זֵיי הָאבְּן אִים דֶערְקֶענְט; אוּן עֶר אִיז פַארְשְׁוְואוּנְדְן פַאר זֵייעֶרֶע אוֹיגְן.
32
אוּן זֵיי הָאבְּן אֵיינֶער צוּם אַנְדֶערְן גֶעזָאגְט: הָאט אוּנְדְזֶער הַארְץ נִישְׁט גֶעבְּרֶענְט אִין אוּנְדְז, בְּשַׁעַת עֶר הָאט צוּ אוּנְדְז גֶערֶעדְט אוֹיפְן וֶועג, אוּן פַאר אוּנְדְז גֶעעֶפְנְט דִי כִּתְבֵי־הַקוֹדֶשׁ?
33
אוּן זֵיי זֶענֶען אוֹיפְגֶעשְׁטַאנֶען גְלַייךְ אִין יֶענֶער שָׂעָה, אוּן הָאבְּן זִיךְ אוּמְגֶעקֶערְט קֵיין יְרוּשָׁלַיִם; אוּן הָאבְּן גֶעפוּנֶען דִי עֶלְף פַארְזַאמְלְט אִינְאֵיינֶעם, אוּן דִי וָואס זֶענֶען מִיט זֵיי גֶעוֶוען,
34
וָואס הָאבְּן גֶעזָאגְט: דֶער הַאר אִיז בֶּאֱמֶת אוֹיפְגֶעשְׁטַאנֶען, אוּן הָאט זִיךְ בַּאוִויזְן צוּ שִׁמְעוֹן!
35
אוּן זֵיי הָאבְּן אִיבֶּערְגֶעחַזְרְט, וָואס סֶע הָאט זִיךְ גֶעטְרָאפְן אוֹיפְן וֶועג, אוּן וִוי אַזוֹי עֶר אִיז פוּן זֵיי דֶערְקֶענְט גֶעוָוארְן בַּיים צֶעבְּרֶעכְן דִי מַצָה.
36
אוּן בְּעֵת זֵיי הָאבְּן גֶערֶעדְט וֶועגְן דִי דָאזִיקֶע זַאכְן, אִיז עֶר אַלֵיין גֶעשְׁטַאנֶען אִין דֶער מִיט צְוִוישְׁן זֵיי, אוּן הָאט צוּ זֵיי גֶעזָאגְט: שָׁלוֹם־עַלֵיכֶם!
37
אָבֶּער זֵיי הָאבְּן זִיךְ דֶערְשְׁרָאקְן אוּן מוֹרֶא גֶעהַאט, אוּן גֶעמֵיינְט, אַז זֵיי זֶעעֶן אַ גֵייסְט.
38
אוּן עֶר הָאט צוּ זֵיי גֶעזָאגְט: וָואס זֶענְט אִיר דֶערְשְׁרָאקְן, אוּן פַארְוָואס דֶערְוֶועקְן זִיךְ מַחְשָׁבוֹת אִין אַייעֶר הַארְצְן?
39
זֶעט מַיינֶע הֶענְט אוּן מַיינֶע פִיס, אַז דָאס בִּין אִיךְ אַלֵיין; רִירְט מִיךְ אָן אוּן זֶעט; וָוארִים אַ גֵייסְט הָאט נִישְׁט קֵיין פְלֵיישׁ אוּן בֵּיינֶער, וִוי אִיר זֶעט, אִיךְ הָאבּ.
40
אוּן בְּעֵת עֶר הָאט דָאס גֶעזָאגְט, הָאט עֶר זֵיי גֶעוִויזְן זַיינֶע הֶענְט אוּן זַיינֶע פִיס.
41
אוּן בְּשַׁעַת זֵיי הָאבְּן נָאךְ אַלְץ נִישְׁט גֶעגְלוֹיבְּט פַאר שִׂמְחָה, אוּן הָאבְּן זִיךְ גֶעחִידוּשְׁט, הָאט עֶר צוּ זֵיי גֶעזָאגְט: הָאט אִיר דָא עֶפֶּעס צוּ עֶסְן?
42
אוּן זֵיי הָאבְּן אִים גֶעגֶעבְּן אַ שְׁטִיקְל גֶעבְּרָאטְנֶע פִישׁ.
43
אוּן עֶר הָאט עֶס גֶענוּמֶען, אוּן הָאט עֶס גֶעגֶעסְן פַאר זֵייעֶרֶע אוֹיגְן.
44
אוּן עֶר הָאט צוּ זֵיי גֶעזָאגְט: דָאס זֶענֶען מַיינֶע רֵייד, וָואס אִיךְ הָאבּ צוּ אַייךְ גֶערֶעדְט, בְּשַׁעַת אִיךְ בִּין נָאךְ גֶעוֶוען מִיט אַייךְ, אַז אַלְץ מוּז מְקוּיָם וֶוערְן, וָואס סֶע שְׁטֵייט גֶעשְׁרִיבְּן וֶועגְן מִיר אִין תּוֹרַת־מֹשֶׁה, אוּן דִי נְבִיאִים, אוּן תְּהִלִים.
45
דֶערְנָאךְ הָאט עֶר גֶעעֶפְנְט זֵייעֶר פַארְשְׁטַאנְד, כְּדֵי זֵיי זָאלְן פַארְשְׁטֵיין דִי כִּתְבֵי־הַקוֹדֶשׁ,
46
אוּן עֶר הָאט צוּ זֵיי גֶעזָאגְט: אַזוֹי שְׁטֵייט גֶעשְׁרִיבְּן, אַז דֶער מָשִׁיחַ זָאל לַיידְן, אוּן דֶעם דְרִיטְן טָאג וִוידֶער אוֹיפְשְׁטֵיין תְּחִיַת־הַמֵתִים;
47
אוּן אַז תְּשׁוּבָה אוּן פַארְגֶעבּוּנְג פוּן זִינְד זָאלְן גֶעדַרְשְׁנְט וֶוערְן אִין זַיין נָאמֶען צוּ אַלֶע אוּמוֹת, אָנְהֵייבְּנְדִיק פוּן יְרוּשָׁלַיִם.
48
אִיר זֶענְט עֵדוּת פוּן דִי דָאזִיקֶע זַאכְן.
49
אוּן אָט שִׁיק אִיךְ אַרוֹיס אוֹיף אַייךְ דִי הַבְטָחָה פוּן מַיין פָאטֶער; אוּן אִיר זָאלְט פַארְבְּלַייבְּן אִין דֶער שְׁטָאט, בִּיז אִיר וֶועט בַּאקְלֵיידְט וֶוערְן מִיט מַאכְט פוּן אוֹיבְן.
50
אוּן עֶר הָאט זֵיי אַרוֹיסְגֶעפִירְט בִּיז אַנְטְקֶעגְנְאִיבֶּער בֵּית־הִינִי, אוּן עֶר הָאט אוֹיפְגֶעהוֹיבְּן זַיינֶע הֶענְט, אוּן הָאט זֵיי גֶעבֶּענְטְשְׁט.
51
אוּן עֶס אִיז גֶעוֶוען, בְּשַׁעַת עֶר הָאט זֵיי גֶעבֶּענְטְשְׁט, הָאט עֶר זִיךְ אָפְּגֶעשֵׁיידְט פוּן זֵיי, אוּן אִיז אַרוֹיפְגֶענוּמֶען גֶעוָוארְן אִין הִימְל אַרַיין.
52
אוּן זֵיי הָאבְּן זִיךְ גֶעבּוּקְט צוּ אִים, אוּן הָאבְּן זִיךְ אוּמְגֶעקֶערְט קֵיין יְרוּשָׁלַיִם מִיט גְרוֹיס שִׂמְחָה,
53
אוּן זֵיי זֶענֶען שְׁטֶענְדִיק גֶעוֶוען אִין דֶעם בֵּית־הַמִקְדָשׁ, אוּן הָאבְּן גֶעלוֹיבְּט גָאט.