אידיש
1
אוּן עֶר אִיז אוֹיפְגֶעשְׁטַאנֶען פוּן דָארְטְן, אוּן אִיז גֶעקוּמֶען אִין דִי גֶעמַארְקְן פוּן יְהוּדָה אוּן אֵבֶר־הַיַרְדֵן, אוּן אַ גְרוֹיסֶער הַמוֹן מֶענְטְשְׁן הָאט זִיךְ וִוידֶער אַרוּם אִים פַארְזַאמְלְט. אוּן וִוי זַיין שְׁטֵייגֶער, הָאט עֶר וִוידֶער מִיט זֵיי גֶעלֶערְנְט.
2
אוּן פְּרוּשִׁים הָאבְּן גֶענֶעעֶנְט, אוּן כְּדֵי אִים צוּ פְּרוּאוְון, הָאבְּן זֵיי אִים גֶעפְרֶעגְט: צִי מֶעג אַ מַאן זִיךְ גֶטְן מִיט זַיין וַוייבּ?
3
הָאט עֶר זֵיי גֶעעֶנְטְפֶערְט: וָואס הָאט אַייךְ מֹשֶׁה גֶעבָּאטְן?
4
הָאבְּן זֵיי גֶעזָאגְט: מֹשֶׁה הָאט אוּנְדְז דֶערְלוֹיבְּט צוּ שְׁרַייבְּן אַ גֶט, אוּן זִי אַוֶועקְשִׁיקְן.
5
אָבֶּער יֵשׁוּעַ הָאט צוּ זֵיי גֶעזָאגְט: צוּלִיבּ אַייעֶר הַארְטְהַארְצִיקֵייט הָאט עֶר אַייךְ פָארְגֶעשְׁרִיבְּן דָאס דָאזִיקֶע גֶעבָּאט.
6
אָבֶּער אִין אָנְהֵייבּ פוּן דֶער בַּאשַׁאפוּנְג הָאט זֵיי גָאט בַּאשַׁאפְן זָכָר אוּן נְקֵבָה.
7
דֶערִיבֶּער זָאל אַ מַאן פַארְלָאזְן זַיין פָאטֶער אוּן מוּטֶער, אוּן זִיךְ בַּאהֶעפְטְן אָן זַיין וַוייבּ,
8
אוּן בֵּיידֶע זָאלְן וֶוערְן אֵיין לַייבּ. אַזוֹי זֶענֶען זֵיי שׁוֹין מֶער נִישְׁט צְוֵויי, נַייעֶרְט אֵיין לַייבּ.
9
דֶערִיבֶּער, וָואס גָאט הָאט בַּאהֶעפְטְן, זָאל אַ מֶענְטְשׁ נִישְׁט פוּנַאנְדֶערְשֵׁיידְן.
10
אוּן אִין הוֹיז הָאבְּן אִים דִי תַּלְמִידִים וִוידֶער גֶעפְרֶעגְט וֶועגְן דֶעם דָאזִיקְן עִנְיָן.
11
אוּן עֶר הָאט צוּ זֵיי גֶעזָאגְט: וֶוער סֶע גֶט זִיךְ מִיט זַיין וַוייבּ, אוּן הָאט חַתוּנָה מִיט אַן אַנְדֶערֶער, אִיז אַ נוֹאֵף.
12
אוּן אוֹיבּ זִי גוּפָא גֶט זִיךְ מִיט אִיר מַאן, אוּן הָאט חַתוּנָה מִיט אַן אַנְדֶערְן, אִיז זִי אַ נוֹאֵפְטֶע.
13
אוּן זֵיי הָאבְּן צוּ אִים גֶעבְּרַאכְט קִינְדֶער, כְּדֵי עֶר זָאל זֵיי אָנְרִירְן; אָבֶּער דִי תַּלְמִידִים הָאבְּן זִיךְ אוֹיף זֵיי אָנְגֶעבֵּייזֶערְט.
14
אוּן אַז יֵשׁוּעַ הָאט דָאס גֶעזֶען, הָאט עֶס אִים פַארְדְרָאסְן, אוּן עֶר הָאט צוּ זֵיי גֶעזָאגְט: לָאזְט דִי קִינְדֶער קוּמֶען צוּ מִיר, אוּן פַארְוֶוערְט זֵיי נִישְׁט; וַוייל צוּ אַזֶעלְכֶע גֶעהֶערְט דָאס מַלְכוּת פוּן גָאט.
15
בֶּאֱמֶת, אִיךְ זָאג אַייךְ, וֶוער סֶע וֶועט נִישְׁט מְקַבְּל זַיין דָאס מַלְכוּת פוּן גָאט וִוי אַ קִינְד, דֶער וֶועט דֶערִין נִישְׁט אַרַיינְקוּמֶען.
16
אוּן עֶר הָאט זֵיי גֶענוּמֶען אִין זַיינֶע אָרֶעמְס, אוּן הָאט זֵיי גֶעבֶּענְטְשְׁט, אוּן אַרוֹיפְגֶעלֵייגְט זַיינֶע הֶענְט אוֹיף זֵיי.
17
אוּן בְּעֵת עֶר הָאט זִיךְ גֶעלָאזְט אִין וֶועג אַרַיין, אִיז צוּ אִים צוּגֶעלָאפְן אֵיינֶער, וָואס אִיז פַאר אִים גֶעפַאלְן אוֹיפְן פָּנִים, אוּן הָאט אִים גֶעפְרֶעגְט: רֶבִּי גוּטֶער, וָואס זָאל אִיךְ טָאן, כְּדֵי צוּ יַרְשֶׁענֶען אֵייבִּיק לֶעבְּן?
18
אוּן יֵשׁוּעַ הָאט צוּ אִים גֶעזָאגְט: פַארְוָואס רוּפְסְטוּ מִיךְ גוּטֶער? קֵיינֶער אִיז נִישְׁט גוּט, חוּץ גָאט אַלֵיין.
19
דוּ קֶענְסְט דִי מִצְוֹות: דוּ זָאלְסְט נִישְׁט טֵייטְן, דוּ זָאלְסְט נִישְׁט מְזַנֶה זַיין, דוּ זָאלְסְט נִישְׁט גַנְבֶענֶען, דוּ זָאלְסְט נִישְׁט פַאלְשׁ עֵדוּת זָאגְן, דוּ זָאלְסְט נִישְׁט בַּארוֹיבְּן, גִיבּ אָפּ כָּבוֹד דַיין פָאטֶער אוּן מוּטֶער.
20
אוּן עֶר הָאט צוּ אִים גֶעזָאגְט: רֶבִּי דָאס אַלְץ הָאבּ אִיךְ אָפְּגֶעהִיט פוּן מַיין יוּגְנְט אָן.
21
אוּן יֵשׁוּעַ הָאט אִים אָנְגֶעקוּקְט, אוּן אִים לִיבּ בַּאקוּמֶען, אוּן הָאט צוּ אִים גֶעזָאגְט: אֵיין זַאך פֶעלְט דִיר נָאךְ; גֵיי, פַארְקוֹיף וָואס דוּ פַארְמָאגְסְט, אוּן גִיבּ עֶס דִי אָרֶעמֶע, וֶועסְטוּ הָאבְּן אַן אוֹצָר אִין הִימְל. אוּן קוּם, אוּן גֵיי מִיר נָאךְ.
22
בַּיי דִי רֵייד הָאט זִיךְ זַיין פָּנִים פַארְכְמַארֶעט, אוּן עֶר אִיז אַוֶועקְגֶעגַאנְגֶען אַ דֶערְשְׁלָאגֶענֶער, מַחְמַת עֶר הָאט גֶעהַאט אַ סַך גִיטֶער.
23
אוּן יֵשׁוּעַ הָאט זִיךְ אַרוּמְגֶעקוּקְט, אוּן גֶעזָאגְט צוּ זַיינֶע תַּלְמִידִים: וִוי שְׁוֶוער אִיז פַאר דִי, וָואס הָאבְּן עַשִׁירוּת, אַרַיינְצוּקוּמֶען אִין דֶעם מַלְכוּת פוּן גָאט!
24
אוּן דִי תַּלְמִידִים הָאבְּן זִיךְ גֶעחִידוּשְׁט אִיבֶּער זַיינֶע רֵייד. אוּן יֵשׁוּעַ הָאט זִיךְ וִוידֶער אָפְּגֶערוּפְן, אוּן צוּ זֵיי גֶעזָאגְט: קִינְדֶער, וִוי שְׁוֶוער אִיז פַאר דִי, וָואס פַארְזִיכֶערְן זִיךְ אִין עַשִׁירוּת, אַרַיינְצוּקוּמֶען אִין דֶעם מַלְכוּת פוּן גָאט!
25
עֶס אִיז לַייכְטֶער פַאר אַ קֶעמְל דוּרְכְצוּגֵיין דוּרְךְ אַ לֶעכְל פוּן אַ נָאדְל, וִוי פַאר אַן עוֹשֶׁר אַרַיינְצוּקוּמֶען אִין דֶעם מַלְכוּת פוּן גָאט.
26
אוּן זֵיי זֶענֶען שְׁטַארְק נִשְׁתּוֹמְם גֶעוָוארְן, אוּן הָאבְּן צוּ אִים גֶעזָאגְט: טָא וֶוער קָאן נִיצוּל וֶוערְן?
27
אוּן יֵשׁוּעַ הָאט אוֹיף זֵיי גֶעקוּקְט, אוּן גֶעזָאגְט: בַּיי מֶענְטְשְׁן אִיז עֶס אוּמְמֶעגְלֶעך, אָבֶּער נִישְׁט בַּיי גָאט; וָוארִים אַלְץ אִיז מֶעגְלֶעך בַּיי גָאט.
28
הָאט פֶּעטְרוֹס גֶענוּמֶען צוּ אִים זָאגְן: זֶע, מִיר הָאבְּן אַלְץ פַארְלָאזְט, אוּן זֶענֶען דִיר נָאכְגֶעגַאנְגֶען,
29
הָאט יֵשׁוּעַ גֶעזָאגְט: בֶּאֱמֶת, אִיךְ זָאג אַייךְ, נִישְׁטָא קֵיינֶער, וָואס הָאט פַארְלָאזְט הוֹיז, אָדֶער בְּרִידֶער, אָדֶער שְׁוֶועסְטֶער, אָדֶער מוּטֶער, אָדֶער פָאטֶער, אָדֶער קִינְדֶער, אָדֶער פֶעלְדֶער, פוּן מַיינֶעטְוֶועגְן אוּן צוּלִיבּ דֶער בְּשׂוּרָה־טוֹבָה,
30
וָואס וֶועט נִישְׁט בַּאקוּמֶען הוּנְדֶערְט מָאל מֶער אִין דֶער אִיצְטִקֶער צַייט, הַייזֶער, אוּן בְּרִידֶער, אוּן שְׁוֶועסְטֶער, אוּן מוּטֶער, אוּן קִינְדֶער, אוּן פֶעלְדֶער, אִינְאֵיינֶעם מִיט רְדִיפוֹת, אוּן אוֹיף יֶענֶער וֶועלְט, אֵייבִּיק לֶעבְּן.
31
אָבֶּער אַ סַך, וָואס זֶענֶען עֶרְשְׁטֶע, וֶועלְן זַיין לֶעצְטֶע, אוּן דִי לֶעצְטֶע – עֶרְשְׁטֶע.
32
אוּן זֵיי זֶענֶען גֶעוֶוען אִין וֶועג, אוּן זֶענֶען אַרוֹיפְגֶעגַאנְגֶען קֵיין יְרוּשָׁלַיִם, אוּן יֵשׁוּעַ אִיז גֶעגַאנְגֶען פָארוֹיס פַאר זֵיי; אוּן זֵיי זֶענֶען גֶעוֶוען פַארְחִידוּשְׁט, אוּן דִי, וָואס זֶענֶען אִים נָאכְגֶעגַאנְגֶען, הָאבְּן מוֹרֶא גֶעהַאט. אוּן עֶר הָאט וִוידֶער גֶענוּמֶען דִי צְוֶועלְף, אוּן הָאט זֵיי אָנְגֶעהוֹיבְּן צוּ דֶערְצֵיילְן, וָואס מִיט אִים וֶועט זִיךְ טְרֶעפְן;
33
אוּן עֶר הָאט גֶעזָאגְט: זֶעט, מִיר גֵייעֶן אַרוֹיף קֵיין יְרוּשָׁלַיִם; אוּן דֶער בֶּן־אָדָם וֶועט אִיבֶּערְגֶעעֶנְטְפֶערְט וֶוערְן צוּ דִי רָאשֵׁי־כֹּהַנִים אוּן דִי סוֹפְרִים, אוּן זֵיי וֶועלְן אִים פַארְמִשְׁפָּטְן צוּם טוֹיט, אוּן אִים אִיבֶּערְעֶנְטְפֶערְן צוּ דִי גוֹייִם.
34
אוּן זֵיי וֶועלְן אִים פַארְשְׁפָּאטְן, אוּן שְׁפַּייעֶן אוֹיף אִים, אוּן אִים שְׁמַייסְן, אוּן טֵייטְן; אוּן אוֹיפְן דְרִיטְן טָאג וֶועט עֶר וִוידֶער אוֹיפְשְׁטֵיין.
35
אוּן יַעֲקֹב אוּן יוֹחָנָן, זַבְדִיס זִין, זֶענֶען צוּגֶעגַאנְגֶען צוּ אִים, אוּן הָאבְּן גֶעזָאגְט: רֶבִּי, מִיר וִוילְן, אַז דוּ זָאלְסְט פַאר אוּנְדְז טָאן, וָואס מִיר וֶועלְן דִיךְ בֶּעטְן.
36
הָאט עֶר צוּ זֵיי גֶעזָאגְט: וָואס וִוילְט אִיר, אַז אִיךְ זָאל טָאן פַאר אַייךְ?
37
הָאבְּן זֵיי צוּ אִים גֶעזָאגְט: בַּאוִוילִיק אוּנְדְז צוּ זִיצְן, אֵיינֶער צוּ דַיין רֶעכְטֶער, אוּן אֵיינֶער צוּ דַיין לִינְקֶער הַאנְט, אִין דַיין הֶערְלְעכְקַייט.
38
אָבֶּער יֵשׁוּעַ הָאט צוּ זֵיי גֶעזָאגְט: אִיר וֵוייסְט נִישְׁט וָואס אִיר וִוילְט. צִי קָאנְט אִיר טְרִינְקֶען דֶעם כּוֹס, וָואס אִיךְ טְרִינְק אָדֶער גֶעטוֹבְלְט צוּ וֶוערְן מִיט דֶער טְבִילָה, וָואס אִיךְ וֶוער גֶעטוֹבְלְט?
39
הָאבְּן זֵיי צוּ אִים גֶעזָאגְט: מִיר קֶענֶען. אוּן יֵשׁוּעַ הָאט צוּ זֵיי גֶעזָאגְט: דֶעם כּוֹס, וָואס אִיךְ טְרִינְק, וֶועט אִיר טְרִינְקֶען; אוּן מִיט דֶער טְבִילָה, וָואס אִיךְ וֶוער גֶעטוֹבְלְט, וֶועט אִיר אוֹיךְ גֶעטוֹבְלְט וֶוערְן;
40
אָבֶּער זִיצְן צוּ מַיין רֶעכְטֶער אָדֶער לִינְקֶער הַאנְט, אִיז נִישְׁט מַיינְס צוּ גֶעבְּן, דָאס אִיז פַאר דִי, פַאר וֶועמֶען עֶס אִיז אָנְגֶעגְרֵייט גֶעוָוארְן;
41
אוּן אַז דִי צֶען הָאבְּן דָאס גֶעהֶערְט, הָאט עֶס זֵיי פַארְדְרָאסְן אוֹיף יַעַקֹב אוּן יוֹחָנָן.
42
אוּן יֵשׁוּעַ הָאט זֵיי צוּגֶערוּפְן צוּ זִיךְ, אוּן גֶעזָאגְט: וֵוייסְן וֵוייסְט אִיר, אַז דִי שָׂרִים פוּן דִי גוֹייִם הֶערְשְׁן אִיבֶּער זֵיי, אוּן זֵייעֶרֶע גְדוֹלִים גֶעוֶועלְטִיקְן אִיבֶּער זֵיי.
43
נִישְׁט אַזוֹי זָאל עֶס אָבֶּער זַיין צְוִוישְׁן אַייךְ; נַייעֶרְט וֶוער סֶע וִויל וֶוערְן גְרוֹיס צְוִוישְׁן אַייךְ, זָאל זַיין אַייעֶר בַּאדִינֶער,
44
אוּן וֶוער סֶע וִויל זַיין עֶרְשְׁט צְוִוישְׁן אַייךְ, זָאל זַיין אַייעֶר אַלֶעמֶענְס קְנֶעכְט.
45
וָוארִים דֶער בֶּן־אָדָם אִיז אוֹיךְ נִישְׁט גֶעקוּמֶען בַּאדִינְט צוּ וֶוערְן, נַייעֶרְט צוּ בַּאדִינֶען, אוּן צוּ גֶעבְּן זַיין לֶעבְּן אַן אוֹיסְלֵייז פַאר אַ סַך.
46
אוּן זֵיי זֶענֶען גֶעקוּמֶען קֵיין יְרִיחוֹ; אוּן בְּעֵת עֶר הָאט פַארְלָאזְט יְרִיחוֹ מִיט זַיינֶע תַּלְמִידִים אוּן מִיט אַ גְרוֹיסְן הַמוֹן מֶענְטְשְׁן, אִיז טִימַיס זוּן, בַּר-טִימַי, אַ בְּלִינְדֶער בֶּעטְלֶער, גֶעזֶעסְן בַּיים וֶועג.
47
אוּן וֶוען עֶר הָאט גֶעהֶערְט, אַז עֶס אִיז יֵשׁוּעַ הַנוֹצְרִי, וָואס גֵייט פַארְבַּיי, הָאט עֶר אָנְגֶעהוֹיבְּן צוּ שְׁרַייעֶן: יֵשׁוּעַ, בֶּן־דָוִד, הָאבּ רַחֲמָנוּת אוֹיף מִיר!
48
אוּן אַ סַך הָאבְּן זִיךְ אוֹיף אִים אָנְגֶעבֵּייזֶערְט, עֶר זָאל שְׁוַוייגְן. אָבֶּער עֶר הָאט נָאךְ הֶעכֶער גֶעשְׁרִיגְן: בֶּן־דָוִד, הָאבּ רַחֲמָנוּת אוֹיף מִיר!
49
אוּן יֵשׁוּעַ הָאט זִיךְ אָפְּגֶעשְׁטֶעלְט, אוּן גֶעזָאגְט: רוּפְט אִים צוּ; אוּן זֵיי הָאבְּן גֶערוּפְן דֶעם בְּלִינְדְן, אוּן צוּ אִים גֶעזָאגְט: זַיי גֶעטְרֵייסְט; שְׁטֵיי אוֹיף, עֶר רוּפְט דִיךְ.
50
אוּן עֶר הָאט אַרָאפְּגֶעוָוארְפְן זַיין מַאנְטְל, אוּן אִיז אוֹיפְגֶעשְׁפְּרוּנְגֶען, אוּן הָאט גֶענֶעעֶנְט צוּ יֵשׁוּעַ.
51
אוּן יֵשׁוּעַ הָאט צוּ אִים גֶעזָאגְט: וָואס וִוילְסְטוּ, אַז אִיךְ זָאל טָאן פַאר דִיר? אוּן דֶער בְּלִינְדֶער הָאט צוּ אִים גֶעזָאגְט: רִבּוֹנִי, כ׳וִויל מַיין רְאִיָה!
52
אוּן יֵשׁוּעַ הָאט צוּ אִים גֶעזָאגְט: גֵיי, דַיין אֶמוּנָה הָאט דִיר גֶעהָאלְפְן. אוּן בְּאוֹתוֹ־רֶגַע הָאט עֶר צוּרִיק בַּאקוּמֶען זַיין רְאִיָה, אוּן אִיז אִים נָאכְגֶעגַאנְגֶען אוֹיפְן וֶועג.