אידיש
1
אוּן עֶר הָאט זֵיי דֶערִיבֶּער דֶערְצֵיילְט אַ מָשָׁל, אַז זֵיי זָאלְן תָּמִיד מִתְפַּלֵל זַיין, אוּן נִישְׁט מִיד וֶוערְן.
2
אוּן עֶר הָאט גֶעזָאגְט: אִין אֵיינֶער אַ שְׁטָאט אִיז גֶעוֶוען אַ שׁוֹפֵט, וָואס הָאט נִישְׁט מוֹרֶא גֶעהַאט פַאר גָאט, אוּן נִישְׁט נוֹשֵׂא פָּנִים גֶעוֶוען קֵיין מֶענְטְשְׁן.
3
אוּן אִין יֶענֶער שְׁטָאט אִיז גֶעוֶוען אַן אַלְמָנָה, וָואס אִיז אָפְט גֶעקוּמֶען צוּ אִים, אוּן הָאט גֶעזָאגְט: נֶעם זִיךְ אָן פַאר מִיר קֶעגְן מַיין שׂוֹנֵא.
4
אוּן עֶר הָאט אַ צַייטְלַאנְג נִישְׁט גֶעוָואלְט; נָאר דֶערְנָאךְ הָאט עֶר זִיךְ בַּארֶעכְנְט: כָאטְשׁ אִיךְ הָאבּ נִישְׁט קֵיין מוֹרֶא פַאר גָאט, אוּן בִּין נִישְׁט נוֹשֵׂא־פָּנִים קֵיין מֶענְטְשְׁן,
5
דָאךְ, וַוייל דִי דָאזִיקֶע אַלְמָנָה אִיז מִיךְ מַטְרִיחַ, וֶועל אִיךְ מִיךְ אָנְנֶעמֶען פַאר אִיר, וָוארִים זִי וֶועט מִיךְ פַארְמַאטֶערְן מִיט אִיר שְׁטֶענְדִיקְן קוּמֶען.
6
אוּן דֶער הַאר הָאט גֶעזָאגְט: הֶערְט וָואס דֶער אוּמְגֶערֶעכְטֶער שׁוֹפֵט זָאגְט.
7
אוּן צִי וֶועט גָאט זִיךְ נִישְׁט אָנְנֶעמֶען פַאר זַיינֶע אוֹיסְדֶערְוֵויילְטֶע, וָואס רוּפְן צוּ אִים טָאג אוּן נַאכְט, אוּן עֶר אִיז גֶעדוּלְדִיק מִיט זֵיי?
8
אִיךְ זָאג אַייךְ, אַז עֶר וֶועט זִיךְ גִיךְ אָנְנֶעמֶען פַאר זֵיי. אוּן בְּעֵת דֶער בֶּן־אָדָם וֶועט קוּמֶען, צִי וֶועט עֶר דֶען גֶעפִינֶען אֶמוּנָה אוֹיף דֶער עֶרְד?
9
אוּן עֶר הָאט אוֹיךְ גֶעזָאגְט דָאס דָאזִיקֶע מָשָׁל צוּ עֶטְלֶעכֶע, וָואס זֶענֶען גֶעוֶוען זִיכֶער בַּיי זִיךְ, אַז זֵיי זֶענֶען צַדִיקִים, אוּן אַלֶע אַנְדֶערֶע הָאבְּן זֵיי גֶעמַאכְט צוּ גָארְנִישְׁט:
10
צְוֵויי מֶענְטְשְׁן זֶענֶען אַרוֹיפְגֶעגַאנְגֶען אִין דֶעם בֵּית־הַמִקְדָשׁ אַרַיין מִתְפַּלֵל צוּ זַיין; אֵיינֶער אַ פְּרוּשִׁי אוּן דֶער אַנְדֶערֶער אַ מוֹכֵס.
11
דֶער פְּרוּשִׁי אִיז גֶעשְׁטַאנֶען אוּן הָאט אַזוֹי אִין זִיךְ מִתְפַּלֵל גֶעוֶוען: גָאט, אִיךְ דַאנְק דִיר, וָואס אִיךְ בִּין נִישְׁט וִוי דִי אִיבֶּערִיקֶע מֶענְטְשְׁן: רוֹיבֶּער, אוּמְגֶערֶעכְטֶע, נוֹאָפִים, אָדֶער אֲפִילוּ וִוי דֶער דָאזִיקֶער מוֹכֵס.
12
אִיךְ פַאסְט צְוֵויי מָאל אִין דֶער וָואך, אוּן גִיבּ מַעֲשֵׂר פוּן אַלְץ, וָואס אִיךְ קְרִיג.
13
אָבֶּער דֶער מוֹכֵס אִיז גֶעשְׁטַאנֶען פוּנְדֶערְוַוייטְנְס, אוּן הָאט צוּמָאל נִישְׁט גֶעוָואלְט אוֹיפְהֵייבְּן זַיינֶע אוֹיגְן צוּם הִימְל, נַייעֶרְט הָאט זִיךְ גֶעשְׁלָאגְן אִין הַארְצְן, אוּן גֶעזָאגְט: גָאט, הָאבּ רַחֲמָנוּת אוֹיף מִיר, אַ חוֹטֵא!
14
אִיךְ זָאג אַייךְ, דֶער דָאזִיקֶער הָאט אַרָאפְּגֶענִידֶערְט צוּ זַיין הוֹיז מֶער גֶערֶעכְטְפַארְטִיקְט וִוי יֶענֶער; וָוארִים יֶעדֶער אֵיינֶער, וָואס דֶערְהֵייכְט זִיךְ אַלֵיין, וֶועט דֶערְנִידֶערִיקְט וֶוערְן; אוּן וֶוער סֶע דֶערְנִידֶערִיקְט זִיךְ אַלֵיין, וֶועט דֶערְהֵייכְט וֶוערְן.
15
אוּן זֵיי הָאבְּן אוֹיךְ גֶעבְּרַאכְט צוּ אִים קִינְדֶערְלֶעך, כְּדֵי עֶר זָאל זֵיי בֶּענְטְשְׁן; אוּן אַז דִי תַּלְמִידִים הָאבְּן דָאס גֶעזֶען, הָאבְּן זֵיי זִיךְ אוֹיף זֵיי אָנְגֶעבֵּייזֶערְט.
16
אָבֶּער יֵשׁוּעַ הָאט זֵיי צוּגֶערוּפְן צוּ זִיךְ, אוּן גֶעזָאגְט: לָאזְט דִי קִינְדֶער קוּמֶען צוּ מִיר, אוּן פַארְוֶוערְט זֵיי נִישְׁט; וַוייל צוּ אַזֶעלְכֶע גֶעהֶערְט דָאס מַלְכוּת פוּן גָאט.
17
בֶּאֱמֶת, אִיךְ זָאג אַייךְ, וֶוער סֶע וֶועט נִישְׁט מְקַבְּל זַיין דָאס מַלְכוּת פוּן גָאט וִוי אַ קִינְד, דֶער וֶועט בְּשׁוּם־אוֹיפְן נִישְׁט אַרַיינְקוּמֶען אַהִין.
18
אוּן אֵיינֶער אַ שַׂר הָאט אִים גֶעפְרֶעגְט, אַזוֹי צוּ זָאגְן: רֶבִּי גוּטֶער, וָואס זָאל אִיךְ טָאן, כְּדֵי צוּ יַרְשֶׁענֶען אֵייבִּיק לֶעבְּן?
19
אוּן יֵשׁוּעַ הָאט צוּ אִים גֶעזָאגְט: פַארְוָואס רוּפְסְטוּ מִיךְ גוּטֶער? קֵיינֶער אִיז נִישְׁט גוּט, אַחוּץ גָאט אַלֵיין.
20
דוּ קֶענְסְט דִי מִצְוֹות: דוּ זָאלְסְט נִישְׁט מְזַנֶה זַיין, דוּ זָאלְסְט נִישְׁט הַרְגֶענֶען, דוּ זָאלְסְט נִישְׁט גַנְבֶענֶען, דוּ זָאלְסְט נִישְׁט פַאלְשׁ עֵדוּת־זָאגְן, הַאלְט בְּכָּבוֹד דַיין פָאטֶער אוּן מוּטֶער.
21
אוּן עֶר הָאט גֶעזָאגְט: דָאס אַלְץ הָאבּ אִיךְ אָפְּגֶעהִיט פוּן מַיין יוּגְנְט אָן.
22
אוּן אַז יֵשׁוּעַ הָאט דָאס גֶעהֶערְט, הָאט עֶר צוּ אִים גֶעזָאגְט: נָאךְ אַיין זַאך פֶעלְט דִיר: פַארְקוֹיף אַלְץ, וָואס דוּ הָאסְט, אוּן טֵייל עֶס צוּ דִי אָרֶעמֶע, אוּן דוּ וֶועסְט הָאבְּן אַן אוֹצָר אִין הִימְל; אוּן קוּם, אוּן גֵיי מִיר נָאךְ.
23
אוּן אַז עֶר הָאט דָאס גֶעהֶערְט, אִיז עֶר גֶעוָוארְן שְׁטַארְק טְרוֹיעֶרִיק; וָוארִים עֶר אִיז גֶעוֶוען זֵייעֶר רַייךְ.
24
אוּן יֵשׁוּעַ הָאט אִים אָנְגֶעקוּקְט, אוּן גֶעזָאגְט: וִוי שְׁוֶוער אִיז עֶס פַאר דִי, וָואס הָאבְּן עַשִׁירוּת, אַרַיינְצוּקוּמֶען אִין דֶעם מַלְכוּת פוּן גָאט!
25
עֶס אִיז לַייכְטֶער פַאר אַ קֶעמְל דוּרְכְצוּגֵיין דוּרְךְ אַ לֶעכְל פוּן אַ נָאדְל, וִוי פַאר אַן עוֹשֶׁר אַרַיינְצוּקוּמֶען אִין דֶעם מַלְכוּת פוּן גָאט.
26
אוּן דִי, וָואס הָאבְּן דָאס גֶעהֶערְט, הָאבְּן גֶעזָאגְט: טָא וֶוער קָאן נִיצוּל וֶוערְן?
27
אוּן עֶר הָאט גֶעזָאגְט: דָאס, וָואס אִיז בַּיי מֶענְטְשְׁן נִישְׁט מֶעגְלֶעך, אִיז מֶעגְלֶעך בַּיי גָאט.
28
אוּן פֶּעטְרוֹס הָאט גֶעזָאגְט: זֶע, מִיר הָאבְּן אַלְצְדִינְג פַארְלָאזְט, אוּן זֶענֶען דִיר נָאכְגֶעגַאנְגֶען.
29
הָאט עֶר צוּ זֵיי גֶעזָאגְט: בֶּאֱמֶת, אִיךְ זָאג אַייךְ, נִישְׁטָא קֵיינֶער, וָואס הָאט פַארְלָאזְן הוֹיז, אָדֶער וַוייבּ, אָדֶער בְּרִידֶער, אָדֶער עֶלְטֶערְן, אָדֶער קִינְדֶער צוּלִיבּ דֶעם מַלְכוּת פוּן גָאט,
30
אַז עֶר זָאל נִישְׁט בַּאקוּמֶען כֶּפֶל־כִּפְלַיִם אִין דֶעם אִיצְטִיקֶער צַייט, אוּן אִין דֶעם יֶענֶער וֶועלְט, אֵייבִּיק לֶעבְּן.
31
אוּן עֶר הָאט גֶענוּמֶען צוּ זִיךְ דִי צְוֶועלְף, אוּן הָאט צוּ זֵיי גֶעזָאגְט: זֶעט, מִיר גֵייעֶן אַרוֹיף קֵיין יְרוּשָׁלַיִם, אוּן אַלְצְדִינְג, וָואס אִיז גֶעשְׁרִיבְּן גֶעוָוארְן דוּרְךְ דִי נְבִיאִים וֶועגְן דֶעם בֶּן־אָדָם, וֶועט מְקוּיָם וֶוערְן.
32
וָוארִים עֶר וֶועט אִיבֶּערְגֶעעֶנְטְפֶערְט וֶוערְן צוּ דִי גוֹייִם, אוּן וֶועט אוֹיסְגֶעשְׁפֶּעט, אוּן פַארְשֶׁעמְט, אוּן פַארְשְׁפִּיגְן וֶוערְן.
33
אוּן זֵיי וִוילְן אִים שְׁמַייסְן, אוּן טֵייטְן; אוּן דֶעם דְרִיטְן טָאג וֶועט עֶר וִוידֶער אוֹיפְשְׁטֵיין.
34
אוּן זֵיי הָאבְּן גָארְנִישְׁט פַארְשְׁטַאנֶען פוּן דִי דָאזִיקֶע זַאכְן; אוּן דָאס דָאזִיקֶע וָוארְט אִיז גֶעוֶוען פַארְהוֹילְן פוּן זֵיי, אוּן זֵיי הָאבְּן נִישְׁט בַּאנוּמֶען, וָואס עֶס אִיז צוּ זֵיי גֶעזָאגְט גֶעוָוארְן.
35
אוּן עֶס אִיז גֶעוֶוען, בְּעֵת עֶר הָאט זִיךְ דֶערְנֶענְטֶערְט צוּ יְרִיחוֹ, אִיז אֵיינֶער אַ בְּלִינְדֶער גֶעזֶעסְן בַּיים וֶועג, אוּן הָאט גֶעבֶּעטְלְט.
36
אוּן אַז עֶר הָאט גֶעהֶערְט דָאס פָאלְק פַארְבַּייגֵיין, הָאט עֶר זִיךְ נָאכְגֶעפְרֶעגְט, וָואס דָאס בַּאטַייט.
37
אוּן מֶען הָאט אִים גֶעזָאגְט, אַז יֵשׁוּעַ הַנוֹצְרִי גֵייט פַארְבַּיי.
38
אוּן עֶר הָאט גֶעשְׁרִיגְן: יֵשׁוּעַ, בֶּן־דָוִד, הָאבּ רַחֲמָנוּת אוֹיף מִיר!
39
אוּן דִי, וָואס זֶענֶען גֶעגַאנְגֶען פָארְוֹיס, הָאבְּן אוֹיף אִים אָנְגֶעשְׁרִיגְן, אַז עֶר זָאל שְׁוַוייגְן. אָבֶּער עֶר הָאט נָאךְ הֶעכֶער גֶעשְׁרִיגְן: בֶּן־דָוִד, הָאבּ רַחֲמָנוּת אוֹיף מִיר!
40
אוּן יֵשׁוּעַ הָאט זִיךְ אָפְּגֶעשְׁטֶעלְט, אוּן הָאט בַּאפוֹילְן, מֶען זָאל אִים בְּרֶענְגֶען צוּ אִים; אוּן אַז עֶר הָאט זִיךְ דֶערְנֶענְטֶערְט, הָאט עֶר אִים גֶעפְרֶעגְט:
41
וָואס וִוילְסְטוּ, אַז אִיךְ זָאל טָאן פַאר דִיר? הָאט עֶר גֶעזָאגְט: הַאר, אַז אִיךְ זָאל קֶענֶען קְרִיגְן מַיין רְאִיָה.
42
אוּן יֵשׁוּעַ הָאט צוּ אִים גֶעזָאגְט: בַּאקוּם דַיין רְאִיָה. דַיין אֶמוּנָה הָאט דִיר גֶעהָאלְפְן.
43
אוּן עֶר הָאט תֵּיכֵּף בַּאקוּמֶען זַיין רְאִיָה, אוּן אִיז אִים נָאכְגֶעגַאנְגֶען, אוּן הָאט גֶעלוֹיבְּט גָאט, אוּן דָאס גַאנְצֶע פָאלְק, אַז זֵיי הָאבְּן דָאס גֶעזֶען, הָאבְּן אָפְּגֶעגֶעבְּן גָאט אַ לוֹיבּ.