אידיש
1
אוּן בְּעֵת זֵיי הָאבְּן גֶענֶעעֶנְט קֵיין יְרוּשָׁלַיִם, קֵיין בֵּית־פַּגֵי אוּן בֵּית־הִינִי, בַּיים הַר־הַזֵיתִים, הָאט עֶר גֶעשִׁיקְט צְוֵויי פוּן זַיינֶע תַּלְמִידִים,
2
אוּן צוּ זֵיי גֶעזָאגְט: גֵייט אִין דָארְף אַרַיין אַנְטְקֶעגְנְאִיבֶּער אַייךְ. אוּן תֵּיכֵּף וִוי אִיר וֶועט אַרַיינְקוּמֶען, וֶועט אִיר גֶעפִינֶען צוּגֶעבּוּנְדְן אַ יוּנְג אֵייזְל, אוֹיף וֶועלכְן קֵיינֶער אִיז נָאךְ נִישְׁט גֶעזֶעסְן; בִּינְדְט עֶס אָפּ, אוּן בְּרֶענְגְט עֶס אַהֶער.
3
אוּן אוֹיבּ עֶמִיצֶער וֶועט צוּ אַייךְ זָאגְן: פַארְוָואס טוּט אִיר דָאס? זָאלְט אִיר זָאגְן: דֶער הַאר דַארְף עֶס הָאבְּן, אוּן עֶר וֶועט עֶס תֵּיכֵּף צוּרִיקְשִׁיקְן.אוּן אוֹיבּ עֶמִיצֶער וֶועט צוּ אַייךְ זָאגְן: פַארְוָואס טוּט אִיר דָאס? זָאלְט אִיר זָאגְן: דֶער הַאר דַארְף עֶס הָאבְּן, אוּן עֶר וֶועט עֶס תֵּיכֵּף צוּרִיקְשִׁיקְן.
4
אוּן זֵיי זֶענֶען גֶעגַאנְגֶען, אוּן הָאבְּן גֶעפוּנֶען אַ יוּנְג אֵייזְל צוּגֶעבּוּנְדְן בַּיי אַ טִיר אִין דְרוֹיסְן בַּיים וֶועג; אוּן זֵיי הָאבְּן עֶס אָפְּגֶעבּוּנְדְן.
5
אוּן עֶטְלֶעכֶע פוּן דִי, וָואס זֶענֶען דָארְט גֶעשְׁטַאנֶען, הָאבְּן צוּ זֵיי גֶעזָאגְט: וָואס טוּט אִיר, וָואס אִיר בִּינְדְט אָפּ דָאס אֵייזֶעלֶע?
6
אוּן זֵיי הָאבְּן צוּ זֵיי גֶעזָאגְט, וָואס יֵשׁוּעַ הָאט זֵיי גֶעהֵייסְן; אוּן זֵיי הָאבְּן זֵיי גֶעלָאזְט גֵיין.
7
אוּן זֵיי הָאבְּן גֶעבְּרַאכְט דָאס אֵייזְל צוּ יֵשׁוּעַ, אוּן הָאבְּן דֶערְוֹיף אַרוֹיפְגֶעלֵייגְט זֵייעֶרֶע מַלְבּוּשִׁים, אוּן עֶר הָאט זִיךְ אוֹיף זֵיי אַרוֹיפְגֶעזֶעצְט.
8
אוּן אַ סַך הָאבְּן אוֹיסְגֶעשְׁפְּרֵייט זֵייעֶרֶע מַלְבּוּשִׁים אוֹיפְן וֶועג, אוּן אַנְדֶערֶע צְוַוייגְן, וָואס זֵיי הָאבְּן אָפְּגְֶעשְׁנִיטְן אוֹיף דִי פֶעלְדֶער.
9
אוּן דִי, וָואס זֶענֶען גֶעגַאנְגֶען פָארוֹיס, אוּן דִי, וָואס זֶענֶען נָאכְגֶעגַאנְגֶען, הָאבְּן גֶעשְׁרִיגְן: הוֹשַׁע־נָא! בָּרוּךְ הַבָּא אִין דֶעם נָאמֶען פוּן גָאט!
10
גֶעבֶּענְטְשְׁט אִיז דָאס מַלְכוּת פוּן אוּנְדְזֶער פָאטֶער דָוִד, וָואס טוּט קוּמֶען! הוֹשַׁע־נָא אִין דֶער הֵייךְ!
11
אוּן עֶר אִיז אַרַיינְגֶעקוּמֶען קֵיין יְרוּשָׁלַיִם, אוּן אִיז גֶעגַאנְגֶען אִין בֵּית־הַמִקְדָשׁ אַרַיין, אוּן נָאכְדֶעם וִוי עֶר הָאט זִיךְ אוֹיף אַלְץ אַרוּמְגֶעקוּקְט, אוּן מַחְמַת עֶס אִיז שׁוֹין גֶעוֶוען שְׁפֶּעט, אִיז עֶר אַרוֹיסְגֶעגַאנְגֶען קֵיין בֵּית־הִינִי מִיט דִי צְוֶועלְף.
12
אוּן אוֹיף מָארְגְן, בְּעֵת זֵיי זֶענֶען אַרוֹיסְגֶעקוּמֶען פוּן בֵּית־הִינִי, אִיז עֶר גֶעוֶוען הוּנְגֶערִיק.
13
אוּן זֶעעֶנְדִיק פוּן דֶערְוַוייטְנְס אַ פֵייגְנְבּוֹים מִיט בְּלֶעטֶער, אִיז עֶר צוּגֶעגַאנְגֶען זֶען, אֶפְשָׁר וֶועט עֶר אוֹיף אִים עֶפֶּעס גֶעפִינֶען. אוּן אַז עֶר הָאט זִיךְ דֶערְנֶענְטֶערְט צוּ אִים, הָאט עֶר גָארְנִישְׁט גֶעפוּנֶען, אַחוּץ בְּלֶעטֶער; וָוארִים עֶס אִיז נָאךְ נִישְׁט גֶעוֶוען דִי צַייט פוּן פַייגְן.
14
אוּן עֶר הָאט צוּ אִים גֶעזָאגְט: זָאל שׁוֹין קֵיינֶער מֶער קֵיינְמָאל נִישְׁט עֶסְן קֵיין פֵּירוֹת פוּן דִיר. אוּן זַיינֶע תַּלְמִידִים הָאבְּן עֶס גֶעהֶערְט.
15
אוּן זֵיי זֶענֶען גֶעקוּמֶען קֵיין יְרוּשָׁלַיִם. אוּן עֶר אִיז אַרַיינְגֶעגַאנְגֶען אִין דֶעם בֵּית־הַמִקְדָשׁ אַרַיין, אוּן הָאט גֶענוּמֶען אַרוֹיסְטְרַייבְּן דִי, וָואס הָאבְּן פַארְקוֹיפְט אוּן גֶעקוֹיפְט אִין בֵּית־הַמִקְדָשׁ, אוּן הָאט אִיבֶּערְגֶעקֶערְט דִי טִישְׁן פוּן דִי חַלְפָנִים, אוּן דִי בֶּענְק פוּן דִי טוֹיבְּן־פַארְקוֹיפֶער.
16
אוּן עֶר הָאט קֵיינֶעם נִישְׁט גֶעלָאזְט דוּרְכְטְרָאגְן קֵיין כֵּלִי דוּרְךְ דֶעם בֵּית־הַמִקְדָשׁ.
17
אוּן עֶר הָאט גֶעלֶערְנְט, אוּן צוּ זֵיי גֶעזָאגְט: שְׁטֵייט דֶען נִישְׁט גֶעשְׁרִיבְּן: מַיין הוֹיז זָאל גֶערוּפְן וֶוערְן אַ הוֹיז פוּן תְּפִילָה פַאר אַלֶע אוּמוֹת? אִיר אָבֶּער הָאט עֶס גֶעמַאכְט אַ הֵייל פוּן גַזְלָנִים.
18
אוּן דִי רָאשֵׁי־כֹּהַנִים אוּן דִי סוֹפְרִים הָאבְּן דָאס גֶעהֶערְט, אוּן זֵיי הָאבְּן גֶעזוּכְט וִוי אַזוֹי אִים אוּמְצוּבְּרֶענְגֶען; וָוארִים זֵיי הָאבְּן פַאר אִים מוֹרֶא גֶעהַאט, מַחְמַת דָאס גַאנְצֶע פָאלְק הָאט זִיךְ גֶעחִידוּשְׁט אִיבֶּער זַיין לֶערְנוּנְג.
19
אוּן יֶעדְן אָוונְט אִיז עֶר אַרוֹיסְגֶעגַאנְגֶען פוּן דֶער שְׁטָאט.
20
אוּן וֶוען זֵיי זֶענֶען פַארְבַּייגֶעגַאנְגֶען אִין דֶער פְרִי, הָאבְּן זֵיי גֶעזֶען, אַז דֶער פֵייגְנְבּוֹים אִיז פַארְוֶועלְקְט גֶעוָוארְן בִּיז דִי וָוארְצְלֶען.
21
אוּן פֶּעטְרוֹס הָאט זִיךְ דֶערְמָאנְט, אוּן צוּ אִים גֶעזָאגְט: רֶבִּי, זֶע! דֶער פֵייגְנְבּוֹים, וָואס דוּ הָאסְט פַארְשָׁאלְטְן, אִיז פַארְוֶועלְקְט גֶעוָוארְן.
22
אוּן יֵשׁוּעַ הָאט גֶעעֶנְטְפֶערְט, אוּן צוּ זֵיי גֶעזָאגְט: הָאט אֶמוּנָה אִין גָאט.
23
בֶּאֱמֶת, אִיךְ זָאג אַייךְ, וֶוער סֶע וֶועט זָאגְן צוּ דֶעם דָאזִיקְן בַּארְג: הֵייבּ דִיךְ אוֹיף אוּן וַוארְף דִיךְ אִין יַם אַרַיין, אוּן עֶר וֶועט נִישְׁט צְוֵוייפְלֶען אִין זַיין הַארְץ, נַייעֶרְט וֶועט גְלוֹיבְּן אִין דֶעם, וָואס עֶר זָאגְט, וֶועט עֶס גֶעשֶׁען פַאר אִים.
24
דֶערִיבֶּער זָאג אִיךְ אַייךְ, אַלְץ, וָואס אִיר וֶועט בֶּעטְן אוּן פַארְלַאנְגֶען, גְלוֹיבְּט אַז אִיר הָאט עֶס שׁוֹין, אוּן אִיר וֶועט עֶס הָאבְּן.
25
אוּן וֶוען אִיר שְׁטֶעלְט זִיךְ מִתְפַּלֵל צוּ זַיין, זַייט מוֹחְל, אוֹיבּ אִיר הָאט עֶפֶּעס קֶעגְן עֶמִיצְן, כְּדֵי אַייעֶר פָאטֶער אִין הִימְל זָאל אוֹיךְ אַייךְ מוֹחְל זַיין אַייעֶרֶע חַטָאִים.
26
אָבֶּער אוֹיבּ אִיר וֶועט נִישְׁט מוֹחְל זַיין, וֶועט אַייעֶר פָאטֶער אִין הִימְל אוֹיךְ אַייעֶרֶע חַטָאִים נִישְׁט מוֹחְל זַיין.
27
אוּן זֵיי זֶענֶען וִוידֶער גֶעקוּמֶען קֵיין יְרוּשָׁלַיִם. אוּן בְּעֵת עֶר אִיז אַרוּמְגֶעגַאנְגֶען אִין דֶעם בֵּית־הַמִקְדָשׁ, זֶענֶען צוּ אִים צוּגֶעגַאנְגֶען דִי רָאשֵׁי־כֹּהַנִים, אוּן דִי סוֹפְרִים, אוּן דִי זְקֵנִים,
28
אוּן זֵיי הָאבְּן צוּ אִים גֶעזָאגְט: מִיט וֶועמֶעס רְשׁוּת טוּסְטוּ דָאס אַלְץ? אוּן וֶוער הָאט דִיר גֶעגֶעבְּן רְשׁוּת, דָאס דָאזִיקֶע צוּ טָאן?
29
אוּן יֵשׁוּעַ הָאט צוּ זֵיי גֶעזָאגְט: אִיךְ וִויל אַייךְ אוֹיךְ פְרֶעגְן אַ קַשְׁיָא; נוּ, עֶנְטְפֶערְט מִיר, אוּן אִיךְ וֶועל אַייךְ זָאגְן מִיט וֶועמֶעס רְשׁוּת אִיךְ טוּ דָאס אַלְץ.
30
אִיז דִי טְבִילָה פוּן יוֹחָנָן גֶעוֶוען פוּן הִימְל, אָדֶער פוּן מֶענְטְשְׁן? נוּ, עֶנְטְפֶערְט מִיר.
31
אוּן זֵיי הָאבְּן זִיךְ גֶעשְׁלָאגְן מִיט דֶער דֵעָה, אוּן גֶעזָאגְט: אוֹיבּ מִיר וֶועלְן זָאגְן: פוּן הִימְל, וֶועט עֶר זָאגְן: פַארְוָואס הָאט אִיר אִים נִישְׁט גֶעגְלוֹיבְּט?
32
וֶועלְן מִיר אָבֶּער זָאגְן: פוּן מֶענְטְשְׁן - הָאבְּן זֵיי מוֹרֶא גֶעהַאט פַארְן פָאלְק, וָוארִים אַלֶע הָאבְּן גֶעהַאלְטְן יוֹחָנָן פַאר אַן אֶמֶתְן נָבִיא.
33
אוּן זֵיי הָאבְּן גֶעעֶנְטְפֶערְט יֵשׁוּעַ: מִיר וֵוייסְן נִישְׁט. הָאט יֵשׁוּעַ צוּ זֵיי גֶעזָאגְט: אוֹיבּ אַזוֹי, זָאג אִיךְ אַייךְ אוֹיךְ נִישְׁט מִיט וֶועמֶעס רְשׁוּת אִיךְ טוּ דָאס.