Yiddish
1
אוּן עֶר אִיז אַוֶועקְגֶעגַאנְגֶען פוּן דָארְטְן, אוּן אִיז גֶעקוּמֶען אִין זַיין אֵייגְן לַאנְד אַרַיין; אוּן זַיינֶע תַּלְמִידִים זֶענֶען אִים נָאכְגֶעגַאנְגֶען.
2
אוּן שַׁבָּת הָאט עֶר אָנְגֶעהוֹיבְּן צוּ לֶערְנֶען אִין דֶער שׁוּל, אוּן אַ סַך וָואס הָאבְּן אִים גֶעהֶערְט, הָאבְּן זִיךְ גֶעחִידוּשְׁט, אוּן גֶעזָאגְט: פוּנְוַואנֶען נֶעמְט זִיךְ דָאס צוּ אִים? אוּן וָואס אִיז דָאס פַאר אַ חָכְמָה, וָואס אִיז אִים גֶעגֶעבְּן גֶעוָוארְן, אַז אַזֶעלְכֶע וואוּנְדֶער זָאלְן גֶעשֶׁען דוּרְךְ זַיינֶע הֶענְט?
3
אִיז דָאס נִישְׁט דֶער סְטָאלְיֶער, דֶער זוּן פוּן מִרְיָם, אוּן דֶער בְּרוּדֶער פוּן יַעֲקֹב, אוּן יוֹסֵי, אוּן יְהוּדָה, אוּן שִׁמְעוֹן? אוּן זֶענֶען נִישְׁט זַיינֶע שְׁוֶועסְטֶער דָא מִיט אוּנְדְז? אוּן זֵיי זֶענֶען גֶעשְׁטְרוֹיכְלְט גֶעוָוארְן אִין אִים.
4
אוּן יֵשׁוּעַ הָאט צוּ זֵיי גֶעזָאגְט: אַ נָבִיא אִיז נִישְׁט אָן כָּבוֹד, סַיידְן אִין זַיין אֵייגְן לַאנְד, אוּן צְוִוישְׁן זַיינֶע קְרוֹבִים, אוּן אִין זַיין אֵייגְן הוֹיז.
5
אוּן עֶר הָאט דָארְט נִישְׁט גֶעקָאנְט טָאן קֵיין וואוּנְדֶער, אַחוּץ וָואס עֶר הָאט אַרוֹיפְגֶעלֵייגְט זַיינֶע הֶענְט אוֹיף עֶטְלֶעכֶע קְרַאנְקֶע, אוּן הָאט זֵיי גֶעהֵיילְט.
6
אוּן עֶר הָאט זִיךְ גֶעחִידוּשְׁט אִיבֶּער זֵייעֶר אוּמְגְלוֹיבְּן. אוּן עֶר אִיז אַרוּמְגֶעגַאנְגֶען אִין דִי דֶערְפֶער אוּן הָאט גֶעלֶערְנְט.
7
אוּן עֶר הָאט גֶערוּפְן צוּ זִיךְ דִי צְוֶועלְף, אוּן הָאט זֵיי גֶענוּמֶען אַרוֹיסְשִׁיקְן זַאלְבֶּעצְוֵוייט, אוּן הָאט זֵיי גֶעגֶעבְּן שְׁלִיטָה אִיבֶּער אוּמְרֵיינֶע גֵייסְטֶער;
8
אוּן עֶר הָאט זֵיי גֶעבָּאטְן, אַז זֵיי זָאלְן גָארְנִישְׁט מִיטְנֶעמֶען אוֹיפְן וֶועג, אַחוּץ אַ שְׁטֶעקְן; נִישְׁט קֵיין בְּרוֹיט, נִישְׁט קֵיין רַייזֶעזַאק, נִישְׁט קֵיין גֶעלְט אִין גַארְטְל;
9
נַייעֶרְט צוּ טְרָאגְן סַאנְדַאלְן, אוּן נִישְׁט צוּ גֵיין אָנְגֶעטָאן אִין צְוֵויי רֶעק.
10
אוּן עֶר הָאט צוּ זֵיי גֶעזָאגְט: אִין וָואס פַאר אַ הוֹיז אִיר וֶועט אַרַיינְקוּמֶען, דָארְט פַארְבְּלַייבְּט, בִּיז אִיר גֵייט וַוייטֶער.
11
אוּן דָאס אָרְט, וָואס וֶועט אַייךְ נִישְׁט אוֹיפְנֶעמֶען, אוּן זִיךְ נִישְׁט צוּהֶערְן צוּ אַייךְ, זָאלְט אִיר פוּן דָארְטְן אַרוֹיסְגֵיין אוּן אָפְּטְרֵייסְלֶען דֶעם שְׁטוֹיבּ פוּן אַייעֶרֶע פִיס, פַאר אַן עֵדוּת צוּ זֵיי.
12
אוּן זֵיי זֶענֶען אַרוֹיסְגֶעגַאנְגֶען אוּן הָאבְּן גֶערוּפְן צוּ תְּשׁוּבָה;
13
אוּן הָאבְּן אַרוֹיסְגֶעטְרִיבְּן אַ סַך בֵּייזֶע גֵייסְטֶער, אוּן גֶעזַאלְבְּט אַ סַך קְרַאנְקֶע מִיט אֵייל, אוּן זֵיי גֶעהֵיילְט.
14
אוּן דֶער מֶלֶךְ הוֹרְדוֹס הָאט דֶערְפוּן גֶעהֶערְט, וַוייל זַיין שֶׁם אִיז גֶעוָוארְן בַּאקַאנְט. אוּן עֶר הָאט גֶעזָאגְט: יוֹחָנָן הַמַטְבִּיל אִיז אוֹיפְגֶעשְׁטַאנֶען תְּחִיַת־הַמֵתִים, אוּן דֶערִיבֶּער אַרְבֶּעטְן אִין אִים דִי דָאזִיקֶע כּוֹחוֹת.
15
אָבֶּער אַנְדֶערֶע הָאבְּן גֶעזָאגְט: עֶס אִיז אֵלִיָהוּ. אוּן וִוידֶער אַנְדֶערֶע הָאבְּן גֶעזָאגְט: ס׳אִיז אַ נָבִיא, פּוּנְקְט וִוי אֵיינֶער פוּר דִי נְבִיאִים.
16
אוּן אַז הוֹרְדוֹס הָאט עֶס גֶעהֶערְט, הָאט עֶר גֶעזָאגְט: יוֹחָנָן, וֶועמֶען אִיךְ הָאבּ גֶעקֶעפְּט, אִיז אוֹיפְגֶעשְׁטַאנֶען.
17
וָוארִים הוֹרְדוֹס הָאט גֶעשִׁיקְט אוּן גֶעלָאזְט כַאפְּן יוֹחָנָן, אוּן הָאט אִים גֶעבּוּנְדְן אִין דֶער תְּפִיסָה צוּלִיבּ הוֹרוֹדְיָה, דָאס וַוייבּ פוּן זַיין בְּרוּדֶער פִילִיפּוּס, וַוייל עֶר הָאט מִיט אִיר חַתוּנָה גֶעהַאט.
18
וָוארִים יוֹחָנָן הָאט גֶעזָאגְט צוּ הוֹרְדוֹס: עֶס אִיז דִיר נִישְׁט דֶערְלוֹיבְּט צוּ הָאבְּן דַיין בְּרוּדֶערְס וַוייבּ.
19
אוּן הוֹרוֹדְיָה הָאט אִים פַיינְט בַּאקוּמֶען, אוּן אִים גֶעוָואלְט טֵייטְן, אָבֶּער זִי הָאט עֶס נִישְׁט גֶעקֶענְט טָאן.
20
וָוארִים הוֹרְדוֹס הָאט מוֹרֶא גֶעהַאט פַאר יוֹחָנָן, וַוייל עֶר הָאט גֶעוואוּסְט, אַז עֶר אִיז אַ צַדִיק אוּן אַ הֵיילִיקֶער מַאן, אוּן עֶר הָאט אִים אָפְּגֶעהִיט. אוּן בְּעֵת עֶר פְלֶעגְט אִים הֶערְן, אִיז עֶר שְׁטַארְק צֶעמִישְׁט גֶעוָוארְן; פוּנְדֶעסְטְוֶועגְן הָאט עֶר אִים גֶערְן גֶעהֶערְט.
21
אוּן אַז עֶס אִיז גֶעקוּמֶען אַ פַּאסִיקֶער טָאג, בְּעֵת הוֹרְדוֹס הָאט צוּ זַיין גֶעבּוֹירְנְטָאג גֶעמַאכְט אַ סְעוּדָה פַאר זַיינֶע הַארְן, אוּן קְרִיגְפִירֶער, אוּן דִי חָשׁוּבְסְטֶע מֶענְטְשְׁן פוּן גָלִיל,
22
אִיז הוֹרוֹדְיָהס טָאכְטֶער אַרַיינְגֶעקוּמֶען אוּן הָאט גֶעטַאנְצְט, אוּן זִי אִיז הוֹרְדוֹס גֶעפֶעלְן גֶעוָוארְן, אוּן אוֹיךְ זַיינֶע גֶעסְט. אוּן דֶער מֶלֶךְ הָאט גֶעזָאגְט צוּם מֵיידְל: פַארְלַאנְג פוּן מִיר, וָואס דוּ וִוילְסְט, אוּן אִיךְ וֶועל עֶס דִיר גֶעבְּן.
23
אוּן עֶר הָאט אִיר גֶעשְׁוואוֹירְן: וָואס נָאר דוּ וֶועסְט פוּן מִיר פַארְלַאנְגֶען, וֶועל אִיךְ דִיר גֶעבְּן, בִּיז אַ הַאלְבּ פוּן מַיין מְלוּכָה.
24
אוּן זִי אִיז אַרוֹיסְגֶעגַאנְגֶען, אוּן הָאט גֶעזָאגְט צוּ אִיר מוּטֶער: וָואס זָאל אִיךְ פַארְלַאנְגְרְן? הָאט זִי גֶעזָאגְט: דֶעם קָאפּ פוּן יוֹחָנָן הַמַטְבִּיל.
25
אוּן זִי אִיז תֵּיכֵּף אַרַיינְגֶעגַאנְגֶען צוּם מֶלֶךְ, אוּן הָאט גֶעזָאגְט: אִיךְ פַארְלַאנְג, דוּ זָאלְסְט מִיר גְלַייךְ גֶעבְּן אוֹיף אַ שִׁיסְל דֶעם קָאפּ פוּן יוֹחָנָן הַמַטְבִּיל.
26
אוּן דֶער מֶלֶךְ הָאט זִיךְ שְׁטַארְק מְצַעֶר גֶעוֶוען, אָבֶּער צוּלִיבּ דִי שְׁבוּעוֹת אוּן דִי גֶעסְט, הָאט עֶר אִיר נִישְׁט גֶעוָואלְט אָפְּזָאגְן.
27
אוּן דֶער מֶלֶךְ הָאט תֵּיכֵּף גֶעשִׁיקְט אַ לַייבּ־וֶועכְטֶער, אוּן הָאט אִים בַּאפוֹילְן צוּ בְּרֶענְגֶען זַיין קָאפּ; אוּן עֶר אִיז גֶעגַאנְגֶען אוּן הָאט אִים גֶעקֶעפְּט אִין דֶער תְּפִיסָה,
28
אוּן גֶעבְּרַאכְט זַיין קָאפּ אוֹיף אַ שִׁיסְל אוּן הָאט אִים גֶעגֶעבְּן דֶעם מֵיידְל, אוּן דָאס מֵיידְל הָאט אִים גֶעגֶעבְּן צוּ אִיר מוּטֶער.
29
אוּן אַז זַיינֶע תַּלְמִידִים הָאבְּן דָאס גֶעהֶערְט, זֶענֶען זֵיי גֶעקוּמֶען אוּן הָאבְּן גֶענוּמֶען זַיין גוּף, אוּן הָאבְּן אִים אַרַיינְגֶעלֵייגְט אִין אַ קֵבֶר.
30
אוּן דִי שְׁלִיחִים הָאבְּן זִיךְ פַארְזַאמְלְט בַּיי יֵשׁוּעַ, אוּן הָאבְּן אִים דֶערְצֵיילְט אַלְצְדִינְג, וָואס זֵיי הָאבְּן גֶעטָאן, אוּן וָואס זֵיי הָאבְּן גֶעלֶערְנְט.
31
אוּן עֶר הָאט צוּ זֵיי גֶעזָאגְט: קוּמְט אוּן צִיט אַייךְ צוּרִיק אִין אַ וִויסְט אָרְט, אוּן רוּט אַייךְ אוֹיס אַבִּיסְל. וָוארִים אַ סַך הָאבְּן גֶעהַאלְטְן אִין קוּמֶען אוּן גֵיין, אַזוֹי, אַז זֵיי הָאבְּן צוּמָאל נִישְׁט גֶעהַאט קֵיין צַייט צוּ עֶסְן.
32
אוּן זֵיי הָאבְּן זִיךְ אַוֶועקְגֶעלָאזְט מִיט אַ שִׁיף אִין אַ וִויסְט אָרְט אַלֵיין.
33
אוּן מֶען הָאט זֵיי גֶעזֶען אַוֶועקְגֵיין, אוּן אַ סַך הָאבְּן זֵיי דֶערְקֶענְט, אוּן זֵיי זֶענֶען זִיךְ צוּנוֹיפְגֶעלָאפְן צוּפוּס פוּן אַלֶע שְׁטֶעט, אוּן זֶענֶען דָארְטְן אָנְגֶעקוּמֶען פְרִיעֶר פַאר זֵיי.
34
אוּן בְּעֵת עֶר אִיז אַרוֹיסְגֶעקוּמֶען אוּן גֶעזֶען דֶעם גְרוֹיסְן עוֹלָם, הָאט אִים אָנְגֶענוּמֶען אַ רַחֲמָנוּת אוֹיף זֵיי, וַוייל זֵיי זֶענֶען גֶעוֶוען וִוי שָׁאף אָן אַ פַּאסְטֶעךְ; אוּן עֶר הָאט מִיט זֵיי אַ סַך גֶעלֶערְנְט.
35
אוּן אַזוֹי וִוי סֶע אִיז שׁוֹין גֶעוָוארְן שְׁפֶּעט, זֶענֶען צוּ אִים גֶעקוּמֶען זַיינֶע תַּלְמִידִים, אוּן הָאבְּן גֶעזָאגְט: דָאס אָרְט אִיז וִויסְט, אוּן עֶס אִיז שׁוֹין שְׁפֶּעט;
36
לָאז זֵיי אָפּ כְּדֵי זֵיי זָאלְן קֶענֶען גֵיין אִין דִי אַרוּמִיקֶע דֶערְפֶער אוּן מְקוֹמוֹת, אוּן זִיךְ קוֹיפְן עֶפֶּעס צוּ עֶסְן.
37
אָבֶּער עֶר הָאט גֶעעֶנְטְפֶערְט, אוּן צוּ זֵיי גֶעזָאגְט: גִיט אִיר זֵיי צוּ עֶסְן. הָאבְּן זֵיי צוּ אִים גֶעזָאגְט: זָאלְן מִיר גֵיין קוֹיפְן בְּרוֹיט פַאר צְוֵויי הוּנְדֶערְט דִינָרִים, אוּן זֵיי גֶעבְּן צוּ עֶסְן?
38
אָבֶּער עֶר הָאט צוּ זֵיי גֶעזָאגְט: וִויפְל בְּרוֹיט הָאט אִיר? גֵייט אוּן זֶעט. אוּן אַז זֵיי זֶענֶען עֶס דֶערְגַאנְגֶען, הָאבְּן זֵיי גֶעזָאגְט: פִינְף, אוּן צְוֵויי פִישׁ.
39
אוּן עֶר הָאט זֵיי אַלֶע גֶעהֵייסְן זִיךְ אַנִידֶערְזֶעצְן כִּיתּוֹת וַוייז אוֹיפְן גְרִינֶעם גְרָאז.
40
אוּן זֵיי הָאבְּן זִיךְ אַנִידֶערְגֶעזֶעצְט אִין שׁוּרוֹת, צוּ הוּנְדֶערְט, אוּן צוּ פוּפְצִיק.
41
אוּן עֶר הָאט גֶענוּמֶען דִי פִינְף בְּרוֹיט אוּן דִי צְוֵויי פִישׁ, אוּן הָאט אוֹיפְגֶעהוֹיבְּן זַיינֶע אוֹיגְן צוּם הִימְל אוּן הָאט אַ בְּרָכָה גֶעמַאכְט, אוּן עֶר הָאט אָפְּגְֶעבְּרָאכְן פוּן דֶעם בְּרוֹיט אוּן עֶס דֶערְלַאנְגְט דִי תַּלְמִידִים, צוּ גְרֵייטְן פַאר זֵיי; אוּן אוֹיךְ דִי צְוֵויי פִישׁ הָאט עֶר צֶעטֵיילְט צְוִוישְׁן זֵיי.
42
אוּן זֵיי הָאבְּן אַלֶע גֶעגֶעסְן צוּ דֶער זַאט,
43
אוּן זֵיי הָאבְּן צוּנוֹיפְגֶענוּמֶען פוּן דִי אִיבֶּערְגֶעבְּלִיבֶּענֶע בְּרֶעקְלֶעךְ, צְוֶועלְף פוּלֶע קֶערְבּ, אוּן אוֹיךְ פוּן דִי פִישׁ.
44
אוּן דִי, וָואס הָאבְּן גֶעגֶעסְן פוּן דֶעם בְּרוֹיט, זֶענֶען גֶעוֶוען פִינְף טוֹיזְנְט מַאן.
45
אוּן עֶר הָאט תֵּיכֵּף גֶענֵייט זַיינֶע תַּלְמִידִים אַרַיינְצוּגֵיין אִין דֶער שִׁיף, אוּן אַרִיבֶּערְצוּפָארְן פְרִיעֶר פַאר אִים אוֹיף דֶער אַנְדֶערֶער זַייט, קֵיין בֵּית־צַידָה, בִּיז עֶר וֶועט אָפְּלָאזְן דָאס פָאלְק.
46
אוּן נָאכְדֶעם וִוי עֶר הָאט זִיךְ מִיט זֵיי אָפְּגֶעזֶעגְנְט, אִיז עֶר אַרוֹיפְגֶעגַאנְגֶען אוֹיפְן בַּארְג מִתְפַּלֵל צוּ זַיין.
47
אוּן אַז סֶע אִיז גֶעוָוארְן אָוְונְט, אִיז דִי שִׁיף גֶעוֶוען אִין מִיטְן יַם, אוּן עֶר גוּפָא אוֹיף דֶער יַבָּשָׁה.
48
אוּן זֶעעֶנְדִיק וִוי זֵיי מַאטֶערְן זִיךְ בַּיים רוּדֶערְן - וָוארִים דֶער וִוינְט אִיז גֶעוֶוען אַנְטְקֶעגְן זֵיי - אִיז עֶר צוּ זֵיי גֶעקוּמֶען אַרוּם דֶער פֶערְטֶער נַאכְטְוַואך, גֵייעֶנְדִיק אוֹיפְן יַם. אוּן עֶר הָאט זֵיי גֶעוָואלְט פַארְבַּייגֵיין,
49
אוּן וִוי זֵיי הָאבְּן אִים גֶעזֶען גֵיין אוֹיפְן יַם, הָאבְּן זֵיי גֶעמֵיינְט, אַז דָאס אִיז אַ גֵייסְט, אוּן הָאבְּן זִיךְ צֶעשְׁרִיגְן;
50
וָוארִים זֵיי הָאבְּן אִים אַלֶע גֶעזֶען, אוּן הָאבְּן זִיךְ דֶערְשְׁרָאקְן. אוּן תֵּיכֵּף הָאט עֶר גֶערֶעדְט מִיט זֵיי, אוּן צוּ זֵיי גֶעזָאגְט: זַייט גֶעטְרֵייסְט, דָאס בִּין אִיךְ; הָאט נִישְׁט קֵיין מוֹרֶא.
51
אוּן עֶר אִיז צוּ זֵיי אִין דֶער שִׁיף אַרַיינְגֶעגַאנְגֶען, אוּן דֶער וִוינְט הָאט אוֹיפְגֶעהֶערְט. אוּן זֵיי הָאבְּן זִיךְ שְׁטַארְק גֶעחִידוּשְׁט;
52
וָוארִים זֵיי הָאבְּן נִישְׁט פַארְשְׁטַאנֶען בְּנוֹגֵע דֶעם בְּרוֹיט, מַחְמַת זֵייעֶר הַארְץ אִיז גֶעוֶוען פַארְהַארְטֶעוֶועט.
53
אוּן בְּעֵת זֵיי זֶענֶען אַרִיבֶּערְגֶעפָארְן, זֶענֶען זֵיי גֶעקוּמֶען צוּם לַאנְד גִנֵיסַר, אוּן הָאבְּן זִיךְ דֶערְנֶענְטֶערְט צוּם בְּרֶעג.
54
אוּן אַז זֵיי זֶענֶען אַרוֹיסְגֶעקוּמֶען פוּן דֶער שִׁיף, הָאט מֶען אִים תֵּיכֵּף דֶערְקֶענְט,
55
אוּן זֵיי זֶענֶען אַרוּמְגֶעלָאפְן אִין דֶער גַאנְצֶער גֶעגְנְט, אוּן הָאבְּן גֶענוּמֶען בְּרֶענְגֶען דִי קְרַאנְקֶע אוֹיף זֵייעֶרֶע גֶעלֶעגֶערְס, וואוּהִין זֵיי הָאבְּן גֶעהֶערְט, אַז עֶר גֶעפִינְט זִיךְ.
56
אוּן אוּמֶעטוּם וואוּ עֶר אִיז גֶעקוּמֶען, אִין דִי דֶערְפֶער, שְׁטֶעט אָדֶער מְקוֹמוֹת, הָאט מֶען דִי קְרַאנְקֶע אַוֶועקְגֶעלֵייגְט אוֹיפְן מַארְק, אוּן אִים גֶעבֶּעטְן, צוּ מֶעגְן כָאטְשׁ אָנְרִירְן דִי כַּנְפוֹת פוּן זַיין בֶּגֶד. אוּן אַלֶע, וָואס הָאבְּן אִים אָנְגֶערִירְט, זֶענֶען גֶעהָאלְפְן גֶעוָוארְן.