אידיש
1
אַזוֹי וִוי אַ סַך הָאבְּן זִיךְ אוּנְטֶערְגֶענוּמֶען צוּ בַּאשְׁרַייבְּן דִי גֶעשִׁיכְטֶע פוּן יֶענֶע גֶעשֶׁעעֶנִישְׁן, וָואס זֶענֶען צְוִוישְׁן אוּנְדְז בַּאגְלוֹיבְּט,
2
פּוּנְקְט וִוי זֵיי זֶענֶען אוּנְדְז אִיבֶּערְגֶעעֶנְטְפֶערְט גֶעוָוארְן פוּן דִי, וָואס זֶענֶען פוּן אָנְהֵייבּ אָן גֶעוֶוען אוֹיגְן־עֵדוּת אוּן בַּאדִינֶער פוּן דֶעם וָוארְט,
3
הָאבּ אִיךְ עֶס אוֹיךְ גֶעהַאלְטְן פַאר רֶעכְט, נָאכְדֶעם וִוי אִיךְ הָאבּ פוּן אָנְהֵייבּ אָן אַלְצְדִינְג גֶענוֹי נָאכְגֶעפָארְשְׁט, צוּ שְׁרַייבְּן אִין אַ סֵדֶר דִיר, אָ אֵיידְלְסְטֶער טֶעאָפִילוּס,
4
כְּדֵי דוּ זָאלְסְט וִויסְן דֶעם אֶמֶת פוּן דֶעם, אִין וָואס דוּ בִּיסְט גֶעלֶערְנְט גֶעוָוארְן.
5
עֶס אִיז גֶעוֶוען אִין דִי טֶעג פוּן הוֹרְדוּס, דֶעם מֶלֶךְ פוּן יְהוּדָה, אֵיינֶער אַ כֹּהֵן מִיטְן נָאמֶען זְכַרְיָה, פוּן דֶעם מִשְׁמָר פוּן אַבִיָה; אוּן עֶר הָאט גֶעהַאט אַ וַוייבּ פוּן דִי טָאכְטֶער פוּן אַהֲרֹן, וָואס הָאט גֶעהֵייסְן אֶלִישֶׁבַע.
6
אוּן בֵּיידֶע זֶענֶען גֶעוֶוען רֶעכְטְפַארְטִיק פַאר גָאט, אוּן זֶענֶען גֶעגַאנְגֶען עֶרְלֶעְך אִין אַלֶע מִצְוֹות אוּן חוּקִים פוּן גָאט.
7
אָבֶּער זֵיי הָאבְּן נִישְׁט גֶעהַאט קֵיין קִינְד, וָוארִים אֶלִישֶׁבַע אִיז גֶעוֶוען אַן עַקָרָה, אוּן בֵּיידֶע זֶענֶען גֶעוֶוען שׁוֹין גוּט בַּאיָארְנְט.
8
אוּן עֶס אִיז גֶעוֶוען, בְּעֵת עֶר הָאט אוֹיסְגֶעפִירְט דִי עַבוֹדָה פַאר גָאט אִין דֶעם סֵדֶר פוּן זַיין מִשְׁמָר,
9
לוֹיט דֶעם מִנְהָג פוּן דֶער כְּהוּנָה, אִיז גֶעוֶוען זַיין גוֹרָל אַרַיינְצוּגֵיין אִין דֶעם הֵיכָל פוּן גָאט אוּן רֵייכֶערְן קְטוֹרֶת.
10
אוּן דִי גַאנְצֶע עֵדָה פוּן דֶעם פָאלְק הָאבְּן מִתְפַּלֵל גֶעוֶוען אִין דְרוֹיסְן אִין דֶער צַייט פוּן קְטוֹרֶת.
11
עֶרְשְׁט אַ מַלְאַךְ פוּן גָאט הָאט זִיךְ בַּאוִויזְן צוּ אִים, וָואס אִיז גֶעשְׁטַאנֶען אוֹיף דֶער רֶעכְטֶער זַייט פוּן דֶעם קְטוֹרֶת־מִזְבֵּחַ.
12
אוּן אַז זְכַרְיָה הָאט אִים דֶערְזֶען, הָאט עֶר זִיךְ דֶערְשְׁרָאקְן, אוּן אַ שְׁרֶעק אִיז גֶעפַאלְן אוֹיף אִים.
13
אָבֶּער דֶער מַלְאַךְ הָאט צוּ אִים גֶעזָאגְט: הָאבּ נִישְׁט קֵיין מוֹרֶא, זְכַרְיָה; וָוארִים דַיין תְּפִילָה אִיז דֶערְהֶערְט גֶעוָוארְן, אוּן דַיין וַוייבּ אֶלִישֶׁבַע וֶועט דִיר גֶעבֶּערְן אַ זוּן, אוּן דוּ זָאלְסְט רוּפְן זַיין נָאמֶען יוֹחָנָן.
14
פְרֵייד אוּן נַחַת וֶועסְטוּ פוּן אִים הָאבְּן; אוּן אַ סַך וֶועלְן זִיךְ פְרֵייעֶן אִיבֶּער זַיין גֶעבּוּרְטְס.
15
וָוארִים עֶר וֶועט זַיין גְרוֹיס פַאר גָאט, אוּן וַויין אוּן שְׁטַארְקְן גֶעטְרַאנְק וֶועט עֶר נִישְׁט טְרִינְקֶען; אוּן עֶר וֶועט זַיין פוּל מִיט דֶעם רוּחַ־הַקוֹדֶשׁ, גְלַייךְ פוּן זַיין מוּטֶערְס טְרַאכְט.
16
אוּן אַ סַך פוּן דִי קִינְדֶער פוּן יִשְׂרָאֵל וֶועט עֶר אוּמְקֶערְן צוּ גָאט, זֵייעֶר הַאר.
17
אוּן עֶר וֶועט גֵיין פַאר אִים אִין דֶעם גֵייסְט אוּן אִין דֶער גְבוּרָה פוּן אֵלִיָהוּ, אוּמְצוּקֶערְן דִי הֶערְצֶער פוּן דִי פָאטֶערְס צוּ דִי קִינְדֶער, אוּן דִי וִוידֶערְשְׁפֶּענִיקֶע צוּ דֶער פַארְשְׁטֶענְדִיקַייט פוּן דִי צַדִיקִים, כְּדֵי אוֹיפְצוּשְׁטֶעלְן אַ צוּגֶעגְרֵייט פָאלְק פַאר גָאט.
18
אוּן זְכַרְיָה הָאט גֶעזָאגְט צוּ דֶעם מַלְאַךְ: וִוי אַזוֹי וֶועל אִיךְ דָאס דֶערְקֶענֶען? וָוארִים אִיךְ בִּין אַ זָקֵן, אוּן מַיין וַוייבּ גוּט בַּאיָארְנְט.
19
אוּן דֶער מַלְאַךְ הָאט גֶעעֶנְטְפֶערְט, אוּן צוּ אִים גֶעזָאגְט: אִיךְ בִּין גַבְרִיאֵל, וָואס שְׁטֵייט פַאר גָאט, אוּן אִיךְ בִּין גֶעשִׁיקְט גֶעוָוארְן צוּ רֶעדְן צוּ דִיר, אוּן צוּ בְּרֶענְגֶען דִיר דִי דָאזִיקֶע בְּשׂוּרָה.
20
אוּן אָט וֶועסְטוּ זַיין שְׁטוּם אוּן נִישְׁט קֶענֶען רֶעדְן, בִּיז דֶעם טָאג, וֶוען דָאס וֶועט גֶעשֶׁען, וָוארִים דוּ הָאסְט נִישְׁט גֶעגְלוֹיבְּט מַיינֶע וֶוערְטֶער, וָואס וֶועלְן מְקוּיָם וֶוערְן אִין זֵייעֶר צַייט.
21
אוּן דָאס פָאלְק הָאט גֶעוַוארְט אוֹיף זְכַרְיָה, אוּן זֵיי הָאבְּן זִיךְ גֶעחִידוּשְׁט, וָואס עֶר זַאמְט זִיךְ אִין דֶעם הֵיכָל.
22
אוּן אַז עֶר אִיז אַרוֹיסְגֶעקוּמֶען, הָאט עֶר נִישְׁט גֶעקֶענְט רֶעדְן צוּ זֵיי; אוּן זֵיי הָאבְּן זִיךְ מְשַׁעֶר גֶעוֶוען, אַז עֶר הָאט גֶעזֶען אַ חִזָּיוֹן אִין דֶעם הֵיכָל; אוּן עֶר הָאט גֶעמַאכְט צֵייכְנְס צוּ זֵיי, אוּן אִיז פַארְבְּלִיבְּן שְׁטוּם.
23
אוּן עֶס אִיז גֶעוֶוען, אַז דִי טֶעג פוּן זַיין עַבוֹדָה הָאבְּן זִיךְ גֶעעֶנְדִיקְט, הָאט עֶר זִיךְ אוּמְגֶעקֶערְט אַהֵיים.
24
אוּן נָאךְ דִי דָאזִיקֶע טֶעג אִיז אֶלִישֶׁבַע זַיין וַוייבּ פַארְגַאנְגֶען אִין טְרָאגְן, אוּן זִי הָאט זִיךְ פַארְבָּארְגְן פִינְף חֳדָשִׁים, אוּן הָאט גֶעזָאגְט:
25
אַזוֹי הָאט גָאט גֶעטָאן צוּ מִיר אִין דִי טֶעג, בְּעֵת עֶר הָאט אוֹיף מִיר גֶעקוּקְט, אַוֶועקְצוּנֶעמֶען מַיין חַרְפָּה פוּן צְוִוישְׁן מֶענְטְשְׁן.
26
אוּן אִין דֶעם זֶעקְסְטְן חוֹדֶשׁ אִיז דֶער מַלְאַךְ גַבְרִיאֵל גֶעשִׁיקְט גֶעוָוארְן פוּן גָאט אִין אָ שְׁטָאט פוּן גָלִיל, וָואס הָאט גֶעהֵייסְן נְצָרֶת,
27
צוּ אַ יוּנְגְפְרוֹי, וָואס אִיז גֶעוֶוען פַארְקְנַסְט צוּ אַ מַאן מִיטְן נָאמֶען יוֹסֵף, פוּן בֵּית־דָוִד; אוּן דִי יוּנְגְפְרוֹי הָאט גֶעהֵייסְן מִרְיָם.
28
אוּן עֶר אִיז צוּ אִיר אַרַיינְגֶעקוּמֶען, אוּן הָאט גֶעזָאגְט: שָׁלוֹם דִיר, דוּ לַייטְזֶעלִיקֶע, גָאט אִיז מִיט דִיר.
29
אָבֶּער זִי הָאט זִיךְ זֵייעֶר דֶערְשְׁרָאקְן אִיבֶּער דֶעם וָוארְט, אוּן הָאט בַּיי זִיךְ גֶעטְרַאכְט, וָואסֶערֶע סָארְט גְרוּס קָאן דָאס זַיין?
30
אוּן דֶער מַלְאַךְ הָאט צוּ אִיר גֶעזָאגְט: הָאבּ נִישְׁט קֵיין מוֹרֶא, מִרְיָם, וָוארִים דוּ הָאסְט גֶעפוּנֶען חֵן בַּיי גָאט.
31
אוּן זֶע, דוּ וֶועסְט מֶעוּבֶּרֶת וֶוערְן, אוּן גֶעבֶּערְן אַ זוּן, אוּן דוּ זָאלְסְט רוּפְן זַיין נָאמֶען יֵשׁוּעַ.
32
עֶר וֶועט זַיין גְרוֹיס, אוּן וֶועט גֶערוּפְן וֶוערְן דֶער זוּן פוּן דֶעם אֵייבֶּערְשְׁטְן; אוּן גָאט, דֶער הַאר, וֶועט אִים גֶעבְּן דֶעם טְרָאן פוּן זַיין פָאטֶער דָוִד;
33
אוּן עֶר וֶועט קֶענִיגְן אִיבֶּער דֶעם הוֹיז פוּן יַעֲקֹב אוֹיף אֵייבִּיק; אוּן צוּ זַיין מְלוּכָה וֶועט נִישְׁט זַיין קֵיין סוֹף.
34
אוּן מִרְיָם הָאט גֶעזָאגְט צוּם מַלְאַךְ: וִוי אַזוֹי וֶועט דָאס זַיין, אַז אִיךְ קֶען נִישְׁט קֵיין מַאן?
35
הָאט דֶער מַלְאַךְ גֶעעֶנְטְפֶערְט אוּן צוּ אִיר גֶעזָאגְט: דֶער רוּחַ־הַקוֹדֶשׁ וֶועט קוּמֶען אוֹיף דִיר, אוּן דִי קְרַאפְט פוּן דֶעם אֵייבֶּערְשְׁטְן וֶועט דִיךְ פַארְשָׁאטֶענֶען; דֶערִיבֶּער וֶועט אוֹיךְ דָאס, וָואס וֶוערְט גֶעבּוֹירְן, אָנְגֶערוּפְן וֶוערְן הֵיילִיק, אוּן דֶער בֶּן־אֱלֹהִים.
36
אוּן זֶע, אֶלִישֶׁבַע דַיין קְרוֹבָה, אוֹיךְ זִי אִיז טְרָאגְנְדִיק מִיט אַ זוּן אוֹיף אִיר עֶלְטֶער; אוּן דָאס אִיז דֶער זֶעקְסְטֶער חוֹדֶשׁ בַּיי אִיר, וָואס אִיז גֶערוּפְן גֶעוָוארְן עַקָרָה.
37
וָוארִים בַּיי גָאט אִיז קֵיין זַאך נִישְׁט אוּמְמֶעגְלֶעךְ.
38
אוּן מִרְיָם הָאט גֶעזָאגְט: אָט בִּין אִיךְ, דִי דִינְסְט פוּן גָאט; זָאל מִיט מִיר גֶעשֶׁען לוֹיט דַיין וָוארְט. אוּן דֶער מַלְאַךְ אִיז פוּן אִיר אַוֶועקְגֶעגַאנְגֶען.
39
אוּן מִרְיָם אִיז אוֹיפְגֶעשְׁטַאנֶען אִין יֶענֶע טֶעג, אוּן אִיז גֶעשְׁוִוינְד גֶעגַאנְגֶען אִין דֶעם בַּארְגִיקְן לַאנְד, צוּ אַ שְׁטָאט אִין יְהוּדָה;
40
אוּן זִי אִיז אַרַיינְגֶעגַאנְגֶען אִין דֶעם הוֹיז פוּן זְכַרְיָה, אוּן הָאט בַּאגְרִיסְט אֶלִישֶׁבַע.
41
אוּן עֶס אִיז גֶעוֶוען, בְּעֵת אֶלִישֶׁבַע הָאט גֶעהֶערְט דִי גְרִיסוּנְג פוּן מִרְיָם, אִיז דָאס קִינְד גֶעשְׁפְּרוּנְגֶען אִין אִיר לַייבּ; אוּן אֶלִישֶׁבַע אִיז גֶעוָוארְן פוּל מִיט דֶעם רוּחַ־הַקוֹדֶשׁ;
42
אוּן זִי הָאט אוֹיפְגֶעהוֹיבְּן אִיר קוֹל מִיט אַ הוֹיךְ גֶעשְׁרֵיי, אוּן גֶעזָאגְט: גֶעבֶּענְטְשְׁט בִּיסְטוּ צְוִוישְׁן וַוייבֶּער, אוּן גֶעבֶּענְטְשְׁט אִיז דִי פְרוּכְט פוּן דַיין לַייבּ!
43
אוּן פַארְוָואס אִיז דָאס מִיר בַּאשֶׁערְט, אַז דִי מוּטֶער פוּן מַיין הַאר זָאל קוּמֶען צוּ מִיר?
44
וָוארִים זֶע, וִוי נָאר דָאס קוֹל פוּן דַיין בַּאגְרִיסוּנְג הָאט דֶערְגְרֵייכְט מַיינֶע אוֹיעֶרן, אִיז דָאס קִינְד גֶעשְׁפְּרוּנְגֶען פוּן שִׂמְחָה אִין מַיין לַייבּ.
45
אוּן גֶעבֶּענְטְשְׁט אִיז זִי, וָואס הָאט גֶעגְלוֹיבְּט, וָוארִים סֶע וֶועט מְקוּיָם וֶוערְן דָאס, וָואס אִיז צוּ אִיר גֶערֶעדְט גֶעוָוארְן פוּן גָאט.
46
אוּן מִרְיָם הָאט גֶעזָאגְט: מַיין זֶעל דֶערְהֵייכְט דֶעם הַאר,
47
אוּן סֶע פְרֵייט זִיךְ מַיין גֵייסְט אִין גָאט, מַיין גוֹאֵל,
48
וָוארִים עֶר הָאט גֶעקוּקְט אוֹיף דֶער נִידֶערִיקַייט פוּן זַיין דִינְסְט, וָוארִים זֶע, פוּן אִיצְט אָן וֶועלְן מִיךְ אַלֶע דוֹרוֹת רוּפְן גֶעבֶּענְטְשְׁטֶע.
49
וַוייל גְרוֹיסֶע זַאכְן הָאט דֶער מֶעכְטִיקֶער מִיר גֶעטָאן; אוּן הֵיילִיק אִיז זַיין נָאמֶען.
50
אוּן זַיין בַּארֶעמְהַארְצִיקַייט אִיז אוֹיף דוֹר־דוֹרוֹת צוּ דִי, וָואס פָארְכְטְן אִים.
51
עֶר הָאט גֶעוִויזְן גְבוּרוֹת מִיט זַיין אָרֶעם, אוּן צֶעשְׁפְּרֵייט דִי גַאוָוהדִיקֶע אִין דִי מַחְשָׁבוֹת פוּן זֵייעֶר הַארְץ.
52
עֶר הָאט אַרָאפְּגֶעוָוארְפְן דִי מֶעכְטִיקֶע פוּן זֵייעֶרֶע טְרָאנֶען, אוּן הָאט דֶערְהוֹיבְּן דִי פוּן נִידֶערִיקְן שְׁטַאנְד.
53
דִי הוּנְגֶערִיקֶע הָאט עֶר אָנְגֶעפִילְט מִיט גוּטְס, אוּן דִי רַייכֶע הָאט עֶר אַוֶועקְגֶעשִׁיקְט לֵיידִיק.
54
גֶעהָאלְפְן הָאט עֶר זַיין קְנֶעכְט יִשְׂרָאֵל, אוּן זִיךְ גֶעטָאן דֶערְמַאנֶען זַיין בַּארֶעמְהַארְצִיקַייט,
55
וִוי עֶר הָאט גֶערֶעדְט צוּ אוּנְדְזֶערֶע אָבוֹת, צוּ אַבְרָהָם אוּן צוּ זַיין זָאמֶען אוֹיף אֵייבִּיק.
56
אוּן מִרְיָם אִיז גֶעבְּלִיבְּן מִיט אִיר אַרוּם דְרַיי חֳדָשִׁים, אוּן הָאט זִיךְ אוּמְגֶעקֶערְט אַהֵיים.
57
אוּן אֶלִישֶׁבַעס צַייט אִיז גֶעוָוארְן פוּל, אַז זִי זָאל לִיגְן אִין קִימְפֶּעט; אוּן זִי הָאט גֶעבּוֹירְן אַ זוּן.
58
אוּן אִירֶע שְׁכֵנִים אוּן קְרוֹבִים הָאבְּן גֶעהֶערְט, אַז גָאט הָאט מִיט אִיר גֶעטָאן גְרוֹיס חֶסֶד, אוּן זֵיי הָאבְּן זִיךְ גֶעפְרֵייט מִיט אִיר.
59
אוּן עֶס אִיז גֶעוֶוען אוֹיפְן אַכְטְן טָאג, אִיז מֶען גֶעקוּמֶען מַל זַיין דָאס קִינְד; אוּן זֵיי הָאבְּן אִים גֶעוָואלְט אַ נָאמֶען גֶעבְּן זְכַרְיָה, נָאךְ זַיין פָאטֶערְס נָאמֶען.
60
אוּן זַיין מוּטֶער הָאט זִיךְ אָפְּגֶערוּפְן: נֵיין, נַייעֶרְט יוֹחָנָן זָאל מֶען אִים רוּפְן.
61
אוּן זֵיי הָאבְּן צוּ אִיר גֶעזָאגְט: קֵיינֶער פוּן דַיין מִשְׁפָּחָה הֵייסְט נִישְׁט אַזוֹי.
62
אוּן זֵיי הָאבְּן גֶעמַאכְט צֵייכְנְס צוּ זַיין פָאטֶער, וָואס פַארַא נָאמֶען עֶר וִויל אִים גֶעבְּן.
63
אוּן עֶר הָאט פַארְלַאנְגְט אַ שְׁרַייבּ־טָאוְול, אוּן הָאט אוֹיפְגֶעשְׁרִיבְּן: זַיין נָאמֶען אִיז יוֹחָנָן. אוּן זֵיי הָאבְּן זִיךְ אַלֶע גֶעחִידוּשְׁט.
64
אוּן זַיין מוֹיל אוּן זַיין צוּנְג הָאבְּן זִיךְ מִיטְאַמָאל אוֹיפְגֶעמַאכְט, אוּן עֶר הָאט גֶענוּמֶען רֶעדְן אוּן לוֹיבְּן גָאט.
65
אוּן אַ פַּחַד אִיז גֶעפַאלְן אוֹיף אַלֶע זֵייעֶרֶע שְׁכֵנִים; אוּן אִין דִי גַאנְצְן גֶעבֶּערְג פוּן יְהוּדָה הָאט מֶען גֶערֶעדְט וֶועגְן דִי דָאזִיקֶע זַאכְן.
66
אוּן אַלֶע, וָואס הָאבְּן דָאס גֶעהֶערְט, הָאבְּן עֶס זִיךְ גֶענוּמֶען צוּם הַארְצְן, אוּן גֶעזָאגְט: וָואס פַארַא קִינְד וֶועט דָאס זַיין? וָוארִים דִי הַאנְט פוּן גָאט אִיז גֶעוֶוען מִיט אִים.
67
אוּן זַיין פָאטֶער זְכַרְיָה אִיז גֶעוָוארְן פוּל מִיט דֶעם רוּחַ־הַקוֹדֶשׁ, אוּן הָאט נְבִיאוֹת גֶעזָאגְט, אַזוֹי צוּ זָאגְן:
68
גֶעלוֹיבְּט אִיז גָאט, דֶער גָאט פוּן יִשְׂרָאֵל! וָוארִים עֶר הָאט גֶעדֶענְקְט אוּן גֶעשִׁיקְט אַ לֵייזוּנְג פַאר זַיין פָאלְק,
69
אוּן הָאט אוֹיפְגֶעשְׁטֶעלְט פַאר אוּנְדְז אַ הָארְן פוּן יְשׁוּעָה אִין דֶעם הוֹיז פוּן זַיין קְנֶעכְט דָוִד,
70
וִוי עֶר הָאט גֶערֶעדְט דוּרְךְ דֶעם מוֹיל פוּן זַיינֶע הֵיילִיקֶע נְבִיאִים פוּן אַמָאל,
71
רֶעטוּנְג פוּן אוּנְדְזֶערֶע שׂוֹנְאִים, אוּן פוּן דֶער הַאנְט פוּן אַלֶע, וָואס הָאבְּן אוּנְדְז פַיינְט.
72
צוּ טָאן חֶסֶד מִיט אוּנְדְזֶערֶע אָבוֹת, אוּן צוּ גֶעדֶענְקֶען זַיין הֵיילִיקְן בּוּנְד;
73
דִי שְׁבוּעָה, וָואס עֶר הָאט גֶעשְׁוואוֹירְן צוּ אַבְרָהָם אָבִינוּ,
74
אוּנְדְז מַצִיל צוּ זַיין פוּן דֶער הַאנְט פוּן אוּנְדְזֶערֶע שׂוֹנְאִים, אוּן דִינֶען אִים אָן פַּחַד,
75
אִין קְדוּשָׁה אוּן גֶערֶעכְטִיקַייט פַאר אִים אַלֶע אוּנְדְזֶערֶע טֶעג.
76
אוּן דוּ, קִינְד, וֶועסְט גֶערוּפְן וֶוערְן: נָבִיא פוּן דֶעם אֵייבֶּערְשְׁטְן; וָוארִים דוּ וֶועסְט גֵיין פַאר גָאט אָנְצוּגְרֵייטְן זַיינֶע וֶועגְן,
77
צוּ גֶעבְּן פַארְשְׁטֶענְדִיקַייט פוּן יְשׁוּעָה פַאר זַיין פָאלְק דוּרְךְ דֶער פַארְגֶעבּוּנְג פוּן זֵייעֶרֶע זִינְד,
78
צוּלִיבּ דֶער בַּארֶעמְהַארְצִיקַייט פוּן אוּנְדְזֶער גָאט, מִיט וָואס דֶער פְרִימָארְגְן וֶועט אוֹיפְגֵיין אוֹיף אוּנְדְז פוּן דֶער הֵייךְ,
79
צוּ לַייכְטְן אוֹיף דִי, וָואס זִיצְן אִין פִינְצְטֶערְנִישׁ אוּן אִין שָׁאטְן פוּן טוֹיט; צוּ פִירְן אוּנְדְזֶערֶע טְרִיט אִין דֶעם וֶועג פוּן שָׁלוֹם.
80
אוּן דָאס קִינְד אִיז גֶעוַואקְסְן, אוּן אִיז גֶעוָוארְן שְׁטַארְק אִין דֶעם גֵייסְט, אוּן אִיז גֶעוֶוען אִין מִדְבָּרִיוֹת בִּיז דֶעם טָאג, וֶוען עֶר הָאט זִיךְ אַנְטְפְּלֶעקְט צוּ יִשְׂרָאֵל.