אידיש
1
אוּן סֶע הָאט גֶענֶעעֶנְט דֶער חַג־הַמַצוֹת, וָואס וֶוערְט גֶערוּפְן פֵּסַח.
2
אוּן דִי רָאשֵׁי־כֹּהַנִים אוּן דִי סוֹפְרִים הָאבְּן גֶעזוּכְט וִוי אַזוֹי אִים אוּמְצוּבְּרֶענְגֶען; וָוארִים זֵיי הָאבְּן מוֹרֶא גֶעהַאט פַאר דֶעם פָאלְק.
3
אוּן דֶער שָׂטָן אִיז אַרַיין אִין יְהוּדָה, וָואס אִיז גֶערוּפְן גֶעוָוארְן אִישׁ קְרִיוֹת, וָואס אִיז גֶעוֶוען פוּן דֶער צָאל פוּן דִי צְוֶועלְף;
4
אוּן עֶר אִיז אַוֶועקְגֶעגַאנְגֶען, אוּן הָאט זִיךְ צוּנוֹיפְגֶערֶעדְט מִיט דִי רָאשֵׁי־כֹּהַנִים אוּן שָׂרִים, וִוי אַזוֹי עֶר זָאל אִים קֶענֶען אִיבֶּערְעֶנְטְפֶערְן צוּ זֵיי.
5
אוּן זֵיי הָאבְּן זִיךְ גֶעפְרֵייט, אוּן הָאבְּן אָפְּגֶעמַאכְט צוּ גֶעבְּן אִים גֶעלְט.
6
אוּן עֶר הָאט מַסְכִּים גֶעוֶוען, אוּן הָאט גֶעזוּכְט אַ גֶעלֶעגְנְהֵייט אִים אִיבֶּערְצוּעֶנְטְפֶערְן צוּ זֵיי, נִישְׁט אִין דִי אוֹיגְן פוּן דֶעם פָאלְק.
7
אוּן סֶע אִיז גֶעקוּמֶען דֶער טָאג פוּן חַג־הַמַצוֹת, וָואס אִין אִים מוּז מֶען מַקְרִיב זַיין דֶעם קָרְבָּן־פֶּסַח.
8
אוּן עֶר הָאט גֶעשִׁיקְט פֶּעטְרוּס אוּן יוֹחָנָן, אוּן הָאט גֶעזָאגְט: גֵייט אוּן גְרֵייט אָן פַאר אוּנְדְז דֶעם סֵדֶר, כְּדֵי מִיר זָאלְן עֶסְן.
9
אוּן זֵיי הָאבְּן צוּ אִים גֶעזָאגְט: וואוּ וִוילְסְטוּ, אַז מִיר זָאלְן אִים אָנְגְרֵייטְן?
10
הָאט עֶר צוּ זֵיי גֶעזָאגְט: זֶעט, בְּעֵת אִיר וֶועט אַרַיינְקוּמֶען אִין דֶער שְׁטָאט אַרַיין, וֶועט אַייךְ בַּאגֶעגֶענֶען אַ מַאן, וָואס טְרָאגְט אַ קְרוּג מִיט וַואסֶער; גֵייט אִים נָאךְ אִין דֶעם הוֹיז אַרַיין, וואוּ עֶר וֶועט אַרַיינְגֵיין.
11
אוּן אִיר זָאלְט זָאגְן צוּ דֶעם בַּעַל־הַבָּית: דֶער רֶבִּי לָאזְט דִיר זָאגְן: וואוּ אִיז דָאס גַאסְט־צִימֶער, וואוּ אִיךְ וֶועל עֶסְן דֶעם קָרְבַּן־פֶּסַח מִיט מַיינֶע תַּלְמִידִים?
12
אוּן עֶר וֶועט אַייךְ וַוייזְן אַ גְרוֹיסֶע אוֹיבֶּערְשְׁטֶע שְׁטוּבּ, אַ פַארְטִיק אָנְגֶעגְרֵייטֶע, דָארְטְן זָאלְט אִיר אָנְגְרֵייטְן.
13
אוּן זֵיי זֶענֶען גֶעגַאנְגֶען, אוּן הָאבְּן גֶעפוּנֶען אַזוֹי וִוי עֶר הָאט צוּ זֵיי גֶעזָאגְט; אוּן זֵיי הָאבְּן אָנְגֶעגְרֵייט דֶעם קָרְבַּן־פֶּסַח.
14
אוּן אַז דִי שָׂעָה הָאט גֶענֶעעֶנְט, הָאט עֶר זִיךְ אַנִידֶערְגֶעזֶעצְט, אוּן דִי שְׁלִיחִים מִיט אִים.
15
אוּן עֶר הָאט צוּ זֵיי גֶעזָאגְט: מִיט בַּאגֶער הָאבּ אִיךְ בַּאגֶערְט צוּ עֶסְן מִיט אַייךְ דֶעם דָאזִיקְן קָרְבַּן־פֶּסַח, אֵיידֶער אִיךְ טוּ לַיידְן;
16
וָוארִים אִיךְ זָאג אַייךְ, אִיךְ וֶועל אִים מֶער נִישְׁט עֶסְן, בִּיז עֶר וֶועט מְמַלֵא וֶוערְן אִין דֶעם מַלְכוּת פוּן גָאט.
17
אוּן עֶר הָאט גֶענוּמֶען אַ כּוֹס, אוּן אַז עֶר הָאט אַ בְּרָכָה גֶעמַאכְט, הָאט עֶר גֶעזָאגְט: נֶעמְט אִים, אוּן צֶעטֵיילְט אִים צְוִוישְׁן זִיךְ;
18
וָוארִים אִיךְ זָאג אַייךְ, אִיךְ וֶועל מֶער נִישְׁט טְרִינְקֶען פוּן דֶער פְרוּכְט פוּן דֶעם וַויינְשְׁטָאק, בִּיז סֶע וֶועט קוּמֶען דָאס מַלְכוּת פוּן גָאט.
19
אוּן עֶר הָאט גֶענוּמֶען מַצָה, אוּן הָאט אַ בְּרָכָה גֶעמַאכְט, אוּן זִי צֶעבְּרָאכְן אוּן גֶעגֶעבְּן צוּ זֵיי, אוּן גֶעזָאגְט: דָאס אִיז מַיין לַייבּ, וָואס וֶוערְט גֶעגֶעבְּן פַאר אַייךְ; טוּט דָאס אִין מַיין אָנְדֶענְק.
20
אוּן אוֹיף אַזַא אוֹיפְן דֶעם כּוֹס נָאךְ דֶער סְעוּדָה, אַזוֹי צוּ זָאגְן: דֶער דָאזִיקֶער כּוֹס אִיז דֶער נַייעֶר בּוּנְד אִין מַיין בְּלוּט, וָואס וֶוערְט פַארְגָאסְן פַאר אַייךְ.
21
דָאךְ זֶע, דִי הַאנְט פוּן מַיין פַארֶעטֶער אִיז מִיט מִיר אוֹיפְן טִישׁ.
22
בֶּאֱמֶת, דֶער בֶּן־אָדָם גֵייט, וִוי סֶע אִיז בַּאשְׁטִימְט גֶעוָוארְן; אָבֶּער וֵויי צוּ יֶענֶעם מֶענְטְשְׁן, דוּרְךְ וֶועמֶען עֶר וֶוערְט פַארְרָאטְן!
23
אוּן זֵיי הָאבְּן אָנְגֶעהוֹיבְּן צוּ פָארְשְׁן צְוִוישְׁן זִיךְ, וֶוער קָאן עֶס זַיין דֶער, וָואס וֶועט טָאן דִי דָאזִיקֶע זַאך.
24
אוּן סֶע הָאט זִיךְ אוֹיךְ אוֹיפְגֶעהוֹיבְּן אַ מַחְלוֹקֶת צְוִוישְׁן זֵיי, וֶוער פוּן זֵיי דַארְף פַארְרֶעכְנְט וֶוערְן פַאר דֶעם גְרֶעסְטְן.
25
אוּן עֶר הָאט צוּ זֵיי גֶעזָאגְט: דִי מְלָכִים פוּן דִי גוֹייִם הֶערְשְׁן אִיבֶּער זֵיי, אוּן דִי, וָואס הָאבְּן שְׁלִיטָה אִיבֶּער זֵיי, וֶוערְן גֶערוּפְן בַּעֲלֵי־חֶסֶד.
26
אִיר אָבֶּער זָאלְט נִישְׁט זַיין אַזוֹי; נַייעֶרְט דֶער גְרֶעסְטֶער צְוִוישְׁן אַייךְ, זָאל וֶוערְן וִוי דֶער יִינְגֶערֶער, אוּן דֶער עֶלְטְסְטֶער, וִוי דֶער, וָואס טוּט דִינֶען.
27
וָוארִים וֶוער אִיז גְרֶעסֶער, דֶער וָואס זִיצְט בַּיים טִישׁ, אָדֶער דֶער, וָואס בַּאדִינְט? צִי אִיז נִישְׁט דֶער, וָואס זִיצְט בַּיים טִישׁ? אָבֶּער אִיךְ בִּין אִין אַייעֶר מִיט וִוי דֶער, וָואס בַּאדִינְט.
28
אוּן אִיר זֶענְט דִי, וָואס זֶענֶען גֶעשְׁטַאנֶען מִיט מִיר אִין מַיינֶע נִסָיוֹנוֹת;
29
אוּן אִיךְ בַּאשְׁטִים פַאר אַייךְ אַ מְלוּכָה, פּוּנְקְט וִוי מַיין פָאטֶער הָאט בַּאשְׁטִימְט פַאר מִיר,
30
כְּדֵי אִיר זָאלְט עֶסְן אוּן טְרִינְקֶען בַּיי מַיין טִישׁ אִין מַיין מַלְכוּת, אוּן זִיצְן אוֹיף טְרָאנֶען אוּן מִשְׁפָּטְן דִי צְוֶועלְף שְׁבָטִים פוּן יִשְׂרָאֵל.
31
שִׁמְעוֹן, שִׁמְעוֹן, זֶע, דֶער שָׂטָן הָאט אַייךְ בַּאגֶערְט צוּ קְרִיגְן, כְּדֵי אַייךְ צוּ קֶענֶען זִיפְּן וִוי וֵוייץ;
32
אָבֶּער אִיךְ הָאבּ מִתְפַּלֵל גֶעוֶוען, אַז דַיין אֶמוּנָה זָאל זִיךְ נִישְׁט אוֹיסְלָאזְן; אוּן דוּ, בְּעֵת דוּ וֶועסְט תְּשׁוּבָה טָאן, זָאלְסְטוּ שְׁטַארְקְן דַיינֶע בְּרִידֶער.
33
אוּן עֶר הָאט צוּ אִים גֶעזָאגְט: הַאר, אִיךְ בִּין גְרֵייט צוּ גֵיין מִיט דִיר אִין תְּפִיסָה, אוּן אֲפִילוּ צוּם טוֹיט.
34
הָאט עֶר גֶעזָאגְט: אִיךְ זָאג דִיר, פֶּעטְרוֹס, דֶער הָאן וֶועט הַיינְט נִישְׁט קְרֵייעֶן, אֵיידֶער דוּ וֶועסְט דְרַיי מָאל לֵייקֶענֶען, אַז דוּ קֶענְסְט מִיךְ.
35
אוּן עֶר הָאט צוּ זֵיי גֶעזָאגְט: בְּעֵת אִיךְ הָאבּ אַייךְ אַרוֹיסְגֶעשִׁיקְט אָן אַ בַּייטְל, אוּן רַייזֶעזַאק, אוּן שִׁיךְ, הָאט אַייךְ עֶפֶּעס גֶעפֶעלְט? הָאבְּן זֵיי גֶעזָאגְט: גָארְנִישְׁט.
36
אוּן עֶר הָאט צוּ זֵיי גֶעזָאגְט: אִיצְט אָבֶּער, דֶער, וָואס הָאט אַ בַּייטְל, לָאז עֶר אִים נֶעמֶען, אוּן אַזוֹי אוֹיךְ דֶעם רַייזֶעזַאק. אוּן דֶער, וָואס הָאט נִישְׁט קֵיין שְׁוֶוערְד, זָאל פַארְקוֹיפְן זַיין מַאנְטְל, אוּן זִיךְ אִים קוֹיפְן.
37
וָוארִים אִיךְ זָאג אַייךְ, אַז דָאס, וָואס סֶע שְׁטֵייט גֶעשְׁרִיבְּן, מוּז אִין מִיר מְמַלֵא וֶוערְן: אוּן עֶר אִיז גֶעצֵיילְט גֶעוָוארְן מִיט פַארְבְּרֶעכֶער; וָוארִים דָאס, וָואס אִיז נוֹגֵע מִיר, קוּמְט צוּ אַ סוֹף.
38
אוּן זֵיי הָאבְּן גֶעזָאגְט: הַאר, זֶע, דָא זֶענֶען צְוֵויי שְׁוֶוערְדְן; אוּן עֶר הָאט צוּ זֵיי גֶעזָאגְט: דָאס אִיז גֶענוּג.
39
אוּן עֶר אִיז אַרוֹיסְגֶעקוּמֶען, אוּן אִיז גֶעגַאנְגֶען, וִוי זַיין מִנְהָג אִיז גֶעוֶוען, צוּם הַר־הַזֵיתִים; אוּן דִי תַּלְמִידִים זֶענֶען אִים אוֹיךְ נָאכְגֶעגַאנְגֶען.
40
אוּן אַז עֶר אִיז גֶעקוּמֶען אוֹיפְן פְּלַאץ, הָאט עֶר צוּ זֵיי גֶעזָאגְט: זַייט מִתְפַּלֵל, אַז אִיר זָאלְט נִישְׁט קוּמֶען צוּ קֵיין נִסָיוֹן.
41
אוּן עֶר הָאט זִיךְ אָפְּגֶעשֵׁיידְט פוּן זֵיי אַרוּם אַ וַוארְף פוּן אַ אוּן עֶר הָאט אַנִידֶערְגֶעקְנִיט, אוּן הָאט מִתְפַּלֵל גֶעוֶוען,
42
אַזוֹי צוּ זָאגְן: פָאטֶער, אוֹיבּ דוּ וִוילְסְט, טוּ אָפּ פוּן מִיר דֶעם דָאזִיקְן כּוֹס; דָאךְ נִישְׁט מַיין רָצוּן, נַייעֶרְט דַיינֶער זָאל גֶעשֶׁען.
43
אוּן אַ מַלְאַךְ פוּן הִימְל הָאט זִיךְ צוּ אִים בַּאוִויזְן, אוּן הָאט אִים גֶעשְׁטַארְקְט.
44
אוּן בְּעֵת עֶר הָאט זִיךְ גֶערַאנְגְלְט מִיטְן טוֹיט, הָאט עֶר מִיט מֶער כַּוָונָה מִתְפַּלֵל גֶעוֶוען; אוּן זַיין שְׁוֵוייס אִיז גֶעוָוארְן וִוי גְרוֹיסֶע טְרָאפְּנְס בְּלוּט, וָואס זֶענֶען אַרָאפְּגֶעפַאלְן אוֹיף דֶער עֶרְד.
45
אוּן אַז עֶר אִיז אוֹיפְגֶעשְׁטַאנֶען פוּן זַיין תְּפִילָה־טָאן, אִיז עֶר גֶעקוּמֶען צוּ דִי תַּלְמִידִים, אוּן הָאט זֵיי גֶעפוּנֶען שְׁלָאפְן פוּן צַעַר,
46
אוּן עֶר הָאט צוּ זֵיי גֶעזָאגְט: פַארְוָואס שְׁלָאפְט אִיר? שְׁטֵייט אוֹיף אוּן זֵייט מִתְפַּלֵל, אַז אִיר זָאלְט נִישְׁט קוּמֶען צוּ קֵיין נִסָיוֹן.
47
בְּשַׁעַת עֶר הָאט נָאךְ גֶערֶעדְט, אִיז אָנְגֶעקוּמֶען אַ הַמוֹן, אוּן יֶענֶער פוּן דִי צְוֶועלְף, וָואס הָאט גֶעהֵייסְן יְהוּדָה, אִיז גֶעגַאנְגֶען פָארְוֹיס פַאר זֵיי. אוּן עֶר הָאט גֶענֶעעֶנְט צוּ יֵשׁוּעַ, אִים צוּ קוּשְׁן;
48
אָבֶּער יֵשׁוּעַ הָאט צוּ אִים גֶעזָאגְט: יְהוּדָה, עֶנְטְפֶערְסְטוּ אִיבֶּער דֶעם בֶּן־אָדָם מִיט אַ קוּשׂ?
49
אוּן בְּעֵת דִי, וָואס זֶענֶען גֶעוֶוען אַרוּם אִים, הָאבְּן גֶעזֶען וָואס דָא וֶועט וֶוערְן, הָאבְּן זֵיי גֶעזָאגְט: הַאר, זָאלְן מִיר שְׁלָאגְן מִיט דֶער שְׁוֶוערְד?
50
אוּן אֵיינֶער פוּן זֵיי הָאט גֶעשְׁלָאגְן דֶעם כֹּהֵן־גָדוֹלְס קְנֶעכְט, אוּן הָאט אִים אָפְּגֶעהַאקְט זַיין רֶעכְטְן אוֹיעֶר.
51
אָבֶּער יֵשׁוּעַ הָאט גֶעזָאגְט: גֶענוּג, לָאזְט אָפּ! אוּן עֶר הָאט בַּארִירְט זַיין אוֹיעֶר, אוּן הָאט אִים גֶעהֵיילְט.
52
אוּן יֵשׁוּעַ הָאט גֶעזָאגְט צוּ דִי רָאשֵׁי־כֹּהַנִים אוּן שָׂרִים פוּן דֶעם בֵּית־הַמִקְדָשׁ, אוּן צוּ דִי זְקֵנִים, וָואס זֶענֶען גֶעקוּמֶען קֶעגְן אִים: זֶענְט אִיר אַרוֹיסְגֶעקוּמֶען וִוי קֶעגְן אַ גַזְלָן, מִיט שְׁוֶוערְדְן אוּן שְׁטֶעקְנְס?
53
בְּעֵת אִיךְ בִּין מִיט אַייךְ גֶעוֶוען טָאג־טֶעגְלֶעך אִין בֵּית־הַמִקְדָשׁ, הָאט אִיר נִישְׁט אוֹיסְגֶעשְׁטְרֶעקְט קֵיין הַאנְט קֶעגְן מִיר. אָבֶּער דָאס אִיז אַייעֶר שָׂעָה, אוּן דִי מַאכְט פוּן דֶער פִינְצְטֶערְנִישׁ.
54
אוּן זֵיי הָאבְּן אִים גֶענוּמֶען, אוּן הָאבְּן אִים אַוֶועקְגֶעפִירְט, אוּן אִים גֶעבְּרַאכְט אִין דֶעם כֹּהֵן־גָדוֹלְס הוֹיז אַרַיין. אוּן פֶּעטְרוֹס אִיז נָאכְגֶעגַאנְגֶען פוּן דֶער וַוייטְנְס;
55
אוּן אַז זֵיי הָאבְּן אָנְגֶעצוּנְדְן אַ פַייעֶר אִינְמִיטְן הוֹיף, אוּן זִיךְ אַנִידֶערְגֶעזֶעצְט צוּזַאמֶען, הָאט זִיךְ פֶּעטְרוֹס אַנִידֶערְגֶעזֶעצְט צְוִוישְׁן זֵיי.
56
אוּן אֵיינֶע אַ דִינְסְט הָאט אִים גֶעזֶען זִיצְן בַּיים פַייעֶר, אוּן הָאט אוֹיף אִים שַׁארְף גֶעקוּקְט, אוּן גֶעזָאגְט: אוֹיךְ דֶער מַאן אִיז גֶעוֶוען מִיט אִים.
57
אָבֶּער עֶר הָאט גֶעלֵייקְנְט, אוּן גֶעזָאגְט: פְרוֹי, אִיךְ קֶען אִים נִישְׁט.
58
אוּן אַ בִּיסְל שְׁפֶּעטֶער הָאט אִים אַן אַנְדֶערֶער גֶעזֶען, אוּן גֶעזָאגְט: דוּ בִּיסְט אוֹיךְ אֵיינֶער פוּן זֵיי. אָבֶּער פֶּעטְרוֹס הָאט גֶעזָאגְט: מֶענְטְשׁ, אִיךְ בִּין עֶס נִישְׁט.
59
אוּן עֶפֶּעס אִין אַ שָׂעָה אַרוּם הָאט אַן אַנְדֶערֶער פַארְזִיכֶערְט, אוּן גֶעזָאגְט: בֶּאֱמֶת, אוֹיךְ עֶר אִיז גֶעוֶוען מִיט אִים, וָוארִים עֶר אִיז אַ גָלִילֶער.
60
אָבֶּער פֶּעטְרוֹס הָאט גֶעזָאגְט: מֶענְטְשׁ, אִיךְ וֵוייס נִישְׁט וָואס דוּ זָאגְסְט. אוּן תֵּיכֵּף, בְּשַׁעַת עֶר הָאט נָאךְ גֶערֶעדְט, הָאט דֶער הָאן גֶעקְרֵייט.
61
אוּן דֶער הַאר הָאט זִיךְ אוֹיסְגֶעדְרֵייט, אוּן הָאט גֶעקוּקְט אוֹיף פֶּעטְרוֹס. אוּן פֶּעטְרוֹס הָאט זִיךְ דֶערְמָאנְט דָאס וָוארְט פוּן דֶעם הַאר, וִוי עֶר הָאט צוּ אִים גֶעזָאגְט: אֵיידֶער דֶער הָאן וֶועט הַיינְט קְרֵייעֶן, וֶועסְטוּ מִיךְ דְרַיי מָאל פַארְלֵייקֶענֶען.
62
אוּן עֶר אִיז אַרוֹיסְגֶעגַאנְגֶען, אוּן הָאט זִיךְ בִּיטֶער צֶעוֵויינְט.
63
אוּן דִי מֶענְטְשְׁן, וָואס הָאבְּן גֶעהַאלְטְן יֵשׁוּעַ, הָאבְּן פוּן אִים אָפְּגֶעשְׁפֶּעט אוּן אִים גֶעשְׁלָאגְן.
64
אוּן זֵיי הָאבְּן אִים פַארְדֶעקְט דִי אוֹיגְן, אוּן אִים גֶעפְרֶעגְט: זָאג נְבִיאוֹת, וֶוער אִיז דֶער, וָואס הָאט דִיךְ גֶעשְׁלָאגְן?
65
אוּן נָאךְ אַ סַך אַנְדֶערֶע זַאכְן הָאבְּן זֵיי גֶערֶעדְט קֶעגְן אִים, אוּן אִים גֶעלֶעסְטֶערְט.
66
אוּן וִוי נָאר עֶס אִיז גֶעוָוארְן טָאג, הָאבְּן זִיךְ פַארְזַאמְלְט דִי זְקֵנִים פוּן פָאלְק, אִינְאֵיינֶעם מִיט דִי רָאשֵׁי־כֹּהַנִים אוּן סוֹפְרִים; אוּן זֵיי הָאבְּן אִים אַוֶועקְגֶעפִירְט אִין זֵייעֶר סַנְהֶדְרִין, אוּן הָאבְּן גֶעזָאגְט:
67
אוֹיבּ דוּ בִּיסְט דֶער מָשִׁיחַ, זָאג עֶס אוּנְדְז. אָבֶּער עֶר הָאט צוּ זֵיי גֶעזָאגְט: אוֹיבּ אִיךְ וֶועל אַייךְ זָאגְן, וֶועט אִיר נִישְׁט גְלוֹיבְּן;
68
אוּן אוֹיבּ אִיךְ וֶועל אַייךְ פְרֶעגְן, וֶועט אִיר נִישְׁט עֶנְטְפֶערְן.
69
אָבֶּער פוּן אִיצְט אָן וֶועט דֶער בֶּן־אָדָם זִיצְן בַּיי דֶער רֶעכְטֶער הַאנְט פוּן גָאטְס גְבוּרָה.
70
אוּן זֵיי הָאבְּן אַלֶע גֶעזָאגְט: בִּיסְטוּ דֶען דֶער בֶּן־אֱלֹהִים? הָאט עֶר צוּ זֵיי גֶעזָאגְט: אִיר זָאגְט, אַז אִיךְ בִּין.
71
אוּן זֵיי הָאבְּן גֶעזָאגְט: וָואס דַארְפְן מִיר נָאךְ מֶער עֵדוּת? וָוארִים מִיר הָאבְּן עֶס אַלֵיין גֶעהֶערְט פוּן זַיין אֵייגְן מוֹיל.