Yiddish
1
אוּן עֶס אִיז גֶעוֶוען צְוֵויי טֶעג פַאר פֵּסַח אוּן חַג־הַמַצוֹת. אוּן דִי רָאשֵׁי־כֹּהַנִים אוּן דִי סוֹפְרִים הָאבְּן גֶעזוּכְט וִוי אַזוֹי אִים צוּ כַאפְּן מִיט כִיטְרֶעקַייט, אוּן אִים טֵייטְן.
2
אָבֶּער זֵיי הָאבְּן גֶעזָאגְט: נִישְׁט אוּם יוֹם־טוֹב, כְּדֵי סֶע זָאל נִישְׁט אַרוֹיסְרוּפְן אַ מְהוּמָה צְוִוישְׁן דֶעם פָאלְק.
3
אוּן בְּשַׁעַת עֶר אִיז גֶעוֶוען אִין בֵּית־הִינִי, אוּן אִיז גֶעזֶעסְן בַּיים טִישׁ אִין דֶעם הוֹיז פוּן שִׁמְעוֹן דֶעם מְצוֹרָע, אִיז גֶעקוּמֶען אַ פְרוֹי, וָואס הָאט גֶעהַאט אַן אַלְאַבּאַסְטֶער קְרִיגְל מִיט זֵייעֶר טַייעֶרן זַאלְבְּאֵייל פוּן רֵיינֶער נַארְד; אוּן זִי הָאט צֶעבְּרָאכְן דָאס קְרִיגְל, אוּן עֶס אוֹיסְגֶעגָאסְן אוֹיף זַיין קָאפּ.
4
אוּן דָארְטְן זֶענֶען גֶעוֶוען עֶטְלֶעכֶע, וָואס הָאבְּן גֶעזָאגְט מִיט פַארְדְרָאס: הַלָמַאי דִי דָאזִיקֶע אוֹיסְבְּרֶענְגוּנְג פוּן דֶעם זַאלְבְּאֵייל?
5
מֶע הָאט דָאךְ דֶעם זַאלְבְּאֵייל גֶעקֶענְט פַארְקוֹיפְן פַאר מֶער וִוי דְרַיי הוּנְדֶערְט דִינָרִים, אוּן עֶס גֶעבְּן צוּ דִי אָרֶעמֶעלַייט; אוּן זֵיי הָאבְּן גֶעמוּרְמְלְט אוֹיף אִיר.
6
אָבֶּער יֵשׁוּעַ הָאט גֶעזָאגְט: לָאזְט זִי גֶעמַאך; פַארְוָואס זֶענְט אִיר זִי מְצַעֶר? זִי הָאט מִיט מִיר גֶעטָאן אַ חֶסֶד.
7
וָוארִים דִי אָרֶעמֶעלַייט הָאט אִיר תָּמִיד מִיט זִיךְ, אוּן וֶוען נָאר אִיר וִוילְט, קָאנְט אִיר זֵיי טָאן גוּטְס; מִיךְ אָבֶּער וֶועט אִיר תָּמִיד נִישְׁט הָאבְּן.
8
זִי הָאט גֶעטָאן וָואס זִי הָאט גֶעקָאנְט; זִי הָאט גֶעזַאלְבְּט מַיין לַייבּ פָארוֹיס צוּ קְבוּרָה.
9
אוּן בֶּאֱמֶת, אִיךְ זָאג אַייךְ, וואוּ נָאר דִי בְּשׂוּרָה־טוֹבָה וֶועט גֶעדַרְשְׁנְט וֶוערְן אִין דֶער גַאנְצֶער וֶועלְט, וֶועט אוֹיךְ דָאס, וָואס זִי הָאט גֶעטָאן, דֶערְצֵיילְט וֶוערְן אִיר צוּם אָנְדְענְק.
10
אוּן יְהוּדָה אִישׁ־קְרִיוֹת, אֵיינֶער פוּן דִי צְוֶועלְף, אִיז אַוֶועקְגֶעגַאנְגֶען צוּ דִי רָאשֵׁי־כֹּהַנִים, כְּדֵי אִים צוּ פַארְרָאטְן צוּ זֵיי.
11
אוּן אַז זֵיי הָאבְּן דָאס גֶעהֶערְט, זֶענֶען זֵיי גֶעוָוארְן מָלֵא־שִׂמְחָה, אוּן הָאבְּן אִים צוּגֶעזָאגְט צוּ גֶעבְּן גֶעלְט. אוּן עֶר הָאט גֶעזוּכְט אַ פַּאסִיקֶע גֶעלֶעגְנְהֵייט אִים צוּ פַארְרָאטְן.
12
אוּן אִין דֶעם עֶרְשְׁטְן טָאג פוּן חַג־הַמַצוֹת, בְּעֵת מֶע שֶׁעכְט דֶעם קָרְבָּן־פֶּסַח, הָאבְּן זַיינֶע תַּלְמִידִים צוּ אִים גֶעזָאגְט: וואוּ וִוילְסְטוּ, אַז מִיר זָאלְן גֵיין אוּן אָנְגְרֵייטְן, כְּדֵי דוּ זָאלְסְט קֶענֶען עֶסְן דֶעם קָרְבָּן־פֶּסַח?
13
אוּן עֶר הָאט גֶעשִׁיקְט צְוֵויי פוּן זַיינֶע תַּלְמִידִים, אוּן הָאט צוּ זֵיי גֶעזָאגְט: גֵייט אִין דֶער שְׁטָאט אַרַיין, אוּן דָארְט וֶועט אַייךְ בַּאגֶעגֶענֶען אַ מֶענְטְשׁ, וָואס טְרָאגְט אַ קְרוּג מִיט וַואסֶער; גֵייט אִים נָאךְ.
14
אוּן וואוּ עֶר וֶועט אַרַיינְגֵיין, זָאלְט אִיר זָאגְן צוּם בַּעַל־הַבָּית: דֶער רֶבִּי לָאזְט דִיר זָאגְן: וואוּ אִיז מַיין גַאסְט־צִימֶער, וואוּ אִיךְ זָאל עֶסְן דֶעם קָרְבָּן־פֶּסַח מִיט מַיינֶע תַּלְמִידִים?
15
אוּן עֶר וֶועט אַייךְ וַוייזְן אַ גְרוֹיסֶע אוֹיבֶּערְשְׁטֶע שְׁטוּבּ, אַ פַארְטִיק אָנְגֶעגְרֵייטֶע; אוּן דָארְטְן גְרֵייט צוּ פַאר אוּנְדְז.
16
אוּן דִי תַּלְמִידִים זֶענֶען גֶעגַאנְגֶען, אוּן זֶענֶען אָנְגֶעקוּמֶען אִין דֶער שְׁטָאט אַרַיין, אוּן הָאבְּן גֶעפוּנֶען אַזוֹי וִוי עֶר הָאט גֶעזָאגְט; אוּן זֵיי הָאבְּן אָנְגֶעגְרֵייט דֶעם קָרְבָּן־פֶּסַח.
17
אוּן אַז עֶס אִיז גֶעוָוארְן אָוונְט, אִיז עֶר גֶעקוּמֶען צוּגֵיין מִיט דִי צְוֶועלְף.
18
אוּן בְּעֵת זֵיי הָאבְּן זִיךְ אַנִידֶערְגֶעזֶצְט אוּן הָאבְּן גֶעגֶעסְן, הָאט יֵשׁוּעַ גֶעזָאגְט: אִיךְ זָאג אַייךְ, אֵיינֶער פוּן אַייךְ וֶועט מִיךְ פַארְרָאטְן, טַאקֶע דֶער, וָואס עֶסְט מִיט מִיר.
19
אוּן זֵיי הָאבְּן זִיךְ שְׁטַארְק מְצַעֶר גֶעוֶוען, אוּן אֵיינֶער נָאכְן אַנְדֶערְן הָאט גֶענוּמֶען צוּ אִים זָאגְן: בִּין אִיךְ דָאס?
20
אוּן עֶר הָאט צוּ זֵיי גֶעזָאגְט: אֵיינֶער פוּן דִי צְוֶועלְף, דֶער, וָואס טוּנְקְט אַיין מִיט מִיר אִין דֶער שִׁיסְל.
21
יָא, דֶער בֶּן־אָדָם גֵייט אַוֶועק, אַזוֹי וִוי סֶע שְׁטֵייט גֶעשְׁרִיבְּן וֶועגְן אִים; אָבֶּער וֵויי צוּ יֶענֶעם מֶענְטְשׁ דוּרְךְ וֶועמֶען דֶער בֶּן־אָדָם וֶוערְט פַארְרָאטְן. בֶּעסֶער וָואלְט פַאר יֶענֶעם מֶענְטְשׁ גֶעוֶוען, אוֹיבּ עֶר וָואלְט נִישְׁט גֶעבּוֹירְן גֶעוָוארְן.
22
אוּן בְּשַׁעַת זֵיי הָאבְּן גֶעגֶעסְן, הָאט עֶר גֶענוּמֶען מַצָה, אוּן הָאט אַ בְּרָכָה גֶעמַאכְט, אוּן זִי צֶעבְּרָאכְן אוּן זֵיי גֶעגֶעבְּן, אוּן גֶעזָאגְט: נֶעמְט; דָאס אִיז מַיין לַייבּ.
23
אוּן עֶר הָאט גֶענוּמֶען אַ כּוֹס, אוּן הָאט אַ בְּרָכָה גֶעמַאכְט, אוּן אִים זֵיי גֶעגֶעבְּן, אוּן זֵיי הָאבְּן אַלֶע פוּן אִים גֶעטְרוּנְקֶען.
24
אוּן עֶר הָאט צוּ זֵיי גֶעזָאגְט: דָאס אִיז מַיין בְּלוּט פוּן דֶעם נַייעֶם בּוּנְד, וָואס וֶוערְט פַארְגָאסְן פַאר אַ סַך.
25
בֶּאֱמֶת, אִיךְ זָאג אַייךְ: אִיךְ וֶועל מֶער נִישְׁט טְרִינְקֶען פוּן דֶער פְרוּכְט פוּן דֶעם וַויינְשְׁטָאק, בִּיז יֶענֶעם טָאג, וֶוען אִיךְ וֶועל אִים טְרִינְקֶען אוֹיפְסְנַיי אִין דֶעם מַלְכוּת פוּן גָאט.
26
אוּן אַז זֵיי הָאבְּן אָפְּגֶעזוּנְגֶען הַלֵל, זֶענֶען זֵיי אַרוֹיסְגֶעגַאנְגֶען צוּ דֶעם הַר־הַזֵיתִים.
27
אוּן יֵשׁוּעַ הָאט צוּ זֵיי גֶעזָאגְט: אִיר אַלֶע וֶועט גֶעשְׁטְרוֹיכְלְט וֶוערְן, וָוארִים סֶע שְׁטֵייט גֶעשְׁרִיבְּן: אִיךְ וֶועל שְׁלָאגְן דֶעם פַּסְטוּך, אוּן דִי שָׁאף וֶועלְן צֶעשְׁפְּרֵייט וֶוערְן.
28
אָבֶּער נָאךְ מַיין אוֹיפְשְׁטֵיין, וֶועל אִיךְ אַייךְ פָארוֹיסְגֵיין קֵיין גָלִיל.
29
הָאט פֶּעטְרוֹס צוּ אִים גֶעזָאגְט: אוֹיבּ אֲפִילוּ אַלֶע זָאלְן גֶעשְׁטְרוֹיכְלְט וֶוערְן, וֶועל אִיךְ דָאךְ נִישְׁט.
30
אוּן יֵשׁוּעַ הָאט צוּ אִים גֶעזָאגְט: בֶּאֱמֶת, אִיךְ זָאג דִיר, אַז הַיינְטִיקֶע נַאכְט נָאךְ, אֵיידֶער דֶער הָאן וֶועט צְוֵויי מָאל קְרֵייעֶן, וֶועסְטוּ מִיךְ דְרַיי מָאל פַארְלֵייקֶענֶען.
31
אָבֶּער עֶר הָאט גֶערֶעדְט אַ צֶעפְלַאַמְטֶער: אוֹיבּ אֲפִילוּ אִיךְ מוּז שְׁטָארְבְּן מִיט דִיר, וֶועל אִיךְ דִיךְ דָאךְ נִישְׁט פַארְלֵייקֶענֶען. אוּן אַזוֹי הָאבְּן זֵיי אַלֶע גֶעזָאגְט.
32
אוּן זֵיי זֶענֶען גֶעקוּמֶען אוֹיף אַ פְּלַאץ, וָואס הָאט גֶעהֵייסְן גַת־שְׁמָנֵי; אוּן עֶר הָאט גֶעזָאגְט צוּ זַיינֶע תַּלְמִידִים: זֶעצְט אַייךְ דָא אַנִידֶער, בְּעֵת אִיךְ בִּין מִתְפַּלֵל.
33
אוּן עֶר הָאט מִיט זִיךְ גֶענוּמֶען פֶּעטְרוֹס, אוּן יַעַקֹב, אוּן יוֹחָנָן, אוּן עֶר הָאט אָנְגֶעהוֹיבְּן זִיךְ מְצַעֶר צוּ זַיין, אוּן אִיז גֶעוֶוען שְׁטַארְק טְרוֹיעֶרִיק.
34
אוּן עֶר הָאט צוּ זֵיי גֶעזָאגְט: אוֹיף מַיין נְשָׁמָה אִיז מִיר זֵייעֶר בִּיטֶער, אַזשׁ צוּם טוֹיט; בְּלַייבְּט דָא, אוּן וַואכְט.
35
אוּן עֶר אִיז אָפְּגֶעגַאנְגֶען אַבִּיסְל וַוייטֶער, אוּן אִיז גֶעפַאלְן אוֹיף דֶער עֶרְד, אוּן הָאט מִתְפַּלֵל גֶעוֶוען, אַז אוֹיבּ מֶעגְלֶעך, זָאל דִי שָׂעָה אִים פַארְאִיבֶּערְגֵיין.
36
אוּן עֶר הָאט גֶעזָאגְט: אַבָּא, פָאטֶער, אַלְץ אִיז מֶעגְלֶעך בַּיי דִיר; נֶעם צוּ דֶעם דָאזִיקְן כּוֹס פוּן מִיר; דָאךְ נִישְׁט וִוי אִיךְ וִויל, נַייעֶרְט וִוי דוּ וִוילְסְט.
37
אוּן עֶר אִיז גֶעקוּמֶען אוּן הָאט זֵיי גֶעפוּנֶען שְׁלָאפְנְדִיק, אוּן עֶר הָאט גֶעזָאגְט צוּ פֶּעטְרוֹס: שִׁמְעוֹן, דוּ שְׁלָאפְסְט? הָאסְטוּ נִישְׁט גֶעקָאנְט וַואכְן אֵיין שָׂעָה?
38
וַואכְט אוּן זַייט מִתְפַּלֵל, כְּדֵי אִיר זָאלְט נִישְׁט קוּמֶען צוּ קֵיין נִסָיוֹן. דֶער גֵייסְט אִיז טַאקֶע וִוילִיק, אָבֶּער דָאס פְלֵיישׁ אִיז שְׁוַואךְ.
39
אוּן עֶר אִיז וִוידֶער אַוֶועקְגֶעגַאנְגֶען אוּן הָאט מִתְפַּלֵל גֶעוֶוען, אוּן הָאט אִיבֶּערְגֶעחַזְרְט דִי זֶעלְבֶּע וֶוערְטֶער.
40
אוּן עֶר אִיז וִוידֶער גֶעקוּמֶען, אוּן הָאט זֵיי גֶעפוּנֶען שְׁלָאפְנְדִיק, וָוארִים זֵייעֶרֶע אוֹיגְן זֶענֶען גֶעוֶוען שְׁוֶוער; אוּן זֵיי הָאבְּן נִישְׁט גֶעוואוּסְט וָואס אִים צוּ עֶנטְפֶערְן.
41
אוּן עֶר אִיז גֶעקוּמֶען צוּם דְרִיטְן מָאל, אוּן הָאט צוּ זֵיי גֶעזָאגְט: טוּט אִיר נָאךְ אַלְץ שְׁלָאפְן אוּן רוּעֶן? עֶס אִיז גֶענוּג; דִי שָׂעָה אִיז גֶעקוּמֶען; זֶעט, דֶער בֶּן־אָדָם וֶוערְט אִיבֶּערְגֶעעֶנְטְפֶערְט אִין דִי הֶענְט פוּן דִי זִינְדִיקֶע.
42
שְׁטֵייט אוֹיף, לָאמִיר גֵיין; אָט קוּמְט מַיין מָסוּר אָן.
43
אוּן תֵּיכֵּף, בְּשַׁעַת עֶר הָאט נָאךְ גֶערֶעדְט, אִיז אָנְגֶעקוּמֶען יְהוּדָה, אֵיינֶער פוּן דִי צְוֶועלְף, אוּן מִיט אִים אַ גְרוֹיסֶער הַמוֹן מִיט שְׁוֶוערְדְן אוּן מִיט שְׁטֶעקְנְס, פוּן דִי רָאשֵׁי־כֹּהַנִים, אוּן דִי סוֹפְרִים, אוּן דִי זְקֵנִים.
44
אוּן דֶער מָסוּר הָאט זֵיי גֶעגֶעבְּן אַ סִימָן, אוּן גֶעזָאגְט: וֶועמֶען אִיךְ וֶועל אַ קוּשׁ טָאן, דֶער אִיז עֶס; נֶעמְט אִים, אוּן פִירְט אִים אַ זִיכֶערְן אַוֶועק.
45
אוּן אַז עֶר אִיז גֶעקוּמֶען, אִיז עֶר גְלַייךְ צוּ אִים צוּגֶעגַאנְגֶען, אוּן גֶעזָאגְט: רֶבִּי! אוּן הָאט אִים גֶעקוּשְׁט.
46
אוּן זֵיי הָאבְּן אַרוֹיפְגֶעלֵייגְט זֵייעֶרֶע הֶענְט אוֹיף אִים, אוּן הָאבְּן אִים גֶענוּמֶען.
47
אָבֶּער אֵיינֶער פוּן דִי, וָואס זֶענֶען דֶערְבַּיי גֶעשְׁטַאנֶען, הָאט אַרוֹיסְגֶעצוֹיגְן זַיין שְׁוֶוערְד, אוּן הָאט גֶעשְׁלָאגְן דֶעם כֹּהֵן־גָדוֹלס קְנֶעכְט, אוּן אִים אָפְּגֶעהַאקְט אַן אוֹיעֶר.
48
אוּן יֵשׁוּעַ הָאט צוּ זֵיי גֶעזָאגְט: זֶענְט אִיר אַרוֹיסְגֶעקוּמֶען וִוי קֶעגְן אַ גַזְלָן, מִיט שְׁוֶוערְדְן אוּן שְׁטֶעקְנְס מִיךְ צוּ כַאפְּן?
49
טָאג־טֶעגְלֶעך בִּין אִיךְ גֶעוֶוען מִיט אַייךְ אִין בֵּית־הַמִקְדָשׁ אוּן הָאבּ גֶעלֶערְנְט, אוּן אִיר הָאט מִיךְ נִישְׁט גֶענוּמֶען. אָבֶּער דִי כִּתְבֵי־הַקוֹדֶשׁ מוּזְן אוֹיף אַז אַ אוֹפְן מְקוּיָם וֶוערְן.
50
אוּן זֵיי הָאבְּן אִים אַלֶע פַארְלָאזְט אוּן זֶענֶען אַנְטְרוּנֶען.
51
אוּן אֵיינֶער אַ יוּנְגֶערְמַאן אִיז אִים נָאכְגֶעגַאנְגֶען, וָואס הָאט גֶעטְרָאגְן אַ לַייוְונְט גֶעוַואנְט אִיבֶּערְן נַאקֶעטְן לַייבּ, אוּן אִים הָאבְּן זֵיי גֶעכַאפְּט;
52
אָבֶּער עֶר הָאט גֶעלָאזְן דָאס לַייוְונְט, אוּן גֶעוַואנְט אִיז אַנְטְרוּנֶען אַ נַאקֶעטֶער.
53
אוּן זֵיי הָאבְּן יֵשׁוּעַ אַוֶועקְגֶעפִירְט צוּם כֹּהֵן־גָדוֹל; אוּן סֶע הָאבְּן זִיךְ בַּיי אִים פַארְזַאמְלְט אַלֶע רָאשֵׁי־כֹּהַנִים, אוּן דִי זְקֵנִים, אוּן דִי סוֹפְרִים.
54
אוּן פֶּעטְרוֹס אִיז אִים נָאכְגֶעגַאנְגֶען פוּן דֶערְוַוייטְן, בִּיז אִינֶעוֵויינִיק אִין הוֹיף אַרַיין פוּן דֶעם כֹּהֵן־גָדוֹל; אוּן עֶר הָאט זִיךְ גֶעזֶעצְט מִיט דִי בַּאדִינֶער, אוּן הָאט זִיךְ גֶעוַוארֶעמְט בַּיים פַייעֶר.
55
אוּן דִי רָאשֵׁי־כֹּהַנִים אוּן דֶער גַאנְצֶער סַנְהֶדְרִין הָאבְּן גֶעזוּכְט עֵדוּת קֶעגְן יֵשׁוּעַ, כְּדֵי אִים צוּ טֵייטְן; אוּן הָאבְּן נִישְׁט גֶעפוּנֶען.
56
וָוארִים אַ סַך הָאבְּן קֶעגְן אִים פַאלְשׁ עֵדוּת גֶעזָאגְט, אָבֶּער זֵייעֶר עֵדוּת־זָאגְן הָאט נִישְׁט גֶעשְׁטִימְט.
57
אוּן עֶטְלֶעכֶע זֶענֶען אוֹיפְגֶעשְׁטַאנֶען, וָואס הָאבְּן אָפְּגֶעלֵייגְט פַאלְשׁ עֵדוּת קֶעגְן אִים, אוּן הָאבְּן גֶעזָאגְט:
58
מִיר הָאבְּן אִים גֶעהֶערְט זָאגְן: אִיךְ וֶועל חָרוּב מַאכְן דֶעם דָאזִיקְן הֵיכָל, וָואס אִיז גֶעמַאכְט מִיט הֶענְט, אוּן אִין דְרַיי טֶעג וֶועל אִיךְ אוֹיפְבּוֹיעֶן אַן אַנְדֶערְן, וָואס אִיז נִישְׁט גֶעמַאכְט מִיט קֵיין הֶענְט.
59
אוּן אֲפִילוּ אִין דֶעם הָאט זֵייעֶר עֵדוּת־זָאגְן נִישְׁט גָעשְׁטִימְט.
60
אוּן דֶער כֹּהֵן־גָדוֹל אִיז אוֹיפְגֶעשְׁטַאנֶען צְוִוישְׁן זֵיי, אוּן הָאט גֶעפְרֶעגְט יֵשׁוּעַ: דוּ עֶנְטְפֶערְסְט גָארְנִישְׁט? וָואס מֵיינְט דָאס, וָואס דִי דָאזִיקֶע זָאגְן עֵדוּת קֶעגְן דִיר?
61
אָבֶּער עֶר הָאט גֶעשְׁוִויגְן, אוּן הָאט גָארְנִישְׁט גֶעעֶנְטְפֶערְט. אוּן דֶער כֹּהֵן־גָדוֹל הָאט אִים וִוידֶער גֶעפְרֶעגְט: בִּיסְטוּ דֶער מָשִׁיחַ, דֶער זוּן פוּן דֶעם גֶעבֶּענְטְשְׁטְן?
62
אוּן יֵשׁוּעַ הָאט גֶעזָאגְט: אִיךְ בִּין; אוּן זֶען וֶועט אִיר דֶעם בֶּן־אָדָם זִיצְן בַּיי דֶער רֶעכְטֶער הַאנְט פוּן דֶער גְבוּרָה, אוּן קוּמֶען מִיט דִי וָואלְקְנְס פוּן הִימְל.
63
אוּן דֶער כֹּהֵן־גָדוֹל הָאט צֶערִיסְן זַיינֶע בְּגָדִים, אוּן גֶעזָאגְט: צוּ וָואס דַארְפְן מִיר נָאךְ עֵדוּת?
64
אָט הָאט אִיר גֶעהֶערְט דִי לֶעסְטֶערוּנְג; וָואס אִיז אַייעֶר דֵעָה? אוּן זֵיי הָאבְּן אִים אַלֶע פַארְמִשְׁפָּט: עֶר אִיז חַייָב־מִיתָה.
65
אוּן עֶטְלֶעכֶע הָאבְּן גֶענוּמֶען אוֹיף אִים שְׁפַּייעֶן, אוּן אִים פַארְהִילְט דָאס פָּנִים, אוּן אִים גֶעשְׁלָאגְן מִיט דִי פוֹיסְטְן, אוּן צוּ זָאגְן צוּ אִים: זָאג נְבִיאוֹת! אוּן דִי בַּאדִינֶער הָאבְּן אִים בַּאגֶעגְנְט מִיט קְלֶעפּ.
66
אוּן בְּשַׁעַת פֶּעטְרוֹס אִיז גֶעוֶוען אוּנְטְן אִין הוֹיף, אִיז צוּגֶעגַאנְגֶען אֵיינֶע פוּן דִי דִינְסְט פוּן דֶעם כֹּהֵן־גָדוֹל;
67
אוּן אַז זִי הָאט גֶעזֶען פֶּעטְרוֹס וַוארֶעמֶען זִיךְ, הָאט זִי גֶעקוּקְט אוֹיף אִים, אוּן גֶעזָאגְט: דוּ בִּיסְט אוֹיךְ גֶעוֶוען מִיט יֵשׁוּעַ הַנוֹצְרִי.
68
אָבֶּער עֶר הָאט גֶעלֵייקְנְט, אוּן גֶעזָאגְט: נִישְׁט אִיךְ וֵוייס, נִישְׁט אִיךְ פַארְשְׁטֵיי, וָואס דוּ זָאגְסְט. אוּן עֶר אִיז אַרוֹיסְגֶעגַאנְגֶען אִין דֶעם פָארְהוֹיף, אוּן דֶער הָאן הָאט גֶעקְרֵייט.
69
אוּן דִי דִינְסְט הָאט אִים גֶעזֶען, אוּן הָאט וִוידֶער אָנְגֶעהוֹיבְּן זָאגְן צוּ דִי, וָואס זֶענֶען גֶעשְׁטַאנֶען דֶערְבַּיי: עֶר אִיז אוֹיךְ אֵיינֶער פוּן זֵיי.
70
אָבֶּער עֶר הָאט עֶס וִוידֶער גֶעלֵייקְנְט. אוּן אִין אַ וַויילֶע אַרוּם הָאבְּן דִי, וָואס זֶענֶען דָארְט גֶעשְׁטַאנֶען, וִוידֶער גֶעזָאגְט צוּ פֶּעטְרוֹס: בֶּאֱמֶת, דוּ בִּיסְט אֵיינֶער פוּן זֵיי; וָוארִים דוּ בִּיסְט אַ גָלִילֶער.
71
אוּן עֶר הָאט אָנְגֶעהוֹיבְּן זִיךְ צוּ שֶׁעלְטְן אוּן צוּ שְׁוֶוערְן: אִיךְ קֶען נִישְׁט דֶעם מֶענְטְשְׁן פוּן וֶועמֶען אִיר רֶעדְט.
72
אוּן תֵּיכֵּף הָאט דֶער הָאן גֶעקְרֵייט צוּם צְוֵוייטְן מָאל. אוּן פֶּעטְרוֹס הָאט זִיךְ דֶערְמָאנְט דָאס וָוארְט, וָואס יֵשׁוּעַ הָאט צוּ אִים גֶעזָאגְט: אֵיידֶער דֶער הָאן וֶועט צְוֵויי מָאל קְרֵייעֶן, וֶועסְטוּ מִיךְ דְרַיי מָאל פַארְלֵייקֶענֶען. אוּן אַז עֶר הָאט זִיךְ דֶערִין דֶערְמָאנְט, הָאט עֶר זִיךְ צֶעוֵויינְט.