אידיש
1
אוּן זֵייעֶר גַאנְצֶע פַארְזַאמְלוּנְג אִיז אוֹיפְגֶעשְׁטַאנֶען, אוּן הָאבְּן אִים גֶעבְּרַאכְט פַאר פִּילַאטוּס.
2
אוּן זֵיי הָאבְּן אִים אָנְגֶעהוֹיבְּן צוּ בַּאשׁוּלְדִיקְן, אַזוֹי צוּ זָאגְן: מִיר הָאבְּן גֶעפוּנֶען, אַז דֶער דָאזִיקֶער מֶענְטְשׁ פַארְפִירְט אוּנְדְזֶער פָאלְק, אוּן פַארְוֶוערְט צוּ גֶעבְּן מַס דֶעם קֵיסָר, אוּן זָאגְט, אַז עֶר אִיז דֶער מֵלֶך־הַמָשִׁיחַ.
3
אוּן פִּילַאטוּס הָאט אִים גֶעפְרֶעגְט: בִּיסְטוּ דֶער מֶלֶךְ פוּן דִי יִידְן? אוּן עֶר הָאט אִים גֶעעֶנְטְפֶערְט: דוּ זָאגְסְט עֶס.
4
אוּן פִּילַאטוּס הָאט גֶעזָאגְט צוּ דִי רָאשֵׁי־כֹּהַנִים אוּן דֶעם פָאלְק: אִיךְ גֶעפִין נִישְׁט קֵיין שׁוּלְד אִין דֶעם דָאזִיקְן מֶענְטְשְׁן.
5
אָבֶּער זֵיי זֶענֶען נָאךְ מֶער צוּגֶעשְׁטַאנֶען, אוּן הָאבְּן גֶעזָאגְט: עֶר הֶעצְט אוֹיף דָאס פָאלְק, מִיט זַיין לֶערְנֶען אִין גַאנְץ יְהוּדָה, אָנְהֵייבְּנְדִיק פוּן גָלִיל בִּיז דַאנֶען.
6
אוּן אַז פִּילַאטוּס הָאט דָאס גֶעהֶערְט, הָאט עֶר גֶעפְרֶעגְט, צִי דֶער מֶענְטְשׁ אִיז אַ גָלִילֶער.
7
אוּן וֶוען עֶר אִיז גֶעוָואר גֶעוָוארְן, אַז עֶר אִיז פוּן הוֹרְדוֹסְעֶס מֶמְשָׁלָה, הָאט עֶר אִים גֶעשִׁיקְט צוּ הוֹרְדוּס, וָואס אִיז גְרָאד אִין יֶענֶע טֶעג גֶעוֶוען אִין יְרוּשָׁלַיִם.
8
אוּן וֶוען הוֹרְדוֹס הָאט גֶעזֶען יֵשׁוּעַ, הָאט עֶר זִיךְ זֵייעֶר גֶעפְרֵייט, וָוארִים שׁוֹין אַ לַאנְגֶע צַייט, אַז עֶר הָאט אִים בַּאגֶערְט צוּ זֶען, מַחְמַת עֶר הָאט גֶעהֶערְט וֶועגְן אִים, אוּן עֶר הָאט גֶעהָאפְט צוּ זֶען עֶפֶּעס אַ נֵס דוּרְךְ אִים.
9
אוּן עֶר הָאט אִים גֶענוּמֶען אַ סַך אוֹיסְפְרֶעגְן; אָבֶּער עֶר הָאט אִים גָארְנִישְׁט גֶעעֶנְטְפֶערְט.
10
אוּן דִי רָאשֵׁי־כֹּהַנִים אוּן דִי סוֹפְרִים זֶענֶען גֶעשְׁטַאנֶען, אוּן הָאבְּן אִים שְׁוֶוער בַּאשׁוּלְדִיקְט.
11
אוּן הוֹרְדוֹס מִיט זַיינֶע זֶעלְנֶער הָאבְּן אִים גֶעמַאכְט צוּ גָארְנִישְׁט, אוּן אִים אוֹיסְגֶעלַאכְט, אוּן אָנְטוּעֶנְדִיק אִים אִין פְּרֶעכְטִיקֶע קְלֵיידֶער, הָאט עֶר אִים צוּרִיקְגֶעשִׁיקְט צוּ פִּילַאטוּס.
12
אוּן הוֹרְדוֹס אוּן פִּילַאטוּס זֶענֶען יֶענֶעם טָאג גֶעוָוארְן פְרַיינְט אֵיינֶער מִיטְן אַנְדֶערְן, וָוארִים פְרִיעֶר זֶענֶען זֵיי גֶעוֶוען פַארְפַיינְט צְוִוישְׁן זִיךְ.
13
אוּן פִּילַאטוּס הָאט צוּזַאמֶענְגֶערוּפְן דִי רָאשֵׁי־כֹּהַנִים, אוּן דִי שָׂרִים, אוּן דָאס פָאלְק,
14
אוּן הָאט צוּ זֵיי גֶעזָאגְט: אִיר הָאט צוּ מִיר גֶעבְּרַאכְט דֶעם דָאזִיקְן מֶענְטְשְׁן, וִוי אֵיינֶעם, וָואס פַארְפִירְט דָאס פָאלְק; אוּן נָאכְדֶעם וִוי אִיךְ הָאבּ אִים אוֹיסְגֶעפָארְשְׁט פַאר אַייךְ, עֶרְשְׁט, אִיךְ הָאבּ נִישְׁט גֶעפוּנֶען קֵיין שׁוּלְד אִין דֶעם מֶענְטְשְׁן בְּנוֹגֵע יֶענֶע זַאכְן, אִין וָואס אִיר בַּאשׁוּלְדִיקְט אִים.
15
נֵיין, אוֹיךְ נִישְׁט הוֹרְדוֹס, וָוארִים עֶר הָאט אִים צוּרִיקְגֶעשִׁיקְט צוּ אוּנְדְז; אוּן אָט הָאט עֶר גָארְנִישְׁט גֶעטָאן, עֶר זָאל וֶוערְט זַיין דֶעם טוֹיט.
16
אִיךְ וִויל אִים דֶערִיבֶּער בַּאשְׁטְרָאפְן, אוּן אִים לָאזְן פְרַיי.
17
אוּן עֶר הָאט פַאר זֵיי גֶעמוּזְט בַּאפְרַייעֶן אֵיינֶעם אוֹיף יוֹם־טוֹב.
18
אוּן זֵיי הָאבְּן אַלֶע אִינְאֵיינֶעם אוֹיסְגֶעשְׁרִיגְן: אַוֶועק מִיט דֶעם דָאזִיקְן, אוּן בַּאפְרַיי אוּנְדְז בַּר־אַבָּא.
19
אוּן יֶענֶער אִיז צוּלִיבּ עֶפֶּעס אַ מְרִידָה אִין דֶער שְׁטָאט, אוּן פַאר אַ רְצִיחָה, אַרַיינְגֶעוָוארְפְן גֶעוָוארְן אִין דֶער תְּפִיסָה אַרַיין.
20
וּן פִּילַאטוּס הָאט צוּ זֵיי וִוידֶער גֶערֶעדְט, אוּן הָאט בַּאגֶערְט צוּ בַּאפְרַייעֶן יֵשׁוּעַ;
21
נָאר זֵיי הָאבְּן גֶעשְׁרִיגְן; קְרֵייצִיק, קְרֵייצִיק אִים!
22
אוּן עֶר הָאט צוּם דְרִיטְן מָאל צוּ זֵיי גֶעזָאגְט: פַארְוָואס, וָואסֶער שְׁלֶעכְטְס הָאט עֶר גֶעטָאן? אִיךְ הָאבּ אִין אִים נִישְׁט גֶעפוּנֶען קֵיין שׁוּלְד, וָואס זָאל וֶוערְט זַיין דֶעם טוֹיט; אִיךְ וֶועל אִים דֶערִיבֶּער בַּאשְׁטְרָאפְן אוּן אִים לָאזְן פְרַיי.
23
אָבֶּער זֵיי זֶענֶען צוּ אִים צוּגֶעשְׁטַאנֶען, אוּן מִיט הוֹיכֶע גֶעשְׁרַייעֶן הָאבְּן זֵיי פַארְלַאנְגְט, אַז עֶר זָאל גֶעקְרֵייצִיקְט וֶוערְן. אוּן זֵייעֶרֶע קוֹלוֹת הָאבְּן גוֹבֵר גֶעוֶוען.
24
אוּן פִּילַאטוּס הָאט אַרוֹיסְגֶעגֶעבְּן אַ פְּסַק, אַז זֵייעֶר פַארְלַאנְג זָאל גֶעטָאן וֶוערְן.
25
אוּן עֶר הָאט בַּאפְרַייט דֶעם, וָואס אִיז אַרַיינְגֶעוָוארְפְן גֶעוָוארְן אִין דֶער תְּפִיסָה אַרַיין פַאר מְרִידָה אוּן רְצִיחָה, וֶועמֶען זֵיי הָאבְּן פַארְלַאנְגְט; אוּן יֵשׁוּעַ הָאט עֶר אִיבֶּערְגֶעעֶנְטְפֶערְט לוֹיט זֵייעֶר וִוילְן.
26
אוּן בְּעֵת זֵיי הָאבְּן אִים אַוֶועקְגֶעפִירְט, הָאבְּן זֵיי גֶעכַאפְּט אֵיינֶעם, שִׁמְעוֹן פוּן קוּרִינִי, וָואס אִיז גֶעקוּמֶען פוּן דֶעם פֶעלְד, אוּן הָאבְּן אוֹיף אִים אַרוֹיפְגֶעלֵייגְט דֶעם צְלָב, אִים נָאכְצוּטְרָאגְן יֵשׁוּעַ.
27
אוּן עֶס אִיז אִים נָאכְגֶעגַאנְגֶען אַ גְרוֹיסֶער הַמוֹן פוּן דֶעם פָאלְק, אוּן פוּן פְרוֹיעֶן, וָואס הָאבְּן אִים בַּאוֵויינְט אוּן בַּאקְלָאגְט.
28
אוּן יֵשׁוּעַ הָאט זִיךְ גֶעוֶוענְדְט צוּ זֵיי, אוּן גֶעזָאגְט: טֶעכְטֶער פוּן יְרוּשָׁלַיִם, וֵויינְט נִישְׁט אִיבֶּער מִיר, נַייעֶרְט וֵויינְט אוֹיף זִיךְ אַלֵיין, אוּן פַאר אַייעֶרֶע קִינְדֶער.
29
וָוארִים אָט קוּמֶען טֶעג, אִין וֶועלְכֶע מֶע וֶועט זָאגְן: וָואוֹיל אִיז דִי עַקָרוֹת, אוּן דִי לַייבֶּער, וָואס הָאבְּן קֵיינְמָאל נִישְׁט גֶעטְרָאגְן, אוּן דִי בְּרִיסְט, וָואס הָאבְּן קֵיינְמָאל נִישְׁט גֶעגֶעבְּן צוּ זוֹיגְן!
30
דֶעמָאלְט וֶועלְן זֵיי זָאגְן צוּ דִי בֶּערְג: פַאלְט אוֹיף אוּנְדְז, אוּן צוּ דִי הֵייכְן: דֶעקְט אוּנְדְז צוּ.
31
וַוייל אוֹיבּ מֶען טוּט אַזוֹינְס דֶעם גְרִינֶעם בּוֹים, וָואס וֶועט מֶען שׁוֹין טָאן צוּם טְרוּקֶענֶעם?
32
אוּן אוֹיךְ צְוֵויי אַנְדֶערֶע, וָואס זֶענֶען גֶעוֶוען רְשָׁעִים, זֶענֶען גֶעפִירְט גֶעוָוארְן מִיט אִים גֶעטֵייט צוּ וֶוערְן.
33
אוּן אַז זֵיי זֶענֶען גֶעקוּמֶען צוּ דֶעם פְּלַאץ, וָואס אִיז גֶערוּפְן גֶעוָוארְן גָלְגָלְתָּא, הָאבְּן זֵיי אִים דָארְט גֶעקְרֵייצִיקְט, אוּן דִי רְשָׁעִים, אֵיינֶעם צוּ דֶער רֶעכְטֶער הַאנְט אוּן דֶעם אַנְדֶערְן צוּ דֶער לִינְקֶער.
34
אוּן יֵשׁוּעַ הָאט גֶעזָאגְט: פָאטֶער, זַיי זֵיי מוֹחְל; וָוארִים זֵיי וֵוייסְן נִישְׁט וָואס זֵיי טְוּעֶן! אוּן בַּיים צֶעטֵיילְן זַיינֶע קְלֵיידֶער צְוִוישְׁן זִיךְ, הָאבְּן זֵיי גֶעוָוארְפְן גוֹרָל.
35
אוּן דָאס פָאלְק אִיז גֶעשְׁטַאנֶען אוּן הָאט צוּגֶעקוּקְט; אוּן דִי שָׂרִים הָאבְּן פוּן אִים אָפְּגֶעשְׁפֶּעט, אוּן גֶעזָאגְט: אַנְדֶערֶע הָאט עֶר מַצִיל גֶעוֶוען; זָאל עֶר זִיךְ אַלֵיין מַצִיל זַיין, אוֹיבּ דָאס אִיז דֶער מָשִׁיחַ פוּן גָאט, זַיין אוֹיסְדֶערְוֵויילְטֶערֶע.
36
אוּן אוֹיךְ דִי זֶעלְנֶער הָאבְּן אִים אוֹיסְגֶעלַאכְט, אוּן הָאבְּן גֶענֶעעֶנְט אוּן אִים גֶעגֶעבְּן עֶסִיק,
37
אוּן גֶעזָאגְט: אוֹיבּ דוּ בִּיסְט דֶער מֶלֶךְ פוּן דִי יִידְן, זַיי דִיךְ אַלֵיין מַצִיל.
38
אוּן אִיבֶּער אִים אִיז אוֹיךְ גֶעוֶוען אַן אוֹיפְשְׁרִיפְט: דָאס אִיז דֶער מֶלֶךְ פוּן דִי יִידְן.
39
אוּן אֵיינֶער פוּן דִי רְשָׁעִים, וָואס אִיז גֶעהָאנְגֶען גֶעוָוארְן, הָאט אִים גֶעלֶעסְטֶערְט, אַזוֹי צוּ זָאגְן: צִי בִּיסְטוּ נִישְׁט דֶער מָשִׁיחַ? זֵיי מַצִיל דִיךְ אוּן אוּנְדְז.
40
אוּן דֶער אַנְדֶערֶער הָאט אִים אוֹיסְגֶעמוּסְרְט, אוּן גֶעזָאגְט: צִי הָאסְטוּ אֲפִילוּ נִישְׁט מוֹרֶא פַאר גָאט, וָואס דוּ טוּסְט לַיידְן דִי זֶעלְבֶּע שְׁטְרָאף?
41
אוּן מִיר אַוַודַאי לוֹיטְן מִשְׁפָּט; וָוארִים מִיר קְרִיגְן דֶעם שְׂכַר, וָואס אוּנְדְזֶערֶע מַעֲשִׂים זֶענֶען וֶוערְט גֶעוֶוען; דֶער דָאזִיקֶער אָבֶּער הָאט נִישְׁט גֶעטָאן קֵיין שׁוּם שְׁלֶעכְטְס.
42
אוּן עֶר הָאט גֶעזָאגְט: יֵשׁוּעַ, גֶעדֶענְק מִיךְ, וֶוען דוּ וֶועסְט קוּמֶען אִין דַיין מַלְכוּת אַרַיין.
43
אוּן עֶר הָאט צוּ אִים גֶעזָאגְט: בֶּאֱמֶת, אִיךְ זָאג דִיר, הַיינְט וֶועסְטוּ זַיין מִיט מִיר אִין גַן־עֵדֶן.
44
אוּן עֶס אִיז שׁוֹין גֶעוֶוען אַרוּם דֶער זֶעקְסְטֶער שָׂעָה, אוּן אַ פִינְצְטֶערְנִישׁ אִיז גֶעקוּמֶען אִיבֶּער דֶעם גַאנְצְן לַאנְד, בִּיז דֶער נַיינְטֶער שָׂעָה.
45
אוּן דִי זוּן אִיז פִינְצְטֶער גֶעוָוארְן; אוּן דָאס פָּרוֹכֶת פוּן דֶעם הֵיכָל אִיז צֶערִיסְן גֶעוָוארְן אִין צְוֵוייעֶן.
46
אוּן יֵשׁוּעַ הָאט גֶעשְׁרִיגְן מִיט אַ הוֹיךְ קוֹל, אוּן הָאט גֶעזָאגְט: פָאטֶער, אִין דַיינֶע הֶענְט גִיבּ אִיךְ אִיבֶּער מַיין גֵייסְט! אוּן בְּעֵת עֶר הָאט דָאס גֶעזָאגְט, הָאט עֶר אוֹיסְגֶעהוֹיכְט זַיין גֵייסְט.
47
אוּן אַז דֶער הוֹיפְּטְמַאן הָאט גֶעזֶען וָואס עֶס אִיז גֶעשֶׁען, הָאט עֶר אָפְּגֶעגֶעבְּן כָּבוֹד צוּ גָאט, אוּן הָאט גֶעזָאגְט: בֶּאֱמֶת, דֶער דָאזִיקֶער מֶענְטְשׁ אִיז גֶעוֶוען אַ צַדִיק.
48
אוּן בְּעֵת דָאס גַאנְצֶע פָאלְק, וָואס אִיז זִיךְ צוּנוֹיפְגֶעקוּמֶען, הָאט גֶעזֶען וָואס ס׳אִיז גֶעשֶׁען, הָאבְּן זֵיי זִיךְ אוּמְגֶעקֶערְט אוּן זִיךְ גֶעקְלַאפְּט אִין הַארְצְן.
49
אוּן אַלֶע זַיינֶע בַּאקַאנְטֶע, אוּן דִי פְרוֹיעֶן, וָואס זֶענֶען מִיטְגֶעגַאנְגֶען מִיט אִים פוּן גָלִיל, זֶענֶען גֶעשְׁטַאנֶען פוּן דֶערְוַוייטְנְס אוּן הָאבְּן דָאס צוּגֶעזֶען.
50
אוּן אָט אִיז גֶעוֶוען אַ מֶענְטְשׁ, וָואס הָאט גֶעהֵייסְן יוֹסֵף, פוּן דֶער יִידִישֶׁער שְׁטָאט רָמָתַיִם. עֶר אִיז גֶעוֶוען אַ בַּעַל־יוֹעֵץ, אַ גוּטֶער מֶענְטְשׁ אוּן אַ צַדִיק,
51
וָואס הָאט נִישְׁט מַסְכִּים גֶעוֶוען מִיט זֵייעֶר עֵצָה, אָדֶער מִיט זֵייעֶרֶע מַעֲשִׂים , אוּן וָואס הָאט גֶעוַוארְט אוֹיף דֶעם מַלְכוּת פוּן גָאט.
52
דֶער דָאזִיקֶער אִיז גֶעגַאנְגֶען צוּ פִּילַאטוּס, אוּן הָאט גֶעבֶּעטְן דֶעם גוּף פוּן יֵשׁוּעַ.
53
אוּן עֶר הָאט אִים אַרָאפְּגֶענוּמֶען, אוּן הָאט אִים אַיינְגֶעוִויקְלְט אִין לַייוְונְטֶע תַּכְרִיכִים, אוּן הָאט אִים אַרַיינְגֶעלֵייגְט אִין אַ קֵבֶר, וָואס אִיז גֶעוֶוען אוֹיסְגֶעהַאקְט אִין אַ פֶעלְזְן, אוּן אִין וֶועלְכְן קֵיינֶער אִיז נָאךְ קֵיינְמָאל נִישְׁט גֶעלֶעגְן.
54
אוּן עֶס אִיז גֶעוֶוען עֶרֶב־שַׁבָּת, אוּן דֶער שַׁבָּת הָאט גֶענֶעעֶנְט.
55
אוּן דִי פְרוֹיעֶן, וָואס זֶענֶען גֶעקוּמֶען מִיט אִים פוּן גָלִיל, זֶענֶען נָאכְגֶעגַאנְגֶען, אוּן הָאבְּן בַּאקוּקְט דֶעם קֵבֶר, אוּן וִוי אַזוֹי זַיין גוּף אִיז גֶעלֵייגְט גֶעוָוארְן;
56
אוּן זֵיי הָאבְּן זִיךְ אוּמְגֶעקֶערְט, אוּן הָאבְּן אָנְגֶעגְרֵייט בְּשָׂמִים אוּן זַאלְבְּאֵיילְן. אוּן שַׁבָּת הָאבְּן זֵיי גֶערוּט לוֹיט דֶעם דִין.