אידיש
1
אוּן עֶר הָאט וִוידֶער אָנְגֶעהוֹיבְּן צוּ לֶערְנֶען בַּיים יַם. אוּן סֶע הָאט זִיךְ פַארְזַאמְלְט אַרוּם אִים אַ גְרוֹיסֶער עוֹלָם, אַזוֹי, אַז עֶר אִיז אַרַיינְגֶעגַאנְגֶען אִין אַ שִׁיף, אוּן הָאט זִיךְ גֶעזֶעצְט אוֹיפְן יַם; אוּן דָאס גַאנְצֶע פָאלְק אִיז גֶעשְׁטַאנֶען אוֹיף דֶער יַבָּשָׁה בַּיים יַם.
2
אוּן עֶר הָאט זֵיי גֶעלֶערְנְט אַ סַך זַאכְן דוּרְךְ מְשָׁלִים, אוּן הָאט צוּ זֵיי גֶעזָאגְט אִין זַיין לֶערְנוּנְג:
3
הֶערְט אוּן פַארְנֶעמְט: דֶער זֵייעֶר אִיז אַרוֹיסְגֶעגַאנְגֶען זֵייעֶן;
4
אוּן בְּעֵת עֶר הָאט גֶעזֵייט, אִיז טֵייל זְרִיעֶה גֶעפַאלְן בַּיים וֶועג, אוּן דִי פֵייגְל זֶענֶען גֶעקוּמֶען אוּן הָאבְּן זִי פַארְצֶערְט.
5
אוּן אַנְדֶערֶע אִיז גֶעפַאלְן אוֹיף פֶעלְזִיק לַאנְד, וואוּ זִי הָאט נִישְׁט גֶעהַאט קֵיין סַך עֶרְד; אוּן זִי הָאט תֵּיכֵּף אוֹיפְגֶעשְׁפְּרָאצְט, וַוייל זִי הָאט נִישְׁט גֶעהַאט קֵיין טִיפְקַייט פוּן עֶרְד;
6
אוּן אַז דִי זוּן אִיז אוֹיפְגֶעגַאנְגֶען, אִיז זִי פַארְטְרִיקְנְט גֶעוָוארְן, אוּן מַחְמַת זִי הָאט נִישְׁט גֶעהַאט קֵיין וָוארְצְלֶען, אִיז זִי פַארְוֶועלְקְט גֶעוָוארְן.
7
אוּן אַנְדֶערֶע אִיז גֶעפַאלְן צְוִוישְׁן דֶערְנֶער, אוּן דִי דֶערְנֶער זֶענֶען אוֹיפְגֶעוַואקְסְן אוּן הָאבְּן זִי דֶערְשְׁטִיקְט, אוּן קֵיין תְּבוּאָה אִיז נִישְׁט אַרוֹיסְגֶעקוּמֶען.
8
אוּן אַנְדֶערֶע אִיז גֶעפַאלְן אוֹיף גוּטֶער עֶרְד, אוּן הָאט אַרוֹיסְגֶעגֶעבְּן תְּבוּאָה, אִיז גֶעוַואקְסְן אוּן הָאט זִיךְ פַארְמֶערְט, אוּן הָאט אַרוֹיסְגֶעבְּרַאכְט דְרַייסִיקְפַאךְ, אוּן זֶעכְצִיקְפַאךְ, אוּן הוּנְדֶערְטְפַאךְ.
9
אוּן עֶר הָאט גֶעזָאגְט: דֶער, וָואס הָאט אוֹיעֶרְן צוּ הֶערְן, זָאל הֶערְן.
10
אוּן בְּעֵת עֶר אִיז גֶעוֶוען אַלֵיין, הָאבְּן דִי, וָואס זֶענֶען מִיט אִים גֶעוֶוען, צוּזַאמֶען מִיט דִי צְוֶועלְף, אִים גֶעפְרֶעגְט פוּנְוֶועגְן דִי מְשָׁלִים.
11
אוּן עֶר הָאט צוּ זֵיי גֶעזָאגְט: אַייךְ אִיז גֶעגֶעבְּן גֶעוָוארְן צוּ פַארְשְׁטֵיין דֶעם סוֹד פוּן דֶעם מַלְכוּת פוּן גָאט, אָבֶּער פַאר דִי, וָואס זֶענֶען אִין דְרוֹיסְן, אִיז אַלְץ דוּרְךְ מְשָׁלִים,
12
כְּדֵי זֶען זָאלְן זֵיי זֶען, אוּן דָאךְ נִישְׁט זֶען; אוּן הֶערְן זָאלְן זֵיי הֶערְן, אוּן נִישְׁט פַארְשְׁטֵיין; טָאמֶער וֶועלְן זֵיי זִיךְ אוּמְקֶערְן, אוּן סֶע וֶועט זֵיי פַארְגֶעבְּן וֶוערְן.
13
אוּן עֶר הָאט צוּ זֵיי גֶעזָאגְט: אוֹיבּ אִיר פַארְשְׁטֵייט נִישְׁט דָאס דָאזִיקֶע מָשָׁל, טָא וִוי אַזוֹי וֶועט אִיר פַארְשְׁטֵיין אַלֶע מְשָׁלִים?
14
דֶער זֵייעֶר טוּט זֵייעֶן דָאס וָוארְט.
15
אוּן דָאס זֶענֶען דִי בַּיים וֶועג, וואוּ דָאס וָוארְט אִיז פַארְזֵייט גֶעוֶואטְן; אוּן בְּעֵת זֵיי הֶערְן עֶס, קוּמְט תֵּיכֵּף דֶער שָׂטָן, אוּן נֶעמְט צוּ דָאס וָוארְט, וָואס אִיז אִין זֵיי פַארְזֵייט גֶעוָוארְן.
16
אוּן אַזוֹי אוֹיךְ דִי, וָואס זֶענֶען גֶעזֵייט אוֹיף פֶעלְזִיק לַאנְד, בְּעֵת זֵיי הֶערְן דָאס וָוארְט, נֶעמֶען זֵיי עֶס תֵּיכֵּף אוֹיף מִיט שִׂמְחָה;
17
אוּן אַזוֹי וִוי זֵיי הָאבְּן נִישְׁט קֵיין וָוארְצְלֶען אִין זִיךְ, גֶעוֶוערְן זֵיי נָאר אַ וַוייל; דֶערְנָאךְ, אַז סֶע קוּמֶען לַיידְן, אָדֶער רְדִיפוֹת צוּלִיבּ דֶעם וָוארְט, וֶוערְן זֵיי תֵּיכֵּף גֶעשְׁטְרוֹיכְלְט.
18
אוּן דָאס, וָואס אִיז פַארְזֵייט צְוִוישְׁן דֶערְנֶער, דָאס זֶענֶען דִי, וָואס הָאבְּן גֶעהֶערְט דָאס וָוארְט,
19
נָאר דִי דַאגוֹת פוּן דֶער וֶועלְט, אוּן דִי אָפְּנַארֶערַיי פוּן עַשִׁירוּת, אוּן דִי תַּאֲווֹת צוּ אַנְדֶערֶע זַאכְן קוּמֶען אַרַיין, אוּן דֶערְשְׁטִיקְן דָאס וָוארְט, אוּן עֶס בְּלַייבְּט אוּמְפְרוּכְטְבַּאר.
20
אוּן דָאס, וָואס אִיז פַארְזֵייט גֶעוָוארְן אוֹיף גוּטֶער עֶרְד, דָאס זֶענֶען דִי, וָואס הֶערְן דָאס וָוארְט, אוּן זֶענֶען עֶס מְקַבְּל, אוּן גִיבְּן אַרוֹיס תְּבוּאָה, דְרַייסִיקְפַאךְ, אוּן זֶעכְצִיקְפַאךְ, אוּן הוּנְדֶערְטְפַאךְ.
21
אוּן עֶר הָאט צוּ זֵיי גֶעזָאגְט: בְּרֶענְגְט מֶע דֶען אַרַיין אַ לִיכְט, כְּדֵי עֶס צוּ שְׁטֶעלְן אוּנְטֶער אַ מֶעסְטְל, אָדֶער אוּנְטֶערְן בֶּעט, אוּן נִישְׁט אִין אַ לַייכְטֶער?
22
וָוארִים עֶס אִיז גָארְנִישְׁט פַארְהוֹילְן, וָואס וֶועט נִישְׁט אַנְטְפְּלֶעקְט וֶוערְן; אוּן עֶס אִיז גָארְנִישְׁט פַארְבָּארְגְן, וָואס וֶועט נִישְׁט בַּאקַאנְט וֶוערְן.
23
דֶער, וָואס הָאט אוֹיעֶרְן צוּ הֶערְן, זָאל הֶערְן!
24
אוּן עֶר הָאט צוּ זֵיי גֶעזָאגְט: פַארְנֶעמְט וָואס אִיר הֶערְט; מִיט דֶער מָאס, וָואס אִיר טוּט מֶעסְטְן, וֶועט אַייךְ גֶעמָאסְטְן וֶוערְן, אוּן מֶע וֶועט אַייךְ נָאךְ עֶפֶּעס צוּלֵייגְן.
25
וָוארִים דֶער, וָואס הָאט, דֶעם וֶועט גֶעגֶעבְּן וֶוערְן; אוּן דֶער, וָואס הָאט נִישְׁט, פוּן אִים וֶועט אַוֶועקְגֶענוּמֶען וֶוערְן אֲפִילוּ דָאס, וָואס עֶר הָאט.
26
אוּן עֶר הָאט גֶעזָאגְט: דָאס מַלְכוּת פוּן גָאט אִיז גֶעגְלִיכְן צוּ אַ מֶענְטְשׁ, וָואס טוּט וַוארְפְן זְרִיעֶה אוֹיף דֶער עֶרְד,
27
אוּן עֶר גֵייט שְׁלָאפְן אוּן אוֹיפְשְׁטֵיין בַּיינַאכְט אוּן בַּייטָאג, אוּן דִי זְרִיעֶה שְׁפְּרָאצְט אוֹיס אוּן וַואקְסְט אוֹיף, אָן זַיין וִויסְן.
28
וָוארִים דִי עֶרְד בְּרֶענְגְט אַרוֹיס תְּבוּאָה פוּן זִיךְ אַלֵיין; קוֹדֶם דָאס בְּלֶעטְל, דֶערְנָאךְ דִי זַאנְג, דֶערְנָאךְ דֶעם פוּלְן קֶערְן אִין דֶער זַאנְג.
29
אוּן וֶוען דִי תְּבוּאָה וֶוערְט צַייטִיק, נֶעמְט עֶר גְלַייךְ דָאס שׁנַיידְמֶעסֶער, וָוארִים גֶעקוּמֶען אִיז דִי שְׁנִיט־צַייט.
30
אוּן עֶר הָאט גֶעזָאגְט: מִיט וָואס זָאלְן מִיר פַארְגְלַייכְן דָאס מַלְכוּת פוּן גָאט? אָדֶער מִיט וָואסֶער מָשָׁל זָאלְן מִיר עֶס דֶערְקְלֶערְן?
31
עֶס אִיז וִוי זֶענֶעפְט־זְרִיעֶה, וָואס בִּשְׁעַת סֶע וֶוערְט פַארְזֵייט אִין דֶער עֶרְד, אִיז עֶס דִי קְלֶענְסְטֶע פוּן אַלֶע עֶרְד־זְרִיעוֹת;
32
אָבֶּער אַז עֶס אִיז שׁוֹין פַארְזֵייט, וַואקְסְט עֶס אוֹיס אוּן וֶוערְט גְרֶעסֶער פוּן אַלֶע קְרֵייטֶעכְצֶער, אוּן גִיט אַרוֹיס גְרוֹיסֶע צְוַוייגְן, אַזוֹי, אַז דִי פֵייגְל פוּן הִימְל קָאנֶען רוּעֶן אִין זַיין שָׁאטְן.
33
אוּן מִיט אַ סַך אַזוֹינֶע מְשָׁלִים הָאט עֶר גֶערֶעדְט צוּ זֵיי דָאס וָוארְט, אוֹיף וִוי וַוייט זֵיי זֶענֶען גֶעוֶוען בִּיְכוֹלֶת צוּ פַארְנֶעמֶען;
34
אוּן אָן אַ מָשָׁל הָאט עֶר צוּ זֵיי נִישְׁט גֶערֶעדְט; אָבֶּער וֶוען עֶר אִיז גֶעוֶוען אַלֵיין מִיט זַיינֶע תַּלְמִידִים, הָאט עֶר זֵיי אַלְץ פַארְטַייטְשְׁט.
35
אִין יֶענֶעם טָאג, בְּעֵת עֶס אִיז גֶעוָוארְן אָוונְט, הָאט עֶר צוּ זֵיי גֶעזָאגְט: לָאמִיר אַרִיבֶּערְפָארְן אוֹיף דֶער אַנְדֶערֶער זַייט.
36
אוּן אַז עֶר הָאט אָפְּגֶעלָאזְט דֶעם עוֹלָם, הָאבְּן זֵיי אִים מִיטְגֶענוּמֶען אִין דֶער שִׁיף, אַזוֹי וִוי עֶר אִיז גֶעוֶוען; אוּן מִיט אִים זֶענֶען גֶעוֶוען נָאךְ אַנְדֶערֶע שִׁיפְן.
37
אוּן אַ גְרוֹיסֶער שְׁטוּרֶעמְוִוינְט הָאט זִיךְ אוֹיפְגֶעהוֹיבְּן, אוּן דִי כְוַואלְיֶעס הָאבְּן אָנְגֶעשְׁלָאגְן אָן דֶער שִׁיף, אַזוֹי, אַז דִי שִׁיף הָאט גֶענוּמֶען וֶוערְן פוּל.
38
אוּן עֶר אִיז גֶעוֶוען אִין הִינְטֶערְשְׁטְן טֵייל, אוּן אִיז גֶעשְׁלָאפְן אוֹיף דֶעם קִישְׁן; אוּן זֵיי הָאבְּן אִים אוֹיפְגֶעוֶועקְט, אוּן הָאבְּן צוּ אִים גֶעזָאגְט: רֶבִּי, אַרְט דִיךְ נִישְׁט וָואס מִיר גֵייעֶן אוּנְטֶער?
39
אוּן עֶר אִיז אוֹיפְגֶעשְׁטַאנֶען, אוּן הָאט אָנְגֶעשְׁרִיגְן אוֹיף דֶעם וִוינְט, אוּן גֶעזָאגְט צוּם יַם: שְׁוַוייג, זַיי שְׁטִיל! אוּן דֶער וִוינְט הָאט אוֹיפְגֶעהֶערְט, אוּן עֶס אִיז גֶעוָוארְן אַ גְרוֹיסֶע שְׁטִילְקַייט.
40
אוּן עֶר הָאט צוּ זֵיי גֶעזָאגְט: פַארְוָואס זֶענְט אִיר אַזוֹי שְׁרֶעקֶעוְודִיק? הָאט אִיר נִישְׁט קֵיין אֶמוּנָה?
41
אוּן זֵיי הָאבְּן שְׁטַארְק מוֹרֶא בַּאקוּמֶען, אוּן הָאבְּן גֶעזָאגְט אֵיינֶער צוּם אַנְדֶערְן: וֶוער אֵייגְנְטְלֶעךְ אִיז עֶר, וָואס אֲפִילוּ דֶער וִוינְט אוּן דֶער יַם גֶעהָארְכְן אִים?