אידיש
1
אוּן עֶס אִיז גֶעוֶוען אִין יֶענֶע טֶעג, אַז אַ בַּאפֶעל אִיז אַרוֹיסְגֶעגַאנְגֶען פוּן קֵיסָר אוֹיגוּסְטוּס, אַז דִי גַאנְצֶע וֶועלְט זָאל גֶעצֵיילְט וֶוערְן.
2
דָאס אִיז גֶעוֶוען דִי עֶרְשְׁטֶע צֵיילוּנְג, בְּעֵת קוּרִינְיוּס אִיז גֶעוֶוען גוֹבֶערְנַאטָאר פוּן סִירְיֶע.
3
אוּן אַלֶע זֶענֶען גֶעגַאנְגֶען זִיךְ אַיינְשְׁרַייבְּן, יֶעדֶער אֵיינֶער אִין זַיין אֵייגֶענֶער שְׁטָאט.
4
אוּן יוֹסֵף אִיז אוֹיךְ אַרוֹיפְגֶעגַאנְגֶען פוּן גָלִיל, פוּן דֶער שְׁטָאט נְצָרֶת, קֵיין יְהוּדָה, צוּ דֶער שְׁטָאט פוּן דָוִד, וָואס הֵייסְט בֵּית־לֶחֶם, וָוארִים עֶר אִיז גֶעוֶוען פוּן דָוִדס הוֹיז אוּן מִשְׁפָּחָה;
5
כְּדֵי זִיךְ צוּ פַארְשְׁרַייבְּן מִיט מִרְיָם, וָואס אִיז גֶעוֶוען פַארְקְנַסְט צוּ אִים, בְּעֵת זִי אִיז גֶעוֶוען מֶעוּבֶּרֶת.
6
אוּן עֶס אִיז גֶעוֶוען, בְּעֵת זֵיי זֶענֶען דָארְט גֶעוֶוען, זֶענֶען גֶעוָוארְן פוּל דִי טֶעג פוּן אִיר קִימְפֶּעט.
7
אוּן זִי הָאט גֶעבּוֹירְן אִיר זוּן דֶעם בְּכוֹר, אוּן הָאט אִים אַיינְגֶעוִויקְלְט אִין וִוינְדֶעלְעך, אוּן אִים אַרַיינְגֶעלֵייגְט אִין אַ קָארִיטֶע, וָוארִים עֶס אִיז פַאר זֵיי נִישְׁט גֶעוֶוען קֵיין פְּלַאץ אִין דֶער אַכְסַנְיָא.
8
אוּן עֶס זֶענֶען גֶעוֶוען פַּאסְטֶעכֶער אִין יֶענֶער גֶעגְנְט אִין פֶעלְד, וָואס הָאבְּן אַכְטוּנְג גֶעגֶעבְּן בַּיינַאכְט אוֹיף זֵייעֶר סְטַאדֶע.
9
אוּן אַ מַלְאַךְ פוּן גָאט הָאט זִיךְ צוּ זֵיי בַּאוִויזְן, אוּן דִי הֶערְלְעכְקַייט פוּן גָאט הָאט גֶעלוֹיכְטְן אַרוּם זֵיי; אוּן זֵיי הָאבְּן זִיךְ שְׁטַארְק דֶערְשְׁרָאקְן;
10
אוּן דֶער מַלְאַךְ הָאט צוּ זֵיי גֶעזָאגְט: הָאט נִישְׁט קֵיין מוֹרֶא; וָוארִים אָט בְּרֶענְג אִיךְ אַייךְ אַ גוּטֶע בְּשׂוּרָה פוּן אַ גְרוֹיסֶער שִׂמְחָה, וָואס וֶועט זַיין פַאר דֶעם גַאנְצְן פָאלְק;
11
וָוארִים הַיינְט אִיז אַייךְ גֶעבּוֹירְן גֶעוָוארְן אִין דֶער שְׁטָאט פוּן דָוִד אַ גוֹאֵל, וָואס אִיז דֶער מָשִׁיחַ, דֶער הַאר.
12
אוּן דָאס אִיז אַ צֵייכְן פַאר אַייךְ: אִיר וֶועט גֶעפִינֶען אַ קִינְד אַיינְגֶעוִויקְלְט אִין וִוינְדֶעלְעך, אוּן לִיגְן אִין אַ קָארִיטֶע.
13
אוּן פְּלוּצִים אִיז מִיט דֶעם מַלְאַךְ גֶעוֶוען אַ מַחֲנֵה פוּן הִימְלִישְׁן חַיִל, וָואס הָאבְּן גֶעלוֹיבְּט גָאט, אוּן גֶעזָאגְט:
14
כָּבוֹד צוּ גָאט אִין דֶער הֵייךְ, אוּן אוֹיף דֶער עֶרְד שָׁלוֹם צְוִוישְׁן מֶענְטְשְׁן, וָואס אִין זֵיי אִיז זַיין וָואוֹילְגֶעפֶעלְן.
15
אוּן עֶס אִיז גֶעוֶוען, וִוי דִי מַלְאָכִים זֶענֶען פוּן זֵיי אַוֶועק אִין הִימְל אַרַיין, הָאבְּן דִי פַּאסְטֶעכֶער גֶעזָאגְט אֵיינֶער צוּם אַנְדֶערְן: לָאמִיר אִיצְט גֵיין קֵיין בֵּית־לֶחֶם, אוּן זֶען דִי זַאך, וָואס אִיז גֶעשֶׁען, פוּן וָואס גָאט הָאט אוּנְדְז צוּ וִויסְן גֶעטָאן.
16
אוּן זֵיי זֶענֶען גֶעקוּמֶען גֶעשְׁוִוינְד, אוּן הָאבְּן גֶעפוּנֶען מִרְיָם אוּן יוֹסֵף, אוּן דָאס קִינְד לִיגְן אִין דֶער קָארִיטֶע.
17
אוּן אַז זֵיי הָאבְּן עֶס גֶעזֶען, הָאבְּן זֵיי בַּאקַאנְט גֶעמַאכְט דָאס וָוארְט, וָואס אִיז צוּ זֵיי גֶערֶעדְט גֶעוָוארְן וֶועגְן דֶעם דָאזִיקְן קִינְד.
18
אוּן אַלֶע, וָואס הָאבְּן דָאס גֶעהֶערְט, הָאבְּן זִיךְ גֶעוְואוּנְדֶערט וֶועגְן דֶעם, וָואס דִי פַּאסְטֶעכֶער הָאבְּן דֶערְצֵיילְט.
19
אָבֶּער מִרְיָם הָאט אָפְּגֶעהִיט דִי דָאזִיקֶע אַלֶע רֵייד, אוּן הָאט גֶעטְרַאכְט וֶועגְן זֵיי אִין אִיר הַארְץ.
20
אוּן דִי פַּאסְטֶעכֶער הָאבְּן זִיךְ אוּמְגֶעקֶערְט, אוּן הָאבְּן אָפְּגֶעגֶעבְּן כָּבוֹד אוּן גֶעלוֹיבְּט גָאט פַאר אַלְץ, וָואס זֵיי הָאבְּן גֶעהֶערְט אוּן גֶעזֶען, אַזוֹי וִוי עֶס אִיז צוּ זֵיי גֶערֶעדְט גֶעוָוארְן.
21
אוּן אַז עֶס זֶענֶען גֶעוָוארְן פוּל אַכְט טֶעג אִים מַל צוּ זַיין, הָאט מֶען אִים אַ נָאמֶען גֶעגֶעבְּן יֵשׁוּעַ, וִוי דֶער מַלְאַךְ הָאט אִים גֶערוּפְן, אֵיידֶער עֶר אִיז אוֹיפְגֶענוּמֶען גֶעוָוארְן אִין דֶער מוּטֶערְטְרַאַכְט.
22
אוּן בְּעֵת עֶס זֶענֶען גֶעוָוארְן פוּל דִי טֶעג פוּן אִיר רֵיינִיקוּנְג, לוֹיט תּוֹרַת־מֹשֶׁה, הָאבְּן זֵיי אִים אַרוֹיפְגֶעבְּרַאכְט קֵיין יְרוּשָׁלַיִם, אִים צוּ שְׁטֶעלְן פַאר גָאט –
23
וִוי סֶע שְׁטֵייט גֶעשְׁרִיבְּן אִין דֶער תּוֹרָה פוּן גָאט: יֶעדֶער זָכָר, וָואס עֶפְנְט דִי מוּּטֶערְטְרַאַכְט, זָאל גֶערוּפְן וֶוערְן הֵיילִיק צוּ גָאט –
24
אוּן צוּ גֶענֶעעֶנֶען אַ קָרְבָּן, לוֹיט וִוי סֶע אִיז גֶעזָאגְט גֶעוָוארְן אִין דֶער תּוֹרָה פוּן גָאט: אַ פָּאר טוּרְטְל-טוֹיבְּן, אָדֶער צְוֵויי יוּנְגֶע טוֹיבְּן.
25
אוּן זֶע, עֶס אִיז גֶעוֶוען אַ מֶענְטְשׁ אִין יְרוּשָׁלַיִם, וָואס הָאט גֶעהֵייסְן שִׁמְעוֹן, אוּן דֶער דָאזִיקֶער מֶענְטְשׁ אִיז גֶעוֶוען אַ צַדִיק אוּן פְרוּם, אוּן עֶר הָאט גֶעוַוארְט אוֹיף דֶער נֶחָמָה פוּן יִשְׂרָאֵל; אוּן דֶער רוּחַ־הַקוֹדֶשׁ הָאט גֶערוּט אוֹיף אִים.
26
אוּן אִים אִיז אַנְטְפְּלֶעקְט גֶעוָוארְן דוּרְךְ דֶעם רוּחַ־הַקוֹדֶשׁ, אַז עֶר וֶועט נִישְׁט זֶען דֶעם טוֹיט, אֵיידֶער עֶר וֶועט הָאבְּן גֶעזֶען דֶעם מָשִׁיחַ פוּן גָאט.
27
אוּן עֶר אִיז גֶעקוּמֶען דוּרְךְ דֶעם רוּחַ־הַקוֹדֶשׁ אִין בֵּית־הַמִקְדָשׁ אַרַיין; אוּן בְּעֵת דִי עֶלְטֶערְן הָאבְּן אַרַיינְגֶעבְּרַאכְט דָאס קִינְד יֵשׁוּעַ, צוּ טָאן מִיט אִים לוֹיט דֶעם דִין פוּן דֶער תּוֹרָה,
28
הָאט עֶר אִים גֶענוּמֶען אִין זַיינֶע אָרֶעמְס, אוּן גֶעלוֹיבְּט גָאט, אוּן גֶעזָאגְט:
29
אַצִינְד טוּסְטוּ אָפְּלָאזְן דַיין קְנֶעכְט, אָ גָאט, לוֹיט דַיין וָוארְט, בְּשָׁלוֹם;
30
וָוארִים מַיינֶע אוֹיגְן הָאבְּן גֶעזֶען דַיין יְשׁוּעָה,
31
וָואס דוּ הָאסְט אָנְגֶעגְרֵייט פַאר אַלֶע פֶעלְקֶער;
32
אַ לִיכְט צוּ בַּאלַייכְטְן דִי אוּמוֹת, אוּן דֶער כָּבוֹד פוּן דַיין פָאלְק יִשְׂרָאֵל.
33
אוּן זַיין פָאטֶער אוּן זַיין מוּטֶער הָאבְּן זִיךְ גֶעוְואוּנְדֶערט אִיבֶּער דֶעם, וָואס אִיז גֶעזָאגְט גֶעוָוארְן וֶועגְן אִים;
34
אוּן שִׁמְעוֹן הָאט זֵיי גֶעבֶּענְטְשְׁט, אוּן הָאט גֶעזָאגְט צוּ מִרְיָם, זַיין מוּטֶער: זֶע, עֶר אִיז בַּאשְׁטִימְט פַאר דֶעם פַאלְן אוּן דֶעם אוֹיפְשְׁטֵיין פַאר אַ סַך אִין יִשְׂרָאֵל; אוּן פַאר אַ צֵייכְן, וָואס מֶע וֶועט רֶעדְן אַנְטְקֶעגְן –
35
אוּן אַ שְׁוֶוערְד וֶועט דוּרְכְשְׁטֶעכְן דַיין אֵייגֶענֶע זֶעל - כְּדֵי סֶע זָאלְן אַנְטְפְּלֶעקְט וֶוערְן דִי מַחְשָׁבוֹת פוּן אַ סַך הֶערְצֶער.
36
אוּן עֶס אִיז גֶעוֶוען אֵיינֶע אַ נְבִיאָה, חַנָה בַּת־פְּנוּאֵל, פוּן שֵׁבֶט אָשֵׁר; זִי אִיז גֶעוֶוען אִין הוֹיכְן עֶלְטֶער, אוּן הָאט גֶעלֶעבְּט מִיט אִיר מַאן זִיבְּן יָאר פוּן אִיר מֵיידְלְשַׁאפְט,
37
אוּן אִיז גֶעוֶוען אַן אַלְמָנָה פוּן פִיר אוּן אַכְצִיק יָאר. אוּן זִי הָאט נִישְׁט אָפְּגֶעטְרֶעטְן פוּן דֶעם בֵּית־הַמִקְדָשׁ, אוּן הָאט גֶעדִינְט גָאט מִיט תַּעַנֵיתִים אוּן תְּפִילוֹת טָאג אוּן נַאכְט.
38
אוּן גְרָאד אִין יֶענֶער שָׂעָה אִיז זִי אָנְגֶעקוּמֶען, אוּן הָאט גֶענוּמֶען לוֹיבְּן גָאט, אוּן רֶעדְן וֶועגְן אִים פַאר אַלֶע, וָואס הָאבְּן גֶעוַוארְט אוֹיף דֶער גְאוּלָה פוּן יְרוּשָׁלַיִם.
39
אוּן נָאכְדֶעם וִוי זֵיי הָאבְּן מְקַייָם גֶעוֶוען אַלְצְדִינְג, לוֹיט דֶער תּוֹרָה פוּן גָאט, הָאבְּן זֵיי זִיךְ אוּמְגֶעקֶערְט קֵיין גָלִיל, צוּ זֵייעֶר אֵייגֶענֶער שְׁטָאט נְצָרֶת.
40
אוּן דָאס קִינְד אִיז גֶעוַואקְסְן אוּן אִיז גֶעוָוארְן שְׁטַארְק, פוּל מִיט חָכְמָה, אוּן דֶער חֵן פוּן גָאט הָאט גֶערוּט אוֹיף אִים.
41
אוּן זַיינֶע עֶלְטֶערְן פְלֶעגְן עוֹלֵה־רֶגֶל זַיין יֶעדֶעס יָאר קֵיין יְרוּשָׁלַיִם אוֹיף דֶעם יוֹם־טוֹב פֵּסַח.
42
אוּן וֶוען עֶר אִיז אַלְט גֶעוֶוען צְוֶועלְף יָאר, הָאבְּן זֵיי עוֹלֵה־רֶגֶל גֶעוֶוען לוֹיט דֶעם דִין.
43
אוּן אַז דֶער יוֹם־טוֹב הָאט זִיךְ גֶעעֶנְדִיקְט, אוּן זֵיי הָאבְּן זִיךְ אוּמְגֶעקֶערְט אַהֵיים, אִיז דָאס יִינְגְל יֵשׁוּעַ אִיבֶּערְגֶעבְּלִיבְּן אִין יְרוּשָׁלַיִם; אוּן זַיינֶע עֶלְטֶערְן הָאבְּן עֶס נִישְׁט גֶעוואוּסְט.
44
אוּן אַזוֹי וִוי זֵיי הָאבְּן גֶעמֵיינְט, אַז עֶר אִיז מִיט דִי עוֹלֶי־רֶגֶל, זֶענֶען זֵיי אָפְּגֶעגַאנְגֶען אַ טָאג גַאנְג, אוּן הָאבְּן אִים גֶעזוּכְט צְוִוישְׁן זֵייעֶרֶע קְרוֹבִים אוּן בַּאקַאנְטֶע.
45
אוּן אַז זֵיי הָאבְּן אִים נִישְׁט גֶעפוּנֶען, הָאבְּן זֵיי זִיךְ אוּמְגֶעקֶערְט קֵיין יְרוּשָׁלַיִם, אוּן הָאבְּן אִים גֶעזוּכְט.
46
אוּן עֶס אִיז גֶעוֶוען, אִין דְרַיי טֶעג אַרוּם, הָאבְּן זֵיי אִים גֶעפוּנֶען אִין בֵּית־הַמִקְדָשׁ זִיצְן צְוִוישְׁן דִי תַּלְמִידֵי־חֲכָמִים, וִוי עֶר הָאט זִיךְ צוּגֶעהֶערְט אוּן זֵיי גֶעפְרֶעגְט קַשְׁיוּת.
47
אוּן אַלֶע, וָואס הָאבְּן אִים גֶעהֶערְט, הָאבְּן זִיךְ שְׁטַארְק גֶעחִידוּשְׁט אִיבֶּער זַיין שֵׂכְל אוּן זַיינֶע תְּשׁוּבוֹת.
48
אוּן בְּעֵת זֵיי הָאבְּן אִים גֶעזֶען, זֶענֶען זֵיי נִשְׁתּוֹמְם גֶעוָוארְן; אוּן זַיין מוּטֶער הָאט צוּ אִים גֶעזָאגְט: זוּן, פַארְוָואס הָאסְטוּ אוּנְדְז אַזוֹינְס גֶעטָאן? זֶע, דַיין פָאטֶער אוּן אִיךְ הָאבְּן דִיךְ גֶעזוּכְט מִיט צַעַר.
49
אוּן עֶר הָאט צוּ זֵיי גֶעזָאגְט: פַארְוָואס הָאט אִיר מִיךְ גֶעזוּכְט? צִי הָאט אִיר נִישְׁט גֶעוואוּסְט, אַז אִיךְ מוּז זַיין אִין מַיין פָאטֶערְס הוֹיז?
50
אוּן זֵיי הָאבְּן נִישְׁט פַארְשְׁטַאנֶען דָאס וָוארְט, וָואס עֶר הָאט צוּ זֵיי גֶערֶעדְט.
51
אוּן עֶר הָאט מִיט זֵיי אַרָאפְּגֶענִידֶערְט, אוּן אִיז גֶעקוּמֶען קֵיין נְצָרֶת; אוּן עֶר אִיז זֵיי גֶעוֶוען אוּנְטֶערְטֶענִיק; אוּן זַיין מוּטֶער הָאט אָפְּגֶעהִיט דִי דָאזִיקֶע אַלֶע רֵייד אִין אִיר הַארְץ.
52
אוּן יֵשׁוּעַ אִיז גֶעוַואקְסְן אִין חָכְמָה אוּן אִין גֶעשְׁטַאלְט, אוּן אִין חֵן בַּיי גָאט אוּן בַּיי מֶענְטְשְׁן.