אידיש
1
אוּן אַלֶע מוֹכְסִים אוּן זִינְדִיקֶע הָאבְּן גֶענֶעעֶנְט צוּ אִים, כְּדֵי אִים צוּ הֶערְן.
2
אוּן דִי פְּרוּשִׁים אוּן דִי סוֹפְרִים הָאבְּן גֶעמוּרְמְלְט, אוּן גֶעזָאגְט: דֶער דָאזִיקֶער נֶעמְט אוֹיף זִינְדִיקֶע, אוּן עֶסְט מִיט זֵיי.
3
אוּן עֶר הָאט גֶערֶעדְט צוּ זֵיי דָאס דָאזִיקֶע מָשָׁל:
4
וָואסֶער מֶענְטְשׁ צְוִוישְׁן אַייךְ, וָואס הָאט הוּנְדֶערְט שָׁאף, אוּן עֶר פַארְלִירְט אֵיינֶע פוּן זֵיי, וֶועט נִישְׁט אִיבֶּערְלָאזְן דִי נַיין־אוּן־נַיינְצִיק אִין דֶער מִדְבָּר, אוּן נָאכְגֵיין נָאךְ דֶער, וָואס אִיז פַארְלוֹירְן, בִּיז עֶר גֶעפִינְט זִי?
5
אוּן אַז עֶר גֶעפִינְט זִי, לֵייגְט עֶר זִי אַרוֹיף אוֹיף זַיינֶע אַקְסְלֶען, אוּן פְרֵייט זִיךְ.
6
אוּן בְּעֵת עֶר קוּמְט אַהֵיים, רוּפְט עֶר צוּנוֹיף זַיינֶע פְרַיינְט, אוּן דִי שְׁכֵנִים, אוּן זָאגְט צוּ זֵיי: פְרֵייט אַייךְ מִיט מִיר, וָוארִים אִיךְ הָאבּ גֶעפוּנֶען מַיין שָׁאף, וָואס אִיז פַארְלוֹירְן גֶעגַאנְגֶען.
7
פּוּנְקְט אַזוֹי, זָאג אִיךְ אַייךְ, וֶועט זַיין אַ שִׂמְחָה אִין הִימְל אִיבֶּער אֵיין חוֹטֵא, וָואס טוּט תְּשׁוּבָה, מֶער וִוי אִיבֶּער נַיין־אוּן־נַיינְצִיק צַדִיקִים, וָואס דַארְפְן נִישְׁט תְּשׁוּבָה טָאן.
8
אָדֶער וֶועלְכֶע פְרוֹי, וָואס הָאט צֶען זִילְבֶּערְשְׁטִיק, אוּן זִי פַארְלִירְט אַיין שְׁטִיק, טוּט נִישְׁט אָנְצִינְדְן אַ לִיכְט, אוּן אוֹיסְקֶערְן דָאס הוֹיז אוּן זוּכְט גוּט, בִּיז זִי גֶעפִינְט עֶס?
9
אוּן אַז זִי גֶעפִינְט עֶס, רוּפְט זִי צוּנוֹיף אִירֶע פְרַיינְט אוּן שְׁכֵנִים, אוּן זָאגְט: פְרֵייט אַייךְ מִיט מִיר, וַוייל אִיךְ הָאבּ גֶעפוּנֶען דָאס שְׁטִיק זִילְבֶּער, וָואס אִיךְ הָאבּ פַארְלוֹירְן.
10
פּוּנְקְט אַזוֹי, זָאג אִיךְ אַייךְ, אִיז אַ שִׂמְחָה פַאר דִי מַלְאָכִים פוּן גָאט אִיבֶּער אֵיין חוֹטֵא, וָואס טוּט תְּשׁוּבָה.
11
אוּן עֶר הָאט גֶעזָאגְט: אֵיינֶער אַ מֶענְטְשׁ הָאט גֶעהַאט צְוֵויי זִין;
12
אוּן דֶער יוּנְגֶערֶער פוּן זֵיי הָאט גֶעזָאגְט צוּם פָאטֶער: פָאטֶער, גִיבּ מִיר דֶעם חֵלֶק פַארְמֶעגְן, וָואס פַאלְט אוֹיס אוֹיף מִיר. אוּן עֶר הָאט צֶעטֵיילְט צְוִוישְׁן זֵיי דִי נַחֲלָה.
13
אוּן אִין עֶטְלֶעכֶע טֶעג אַרוּם, הָאט דֶער יוּנְגֶערֶער זוּן אַלְץ צוּנוֹיפְגֶענוּמֶען, אוּן אִיז אַוֶועקְגֶעפָארְן אִין אַ וַוייטֶער לַאנְד, אוּן דָארְט הָאט עֶר גֶעפַּטֶערְט זַיין פַארְמֶעגְן דוּרְךְ אַ לֶעבְּן.
14
אוּן אַז עֶר הָאט אַלְץ פַארְשְׁוֶוענְדְט, אִיז גֶעקוּמֶען אַ שְׁטַארְקֶער הוּנְגֶער אִין יֶענֶער לַאנְד, אוּן עֶר הָאט אָנְגֶעהוֹיבְּן צוּ לַיידְן נוֹיט.
15
אוּן עֶר אִיז גֶעגַאנְגֶען אוּן הָאט זִיךְ בַּאהֶעפְט אָן אֵיינֶעם פוּן דִי תּוֹשָׁבִים אִין יֶענֶער לַאנְד, אוּן עֶר הָאט אִים גֶעשִׁיקְט אִין זַיינֶע פֶעלְדֶער אַרַיין פַּאשֶׁען חֲזֵירִים.
16
אוּן עֶר וָואלְט גֶערְן גֶעוֶוען אָנְגֶעפִילְט זַיין מָאגְן מִיט דִי וָואס דִי חֲזֵירִים הָאבְּן גֶעגֶעסְן, אָבֶּער קֵיינֶער הָאט זֵיי אִים נִישְׁט גֶעגֶעבְּן.
17
אוּן אַז עֶר אִיז גֶעקוּמֶען צוּ זִיךְ, הָאט עֶר גֶעזָאגְט: וִויפְל לוֹין־אַרְבֶּעטֶער הָאבְּן בַּיי מַיין פָאטֶער בְּרוֹיט בְּשֶׁפַע, אוּן אִיךְ גֵיי דָא אוֹיס פַאר הוּנְגֶער!
18
אִיךְ וֶועל אוֹיפְשְׁטֵיין אוּן גֵיין צוּ מַיין פָאטֶער, אוּן וֶועל צוּ אִים זָאגְן: פָאטֶער, אִיךְ הָאבּ גֶעזִינְדִיקְט קֶעגְן הִימְל אוּן פַאר דִיר;
19
אִיךְ בִּין מֶער נִישְׁט וֶוערְט גֶערוּפְן צוּ וֶוערְן דַיין זוּן; מַאך מִיךְ וִוי אֵיינֶעם פוּן דַיינֶע לוֹין־אַרְבֶּעטֶער.
20
אוּן עֶר אִיז אוֹיפְגֶעשְׁטַאנֶען, אוּן הָאט גֶענוּמֶען גֵיין צוּ זַיין פָאטֶער. אוּן בְּעֵת עֶר אִיז נָאךְ גֶעוֶוען גַאנְץ וַוייט, הָאט אִים זַיין פָאטֶער גֶעזֶען, אוּן עֶר הָאט זִיךְ דֶערְבַּארֶעמְט, אוּן עֶר אִיז גֶעלָאפְן, אוּן אִיז אִים גֶעפַאלְן אוֹיפְן הַאלְדְז, אוּן הָאט אִים גֶעקוּשְׂט.
21
אוּן דֶער זוּן הָאט צוּ אִים גֶעזָאגְט: פָאטֶער, אִיךְ הָאבּ גֶעזִינְדִיקְט קֶעגְן הִימְל אוּן פַאר דִיר; אִיךְ בִּין מֶער נִישְׁט וֶוערְט גֶערוּפְן צוּ וֶוערְן דַיין זוּן.
22
אָבֶּער דֶער פָאטֶער הָאט גֶעזָאגְט צוּ זַיינֶע קְנֶעכְט: בְּרֶענְגְט גִיךְ אַרוֹיס דָאס בֶּעסְטֶע מַלְבּוּשׁ, אוּן טוּט עֶס אִים אָן. אוּן טוּט אָן אַ רִינְג אוֹיף זַיין הַאנְט, אוּן שִׁיךְ אוֹיף זַיינֶע פִיס;
23
אוּן בְּרֶענְגְט דָאס פֶעטֶע קַאלְבּ, אוּן שֶׁעכְט עֶס, אוּן לָאמִיר עֶסְן אוּן זִיךְ מְשַׂמֵחַ זַיין.
24
וָוארִים דֶער דָאזִיקֶער זוּן מַיינֶער אִיז גֶעוֶוען טוֹיט, אוּן אִיז וִוידֶער לֶעבֶּעדִיק; עֶר אִיז גֶעוֶוען פַארְלוֹירְן, אוּן אִיז גֶעפוּנֶען גֶעוָוארְן. אוּן זֵיי הָאבְּן זִיךְ אָנְגֶעהוֹיבְּן מְשַׂמֵחַ צוּ זַיין.
25
אוּן זַיין עֶלטֶערֶען זוּן אִיז גֶעוֶוען אִין פֶעלְד, אוּן בְּעֵת עֶר אִיז גֶעקוּמֶען אוּן זִיךְ דֶערְנֶענְטֶערְט צוּם הוֹיז, הָאט עֶר גֶעהֶערְט שְׁפִּילְן אוּן טַאנְצְן.
26
אוּן עֶר הָאט צוּגֶערוּפְן אֵיינֶעם פוּן דִי קְנֶעכְט, אוּן הָאט אִים גֶעפְרֶעגְט, וָואס דָאס קָאן בַּאטַייטְן.
27
הָאט עֶר צוּ אִים גֶעזָאגְט: דַיין בְּרוּדֶער אִיז גֶעקוּמֶען, אוּן דַיין פָאטֶער הָאט גֶעשָׁאכְטְן דָאס פֶעטֶע קַאלְבּ, מַחְמַת עֶר הָאט זִיךְ אוּמְגֶעקֶערְט צוּ אִים בְּשָׁלוֹם.
28
אָבֶּער דָאס הָאט אִים שְׁטַארְק פַארְדְרָאסְן, אוּן עֶר הָאט נִישְׁט גֶעוָואלְט אַרַיינְגֵיין. אוּן זַיין פָאטֶער אִיז אַרוֹיסְגֶעקוּמֶען, אוּן הָאט אִים גֶעבֶּעטְן,
29
אָבֶּער עֶר הָאט גֶעעֶנְטְפֶערְט זַיין פָאטֶער: זֶע, שׁוֹין אַזוֹיפִיל יָארְן טוּ אִיךְ דִיר דִינֶען, אוּן אִיךְ הָאבּ קֵיינְמָאל נִישְׁט עוֹבֵר גֶעוֶוען דַיינְס אַ גֶעבָּאט; אוּן דָאךְ הָאסְטוּ מִיר נָאךְ קֵיינְמָאל נִישְׁט גֶעגֶעבְּן אַ ציגֶעלֶע, כְּדֵי אִיךְ זָאל מִיךְ מְשַׂמֵחַ זַיין מִיט מַיינֶע פְרַיינְט.
30
אָבֶּער וִוי נָאר דֶער דָאזִיקֶער זוּן דַיינֶער אִיז גֶעקוּמֶען, וָואס הָאט פַארְצֶערְט דַיין נַחֲלָה מִיט זוֹנוֹת, הָאסְטוּ גֶעשָׁאכְטְן פַאר אִים דָאס פֶעטֶע קַאלְבּ.
31
אוּן עֶר הָאט צוּ אִים גֶעזָאגְט: זוּן, דוּ בִּיסְט תָּמִיד מִיט מִיר, אוּן אַלְץ, וָואס אִיז מַיינְס, אִיז דַיינְס.
32
עֶס אִיז גֶעוֶוען רֶעכְט זִיךְ מְשַׂמֵחַ צוּ זַיין אוּן זִיךְ צוּ פְרֵייעֶן, וַוייל דֶער דָאזִיקֶער בְּרוּדֶער דַיינֶער אִיז גֶעוֶוען טוֹיט, אוּן אִיז וִוידֶער לֶעבֶּעדִיק; עֶר אִיז גֶעוֶוען פַארְלוֹירְן, אוּן אִיז גֶעפוּנֶען גֶעוָוארְן.