אידיש
1
אוּן גְרָאד דֶעמָאלְט זֶענֶען דָארְטְן גֶעוֶוען עֶטְלֶעכֶע, וָואס הָאבְּן אִים דֶערְצֵיילְט פוּן דִי גָלִילֶער, וֶועמֶעס בְּלוּט פִּילַאטוּס הָאט אוֹיסְגֶעמִישְׁט מִיט זֵייעֶרֶע קָרְבָּנוֹת.
2
אוּן עֶר הָאט גֶעעֶנְטְפֶערְט, אוּן צוּ זֵיי גֶעזָאגְט: צִי מֵיינְט אִיר, אַז יֶענֶע גָלִילֶער זֶענֶען גֶעוֶוען גְרֶעסֶערֶע חוֹטְאִים פוּן אַלֶע גָלִילֶער, מַחְמַת זֵיי הָאבְּן אַזוֹינְס גֶעלִיטְן?
3
נֵיין, זָאג אִיךְ אַייךְ; אוּן אוֹיבּ אִיר וֶועט נִישְׁט תְּשׁוּבָה טָאן, וֶועט אִיר אַלֶע אַזוֹי אוּמְקוּמֶען.
4
אָדֶער יֶענֶע אַכְצְן, אוֹיף וֶועמֶען דֶער טוּרֶעם פוּן שִׁילוֹחַ אִיז גֶעפַאלְן אוּן הָאט זֵיי דֶערְהַרְגֶעט, צִי מֵיינְט אִיר, אַז זֵיי זֶענֶען גֶעוֶוען שׁוּלְדִיקֶער פוּן אַלֶע מֶענְטְשְׁן, וָואס וָואוֹינֶען אִין יְרוּשָׁלַיִם?
5
נֵיין, זָאג אִיךְ אַייךְ; אוּן אוֹיבּ אִיר וֶועט נִישְׁט תְּשׁוּבָה טָאן, וֶועט אִיר אַלֶע אַזוֹי אוּמְקוּמֶען.
6
אוּן עֶר הָאט דֶערְצֵיילְט דָאס דָאזִיקֶע מָשָׁל: אַ מֶענְטְשׁ הָאט פַארְפְלַאנְצְט אַ פֵייגְנְבּוֹים אִין זַיין וַויינְגָארְטְן; אוּן עֶר אִיז גֶעקוּמֶען זוּכְן אוֹיף אִים פֵּירוֹת, אוּן הָאט נִישְׁט גֶעפוּנֶען קֵיין אֵיינֶע.
7
אוּן עֶר הָאט גֶעזָאגְט צוּם וַויינְגֶערְטְנֶער: זֶע, שׁוֹין דְרַיי יָאר וִוי אִיךְ קוּם זוּכְן פֵּירוֹת אוֹיף דֶעם דָאזִיקְן פֵייגְנְבּוֹים, אוּן גֶעפִין נִישְׁט קֵיין אֵיינֶע. הַאק אִים אָפּ; צוּ וָואס זָאל עֶר נָאךְ פַארְדַארְבְּן דִי עֶרְד?
8
אוּן עֶר הָאט אִים גֶעעֶנְטְפֶערְט: הַאר, לָאז אִים נָאךְ הַיינְטִיקְס יָאר, בִּיז אִיךְ וֶועל אִים אַרוּמְגְרָאבְּן אוּן בַּאמִיסְטִיקְן.
9
אֶפְשָׁר וֶועט עֶר אִיבֶּער־אַיָאר טְרָאגְן פֵּירוֹת; אוֹיבּ נִישְׁט, וֶועסְטוּ אִים לָאזְן אָפְּהַאקְן.
10
אוּן עֶר הָאט אִין אַ שַׁבָּת גֶעלֶערְנְט אִין אֵיינֶעם פוּן דִי שׁוּלְן.
11
אוּן דָארְטְן אִיז גֶעוֶוען אַ פְרוֹי, וָואס הָאט אַכְצְן יָאר גֶעהַאט אַ קְרֶענְקְלֶעכְן גֵייסְט; אוּן זִי אִיז גֶעוֶוען צוּזַאמֶענְגֶעבּוֹיגְן, אוּן הָאט זִיךְ בְּשׁוּם־אוֹיפְן נִישְׁט גֶעקָאנְט אוֹיסְגְלַייכְן.
12
אוּן אַז יֵשׁוּעַ הָאט זִי גֶעזֶען, הָאט עֶר זִי צוּגֶערוּפְן, אוּן צוּ אִיר גֶעזָאגְט: פְרוֹי, דוּ בִּיסְט פְרַיי פוּן דַיין קְרַאנְקְהֵייט.
13
אוּן עֶר הָאט אַרוֹיפְגֶעלֵייגְט אוֹיף אִיר זַיינֶע הֶענְט, אוּן זִי אִיז תֵּיכֵּף גֶעוָוארְן גְלַייךְ, אוּן הָאט גֶעלוֹיבְּט גָאט.
14
אוּן דֶער גַבַּאי פוּן דֶער שׁוּל אִיז אִין כַּעַס גֶעוָוארְן, מַחְמַת יֵשׁוּעַ הָאט גֶעהֵיילְט אוּם שַׁבָּת, אוּן עֶר הָאט גֶעזָאגְט צוּם פָאלְק: זֶעקְס טֶעג זֶענֶען פַארַאן אִין וֶועלְכֶע מֶע מֶעג אַרְבֶּעטְן; קוּמְט דֶערִיבֶּער אִין זֵיי אוּן לָאזְט זִיךְ הֵיילְן, אָבֶּער נִישְׁט אוּם שַׁבָּת.
15
אוּן דֶער הַאר הָאט אִים גֶעעֶנְטְפֶערְט: אִיר חוֹנְפִים! טוּט נִישְׁט יֶעדֶער אֵיינֶער פוּן אַייךְ אָפְּבִּינְדְן שַׁבָּת זַיין אָקְס, אָדֶער זַיין אֵייזְל פוּן דֶער קָארִיטֶע, אוּן פִירְט אִים אָנְצוּטְרִינְקֶען?
16
אוּן צִי דַארְף נִישְׁט דִי דָאזִיקֶע פְרוֹי, וָואס אִיז אַ בַּת־אַבְרָהָם, אוּן וֶועמֶען דֶער שָׂטָן הָאט גֶעבּוּנְדְן שׁוֹין אַכְצְן יָאר, אָפְּגֶעבּוּנְדְן וֶוערְן פוּן דֶעם דָאזִיקְן בַּאנְד אוּם שַׁבָּת?
17
אוּן בְּעֵת עֶר הָאט דָאס גֶעזָאגְט, זֶענֶען אַלֶע זַיינֶע קֶעגְנֶער פַארְשֶׁעמְט גֶעוָוארְן; אוּן דָאס גַאנְצֶע פָאלְק הָאט זִיךְ גֶעפְרֵייט אִיבֶּער דִי אַלֶע וְואוּנְדֶערְלֶעכֶע מַעֲשִׂים, וָואס זֶענֶען דוּרְךְ אִים גֶעטָאן גֶעוָוארְן.
18
אוּן עֶר הָאט דֶערִיבֶּער גֶעזָאגְט: צוּ וָואס אִיז דָאס מַלְכוּת פוּן גָאט עֶנְלֶעך? אוּן מִיט וָואס זָאל אִיךְ עֶס פַארְגְלַייכְן?
19
עֶס אִיז גֶעגְלִיכְן צוּ אַ קֶערְנְדְל פוּן זֶענֶעפְט־זְרִיעֶה, וָואס אַ מֶענְטְשׁ הָאט גֶענוּמֶען אוּן גֶעזֵייט אִין זַיין גָארְטְן; אוּן עֶס אִיז גֶעוַואקְסְן אוּן אִיז גֶעוָוארְן אַ בּוֹים, אוּן דִי פֵייגְל פוּן הִימְל הָאבְּן זִיךְ גֶעמַאכְט נֶעסְטְן אִין זַיינֶע צְוַוייגְן.
20
אוּן עֶר הָאט וִוידֶער אַמָאל גֶעזָאגְט: צוּ וָואס זָאל אִיךְ פַארְגְלַייכְן דָאס מַלְכוּת פוּן גָאט?
21
עֶס אִיז גֶעגְלִיכְן צוּ זוֹיעֶרְטֵייג, וָואס אַ פְרוֹי הָאט גֶענוּמֶען אוּן אַרַיינְגֶעטָאן אִין דְרַיי מָאס מֶעל, בִּיז עֶס אִיז אִינְגַאנְצְן פַארְזֵייעֶרְט גֶעוָוארְן.
22
אוּן עֶר אִיז גֶעגַאנְגֶען אִיבֶּער שְׁטֶעט אוּן דֶערְפֶער, אוּן הָאט גֶעלֶערְנְט, אוּן הָאט עוֹלֵה־רֶגֶל גֶעוֶוען קֵיין יְרוּשָׁלַיִם.
23
אוּן אֵיינֶער הָאט צוּ אִים גֶעזָאגְט: הַאר, זֶענֶען עֶס נָאר עֶטְלֶעכֶע, וָואס וֶועלְן נִיצוּל וֶוערְן? אָבֶּער עֶר הָאט צוּ זֵיי גֶעזָאגְט:
24
בַּאמִיט אַייךְ אַרַיינְצוּקוּמֶען דוּרְךְ דֶעם עֶנְגְן טוֹיעֶר, וָוארִים אִיךְ זָאג אַייךְ, אַ סַך וֶועלְן זוּכְן אַרַיינְצוּקוּמֶען, אוּן וֶועלְן נִישְׁט קָאנֶען.
25
הָאט זִיךְ דֶער בַּעַל־הַבָּית אֵיינְמָאל אוֹיפְגֶעהוֹיבְּן אוּן פַארְשְׁלָאסְן דִי טִיר, אוּן אִיר וֶועט אָנְהֵייבְּן צוּ שְׁטֵיין אִין דְרוֹיסְן, אוּן קְלַאפְּן אִין דֶער טִיר, אוּן זָאגְן: הַאר, עֶפְן אוּנְדְז אוֹיף! אוּן עֶר וֶועט אַייךְ עֶנְטְפֶערְן: אִיךְ וֵוייס נִישְׁט פוּנְוַואנֶען אִיר זֶענְט.
26
דֶעמָאלְט וֶועט אִיר אָנְהֵייבְּן צוּ זָאגְן: מִיר הָאבְּן גֶעגֶעסְן אוּן גֶעטְרוּנְקֶען פַאר דִיר, אוּן דוּ הָאסְט גֶעלֶערְנְט אִין אוּנְדְזֶערֶע גַאסְן.
27
אוּן עֶר וֶועט עֶנְטְפֶערְן: אִיךְ זָאג אַייךְ, אִיךְ וֵוייס נִישְׁט פוּנְוַואנֶען אִיר זֶענְט; קֶערְט אָפּ פוּן מִיר, אִיר טְוּעֶר פוּן אוּמְרֶעכְט!
28
דָארְט וֶועט זַיין גֶעוֵויין אוּן קְרִיצְן פוּן צֵיין, בְּעֵת אִיר וֶועט זֶען אַבְרָהָם, אוּן יִצְחָק, אוּן יַעֲקֹב, אוּן אַלֶע נְבִיאִים אִין דֶעם מַלְכוּת פוּן גָאט, אוּן אִיר אַלֵיין אַרוֹיסְגֶעוָוארְפֶענֶע אִין דְרוֹיסְן.
29
אוּן זֵיי וֶועלְן קוּמֶען פוּן מִזְרַח אוּן מַעֲרָב, אוּן צָפוּן אוּן דָרוֹם, אוּן וֶועלְן זִיךְ אַנִידֶערְזֶעצְן אִין דֶעם מַלְכוּת פוּן גָאט.
30
אוּן זֶע, עֶס זֶענֶען פַארַאן לֶעצְטֶע, וָואס וֶועלְן זַיין עֶרְשְׁטֶע, אוּן פַארַאן זֶענֶען עֶרְשְׁטֶע, וָואס וֶועלְן זַיין לֶעצְטֶע.
31
פּוּנְקְט אִין יֶענֶער שָׂעָה זֶענֶען גֶעקוּמֶען עֶטְלֶעכֶע פְּרוּשִׁים, אוּן הָאבְּן צוּ אִים גֶעזָאגְט: גֵיי אוּן דֶערְוַוייטֶער דִיךְ פוּנְדַאנֶען, וָוארִים הוֹרְדוֹס וִויל דִיךְ הַרְגֶענֶען.
32
אוּן עֶר הָאט צוּ זֵיי גֶעזָאגְט: גֵייט אוּן זָאגְט יֶענֶעם פוּקְס: אָט טְרַייבּ אִיךְ אַרוֹיס בֵּייזֶע גֵייסְטֶער אוּן טוּ רְפוּאוֹת הַיינְט אוּן מָארְגְן, אוּן דֶעם דְרִיטְן טָאג קוּם אִיךְ צוּם סוֹף.
33
אִיךְ מוּז אָבֶּער גֵיין מַיין וֶועג הַיינְט אוּן מָארְגְן אוּן אִיבֶּערְמָארְגְן; וָוארִים עֶס קָאן נִישְׁט זַיין, אַז אַ נָבִיא זָאל אוּמְקוּמֶען מִחוּץ יְרוּשָׁלַיִם.
34
אָ יְרוּשָׁלַיִם, יְרוּשָׁלַיִם, וָואס הַרגֶעסְט דִי נְבִיאִים, אוּן פַארְשְׁטֵיינְסְט דִי, וָואס זֶענֶען גֶעשִׁיקְט צוּ דִיר! וִויפְל מָאל הָאבּ אִיךְ גֶעוָואלְט אַיינְזַאמְלֶען דַיינֶע קִינְדֶער, וִוי אַ הוּן זַאמְלְט אַיין אִירֶע הִינְדְלֶעך אוּנְטֶער אִירֶע פְלִיגְל, אוּן אִיר הָאט נִישְׁט גֶעוָואלְט!
35
זֶעט, אַייעֶר הוֹיז וֶועט אַייךְ בְּלַייבְּן חָרוּב! אוּן אִיךְ זָאג אַייךְ, בֶּאֱמֶת, אִיר וֶועט מִיךְ מֶער נִישְׁט זֶען, בִּיז אִיר וֶועט זָאגְן: בָּרוּךְ הַבָּא אִין דֶעם נָאמֶען פוּן גָאט!