אידיש
1
אוּן זֵיי זֶענֶען גֶעקוּמֶען אוֹיף דֶער אַנְדֶערֶער זַייט יַם, אִין דֶעם לַאנְד פוּן דִי גַדְרִיִים.
2
אוּן בְּעֵת עֶר אִיז אַרוֹיסְגֶעקוּמֶען פוּן דֶער שִׁיף, אִיז אִים תֵּיכֵּף פוּן צְוִוישְׁן דִי קְבָרִים אַנְטְקֶעגְנְגֶעקוּמֶען אַ מֶענְטְשׁ מִיט אַן אוּמְרֵיינֶעם גֵייסְט,
3
וָואס הָאט גֶעוְואוֹינְט צְוִוישְׁן דִי קְבָרִים; אוּן קֵיינֶער הָאט אִים מֶער נִישְׁט גֶעקֶענְט בִּינְדְן, נִישְׁט צוּמָאל מִיט אַ קֵייט;
4
וַוייל מֶע הָאט אִים אָפְט גֶעבּוּנְדְן מִיט אַייזְנְס אוּן מִיט קֵייטְן, אָבֶּער עֶר הָאט דִי קֵייטְן פוּנְאַנְדֶערְגֶערִיסְן, אוּן דִי אַייזְנְס הָאט עֶר צֶעבְּרָאכְן אוֹיף שְׁטִיקֶער; אוּן קֵיינֶער אִיז נִישְׁט גֶעוֶוען בְּכּוֹחַ אִים צוּ צַאמֶען.
5
אוּן טָאג אוּן נַאכְט אִיז עֶר כְּסֵדֶר גֶעוֶוען צְוִוישְׁן דִי קְבָרִים אוּן אוֹיף דִי בֶּערְג, אוּן הָאט גֶעשְׁרִיגְן אוּן זִיךְ גֶענִיזוּקְט מִיט שְׁטֵיינֶער.
6
אוּן וֶוען עֶר הָאט פוּן דֶערְוַוייטְנְס גֶעזֶען יֵשׁוּעַ, אִיז עֶר צוּגֶעלָאפְן אוּן זִיךְ גֶעבּוּקְט פַאר אִים,
7
אוּן אוֹיסְשְׁרַייעֶנְדִיק מִיט אַ הוֹיךְ קוֹל, הָאט עֶר גֶעזָאגְט: וָואס וִוילְסְטוּ פוּן מִיר, יֵשׁוּעַ, דוּ בֶּן־אֵל עֶליוֹן? אִיךְ בַּאשְׁוֶוער דִיךְ בַּיי גָאט, זָאלְסְט מִיךְ נִישְׁט פַּיינִיקְן.
8
וָוארִים עֶר הָאט צוּ אִים גֶעזָאגְט: גֵיי אַרוֹיס פוּן דֶעם מֶענְטְשׁ, דוּ אוּמְרֵיינֶער גֵייסְט!
9
אוּן עֶר הָאט אִים גֶעפְרֶעגְט: וָואס אִיז דַיין נָאמֶען? הָאט עֶר צוּ אִים גֶעזָאגְט: מַיין נָאמֶען אִיז לִגְיוֹן; וָוארִים מִיר זֶענֶען אַ סַך.
10
אוּן עֶר הָאט אִים שְׁטַארְק גֶעבֶּעטְן, אַז עֶר זָאל זֵיי נִישְׁט אַרוֹיסְשִׁיקְן פוּן דֶעם לַאנְד.
11
אוּן דָארְטְן בַּיים בַּארְג הָאט זִיךְ גֶעפַּאשֶׁעט אַ גְרוֹיסֶע סְטַאדֶע חֲזֵירִים;
12
אוּן זֵיי הָאבְּן אִים גֶעבֶּעטְן: שִׁיק אוּנְדְז צוּ דִי חֲזֵירִים, כְּדֵי מִיר זָאלְן אִין זֵיי אַרַיין.
13
אוּן עֶר הָאט זֵיי גֶעגֶעבְּן דֶערְלוֹיבֶּענִישׁ. אוּן דִי אוּמְרֵיינֶע גֵייסְטֶער זֶענֶען אַרוֹיס, אוּן זֶענֶען אַרַיין אִין דִי חֲזֵירִים; אוּן דִי סְטַאדֶע, אַן עֶרֶךְ פוּן צְוֵויי טוֹיזְנְט, הָאט זִיךְ אַרָאפְּגֶעלָאזְט פוּן דֶעם שִׁיפּוּעַ אִין יַם אַרַיין, אוּן זֶענֶען דֶערְטְרוּנְקֶען גֶעוָוארְן אִין דֶעם יַם.
14
אוּן דִי פַּאסְטֶעכֶער זֶענֶען גֶעלָאפְן אוּן הָאבְּן עֶס דֶערְצֵיילְט אִין דֶער שְׁטָאט אוּן אִין דָארְף. אוּן זֵיי זֶענֶען אַרוֹיסְגֶעגַאנְגֶען זֶען וָואס דָא אִיז גֶעשֶׁען.
15
אוּן זֵיי זֶענֶען גֶעקוּמֶען צוּ יֵשׁוּעַ, אוּן הָאבְּן גֶעזֶען דֶעם בַּאזֶעסֶענֶעם זִיצְן דָארְט, אָנְגֶעטָאן אוּן בַּיים קְלָארְן שֵׂכֶל, טַאקֶע דֶער, וָואס הָאט גֶעהַאט דִי לִגְיוֹן; אוּן זֵיי הָאבְּן מוֹרֶא בַּאקוּמֶען
16
אוּן דִי, וָואס הָאבְּן עֶס גֶעזֶען, הָאבְּן דֶערְצֵיילְט וָואס עֶס אִיז גֶעשֶׁען מִיט דֶעם בַּאזֶעסֶענֶעם, אוּן מִיט דִי חֲזֵירִים.
17
אוּן זֵיי הָאבְּן אִים גֶעבֶּעטְן, אַז עֶר זָאל פַארְלָאזְן זֵייעֶרֶע גְרֶענִיצְן.
18
אוּן בְּעֵת עֶר אִיז אַרַיינְגֶעגַאנְגֶען אִין דֶער שִׁיף, הָאט אִים דֶער, וָואס אִיז גֶעוֶוען בַּאזֶעסְן, גֶעבֶּעטְן, אַז עֶר זָאל מֶעגְן זַיין מִיט אִים.
19
אוּן עֶר הָאט אִים נִישְׁט גֶעלָאזְט, נַייעֶרְט הָאט צוּ אִים גֶעזָאגְט: גֵיי אַהֵיים צוּ דַיינֶע פְרַיינְט, אוּן דֶערְצֵייל זֵיי, וָואס גָאט הָאט מִיט דִיר גֶעטָאן, אוּן וִוי עֶר הָאט זִיךְ דֶערְבַּארֶעמְט אִיבֶּער דִיר.
20
אוּן עֶר אִיז אַרוֹיסְגֶעגַאנְגֶען, אוּן הָאט גֶענוּמֶען פַארְשְׁפְּרֵייטְן אִין דֶעקַאפָּלִיס אַלְץ, וָואס יֵשׁוּעַ הָאט פַאר אִים גֶעטָאן; אוּן זֵיי הָאבְּן זִיךְ אַלֶע גֶעחִידוּשְׁט.
21
אוּן בְּעֵת יֵשׁוּעַ הָאט זִיךְ וִוידֶער אַרִיבֶּערְגֶעשִׁיפְט אוֹיף דֶער אַנְדֶערֶער זַייט, הָאט זִיךְ צוּ אִים פַארְזַאמְלְט אַ סַך פָאלְק; אוּן עֶר אִיז גֶעוֶוען בַּיים יַם.
22
אוּן אֵיינֶער פוּן דִי גַבָּאִים פוּן דֶער שׁוּל, וָואס הָאט גֶעהֵייסְן יָאִיר, אִיז צוּ אִים גֶעקוּמֶען. אוּן אַז עֶר הָאט אִים גֶעזֶען, אִיז עֶר גֶעפַאלְן צוּ זַיינֶע פִיס,
23
אוּן עֶר הָאט אִים שְׁטַארְק גֶעבֶּעטְן, אוּן גֶעזָאגְט: מַיין טֶעכְטֶערְל הַאלְט בַּיים שְׁטַארְבְּן; קוּם, אוּן לֵייג אַרוֹיף דַיינֶע הֶענְט אוֹיף אִיר, כְּדֵי זִי זָאל גֶערַאטֶעוֶועט וֶוערְן, אוּן לֶעבְּן.
24
אוּן עֶר אִיז מִיט אִים גֶעגַאנְגֶען; אוּן אַ גְרוֹיסֶער עוֹלָם אִיז אִים נָאכְגֶעגַאנְגֶען, אוּן הָאט אִים גֶעדְרֶענְגְט.
25
אוּן אַ פְרוֹי, וָואס הָאט צְוֶועלְף יָאר גֶעהַאט אַ בְּלוּטְפְלוּס,
26
אוּן וָואס הָאט זִיךְ פִיל אָנְגֶעלִיטְן פוּן אַ סַך רוֹפְאִים, אוּן הָאט אוֹיסְגֶעגֶעבְּן אַלְץ וָואס זִי הָאט פַארְמָאגְט, אוּן הָאט זִיךְ דָאךְ נִישְׁט גֶעבֶּעסֶערְט, נַייעֶרְט עֶס אִיז אִיר נָאךְ עֶרְגֶער גֶעוָוארְן;
27
בְּעֵת זִי הָאט גֶעהֶערְט פוּנְוֶועגְן יֵשׁוּעַ, אִיז זִי גֶעקוּמֶען צְוִוישְׁן דֶעם פָאלְק פוּן הִינְטְן, אוּן הָאט אָנְגֶערִירְט זַיין מַלְבּוּשׁ.
28
וָוארִים זִי הָאט גֶעזָאגְט: אוֹיבּ אִיךְ וֶועל נָאר אָנְרִירְן זַיינֶע מַלְבּוּשִׁים, וֶועל אִיךְ גֶעהָאלְפְן וֶוערְן.
29
אוּן תֵּיכֵּף אִיז דֶער קְוַואל פוּן אִיר בְּלוּט פַארְטְרִיקְנְט גֶעוָוארְן; אוּן זִי הָאט דֶערְפִילְט אִין אִיר לַייבּ, אַז זִי אִיז גֶעהֵיילְט גֶעוָוארְן פוּן אִיר פְּלָאג.
30
אוּן בּאוֹתוֹ־רֶגַע הָאט יֵשׁוּעַ דֶערְפִילְט אִין זִיךְ, אַז גְבוּרָה אִיז פוּן אִים אַרוֹיסְגֶעגַאנְגֶען, אוּן עֶר הָאט זִיךְ אוֹיסְגֶעדְרֵייט צְוִוישְׁן דֶעם פָאלְק, אוּן גֶעזָאגְט: וֶוער הָאט בַּארִירְט מַיינֶע מַלְבּוּשִׁים?
31
אוּן זַיינֶע תַּלְמִידִים הָאבְּן צוּ אִים גֶעזָאגְט: דוּ זֶעסְט וִוי דָאס פָאלְק דְרִיקְט דִיךְ, זָאגְסְטוּ גָאר: וֶוער הָאט מִיךְ בַּארִירְט?
32
אוּן עֶר הָאט זִיךְ אַרוּמְגֶעקוּקְט, כְּדֵי צוּ זֶען וֶוער סֶע הָאט דָאס גֶעטָאן.
33
אָבֶּער דִי פְרוֹי הָאט מוֹרֶא בַּאקוּמֶען אוּן הָאט גֶעצִיטֶערְט, מַחְמַת זִי הָאט גֶעוואוּסְט וָואס סֶע אִיז מִיט אִיר גֶעשֶׁען, אוּן זִי הָאט גֶענֶעעֶנְט אוּן אִיז פַאר אִים אַנִידֶערְגֶעפַאלְן, אוּן הָאט אִים דֶערְצֵיילְט דֶעם גַאנְצְן אֶמֶת.
34
אוּן עֶר הָאט צוּ אִיר גֶעזָאגְט: טָאכְטֶער, דַיין אֶמוּנָה הָאט דִיר גֶעהָאלְפְן; גֵיי בְּשָׁלוֹם, אוּן וֶוער גֶעהֵיילְט פוּן דַיין פְּלָאג.
35
אוּן בְּשַׁעַת עֶר הָאט נָאךְ גֶערֶעדְט, אִיז מֶען גֶעקוּמֶען פוּן דֶעם גַבַּאי פוּן דֶער שׁוּל, אוּן גֶעזָאגְט: דַיין טָאכְטֶער אִיז גֶעשְׁטָארְבְּן; צוּ וָואס בִּיסְטוּ נָאךְ מַטְרִיחַ דֶעם רֶבִּין?
36
אוּן אַז יֵשׁוּעַ הָאט גֶעהֶערְט, וָואס זֵיי הָאבְּן גֶעזָאגְט, הָאט עֶר זִיךְ אָפְּגֶערוּפְן צוּם גַבַּאי פוּן דֶער שׁוּל: הָאבּ נִישְׁט קֵיין מוֹרֶא; הָאבּ נָאר בִּטָחוֹן!
37
אוּן עֶר הָאט קֵיינֶעם נִישְׁט גֶעלָאזְט מִיטְגֵיין, אַחוּץ פֶעטְרוֹס, יַעקֹב, אוּן יוֹחָנָן, יַעקֹבס בְּרוּדֶער.
38
אוּן וִוי זֵיי זֶענֶען צוּגֶעקוּמֶען צוּם הוֹיז פוּן דֶעם גַבַּאי פוּן דֶער שׁוּל, הָאט עֶר גֶעזֶען דִי מְהוּמָה, אוּן דִי פִיל וֵויינֶער אוּן קְלָאגֶער.
39
אוּן עֶר אִיז אַרַיינְגֶעגַאנְגֶען, אוּן הָאט צוּ זֵיי גֶעזָאגְט: וָואס לִיאַרֶעמְט אִיר אוּן וֵויינְט? דָאס קִינְד אִיז נִישְׁט גֶעשְׁטָארְבְּן, נַייעֶרְט טוּט שְׁלָאפְן.
40
אוּן זֵיי הָאבְּן אִים גוּט אוֹיסְגֶעלַאכְט. אוּן עֶר הָאט זֵיי אַלֶעמֶען אַרוֹיסְגֶעטְרִיבְּן, אוּן הָאט גֶענוּמֶען מִיט זִיךְ דֶעם פָאטֶער אוּן דִי מוּטֶער אוּן דִי, וָואס זֶענֶען גֶעוֶוען מִיט אִים אוּן אִיז אַרַיינְגֶעגַאנְגֶען וואוּ דָאס קִינְד אִיז גֶעוֶוען.
41
אוּן עֶר הָאט אָנְגֶענוּמֶען דָאס קִינְד בַּיי דֶער הַאנְט, אוּן הָאט צוּ אִיר גֶעזָאגְט: טַלְיְתָא קוּמִי; וָואס אִיז טַייטְשׁ: מֵיידְל, שְׁטֵיי אוֹיף.
42
אוּן דָאס מֵיידְל אִיז תֵּיכֵּף אוֹיפְגֶעשְׁטַאנֶען, אוּן הָאט גֶענוּמֶען גֵיין; אוּן זִי אִיז אַלְט גֶעוֶוען צְוֶועלְף יָאר. אוּן זֵיי זֶענֶען פַארְחִידוּשְׁט גֶעוָוארְן מִיט אַ גְרוֹיס חִידוּשׁ.
43
אוּן עֶר הָאט זֵיי שְׁטְרֶענְג בַּאפוֹילְן, אַז קֵיינֶער זָאל נִישְׁט וִויסְן דֶערְפוּן; אוּן עֶר הָאט גֶעהֵייסְן, מֶע זָאל אִיר גֶעבְּן עֶפֶּעס צוּ עֶסְן.