אידיש
1
אוּן עֶר הָאט גֶעזָאגְט צוּ זַיינֶע תַּלְמִידִים: עֶס אִיז אוּמְמֶעגְלֶעך, אַז עֶס זָאלְן נִישְׁט קוּמֶען קֵיין שְׁטְרוֹיכְלוּנְגֶען; אָבֶּער וֵויי צוּ יֶענֶעם, דוּרְךְ וֶועמֶען זֵיי קוּמֶען!
2
סֶע וָואלְט פַאר אִים בֶּעסֶער גֶעוֶוען, אַז אַ מִילְשְׁטֵיין וָואלְט אָנְגֶעהָאנְגֶען גֶעוָוארְן אַרוּם זַיין הַאלְדְז, אוּן עֶר וָואלְט אַרַיינְגֶעוָוארְפְן גֶעוָוארְן אִין יַם אַרַיין, אֵיידֶער צוּ מַאכְן שְׁטְרוֹיכְלֶען אֵיינֶעם פוּן דִי דָאזִיקֶע קְלֵיינֶע.
3
גִיט אַכְטוּנְג אוֹיף זִיךְ; אוֹיבּ דַיין בְּרוּדֶער זִינְדִיקְט, שְׁטְרָאף אִים; אוּן אוֹיבּ עֶר הָאט חַרָטָה, זַיי אִים מוֹחְל.
4
אוּן אוֹיבּ עֶר זִינְדִיקְט קֶעגְן דִיר זִיבְּן מָאל אִין טָאג, אוּן עֶר וֶוענְדְט זִיךְ צוּ דִיר זִיבְּן מָאל, אוּן זָאגְט: אִיךְ הָאבּ חַרָטָה, זָאלְסְטוּ אִים מוֹחְל זַיין.
5
אוּן דִי שְׁלִיחִים הָאבְּן גֶעזָאגְט צוּ דֶעם הַאר: פַארְמֶער אוּנְדְזֶער אֶמוּנָה.
6
אוּן דֶער הַאר הָאט גֶעזָאגְט: אוֹיבּ אִיר וָואלְט גֶעהַאט אֶמוּנָה אַזוֹי גְרוֹיס וִוי אַ קֶערְנְדְל פוּן זֶענֶעפְט־זְרִיעֶה, וָואלְט אִיר גֶעקָאנְט זָאגְן צוּ דֶעם דָאזִיקְן מוֹילְבֶּערְבּוֹים: וֶוער אוֹיסְגֶעוָוארְצְלְט, אוּן פַארְפְלַאנְץ דִיךְ אִין יַם, אוּן עֶר וָואלְט אַייךְ גֶעפָאלְגְט.
7
וֶוער פוּן אַייךְ, וָואס הָאט אַ קְנֶעכְט צוּם אַקֶערְן, אָדֶער צוּ הִיטְן שָׁאף, וֶועט צוּ אִים זָאגְן וֶוען עֶר קוּמְט פוּן פֶעלְד: קוּם תֵּיכֵּף אַהֶער, אוּן זֶעץ דִיךְ צוּם טִישׁ?
8
צִי וֶועט עֶר נִישְׁט גִיכֶער זָאגְן צוּ אִים: גְרֵייט מִיר אָן עֶפֶּעס צוּ עֶסְן, אוּן גוּרְט דִיךְ אָן, אוּן בַּאדִין מִיךְ, בִּיז אִיךְ וֶועל הָאבְּן גֶעגֶעסְן אוּן גֶעטְרוּנְקֶען; אוּן דֶערְנָאךְ וֶועסְטוּ עֶסְן אוּן טְרִינְקֶען?
9
צִי טוּט עֶר דַאנְקֶען דֶעם קְנֶעכְט, וַוייל עֶר הָאט גֶעטָאן, וָואס אִיז אִים גֶעבָּאטְן גֶעוָוארְן?
10
פּוּנְקְט אַזוֹי אוֹיךְ מִיט אַייךְ, אַז אִיר וֶועט הָאבְּן גֶעטָאן דִי אַלֶע זַאכְן, וָואס זֶענֶען אַייךְ גֶעבָּאטְן גֶעוָוארְן, זָאגְט: מִיר זֶענֶען אוּמְנוּצְלֶעכֶע קְנֶעכְט: מִיר הָאבְּן בְּלוֹיז גֶעטָאן אוּנְדְזֶער חוֹב.
11
אוּן בְּעֵת עֶר אִיז גֶעוֶוען אוֹיף דֶעם וֶועג קֵיין יְרוּשָׁלַיִם, אִיז עֶר דוּרְכְגֶעגַאנְגֶען דוּרְךְ דִי גֶעמַארְקְן פוּן שׁוֹמְרוֹן אוּן גָלִיל.
12
אוּן אַז עֶר אִיז אַרַיינְגֶעקוּמֶען אִין אֵיינֶעם אַ דָארְף, הָאבְּן אִים בַּאּגֶעגְנְט צֶען מְצוֹרָעִים, וָואס זֶענֶען גֶעשְׁטַאנֶען פוּנְדֶערְוַוייטְנְס,
13
אוּן זֵיי הָאבְּן אוֹיפְגֶעהוֹיבְּן זֵייעֶרֶע קוֹלוֹת, אוּן הָאבְּן גֶעזָאגְט: רֶבִּי יֵשׁוּעַ, הָאבּ רַחֲמָנוּת אוֹיף אוּנְדְז.
14
אוּן אַז עֶר הָאט זֵיי גֶעזֶען, הָאט עֶר צוּ זֵיי גֶעזָאגְט: גֵייט אוּן וַוייזְט זִיךְ פַאר דִי כֹּהַנִים. אוּן עֶס אִיז גֶעוֶוען, בְּעֵת זֵיי זֶענֶען גֶעגַאנְגֶען, זֶענֶען זֵיי גֶערֵיינִיקְט גֶעוָוארְן.
15
אוּן אֵיינֶער פוּן זֵיי, בְּעֵת עֶר הָאט גֶעזֶען, אַז עֶר אִיז גֶעהֵיילְט גֶעוָוארְן, הָאט זִיךְ אוּמְגֶעקֶערְט, אוּן מִיט אַ הוֹיךְ קוֹל גֶעלוֹיבְּט גָאט;
16
אוּן עֶר אִיז גֶעפַאלְן אוֹיף זַיין פָּנִים צוּ זַיינֶע פִיס, אוּן הָאט אִים גֶעדַאנְקְט. אוּן עֶר אִיז גֶעוֶוען אַ שׁוֹמְרוֹנִי.
17
אוּן יֵשׁוּעַ הָאט גֶעעֶנְטְפֶערְט: זֶענֶען נִישְׁט צֶען גֶערֵיינִיקְט גֶעוָוארְן. אָבֶּער וואוּ זֶענֶען דִי נֵיין?
18
צִי הָאט זִיךְ נִישְׁט גֶעפוּנֶען קֵיינֶער, וָואס הָאט זִיךְ אוּמְגֶעקֶערְט אָפְּצוּגֶעבְּן כָּבוֹד צוּ גָאט, אַחוּץ דֶער דָאזִיקֶער פְרֶעמְדֶער?
19
אוּן עֶר הָאט צוּ אִים גֶעזָאגְט: שְׁטֵיי אוֹיף אוּן גֵיי; דַיין אֶמוּנָה הָאט דִיר גֶעהָאלְפְן.
20
אוּן אַז דִי פְּרוּשִׁים הָאבְּן אִים גֶעפְרֶעגְט, וֶוען דָאס מַלְכוּת פוּן גָאט וֶועט קוּמֶען, הָאט עֶר זֵיי גֶעעֶנְטְפֶערְט: דָאס מַלְכוּת פוּן גָאט קוּמְט נִישְׁט אוֹיף אַ זֶעעֶנְדִיקְן אוֹיפְן;
21
מֶע וֶועט אוֹיךְ נִישְׁט זָאגְן: אָט אִיז עֶס! אָדֶער: דָארְטְן! וָוארִים זֶע, דָאס מַלְכוּת פוּן גָאט אִיז אִין אַייךְ.
22
אוּן עֶר הָאט גֶעזָאגְט צוּ דִי תַּלְמִידִים: סֶע וֶועלְן קוּמֶען טֶעג, וֶוען אִיר וֶועט בַּאגֶערְן צוּ זֶען אֵיינֶעם פוּן דִי טֶעג פוּן דֶעם בֶּן־אָדָם, אוּן אִיר וֶועט אִים נִישְׁט זֶען.
23
אוּן מֶע וֶועט צוּ אַייךְ זָאגְן: אָט דָארְט! אָט דָא! גֵייט נִישְׁט אַהִין, אוּן לוֹיפְט זֵיי נִישְׁט נָאךְ.
24
וָוארִים אַזוֹי וִוי דֶער בְּלִיץ שַׁיינְט אוֹיף אִין אֵיין עֶק הִימְל אוּן בַּאלַייכְט דֶעם אַנְדֶערְן עֶק הִימְל, אַזוֹי וֶועט דֶער בֶּן־אָדָם זַיין אִין זַיין טָאג.
25
אָבֶּער קוֹדֶם מוּז עֶר אַ סַך לַיידְן, אוּן פַארְוָוארְפְן וֶוערְן פוּן דֶעם דָאזִיקְן דוֹר.
26
אוּן וִוי עֶס אִיז גֶעוֶוען אִין דִי טֶעג פוּן נֹחַ, אַזוֹי וֶועט עֶס אוֹיךְ זַיין אִין דִי טֶעג פוּן דֶעם בֶּן־אָדָם.
27
זֵיי הָאבְּן גֶעגֶעסְן, אוּן גֶעטְרוּנְקֶען, חַתוּנָה גֶעהַאט אוּן חַתוּנָה גֶעמַאכְט, בִּיזְן טָאג וֶוען נֹחַ אִיז אַרַיינְגֶעגַאנְגֶען אִין דֶער תֵּיבָה אַרַיין, אוּן דֶער מַבּוּל אִיז גֶעקוּמֶען, אוּן הָאט זֵיי אַלֶע פַארְטִילִיקְט.
28
פּוּנְקְט אַזוֹי וִוי עֶס אִיז גֶעוֶוען אִין דִי טֶעג פוּן לוֹט: זֵיי הָאבְּן גֶעגֶעסְן, אוּן גֶעטְרוּנְקֶען, זֵיי הָאבְּן גֶעקוֹיפְט, אוּן פַארְקוֹיפְט, זֵיי הָאבְּן גֶעפְלַאנְצְט, אוּן גֶעבּוֹיט;
29
אָבֶּער אִין דֶעם טָאג, וֶוען לוֹט אִיז אַרוֹיסְגֶעגַאנְגֶען פוּן סְדוֹם, הָאט עֶס גֶערֶעגְנְט מִיט פַייעֶר אוּן שְׁוֶועבְּל פוּן הִימְל, אוּן הָאט זֵיי אַלֶע פַארְטִילִיקְט;
30
פּוּנְקְט אַזוֹי וֶועט עֶס זַיין אִין דֶעם טָאג, וֶוען דֶער בֶּן־אָדָם וֶועט אַנְטְפְּלֶעקְט וֶוערְן.
31
אִין יֶענֶעם טָאג זָאל דֶער, וָואס אִיז אוֹיפְן דַאךְ אוּן זַיינֶע כֵּלִים זֶענֶען אִין הוֹיז, נִישְׁט אַרָאפְּגֵיין זֵיי אַוֶועקְצוּנֶעמֶען; אוּן זָאל דֶער, וָואס אִיז אִין פֶעלְד, זִיךְ נִישְׁט אוּמְקֶערְן צוּרִיק.
32
גֶעדֶענְקְט לוֹט׳ס וַוייבּ.
33
דֶער, וָואס וִויל מַצִיל זַיין זַיין לֶעבְּן, וֶועט עֶס פַארְלִירְן; אוּן וֶוער סֶע וֶועט עֶס פַארְלִירְן, וֶועט עֶס דֶערְהַאלְטְן.
34
אִיךְ זָאג אַייךְ, אִין יֶענֶער נַאכְט וֶועלְן צְוֵויי זַיין אוֹיף אַיין בֶּעט; אֵיינֶער וֶועט אַוֶועקְגֶענוּמֶען וֶוערְן, אוּן דֶער אַנְדֶערֶער וֶועט אִיבֶּערְגֶעלָאזְט וֶוערְן.
35
צְוֵויי וַוייבֶּער וֶועלְן מָאלְן צוּזַאמֶען; אֵיינֶע וֶועט אַוֶועקְגֶענוּמֶען וֶוערְן, אוּן דִי אַנְדֶערֶע וֶועט אִיבֶּערְגֶעלָאזְט וֶוערְן.
36
צְוֵויי וֶועלְן זַיין אִין פֶעלְד; אֵיינֶער וֶועט אַוֶועקְגֶענוּמֶען וֶוערְן, אוּן דֶער אַנְדֶערֶער וֶועט אִיבֶּערְגֶעלָאזְט וֶוערְן.
37
אוּן זֵיי הָאבְּן צוּ אִים גֶעזָאגְט: וואוּ, הַאר? אוּן עֶר הָאט צוּ זֵיי גֶעזָאגְט: אַוואוּ ס׳אִיז דִי נְבֵלָה, דָארְט וֶועלְן זִיךְ דִי אָדְלֶערְס פַארְזַאמְלֶען.