Yiddish
1
אוּן נָאךְ עֶטְלֶעכֶע טֶעג אִיז עֶר וִוידֶער גֶעקוּמֶען קֵיין כְּפַר־נָחוּם, אוּן מֶען הָאט זִיךְ דֶערְוואוּסְט, אַז עֶר אִיז אִין דֶער הֵיים.
2
אוּן אַ סַך הָאבְּן זִיךְ פַארְזַאמְלְט, בִּיז סֶע אִיז מֶער נִישְׁט גֶעוֶוען קֵיין פְּלַאץ, נִישְׁט צוּמָאל פַאר דֶער טִיר; אוּן עֶר הָאט גֶערֶעדְט צוּ זֵיי דָאס וָוארְט.
3
אוּן זֵיי זֶענֶען גֶעקוּמֶען, אוּן הָאבְּן צוּ אִים גֶעבְּרַאכְט אַ גֶעלֵיימְטְן, וֶועמֶען פִיר מֶענְטְשְׁן הָאבְּן גֶעטְרָאגְן.
4
אוּן אַזוֹי וִוי זֵיי הָאבְּן נִישְׁט גֶעקָאנְט צוּקוּמֶען צוּ אִים צוּלִיבּ דֶעם עוֹלָם, הָאבְּן זֵיי אוֹיפְגֶעדֶעקְט דֶעם דַאךְ אִיבֶּער אִים; אוּן נָאכְדֶעם וִוי זֵיי הָאבְּן גֶעמַאכְט אַן עֶפֶענוּנְג, הָאבְּן זֵיי אַרְאָפְּגֶעלָאזְט דָאס גֶעלֶעגֶער, אוֹיף וֶועלכְן דֶער גֶעלֵיימְטֶער אִיז גֶעלֶעגְן.
5
אוּן אַז יֵשׁוּעַ הָאט גֶעזֶען זֵייעֶר אֶמוּנָה, הָאט עֶר גֶעזָאגְט צוּם גֶעלֵיימְטְן: מַיין זוּן, דַיינֶע זִינְד זֶענֶען דִיר פַארְגֶעבְּן גֶעוָוארְן.
6
אוּן דָארְטְן זֶענֶען גֶעזֶעסְן עֶטְלֶעכֶע סוֹפְרִים, וָואס הָאבְּן גֶעטְרַאכְט אִין זֵייעֶרֶע הֶערְצֶער:
7
פַארְוָואס רֶעדְט עֶר אַזוֹינְס? עֶר לֶעסְטֶערְט! וֶוער קָאן מוֹחְל זַיין זִינְד, אַחוּץ גָאט אַלֵיין?
8
אוּן יֵשׁוּעַ הָאט תֵּיכֵּף פַארְשְׁטַאנֶען אִין זַיין גֵייסְט וֶועגְן וָואס זֵיי טְרַאכְטְן, אוּן עֶר הָאט צוּ זֵיי גֶעזָאגְט: פַארְוָואס טְרַאכְט אִיר אַזוֹינְס אִין אַייעֶרֶע הֶערְצֶער?
9
וָואס אִיז גְרִינְגֶער, צוּ זָאגְן צוּם גֶעלֵיימְטְן: דַיינֶע זִינְד זֶענֶען דִיר פַארְגֶעבְּן גֶעוָוארְן; אָדֶער צוּ זָאגְן: שְׁטֵיי אוֹיף, נֶעם דַיין גֶעלֶעגֶער אוּן גֵיי?
10
אָבֶּער כְּדֵי אִיר זָאלְט וִויסְן, אַז דֶער בֶּן־אָדָם הָאט רְשׁוּת אוֹיף דֶער עֶרְד מוֹחְל צוּ זַיין זִינְד – הָאט עֶר גֶעזָאגְט צוּם גֶעלֵיימְטְן –
11
אִיךְ זָאג דִיר, שְׁטֵיי אוֹיף, אוּן נֶעם דַיין גֶעלֶעגֶער, אוּן גֵיי אַהֵיים.
12
אוּן עֶר אִיז אוֹיפְגֶעשְׁטַאנֶען, אוּן הָאט תֵּיכֵּף גֶענוּמֶען זַיין גֶעלֶעגֶער, אוּן אִיז אַרוֹיסְגֶעגַאנְגֶען פוּן פַאר זֵיי אַלֶע; אַזוֹי, אַז אַלֶע זֶענֶען נִשְׁתּוֹמְם גֶעוָוארְן, אוּן הָאבְּן גֶעלוֹיבְּט גָאט, אוּן גֶעזָאגְט: אַזוֹינְס הָאבְּן מִיר נָאךְ קֵיינְמָאל נִישְׁט גֶעזֶען.
13
אוּן עֶר אִיז וִוידֶער אַרוֹיסְגֶעגַאנְגֶען צוּם יַם; אוּן דָאס גַאנְצֶע פָאלְק אִיז צוּ אִים גֶעקוּמֶען, אוּן עֶר הָאט זֵיי גֶעלֶערְנְט.
14
אוּן בְּעֵת עֶר אִיז פַארְבַּייגֶעגַאנְגֶען, הָאט עֶר גֶעזֶען לֵוִי בֶּן־חַלְפַי זִיצְן אוֹיפְן צָאל־אַמְט, אוּן עֶר הָאט צוּ אִים גֶעזָאגְט: גֵיי מִיר נָאךְ. אוּן עֶר אִיז אוֹיפְגֶעשְׁטַאנֶען אוּן אִיז אִים נָאכְגֶעגַאנְגֶען.
15
אוּן עֶס אִיז גֶעוֶוען, בְּעֵת עֶר אִיז גֶעזֶעסְן בַּיים טִישׁ אִין זַיין הוֹיז, הָאבְּן אַ סַך מוֹכְסִים אוּן זִינְדִיקֶע זִיךְ אַנִידֶערְגֶעזֶעצְט מִיט יֵשׁוּעַ אוּן זַיינֶע תַּלְמִידִים; וָוארִים אַ סַך פוּן זֵיי זֶענֶען אִים נָאכְגֶעגַאנְגֶען.
16
אוּן וֶוען דִי סוֹפְרִים פוּן דִי פְּרוּשִׁים הָאבְּן גֶעזֶען, אַז עֶר עֶסְט מִיט זִינְדִיקֶע אוּן מִיט מוֹכְסִים, הָאבְּן זֵיי גֶעזָאגְט צוּ זַיינֶע תַּלְמִידִים: פַארְוָואס עֶסְט עֶר אוּן טְרִינְקְט מִיט מוֹכְסִים אוּן זִינְדִיקֶע?
17
אוּן אַז יֵשׁוּעַ הָאט דָאס גֶעהֶערְט, הָאט עֶר צוּ זֵיי גֶעזָאגְט: דִי, וָואס זֶענֶען גֶעזוּנְט, נֵייטִיקְן זִיךְ נִישְׁט אִין קֵיין רוֹפֵא, נַייעֶרְט דִי, וָואס זֶענֶען קְרַאנְק; אִיךְ בִּין נִישְׁט גֶעקוּמֶען צוּ רוּפְן דִי צַדִיקִים, נַייעֶרְט דִי זִינְדִיקֶע.
18
אוּן דִי תַּלְמִידִים פוּן יוֹחָנָן אוּן פוּן דִי פְּרוּשִׁים פְלֶעגְן פַאסְטְן; אוּן זֵיי זֶענֶען גֶעקוּמֶען אוּן הָאבְּן צוּ אִים גֶעזָאגְט: פַארְוָואס טְוּעֶן יוֹחָנָן׳ס תַּלְמִידִים אוּן דִי תַּלְמִידִים פוּן דִי פְּרוּשִׁים פַאסְטְן, אוּן דַיינֶע תַּלְמִידִים פַאסְטְן נִישְׁט?
19
הָאט יֵשׁוּעַ צוּ זֵיי גֶעזָאגְט: קֶענֶען דִי מְחוּתָּנִים פַאסְטְן, בְּשַׁעַת דֶער חָתָן אִיז מִיט זֵיי? כָּל־זְמַן דֶער חָתָן אִיז צְוִוישְׁן זֵיי, קֶענֶען זֵיי נִישְׁט פַאסְטְן.
20
סֶע וֶועלְן אָבֶּער קוּמֶען טֶעג, וֶוען דֶער חָתָן וֶועט אַוֶועקְגֶענוּמֶען וֶוערְן פוּן זֵיי, אוּן דֶעמָאלְט וֶועלְן זֵיי פַאסְטְן אִין יֶענֶע טֶעג.
21
אוּן קֵיינֶער נֵייט נִישְׁט אַ לַאטֶע פוּן נִישְׁט־אַיינְגֶעלָאפֶענֶעם טוּךְ אוֹיף אַן אַלְט מַלְבּוּשׁ; אוֹיבּ יאָ, רַייסְט זִיךְ דִי לַאטֶע אָפּ, דִי נַייעֶ פוּן דֶעם אַלְטְן, אוּן סֶע וֶוערְט נָאךְ אַן עֶרגֶערֶער רִיס.
22
אוּן קֵיינֶער גִיסְט נִישְׁט אַרַיין קֵיין נַייעֶם וַויין אִין אַלְטֶע לָאגְלֶען; וַוייל דֶער וַויין צֶעפְּלַאצְט דִי לָאגְלֶען, אוּן דֶער וַויין גֵייט פַארְלוֹירְן, אוּן אוֹיךְ דִי לָאגְלֶען; נַייעֶרְט נַייעֶם וַויין גִיסְט מֶען אַרַיין אִין נַייעֶ לָאגְלֶען.
23
אוּן עֶס אִיז גֶעוֶוען, אַז עֶר אִיז אִין אַ שַׁבָּת גֶעגַאנְגֶען דוּרְךְ תְּבוּאָה־פֶעלְדֶער, אוּן זַיינֶע תַּלְמִידִים הָאבְּן אָנְגֶעהוֹיבְּן צוּ רַייסְן זַאנְגֶען אוֹיף דֶעם וֶועג.
24
אוּן דִי פְּרוּשִׁים הָאבְּן צוּ אִים גֶעזָאגְט: זֶע, הַלָמַאי טְוּעֶן זֵיי אוּם שַׁבָּת, וָואס מֶען טָאר נִישְׁט?
25
הָאט עֶר צוּ זֵיי גֶעזָאגְט: הָאט אִיר קֵיינְמָאל נִישְׁט גֶעלֵייעֶנְט וָואס דָוִד הָאט גֶעטָאן, בְּעֵת עֶר אִיז גֶעוֶוען אִין נוֹיט אוּן הָאט גֶעלִיטְן הוּנְגֶער, עֶר אוּן דִי מֶענְטְשְׁן וָואס זֶענֶען גֶעוֶוען מִיט אִים?
26
וִוי עֶר אִיז אַרַיינְגֶעגַאנְגֶען אִין דֶעם הוֹיז פוּן גָאט, בְּעֵת אֶבְיָתָר אִיז גֶעוֶוען כֹּהֵן־גָדוֹל, אוּן הָאט גֶעגֶעסְן דָאס לֶחֶם־הַפָּנִים, וָואס קֵיינֶער טָאר נִישְׁט עֶסְן, אַחוּץ דִי כֹּהַנִים, אוּן עֶר הָאט אוֹיךְ גֶעגֶעבְּן צוּ דִי, וָואס זֶענֶען גֶעוֶוען מִיט אִים?
27
אוּן עֶר הָאט צוּ זֵיי גֶעזָאגְט: דֶער שַׁבָּת אִיז גֶעשַׁאפְן גֶעוָוארְן פַאר דֶעם מֶענְטְשְׁן, אוּן נִישְׁט דֶער מֶענְטְשׁ פַאר דֶעם שַׁבָּת.
28
דֶערִיבֶּער אִיז דֶער בֶּן־אָדָם אוֹיךְ הַאר אִיבֶּער דֶעם שַׁבָּת.