אידיש
1
אוּן עֶס אִיז גֶעוֶוען אִין אֵיינֶעם פוּן דִי טֶעג, בְּעֵת עֶר הָאט גֶעלֶערְנְט דָאס פָאלְק אִין דֶעם בֵּית־הַמִקְדָשׁ, אוּן הָאט מְבַשֵׂר גֶעוֶוען דִי גוּטֶע בְּשׂוּרָה, הָאבְּן צוּ אִים גֶענֶעעֶנְט דִי רָאשֵׁי־כֹּהַנִים אוּן דִי סוֹפְרִים מִיט דִי זְקֵנִים,
2
אוּן זֵיי הָאבְּן צוּ אִים גֶעזָאגְט: זָאג אוּנְדְז, מִיט וֶועמֶעס רְשׁוּת טוּסְטוּ דָאס אַלְץ, אָדֶער וֶוער אִז עֶס, וָואס הָאט דִיר גֶעגֶעבְּן דָאס דָאזִיקֶע רְשׁוּת?
3
אוּן עֶר הָאט גֶעעֶנְטְפֶערְט, אוּן צוּ זֵיי גֶעזָאגְט: אִיךְ וִויל אַייךְ אוֹיךְ פְרֶעגְן אַ קַשְׁיָא; נוּ, זָאגְט מִיר:
4
דִי טְבִילָה פוּן יוֹחָנָן, אִיז זִי גֶעוֶוען פוּן הִימְל, אָדֶער פוּן מֶענְטְשְׁן?
5
אוּן זֵיי הָאבְּן זִיךְ גֶעשְׁלָאגְן מִיט דֶער דֵעָה, אוּן גֶעזָאגְט: אוֹיבּ מִיר וֶועלְן זָאגְן: פוּן הִימְל, וֶועט עֶר זָאגְן: פַארְוָואס הָאט אִיר אִים נִישְׁט גֶעגְלוֹיבְּט?
6
וֶועלְן מִיר אָבֶּער זָאגְן: פוּן מֶענְטְשְׁן, וֶועט אוּנְדְז דָאס גַאנְצֶע פָאלְק פַארְשְׁטֵיינֶען; וָוארִים זֵיי זֶענֶען אִיבֶּערְצַייגְט, אַז יוֹחָנָן אִיז גֶעוֶוען אַ נָבִיא.
7
אוּן זֵיי הָאבְּן גֶעעֶנְטְפֶערְט, אַז זֵיי וֵוייסְן נִישְׁט פוּנְוַואנֶען.
8
הָאט יֵשׁוּעַ צוּ זֵיי גֶעזָאגְט: אוֹיבּ אַזוֹי, וֶועל אִיךְ אַייךְ אוֹיךְ נִישְׁט זָאגְן מִיט וֶועמֶעס רְשׁוּת אִיךְ טוּ דָאס.
9
אוּן עֶר הָאט אָנְגֶעהוֹיבְּן רֶעדְן צוּם פָאלְק דָאס דָאזִיקֶע מָשָׁל: אַ מֶענְטְשׁ הָאט גֶעפְלַאנְצְט אַ וַויינְגָארְטְן, אוּן הָאט אִים פַארְדוּנגֶען צוּ וַויינְגֶערְטְנֶער, אוּן אִיז אַוֶועק אִין אַן אַנְדֶער לַאנְד אַרַיין אוֹיף אַ לַאנְגֶער צַייט.
10
אוּן צוּ דֶער בַּאשְׁטִימְטֶער צַייט, הָאט עֶר גֶעשִׁיקְט צוּ דִי וַויינְגֶערְטְנֶער אַ קְנֶעכְט, אַז זֵיי זָאלְן אִים גֶעבְּן פוּן דִי פֵּירוֹת פוּן דֶעם וַויינְגָארְטְן; אָבֶּער דִי וַויינְגֶערְטְנֶער הָאבְּן אִים גֶעשְׁלָאגְן, אוּן אִים אַוֶועקְגֶעשִׁיקְט לֵיידִיק.
11
אוּן עֶר הָאט גֶעשִׁיקְט אַן אַנְדֶערְן קְנֶעכְט; אוּן אוֹיךְ אִים הָאבְּן זֵיי גֶעשְׁלָאגְן, אוּן הָאבְּן אִים מְבַזֶה גֶעוֶוען, אוּן אִים אַוֶועקְגֶעשִׁיקְט לֵיידִיק.
12
אוּן עֶר הָאט גֶעשִׁיקְט נָאךְ אַ דְרִיטְן; אוּן אִים הָאבְּן זֵיי צֶענִיזוֹקְט, אוּן אַרוֹיסְגֶעוָוארְפְן.
13
אוּן דֶער הַאר פוּן דֶעם וַויינְגָארְטְן הָאט גֶעזָאגְט: וָואס זָאל אִיךְ טָאן? אִיךְ וֶועל שִׁיקְן מַיין בַּאלִיבְּטְן זוּן; אֶפְשָׁר וֶועלְן זֵיי דֶרֶךְ־אֶרֶץ הָאבְּן פַאר אִים.
14
אָבֶּער וֶוען דִי וַויינְגֶערְטְנֶער הָאבְּן אִים דֶערְזֶען, הָאבְּן זֵיי זִיךְ מְיַעֵץ גֶעוֶוען אֵיינֶער מִיט דֶעם אַנְדֶערְן, אוּן גֶעזָאגְט: דָאס אִיז דֶער יוֹרֶשׁ; לָאמִיר אִים הַרְגֶענֶען, כְּדֵי דִי יְרוּשָׁה זָאל זַיין אוּנְדְזֶערֶע.
15
אוּן זֵיי הָאבְּן אִים אַרוֹיסְגֶעוָוארְפְן פוּן דֶעם וַויינְגָארְטְן, אוּן הָאבְּן אִים גֶעהַרְגֶעט. בְּכֵן, וָואס וֶועט דֶער הַאר פוּן דֶעם וַויינְגָארְטְן, טָאן צוּ זֵיי?
16
עֶר וֶועט קוּמֶען אוּן אוּמְבְּרֶענְגֶען יֶענֶע וַויינְגֶערְטְנֶער, אוּן דֶעם וַויינְגָארְטְן גֶעבְּן צוּ אַנְדֶערֶע. אוּן אַז זֵיי הָאבְּן דָאס גֶעהֶערְט, הָאבְּן זֵיי גֶעזָאגְט: חַס־וְחָלִילָה!
17
אָבֶּער עֶר הָאט אוֹיף זֵיי גֶעקוּקְט, אוּן גֶעזָאגְט: וָואס דֶען מֵיינְט דָאס, וָואס סֶע שְׁטֵייט גֶעשְׁרִיבְּן: דֶער שְׁטֵיין, וָואס דִי בּוֹימַייסְטֶער הָאבְּן פַארְוָוארְפְן, אִיז גֶעוָוארְן צוּם וִוינְקְלשְׁטֵיין?
18
יֶעדֶער אֵיינֶער, וָואס וֶועט פַאלְן אוֹיף יֶענֶעם שְׁטֵיין, וֶועט זִיךְ צֶעשְׁלָאגְן; אָבֶּער אוֹיף וֶועמֶען עֶר וֶועט פַאלְן, דֶעם וֶועט עֶר צֶעמָאלְן.
19
אוּן דִי סוֹפְרִים אוּן דִי רָאשֵׁי־כֹּהַנִים הָאבְּן גְרָאד אִין יֶענֶער שָׂעָה גֶעזוּכְט צוּ לֵייגְן אוֹיף אִים אַ הַאנְט, אָבֶּער זֵיי הָאבְּן מוֹרֶא גֶעהַאט פַאר דֶעם פָאלְק; וָוארִים זֵיי הָאבְּן פַארְשְׁטַאנֶען, אַז דָאס דָאזִיקֶע מָשָׁל הָאט עֶר גֶערֶעדְט אוֹיף זֵיי.
20
אוּן זֵיי הָאבְּן אִים נָאכְגֶעקוּקְט, אוּן הָאבְּן גֶעשִׁיקְט שְׁפִּיָאנֶען, וָואס הָאבְּן זִיךְ פַארְשְׁטֶעלְט פַאר פְרוּמֶע לַייט, כְּדֵי אִים צוּ כַאפְּן בַּיי זַיינֶע רֵייד, אוּן אִים אִיבֶּערְעֶנְטְפֶערְן צוּ דֶער מַאכְט אוּן אִין רְשׁוּת פוּן דֶעם פְּרָאקוּרַאטָאר.
21
אוּן זֵיי הָאבְּן אִים גֶעפְרֶעגְט: רֶבִּי, מִיר וֵוייסְן, אַז דוּ רֶעדְסְט אוּן לֶערְנְסְט רֶעכְטְפָארְטִיק, אוּן בִּיסְט קֵיינֶעם נִישְׁט נוֹשֵׂא־פָּנִים, נַייעֶרְט לֶערְנְסְט בֶּאֱמֶת דֶעם וֶועג פוּן גָאט.
22
דַארְפְן מִיר גֶעבְּן שְׁטֵייעֶר דֶעם קֵיסָר, אָדֶער נִישְׁט.
23
אָבֶּער עֶר הָאט דֶערְקֶענְט זֵייעֶר כִיטְרֶעקַייט, אוּן הָאט צוּ זֵיי גֶעזָאגְט:
24
וַוייזְט מִיר אַ דִינָר. וֶועמֶעס בִּילְד אוּן אוֹיפְשְׁרִיפְט אִיז דָאס? אוּן זֵיי הָאבְּן גֶעזָאגְט: דֶעם קֵיסָרְס.
25
הָאט עֶר צוּ זֵיי גֶעזָאגְט: גִיט דֶערִיבֶּער דֶעם קֵיסָר דָאס, וָואס אִיז דֶעם קֵיסָרְס, אוּן צוּ גָאט דָאס, וָואס אִיז גָאטְס.
26
אוּן זֵיי הָאבְּן אִים נִישְׁט גֶעקֶענְט כַאפְּן מִיט קֵיין וָוארְט פַאר דֶעם פָאלְק; אוּן זֵיי זֶענֶען נִשְׁתּוֹמֵם גֶעוָוארְן פוּן זַיין עֶנְטְפֶער, אוּן הָאבְּן גֶעשְׁוִויגְן.
27
אוּן סֶע הָאבְּן גֶענֶעעֶנְט עֶטְלֶעכֶע פוּן דִי צְדוֹקִים, וָואס זָאגְן, אַז ס׳אִיז נִישְׁטָא קֵיין תְּחִיַת־הַמֵתִים,
28
אוּן זֵיי הָאבְּן אִים גֶעפְרֶעגְט, אַזוֹי צוּ זָאגְן: רֶבִּי, מֹשֶׁה הָאט אוּנְדְז פִירְגֶעשְׁרִיבְּן, אַז אוֹיבּ אֵיינֶעמְס אַ בְּרוּדֶער וֶועט שְׁטַארְבְּן, וָואס הָאט אַ וַוייבּ, אוּן קֵיין קִינְדֶער הָאט עֶר נִישְׁט, זָאל זַיין בְּרוּדֶער נֶעמֶען דָאס וַוייבּ, אוּן אוֹיפְשְׁטֶעלְן זָאמֶען פַאר זַיין בְּרוּדֶער.
29
אוּן אָט זֶענֶען גֶעוֶוען זִיבְּן בְּרִידֶער; אוּן דֶער עֶרְשְׁטֶער הָאט גֶענוּמֶען אַ וַוייבּ, אוּן אִיז גֶעשְׁטָארְבְּן, אוּן קֵיין קִינְדֶער הָאט עֶר נִישְׁט גֶעהַאט;
30
אוּן דֶער צְוֵוייטֶער
31
אוּן דֶער דְרִיטֶער הָאבְּן זִי גֶענוּמֶען, אוּן אַזוֹי הָאבְּן אוֹיךְ דִי זִיבְּן נִישְׁט גֶעלָאזְט קֵיין קִינְדֶער, אוּן זֶענֶען גֶעשְׁטָארְבְּן.
32
צוּלֶעצְט אִיז אוֹיךְ דִי פְרוֹי גֶעשְׁטָארְבְּן.
33
הַיינְט, בַּיי תְּחִיַת־הַמֵתִים, וֶועמֶעס וַוייבּ וֶועט זִי דֶערִיבֶּער זַיין? וָוארִים דִי זִיבְּן הָאבְּן זִי גֶעהַאט פַאר אַ וַוייבּ.
34
אוּן יֵשׁוּעַ הָאט צוּ זֵיי גֶעזָאגְט: דִי קִינְדֶער פוּן דֶער דָאזִיקֶער וֶועלְט הָאבְּן חַתוּנָה, אוּן מֶע מַאכְט זֵיי חַתוּנָה;
35
אָבֶּער דִי, וָואס זֶענֶען זוֹכֶה צוּ עוֹלָם־הַבָּא אוּן תְּחִיַת־הַמֵתִים, הָאבְּן נִישְׁט חַתוּנָה, אוּן מֶע מַאכְט זֵיי נִישְׁט חַתוּנָה;
36
וָוארִים זֵיי קֶענֶען מֶער נִישְׁט שְׁטַארְבְּן, מַחְמַת זֵיי זֶענֶען גְלַייךְ צוּ מַלְאָכִים, אוּן זֶענֶען קִינְדֶער פוּן גָאט, וַוייל זֵיי זֶענֶען קִינְדֶער פוּן תְּחִיַת־הַמֵתִים.
37
אוּן אַז דִי טוֹיטֶע וֶועלְן אוֹיפְשְׁטֵיין, הָאט אֲפִילוּ מֹשֶׁה אָנְגֶעוִויזִין גֶעוֶוען בַּיים סְנֶה, בְּעֵת עֶר רוּפְט גָאט דֶעם גָאט פוּן אַבְרָהָם, אוּן דֶעם גָאט פוּן יִצְחָק, אוּן דֶעם גָאט פוּן יַעֲקֹב.
38
אוּן גָאט אִיז נִישְׁט דֶער גָאט פוּן טוֹיטֶע, נַייעֶרְט פוּן לֶעבֶּעדִיקֶע, וָוארִים אַלֶע לֶעבְּן פַאר אִים.
39
אוּן עֶטְלֶעכֶע פוּן דִי סוֹפְרִים הָאבְּן גֶעעֶנְטְפֶערְט: רֶבִּי, דוּ הָאסְט וָואוֹיל גֶערֶעדְט.
40
וָוארִים זֵיי הָאבְּן זִיךְ מֶער נִישְׁט דֶערְלוֹיבְּט אִים עֶפֶּעס צוּ פְרֶעגְן.
41
אוּן עֶר הָאט צוּ זֵיי גֶעזָאגְט: וִוי קוּמְט עֶס, וָואס מֶען זָאגְט, אַז דֶער מָשִׁיחַ אִיז דָוִד׳ס זוּן?
42
וָוארִים דָוִד אַלֵיין הָאט גֶעזָאגְט אִין דֶעם סֵפֶר תְּהִלִים: גָאט הָאט גֶעזָאגְט צוּ מַיין הַאר: זֶעץ דִיךְ בַּיי מַיין רֶעכְטֶער הַאנְט,
43
בִּיז אִיךְ וֶועל מַאכְן דַיינֶע פַיינְט פַאר דַיין פוּסְבֶּענְקְל.
44
אוּן אוֹיבּ דָוִד רוּפְט אִים אָן הַאר, וִוי אַזוֹי אִיז עֶר זַיין זוּן?
45
אוּן בְּעֵת דָאס גַאנְצֶע פָאלְק הָאט זִיךְ צוּגֶעהֶערְט, הָאט עֶר גֶעזָאגְט צוּ זַיינֶע תַּלְמִידִים:
46
הִיט אַייךְ פַאר דִי סוֹפְרִים, וָואס הָאבְּן לִיבּ צוּ גֵיין אִין לַאנְגֶע טַלֵיתִים, אוּן הָאבְּן לִיבּ מֶע זָאל זֵיי אָפְּגֶעבְּן שָׁלוֹם אִין דִי מַארְקְפְּלֶעצֶער, אוּן דִי חָשׁוּבְסְטֶע פְּלַאץ אִין דִי שׁוּלְן, אוּן דֶעם אוֹיבְּן־אָן אוֹיף סְעוּדוֹת;
47
זֵיי, וָואס שְׁלִינְגֶען אַיין דִי הַייזֶער פוּן אַלְמָנוֹת, אוּן טְוּעֶן כְּלוֹמְרשְׁט דַאוֶוענֶען לַאנְג. זֵיי וֶועלְן שׁוֹין קְרִיגְן אַ הַארְבֶּערְן פְּסַק.