אידיש
1
אוּן עֶר אִיז אַרַיינְגֶעקוּמֶען אוּן אִיז דוּרְכְגֶעגַאנְגֶען דוּרְךְ יְרִיחוֹ.
2
אוּן אָט אִיז דָארְטְן גֶעוֶוען אַ מֶענְטְשׁ מִיטְן נָאמֶען זַכַּי, וָואס אִיז גֶעוֶוען פוּן דִי רָאשֵׁי־הַמוֹכְסִים, אוּן עֶר אִיז גֶעוֶוען אַן עוֹשֶׁר.
3
אוּן עֶר הָאט בַּאגֶערְט צוּ זֶען יֵשׁוּעַ, וֶוער עֶר אִיז, אוּן הָאט עֶס נִישְׁט גֶעקָאנְט צוּלִיבּ דֶעם עוֹלָם, מַחְמַת עֶר אִיז גֶעוֶוען קְלֵיין אִין וְואוּקְס.
4
אוּן עֶר אִיז גֶעלָאפְן פָארוֹיס, אוּן הָאט אַרוֹיפְגֶעקְלֶעטֶערְט אוֹיף אַ פֵייגְנְבּוֹים, כְּדֵי אִים צוּ זֶען; וָוארִים עֶר הָאט בַּאדַארְפְט פַארְבַּייגֵיין יֶענֶעם וֶועג.
5
אוּן אַז יֵשׁוּעַ אִיז גֶעקוּמֶען צוּ דֶעם פְּלַאץ, הָאט עֶר אַרוֹיפְגֶעקוּקְט, אוּן צוּ אִים גֶעזָאגְט: זַכַּי, אֵייל דִיךְ, אוּן קוּם אַרָאפּ, וַוייל הַיינְט מוּז אִיךְ אַיינְשְׁטֵיין אִין דַיין הוֹיז.
6
אוּן עֶר אִיז שְׁנֶעל אַרוּנְטֶערְגֶעקוּמֶען, אוּן הָאט אִים אוֹיפְגֶענוּמֶען מִיט שִׂמְחָה.
7
אוּן אַז זֵיי הָאבְּן דָאס גֶעזֶען, הָאבְּן זֵיי אַלֶע גֶעמוּרְמְלְט: צוּ אַ חוֹטֵא אִיז עֶר אַרַיינְגֶעגַאנְגֶען אִיבֶּערְצוּנֶעכְטִיקְן!
8
אוּן זַכַּי הָאט זִיךְ אוֹיפְגֶעשְׁטֶעלְט, אוּן גֶעזָאגְט צוּ דֶעם הַאר: זֶע, הַאר, דִי הֶעלְפְט פוּן מַיין פַארְמֶעגְן גִיבּ אִיךְ דִי אָרֶעמֶע; אוּן אוֹיבּ אִיךְ הָאבּ פוּן עֶמִיצְן עֶפֶּעס בַּאגַזְלְט, וֶועל אִיךְ אִים אוּמְקֶערְן פִירְפַאךְ.
9
אוּן יֵשׁוּעַ הָאט צוּ אִים גֶעזָאגְט: הַיינְט אִיז גֶעקוּמֶען אַ יְשׁוּעָה אוֹיף דֶעם דָאזִיקְן הוֹיז, וַוייל עֶר אִיז אוֹיךְ אַ בֶּן־אַבְרָהָם.
10
וָוארִים דֶער בֶּן־אָדָם אִיז גֶעקוּמֶען זוּכְן אוּן מַצִיל צוּ זַיין דָאס, וָואס אִיז גֶעוֶוען פַארְלוֹירְן.
11
אוּן בְּעֵת זֵיי הָאבְּן דָאס גֶעהֶערְט, הָאט עֶר זֵיי וִוידֶער דֶערְצֵיילְט אַ מָשָׁל, מַחְמַת עֶר אִיז גֶעוֶוען נָאעֶנְט פוּן יְרוּשָׁלַיִם, אוּן זֵיי הָאבְּן גֶעמֵיינְט, אַז דָאס מַלְכוּת פוּן גָאט דַארְף אִינְגִיכְן אַנְטְפְּלֶעקְט וֶוערְן.
12
עֶר הָאט דֶערִיבֶּער גֶעזָאגְט: אֵיינֶער אַן אֵיידְלְמַאן אִיז אַוֶועק אִין אַ וַוייטְן לַאנְד אַרַיין, צוּ קְרִיגְן פַאר זִיךְ אַ מְלוּכָה, אוּן זִיךְ אוּמְצוּקֶערְן.
13
אוּן עֶר הָאט גֶערוּפְן צֶען פוּן זַיינֶע קְנֶעכְט, אוּן הָאט זֵיי גֶעגֶעבְּן צֶען מָנִים, אוּן צוּ זֵיי גֶעזָאגְט: הַאנְדְלְט מִיט דֶעם בִּיז אִיךְ וֶועל צוּרִיקְקוּמֶען.
14
אָבֶּער זַיינֶע שְׁטָאטְלֵייט הָאבְּן אִים פַיינְט גֶעהַאט, אוּן הָאבְּן נָאכְגֶעשִׁיקְט נָאךְ אִים שְׁלוּחִים, אַזוֹי צוּ זָאגְן: מִיר וִוילְן נִישְׁט, אַז דֶער דָאזִיקֶער זָאל הֶערְשְׁן אִיבֶּער אוּנְדְז.
15
אוּן עֶס אִיז גֶעוֶוען, נָאכְדֶעם וִוי עֶר הָאט אִיבֶּערְגֶענוּמֶען דִי מְלוּכָה, אוּן הָאט זִיךְ צוּרִיקְגֶעקֶערְט, הָאט עֶר בַּאפוֹילְן צוּ רוּפְן דִי קְנֶעכְט, וֶועמֶען עֶר הָאט גֶעגֶעבְּן דָאס גֶעלְט, כְּדֵי אוֹיסְצוּגֶעפִינֶען וָואס אִיטְלֶעכֶער הָאט פַארְדִינְט אִין זַיין מִסְחָר.
16
אוּן דֶער עֶרְשְׁטֶער אִיז גֶעקוּמֶען פַאר אִים, אוּן הָאט גֶעזָאגְט: הַאר, דַיין מָנֶה הָאט אַרַיינְגֶעבְּרַאכְט נָאךְ צֶען מָנִים.
17
אוּן עֶר הָאט צוּ אִים גֶעזָאגְט: הָאסְט גוּט גֶעטָאן, דוּ גוּטֶער קְנֶעכְט! וַוייל דוּ בִּיסְט גֶעוֶוען גֶעטְרַיי אִיבֶּער וֵויינִיק, זָאלְסְטוּ הָאבְּן רְשׁוּת אִיבֶּער צֶען שְׁטֶעט.
18
אוּן דֶער צְוֵוייטֶער אִיז גֶעקוּמֶען, אוּן הָאט גֶעזָאגְט: דַיין מָנֶה, הַאר, הָאט אַרַיינְגֶעבְּרַאכְט פִינְף מָנִים.
19
אוּן עֶר הָאט אוֹיךְ צוּ אִים גֶעזָאגְט: זֵיי דוּ אוֹיךְ אִיבֶּער פִינְף שְׁטֶעט.
20
אוּן אַן אַנְדֶערֶער אִיז גֶעקוּמֶען, אוּן הָאט גֶעזָאגְט: הַאר, אָט אִיז דַיין מָנֶה, וָואס אִיךְ הָאבּ גֶעהַאט בַּאהַאלְטְן אִין אַ טִיכְל;
21
וָוארִים אִיךְ הָאבּ מוֹרֶא גֶעהַאט פַאר דִיר, מַחְמַת דוּ בִּיסְט אַ שְׁטְרֶענְגֶער מֶענְטְשׁ; דוּ נֶעמְסְט, וָואס דוּ הָאסְט נִישְׁט אַנִידֶערְגֶעלֵייגְט, אוּן שְׁנַיידְסְט דָאס, וָואס דוּ הָאסְט נִישְׁט גֶעזֵייט.
22
הָאט עֶר צוּ אִים גֶעזָאגְט: לוֹיט דַיין אֵייגְן מוֹיל וֶועל אִיךְ דִיךְ מִשְׁפָּטְן, דוּ שְׁלֶעכְטֶער קְנֶעכְט! דוּ הָאסְט גֶעוואוּסְט, אַז אִיךְ בִּין אַ שְׁטְרֶענְגֶער מֶענְטְשׁ, אַז אִיךְ נֶעם, וָואס אִיךְ הָאבּ נִישְׁט אַנִידֶערְגֶעלֵייגְט, אוּן שְׁנַיידְ, וָואס אִיךְ הָאבּ נִישְׁט גֶעזֵייט.
23
טָא פַארְוָואס הָאסְטוּ נִישְׁט אַרַיינְגֶעגֶעבְּן מַיין גֶעלְט אִין דֶער בַּאנְק, אוּן בַּיי מַיין צוּרִיקְקוּמֶען, וָואלְט אִיךְ עֶס בַּאקוּמֶען מִיט פְּרָאצֶענְט?
24
אוּן עֶר הָאט גֶעזָאגְט צוּ דִי, וָואס זֶענֶען גֶעשְׁטַאנֶען דֶערְבַּיי: נֶעמְט צוּ בַּיי אִים דִי מָנֶה, אוּן גִיט עֶס דֶעם, וָואס הָאט דִי צֶען מָנִים.
25
אוּן זֵיי הָאבְּן צוּ אִים גֶעזָאגְט: הַאר, עֶר הָאט שׁוֹין צֶען מָנִים!
26
אִיךְ זָאג אַייךְ, דֶער, וָואס הָאט, דֶעם וֶועט גֶעגֶעבְּן וֶוערְן; פוּן דֶעם אָבֶּער, וָואס הָאט נִישְׁט, פוּן אִים וֶועט אַוֶועקְגֶענוּמֶען וֶוערְן אֲפִילוּ דָאס, וָואס עֶר הָאט.
27
אוּן יֶענֶע, מַיינֶע שׂוֹנְאִים, וָואס הָאבְּן נִישְׁט גֶעוָואלְט, אַז אִיךְ זָאל הֶערְשְׁן אִיבֶּער זֵיי, בְּרֶענְגְט זֵיי אַהֶער אוּן הַרְגֶעט זֵיי פַאר מַיינֶע אוֹיגְן.
28
אוּן נָאכְדֶעם וִוי עֶר הָאט דָאס גֶעזָאגְט, אִיז עֶר גֶעגַאנְגֶען פָארוֹיס, אוּן הָאט עוֹלֵה־רֶגֶל גֶעוֶוען קֵיין יְרוּשָׁלַיִם.
29
אוּן עֶס אִיז גֶעוֶוען, בְּעֵת עֶר הָאט זִיךְ דֶערְנֶענְטֶערְט קֵיין בֵּית־פַּגֵי אוּן בֵּית־הִינִי, בַּיים בַּארְג וָואס הֵייסְט הַר־הַזֵיתִים, הָאט עֶר גֶעשִׁיקְט צְוֵויי פוּן זַיינֶע תַּלְמִידִים,
30
אוּן גֶעזָאגְט: גֵייט אִין דָארְף אַרַיין אַנְטְקֶעגְנְאִיבֶּער אַייךְ, אוּן בְּעֵת אִיר וֶועט אַרַיינְקוּמֶען, וֶועט אִיר גֶעפִינֶען אַן אֵייזְל צוּגֶעבּוּנְדְן, אוֹיף וֶועלְכְן קֵיינֶער אִיז נָאךְ נִישְׁט גֶעזֶעסְן; בִּינְדְט עֶס אָפּ, אוּן בְּרֶענְגְט עֶס אַהֶער.
31
אוּן אוֹיבּ עֶמִיצֶער וֶועט אַייךְ פְרֶעגְן: פַארְוָואס בִּינְדְט אִיר עֶס אָפּ? זָאלְט אִיר אַזוֹי זָאגְן: דֶער הַאר דַארְף עֶס הָאבְּן.
32
אוּן דִי שְׁלִיחִים זֶענֶען גֶעגַאנְגֶען, אוּן הָאבְּן גֶעפוּנֶען פּוּנְקְט וִוי עֶר הָאט צוּ זֵיי גֶעזָאגְט.
33
אוּן בְּעֵת זֵיי הָאבְּן אָפְּגֶעבּוּנְדְן דָאס אֵייזְל, הָאבְּן זַיינֶע בַּעֲלֵי־בַּתִּים צוּ זֵיי גֶעזָאגְט: פַארְוָואס בִּינְדְט אִיר אָפּ דָאס אֵייזְל?
34
אוּן זֵיי הָאבְּן גֶעזָאגְט: דֶער הַאר דַארְף עֶס הָאבְּן.
35
אוּן זֵיי הָאבְּן עֶס גֶעבְּרַאכְט צוּ יֵשׁוּעַ, אוּן הָאבְּן אַרוֹיפְגֶעוָוארְפְן זֵייעֶרֶע מַלְבּוּשִׁים אוֹיף דֶעם אֵייזְל, אוּן הָאבְּן יֵשׁוּעַ אַרוֹיפְגֶעזֶעצְט דֶערְוֹיף.
36
אוּן בְּעֵת עֶר אִיז גֶעגַאנְגֶען, הָאבְּן זֵיי אוֹיסְגֶעשְׁפְּרֵייט זֵייעֶרֶע מַלְבּוּשִׁים אוֹיפְן וֶועג.
37
אוּן וִוי עֶר הָאט זִיךְ דֶערְנֶענְטֶערְט צוּם אַרָאפְּגַאנְג פוּן דֶעם הַר־הַזֵיתִים, הָאט דֶער גַאנְצֶער עוֹלָם תַּלְמִידִים אָנְגֶעהוֹיבְּן צוּ פְרֵייעֶן זִיךְ אוּן לוֹיבְּן גָאט מִיט אַ הוֹיךְ קוֹל פַאר אַלֶע וְואוּנְדֶערְלֶעכֶע מַעֲשִׂים , וָואס זֵיי הָאבְּן גֶעזֶען,
38
אוּן הָאבְּן גֶעזָאגְט: גֶעבֶּענְטְשְׁט אִיז דֶער מֶלֶךְ, וָואס קוּמְט אִין דֶעם נָאמֶען פוּן גָאט! שָׁלוֹם אִין הִימְל, אוּן כָּבוֹד אִין דֶער הֵייךְ!
39
אוּן עֶטְלֶעכֶע פוּן דִי פְּרוּשִׁים פוּן צְוִוישְׁן דֶעם פָאלְק הָאבְּן צוּ אִים גֶעזָאגְט: רֶבִּי, שְׁרַיי אָן אוֹיף דַיינֶע תַּלְמִידִים.
40
אוּן עֶר הָאט גֶעעֶנְטְפֶערְט: אִיךְ זָאג אַייךְ, אַז אוֹיבּ דִי דָאזִיקֶע וֶועלְן שְׁוַוייגְן, וֶועלְן דִי שְׁטֵיינֶער שְׁרַייעֶן.
41
אוּן בְּעֵת עֶר הָאט זִיךְ דֶערְנֶענְטֶערְט, הָאט עֶר גֶעזֶען דִי שְׁטָאט, אוּן הָאט זִיךְ צֶעוֵויינְט אִיבֶּער אִיר,
42
אוּן גֶעזָאגְט: הַלְוַואי וָואלְטְסְטוּ גֶעוואוּסְט אִין דֶעם הַיינְטִיקְן טָאג דָאס, וָואס קֶער זִיךְ אָן צוּ דַיין שָׁלוֹם! אִיצְט אִיז דָאס אָבֶּער פַארְהוֹילְן פוּן דַיינֶע אוֹיגְן.
43
וָוארִים סֶע וֶועלְן קוּמֶען אוֹיף דִיר טֶעג, וֶוען דַיינֶע שׂוֹנְאִים וֶועלְן אוֹיפְשְׁטֶעלְן אַ וַואל אַרוּם דִיר, אוּן דִיךְ אַרוּמְרִינְגְלֶען, אוּן דִיךְ בַּאלַאגֶערְן פוּן אַלֶע זַייטְן;
44
אוּן וֶועלְן דִיךְ שְׁמֶעטֶערְן צוּ דֶער עֶרְד, אוּן דַיינֶע קִינְדֶער צְוִוישְׁן דִיר, אוּן נִישְׁט לָאזְן אִין דִיר אַיין שְׁטֵיין אוֹיפְן אַנְדֶערְן; מַחְמַת דוּ הָאסְט נִישְׁט דֶערְקֶענְט דִי צַייט, וֶוען דוּ בִּיסְט גֶעדֶענְקְט גֶעוָוארְן.
45
אוּן עֶר אִיז אַרַיינְגֶעגַאנְגֶען אִין דֶעם בֵּית־הַמִקְדָשׁ אַרַיין, אוּן הָאט גֶענוּמֶען אַרוֹיסְטְרַייבְּן דִי, וָואס הָאבְּן פַארְקוֹיפְט,
46
אוּן הָאט צוּ זֵיי גֶעזָאגְט: סֶע שְׁטֵייט גֶעשְׁרִיבְּן: מַיין הוֹיז זָאל זַיין אַ הוֹיז פוּן תְּפִילָה, אָבֶּער אִיר הָאט עֶס גֶעמַאכְט אַ הֵייל פוּן גַזְלָנִים.
47
אוּן עֶר הָאט טָאג־טֶעגְלֶעך גֶעלֶערְנְט אִין דֶעם בֵּית־הַמִקְדָשׁ. אוּן דִי רָאשֵׁי־כֹּהַנִים, אוּן דִי סוֹפְרִים, אוּן דִי עֶלְצְטֶע פוּן פָאלְק הָאבְּן גֶעזוּכְט אִים אוּמְצוּבְּרֶענְגֶען.
48
אוּן זֵיי הָאבְּן נִישְׁט גֶעוואוּסְט וָואס צוּ טָאן, וָוארִים דָאס גַאנְצֶע פָאלְק הָאט זִיךְ בַּאהֶעפְט אִין אִים, אוּן זִיךְ צוּ אִים צוּגֶעהֶערְט.